| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. சூளபுண்ணமஸுத்தவண்ணனா
10. Cūḷapuṇṇamasuttavaṇṇanā
91. ஏவங் மே ஸுதந்தி சூளபுண்ணமஸுத்தங். தத்த² துண்ஹீபூ⁴தங் துண்ஹீபூ⁴தந்தி யங் யங் தி³ஸங் அனுவிலோகேதி, தத்த² தத்த² துண்ஹீபூ⁴தமேவ. அனுவிலோகெத்வாதி பஞ்சபஸாத³படிமண்டி³தானி அக்கீ²னி உம்மீலெத்வா ததோ ததோ விலோகெத்வா அந்தமஸோ ஹத்த²குக்குச்சபாத³குக்குச்சானம்பி அபா⁴வங் தி³ஸ்வா. அஸப்புரிஸோதி பாபபுரிஸோ. நோ ஹேதங், ப⁴ந்தேதி யஸ்மா அந்தோ⁴ அந்த⁴ங் விய ஸோ தங் ஜானிதுங் ந ஸக்கோதி, தஸ்மா ஏவமாஹங்ஸு. ஏதேனேவ நயேன இதோ பரேஸுபி வாரேஸு அத்தோ² வேதி³தப்³போ³. அஸ்ஸத்³த⁴ஸமன்னாக³தோதி பாபத⁴ம்மஸமன்னாக³தோ. அஸப்புரிஸப⁴த்தீதி அஸப்புரிஸஸேவனோ. அஸப்புரிஸசிந்தீதி அஸப்புரிஸசிந்தாய சிந்தகோ. அஸப்புரிஸமந்தீதி அஸப்புரிஸமந்தனங் மந்தேதா. அஸப்புரிஸவாசோதி அஸப்புரிஸவாசங் பா⁴ஸிதா. அஸப்புரிஸகம்மந்தோதி அஸப்புரிஸகம்மானங் கத்தா. அஸப்புரிஸதி³ட்டீ²தி அஸப்புரிஸதி³ட்டி²யா ஸமன்னாக³தோ. அஸப்புரிஸதா³னந்தி அஸப்புரிஸேஹி தா³தப்³ப³ங் தா³னங். த்யாஸ்ஸ மித்தாதி தே அஸ்ஸ மித்தா. அத்தப்³யாபா³தா⁴யபி சேதேதீதி பாணங் ஹனிஸ்ஸாமி, அதி³ன்னங் ஆதி³யிஸ்ஸாமி, மிச்சா² சரிஸ்ஸாமி, த³ஸ அகுஸலகம்மபதே² ஸமாதா³ய வத்திஸ்ஸாமீதி ஏவங் அத்தனோ து³க்க²த்தா²ய சிந்தேதி. பரப்³யாபா³தா⁴யாதி யதா² அஸுகோ அஸுகங் பாணங் ஹந்தி, அஸுகஸ்ஸ ஸந்தகங் அதி³ன்னங் ஆதி³யதி, த³ஸ அகுஸலகம்மபதே² ஸமாதா³ய வத்ததி, ஏவங் நங் ஆணாபெஸ்ஸாமீதி ஏவங் பரஸ்ஸ து³க்க²த்தா²ய சிந்தேதி. உப⁴யப்³யாபா³தா⁴யாதி அஹங் அஸுகஞ்ச அஸுகஞ்ச க³ஹெத்வா த³ஸ அகுஸலகம்மபதே² ஸமாதா³ய வத்திஸ்ஸாமீதி ஏவங் உப⁴யது³க்க²த்தா²ய சிந்தேதீதி.
91.Evaṃme sutanti cūḷapuṇṇamasuttaṃ. Tattha tuṇhībhūtaṃ tuṇhībhūtanti yaṃ yaṃ disaṃ anuviloketi, tattha tattha tuṇhībhūtameva. Anuviloketvāti pañcapasādapaṭimaṇḍitāni akkhīni ummīletvā tato tato viloketvā antamaso hatthakukkuccapādakukkuccānampi abhāvaṃ disvā. Asappurisoti pāpapuriso. No hetaṃ, bhanteti yasmā andho andhaṃ viya so taṃ jānituṃ na sakkoti, tasmā evamāhaṃsu. Eteneva nayena ito paresupi vāresu attho veditabbo. Assaddhasamannāgatoti pāpadhammasamannāgato. Asappurisabhattīti asappurisasevano. Asappurisacintīti asappurisacintāya cintako. Asappurisamantīti asappurisamantanaṃ mantetā. Asappurisavācoti asappurisavācaṃ bhāsitā. Asappurisakammantoti asappurisakammānaṃ kattā. Asappurisadiṭṭhīti asappurisadiṭṭhiyā samannāgato. Asappurisadānanti asappurisehi dātabbaṃ dānaṃ. Tyāssa mittāti te assa mittā. Attabyābādhāyapi cetetīti pāṇaṃ hanissāmi, adinnaṃ ādiyissāmi, micchā carissāmi, dasa akusalakammapathe samādāya vattissāmīti evaṃ attano dukkhatthāya cinteti. Parabyābādhāyāti yathā asuko asukaṃ pāṇaṃ hanti, asukassa santakaṃ adinnaṃ ādiyati, dasa akusalakammapathe samādāya vattati, evaṃ naṃ āṇāpessāmīti evaṃ parassa dukkhatthāya cinteti. Ubhayabyābādhāyāti ahaṃ asukañca asukañca gahetvā dasa akusalakammapathe samādāya vattissāmīti evaṃ ubhayadukkhatthāya cintetīti.
அத்தப்³யாபா³தா⁴யபி மந்தேதீதிஆதீ³ஸு அஹங் த³ஸ அகுஸலகம்மபதே² ஸமாதா³ய வத்திஸ்ஸாமீதி மந்தெந்தோ அத்தப்³யாபா³தா⁴ய மந்தேதி நாம. அஸுகங் த³ஸ அகுஸலகம்மபதே² ஸமாத³பெஸ்ஸாமீதி மந்தெந்தோ பரப்³யாபா³தா⁴ய மந்தேதி நாம. அஞ்ஞேன ஸத்³தி⁴ங் – ‘‘மயங் உபோ⁴பி ஏகதோ ஹுத்வா த³ஸ அகுஸலகம்மபதே² ஸமாதா³ய வத்திஸ்ஸாமா’’தி மந்தெந்தோ உப⁴யப்³யாபா³தா⁴ய மந்தேதி நாம.
Attabyābādhāyapi mantetītiādīsu ahaṃ dasa akusalakammapathe samādāya vattissāmīti mantento attabyābādhāya manteti nāma. Asukaṃ dasa akusalakammapathe samādapessāmīti mantento parabyābādhāya manteti nāma. Aññena saddhiṃ – ‘‘mayaṃ ubhopi ekato hutvā dasa akusalakammapathe samādāya vattissāmā’’ti mantento ubhayabyābādhāya manteti nāma.
அஸக்கச்சங் தா³னங் தே³தீதி தெ³ய்யத⁴ம்மம்பி புக்³க³லம்பி ந ஸக்கரோதி. தெ³ய்யத⁴ம்மங் ந ஸக்கரோதி நாம உத்தண்டு³லாதி³தோ³ஸஸமன்னாக³தங் ஆஹாரங் தே³தி, ந பஸன்னங் கரோதி. புக்³க³லங் ந ஸக்கரோதி நாம நிஸீத³னட்டா²னங் அஸம்மஜ்ஜித்வா யத்த² வா தத்த² வா நிஸீதா³பெத்வா யங் வா தங் வா ஆதா⁴ரகங் ட²பெத்வா தா³னங் தே³தி. அஸஹத்தா²தி அத்தனோ ஹத்தே²ன, ந தே³தி, தா³ஸகம்மகாராதீ³ஹி தா³பேதி. அசித்திகத்வாதி ஹெட்டா² வுத்தனயேன தெ³ய்யத⁴ம்மேபி புக்³க³லேபி ந சித்தீகாரங் கத்வா தே³தி. அபவித்³த⁴ந்தி ச²ட்³டே³துகாமோ ஹுத்வா வம்மிகே உரக³ங் பக்கி²பந்தோ விய தே³தி. அனாக³மனதி³ட்டி²கோதி நோ ப²லபாடிகங்கீ² ஹுத்வா தே³தி.
Asakkaccaṃ dānaṃ detīti deyyadhammampi puggalampi na sakkaroti. Deyyadhammaṃ na sakkaroti nāma uttaṇḍulādidosasamannāgataṃ āhāraṃ deti, na pasannaṃ karoti. Puggalaṃ na sakkaroti nāma nisīdanaṭṭhānaṃ asammajjitvā yattha vā tattha vā nisīdāpetvā yaṃ vā taṃ vā ādhārakaṃ ṭhapetvā dānaṃ deti. Asahatthāti attano hatthena, na deti, dāsakammakārādīhi dāpeti. Acittikatvāti heṭṭhā vuttanayena deyyadhammepi puggalepi na cittīkāraṃ katvā deti. Apaviddhanti chaḍḍetukāmo hutvā vammike uragaṃ pakkhipanto viya deti. Anāgamanadiṭṭhikoti no phalapāṭikaṅkhī hutvā deti.
தத்த² உபபஜ்ஜதீதி ந தா³னங் த³த்வா நிரயே உபபஜ்ஜதி. யங் பன தேன பாபலத்³தி⁴காய மிச்சா²த³ஸ்ஸனங் க³ஹிதங், தாய மிச்சா²தி³ட்டி²யா நிரயே உபபஜ்ஜதி. ஸுக்கபக்கோ² வுத்தபடிபக்க²னயேன வேதி³தப்³போ³. தே³வமஹத்ததாதி ச²காமாவசரதே³வா. மனுஸ்ஸமஹத்ததாதி திண்ணங் குலானங் ஸம்பத்தி. ஸேஸங் ஸப்³ப³த்த² உத்தானமேவ. இத³ங் பன ஸுத்தங் ஸுத்³த⁴வட்டவஸேனேவ கதி²தந்தி.
Tatthaupapajjatīti na dānaṃ datvā niraye upapajjati. Yaṃ pana tena pāpaladdhikāya micchādassanaṃ gahitaṃ, tāya micchādiṭṭhiyā niraye upapajjati. Sukkapakkho vuttapaṭipakkhanayena veditabbo. Devamahattatāti chakāmāvacaradevā. Manussamahattatāti tiṇṇaṃ kulānaṃ sampatti. Sesaṃ sabbattha uttānameva. Idaṃ pana suttaṃ suddhavaṭṭavaseneva kathitanti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளபுண்ணமஸுத்தவண்ணனா நிட்டி²தா.
Cūḷapuṇṇamasuttavaṇṇanā niṭṭhitā.
பட²மவக்³க³வண்ணனா நிட்டி²தா.
Paṭhamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. சூளபுண்ணமஸுத்தங் • 10. Cūḷapuṇṇamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. சூளபுண்ணமஸுத்தவண்ணனா • 10. Cūḷapuṇṇamasuttavaṇṇanā
