| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. ஸுஞ்ஞதவக்³கோ³
3. Suññatavaggo
1. சூளஸுஞ்ஞதஸுத்தவண்ணனா
1. Cūḷasuññatasuttavaṇṇanā
176. ஏவங் மே ஸுதந்தி சூளஸுஞ்ஞதஸுத்தங். தத்த² ஏகமித³ந்தி தே²ரோ கிர ப⁴க³வதோ வத்தங் கத்வா அத்தனோ தி³வாட்டா²னங் க³ந்த்வா காலபரிச்சே²த³ங் கத்வா நிப்³பா³னாரம்மணங் ஸுஞ்ஞதாப²லஸமாபத்திங் அப்பெத்வா நிஸின்னோ யதா²பரிச்சே²தே³ன வுட்டா²ஸி. அத²ஸ்ஸ ஸங்கா²ரா ஸுஞ்ஞதோ உபட்ட²ஹிங்ஸு. ஸோ ஸுஞ்ஞதாகத²ங் ஸோதுகாமோ ஜாதோ. அத²ஸ்ஸ ஏதத³ஹோஸி – ‘‘ந கோ² பன ஸக்கா து⁴ரேன து⁴ரங் பஹரந்தேன விய க³ந்த்வா ‘ஸுஞ்ஞதாகத²ங் மே, ப⁴ந்தே, கதே²தா²’தி ப⁴க³வந்தங் வத்துங், ஹந்தா³ஹங் யங் மே ப⁴க³வா நக³ரகங் உபனிஸ்ஸாய விஹரந்தோ ஏகங் கத²ங் கதே²ஸி, தங் ஸாரேமி, ஏவங் மே ப⁴க³வா ஸுஞ்ஞதாகத²ங் கதெ²ஸ்ஸதீ’’தி த³ஸப³லங் ஸாரெந்தோ ஏகமித³ந்திஆதி³மாஹ.
176.Evaṃme sutanti cūḷasuññatasuttaṃ. Tattha ekamidanti thero kira bhagavato vattaṃ katvā attano divāṭṭhānaṃ gantvā kālaparicchedaṃ katvā nibbānārammaṇaṃ suññatāphalasamāpattiṃ appetvā nisinno yathāparicchedena vuṭṭhāsi. Athassa saṅkhārā suññato upaṭṭhahiṃsu. So suññatākathaṃ sotukāmo jāto. Athassa etadahosi – ‘‘na kho pana sakkā dhurena dhuraṃ paharantena viya gantvā ‘suññatākathaṃ me, bhante, kathethā’ti bhagavantaṃ vattuṃ, handāhaṃ yaṃ me bhagavā nagarakaṃ upanissāya viharanto ekaṃ kathaṃ kathesi, taṃ sāremi, evaṃ me bhagavā suññatākathaṃ kathessatī’’ti dasabalaṃ sārento ekamidantiādimāha.
தத்த² இத³ந்தி நிபாதமத்தமேவ. கச்சிமேதங், ப⁴ந்தேதி தே²ரோ ஏகபதே³ ட²த்வா ஸட்டி²பத³ஸஹஸ்ஸானி உக்³க³ஹெத்வா தா⁴ரேதுங் ஸமத்தோ², கிங் ஸோ ‘‘ஸுஞ்ஞதாவிஹாரேனா’’தி ஏகங் பத³ங் தா⁴ரேதுங் ந ஸக்கி²ஸ்ஸதி, ஸோதுகாமேன பன ஜானந்தேன விய புச்சி²துங் ந வட்டதி, பாகடங் கத்வா வித்தா²ரியமானங் ஸுஞ்ஞதாகத²ங் ஸோதுகாமோ அஜானந்தோ விய ஏவமாஹ. ஏகோ அஜானந்தோபி ஜானந்தோ விய ஹோதி, தே²ரோ ஏவரூபங் கோஹஞ்ஞங் கிங் கரிஸ்ஸதி, அத்தனோ ஜானநட்டா²னேபி ப⁴க³வதோ அபசிதிங் த³ஸ்ஸெத்வா ‘‘கச்சிமேத’’ந்திஆதி³மாஹ.
Tattha idanti nipātamattameva. Kaccimetaṃ, bhanteti thero ekapade ṭhatvā saṭṭhipadasahassāni uggahetvā dhāretuṃ samattho, kiṃ so ‘‘suññatāvihārenā’’ti ekaṃ padaṃ dhāretuṃ na sakkhissati, sotukāmena pana jānantena viya pucchituṃ na vaṭṭati, pākaṭaṃ katvā vitthāriyamānaṃ suññatākathaṃ sotukāmo ajānanto viya evamāha. Eko ajānantopi jānanto viya hoti, thero evarūpaṃ kohaññaṃ kiṃ karissati, attano jānanaṭṭhānepi bhagavato apacitiṃ dassetvā ‘‘kaccimeta’’ntiādimāha.
புப்³பே³பீதி பட²மபோ³தி⁴யங் நக³ரகங் உபனிஸ்ஸாய விஹரணகாலேபி. ஏதரஹிபீதி இதா³னிபி. ஏவங் பன வத்வா சிந்தேஸி – ‘‘ஆனந்தோ³ ஸுஞ்ஞதாகத²ங் ஸோதுகாமோ, ஏகோ பன ஸோதுங் ஸக்கோதி, ந உக்³க³ஹேதுங், ஏகோ ஸோதும்பி உக்³க³ஹேதும்பி ஸக்கோதி, ந கதே²துங், ஆனந்தோ³ பன ஸோதும்பி ஸக்கோதி உக்³க³ஹேதும்பி கதே²தும்பி, (கதே²மிஸ்ஸ) ஸுஞ்ஞதாகத²’’ந்தி. இதி தங் கதெ²ந்தோ ஸெய்யதா²பீதிஆதி³மாஹ. தத்த² ஸுஞ்ஞோ ஹத்தி²க³வாஸ்ஸவளவேனாதி தத்த² கட்ட²ரூபபொத்த²கரூபசித்தரூபவஸேன கதா ஹத்தி²ஆத³யோ அத்தி², வெஸ்ஸவணமந்தா⁴தாதீ³னங் டி²தட்டா²னே சித்தகம்மவஸேன கதம்பி, ரதனபரிக்க²தானங் வாதபானத்³வாரப³ந்த⁴மஞ்சபீடா²தீ³னங் வஸேன ஸண்டி²தம்பி, ஜிண்ணபடிஸங்க²ரணத்த²ங் ட²பிதம்பி ஜாதரூபரஜதங் அத்தி², கட்ட²ரூபாதி³வஸேன கதா த⁴ம்மஸவனபஞ்ஹபுச்ச²னாதி³வஸேன ஆக³ச்ச²ந்தா ச இத்தி²புரிஸாபி அத்தி², தஸ்மா ந ஸோ தேஹி ஸுஞ்ஞோ. இந்த்³ரியப³த்³தா⁴னங் ஸவிஞ்ஞாணகானங் ஹத்தி²ஆதீ³னங், இச்சி²திச்சி²தக்க²ணே பரிபு⁴ஞ்ஜிதப்³ப³ஸ்ஸ ஜாதரூபரஜதஸ்ஸ, நிப³த்³த⁴வாஸங் வஸந்தானங் இத்தி²புரிஸானஞ்ச அபா⁴வங் ஸந்தா⁴யேதங் வுத்தங்.
Pubbepīti paṭhamabodhiyaṃ nagarakaṃ upanissāya viharaṇakālepi. Etarahipīti idānipi. Evaṃ pana vatvā cintesi – ‘‘ānando suññatākathaṃ sotukāmo, eko pana sotuṃ sakkoti, na uggahetuṃ, eko sotumpi uggahetumpi sakkoti, na kathetuṃ, ānando pana sotumpi sakkoti uggahetumpi kathetumpi, (kathemissa) suññatākatha’’nti. Iti taṃ kathento seyyathāpītiādimāha. Tattha suñño hatthigavāssavaḷavenāti tattha kaṭṭharūpapotthakarūpacittarūpavasena katā hatthiādayo atthi, vessavaṇamandhātādīnaṃ ṭhitaṭṭhāne cittakammavasena katampi, ratanaparikkhatānaṃ vātapānadvārabandhamañcapīṭhādīnaṃ vasena saṇṭhitampi, jiṇṇapaṭisaṅkharaṇatthaṃ ṭhapitampi jātarūparajataṃ atthi, kaṭṭharūpādivasena katā dhammasavanapañhapucchanādivasena āgacchantā ca itthipurisāpi atthi, tasmā na so tehi suñño. Indriyabaddhānaṃ saviññāṇakānaṃ hatthiādīnaṃ, icchiticchitakkhaṇe paribhuñjitabbassa jātarūparajatassa, nibaddhavāsaṃ vasantānaṃ itthipurisānañca abhāvaṃ sandhāyetaṃ vuttaṃ.
பி⁴க்கு²ஸங்க⁴ங் படிச்சாதி பி⁴க்கூ²ஸு ஹி பிண்டா³ய பவிட்டே²ஸுபி விஹாரப⁴த்தங் ஸாதி³யந்தேஹி பி⁴க்கூ²ஹி சேவ கி³லானகி³லானுபட்டா²கஉத்³தே³ஸசீவரகம்மபஸுதாதீ³ஹி ச பி⁴க்கூ²ஹி ஸோ அஸுஞ்ஞோவ ஹோதி, இதி நிச்சம்பி பி⁴க்கூ²னங் அத்தி²தாய ஏவமாஹ. ஏகத்தந்தி ஏகபா⁴வங், ஏகங் அஸுஞ்ஞதங் அத்தீ²தி அத்தோ². ஏகோ அஸுஞ்ஞபா⁴வோ அத்தீ²தி வுத்தங் ஹோதி. அமனஸிகரித்வாதி சித்தே அகத்வா அனாவஜ்ஜித்வா அபச்சவெக்கி²த்வா. கா³மஸஞ்ஞந்தி கா³மோதி பவத்தவஸேன வா கிலேஸவஸேன வா உப்பன்னங் கா³மஸஞ்ஞங். மனுஸ்ஸஸஞ்ஞாயபி ஏஸேவ நயோ. அரஞ்ஞஸஞ்ஞங் படிச்ச மனஸி கரோதி ஏகத்தந்தி இத³ங் அரஞ்ஞங், அயங் ருக்கோ², அயங் பப்³ப³தோ, அயங் நீலோபா⁴ஸோ வனஸண்டோ³தி ஏவங் ஏகங் அரஞ்ஞங்யேவ படிச்ச அரஞ்ஞஸஞ்ஞங் மனஸி கரோதி. பக்க²ந்த³தீதி ஓதரதி. அதி⁴முச்சதீதி ஏவந்தி அதி⁴முச்சதி. யே அஸ்ஸு த³ரதா²தி யே ச பவத்தத³ரதா² வா கிலேஸத³ரதா² வா கா³மஸஞ்ஞங் படிச்ச ப⁴வெய்யுங், தே இத⁴ அரஞ்ஞஸஞ்ஞாய ந ஸந்தி. து³தியபதே³பி ஏஸேவ நயோ. அத்தி² சேவாயந்தி அயங் பன ஏகங் அரஞ்ஞஸஞ்ஞங் படிச்ச உப்பஜ்ஜமானா பவத்தத³ரத²மத்தா அத்தி².
Bhikkhusaṅghaṃ paṭiccāti bhikkhūsu hi piṇḍāya paviṭṭhesupi vihārabhattaṃ sādiyantehi bhikkhūhi ceva gilānagilānupaṭṭhākauddesacīvarakammapasutādīhi ca bhikkhūhi so asuññova hoti, iti niccampi bhikkhūnaṃ atthitāya evamāha. Ekattanti ekabhāvaṃ, ekaṃ asuññataṃ atthīti attho. Eko asuññabhāvo atthīti vuttaṃ hoti. Amanasikaritvāti citte akatvā anāvajjitvā apaccavekkhitvā. Gāmasaññanti gāmoti pavattavasena vā kilesavasena vā uppannaṃ gāmasaññaṃ. Manussasaññāyapi eseva nayo. Araññasaññaṃ paṭicca manasi karoti ekattanti idaṃ araññaṃ, ayaṃ rukkho, ayaṃ pabbato, ayaṃ nīlobhāso vanasaṇḍoti evaṃ ekaṃ araññaṃyeva paṭicca araññasaññaṃ manasi karoti. Pakkhandatīti otarati. Adhimuccatīti evanti adhimuccati. Ye assu darathāti ye ca pavattadarathā vā kilesadarathā vā gāmasaññaṃ paṭicca bhaveyyuṃ, te idha araññasaññāya na santi. Dutiyapadepi eseva nayo. Atthi cevāyanti ayaṃ pana ekaṃ araññasaññaṃ paṭicca uppajjamānā pavattadarathamattā atthi.
யஞ்ஹி கோ² தத்த² ந ஹோதீதி யங் மிகா³ரமாதுபாஸாதே³ ஹத்தி²ஆத³யோ விய இமிஸ்ஸா அரஞ்ஞஸஞ்ஞாய கா³மஸஞ்ஞாமனுஸ்ஸஸஞ்ஞாவஸேன உப்பஜ்ஜமானங் பவத்தத³ரத²கிலேஸத³ரத²ஜாதங், தங் ந ஹோதி. யங் பன தத்த² அவஸிட்ட²ந்தி யங் மிகா³ரமாதுபாஸாதே³ பி⁴க்கு²ஸங்கோ⁴ விய தத்த² அரஞ்ஞஸஞ்ஞாய பவத்தத³ரத²மத்தங் அவஸிட்ட²ங் ஹோதி. தங் ஸந்தமித³ங் அத்தீ²தி பஜானாதீதி தங் விஜ்ஜமானமேவ ‘‘அத்தி² இத³’’ந்தி பஜானாதி, ஸுஞ்ஞதாவக்கந்தீதி ஸுஞ்ஞதானிப்³ப³த்தி.
Yañhikho tattha na hotīti yaṃ migāramātupāsāde hatthiādayo viya imissā araññasaññāya gāmasaññāmanussasaññāvasena uppajjamānaṃ pavattadarathakilesadarathajātaṃ, taṃ na hoti. Yaṃ pana tattha avasiṭṭhanti yaṃ migāramātupāsāde bhikkhusaṅgho viya tattha araññasaññāya pavattadarathamattaṃ avasiṭṭhaṃ hoti. Taṃ santamidaṃ atthīti pajānātīti taṃ vijjamānameva ‘‘atthi ida’’nti pajānāti, suññatāvakkantīti suññatānibbatti.
177. அமனஸிகரித்வா மனுஸ்ஸஸஞ்ஞந்தி இத⁴ கா³மஸஞ்ஞங் ந க³ண்ஹாதி. கஸ்மா? ஏவங் கிரஸ்ஸ அஹோஸி – ‘‘மனுஸ்ஸஸஞ்ஞாய கா³மஸஞ்ஞங் நிவத்தெத்வா, அரஞ்ஞஸஞ்ஞாய மனுஸ்ஸஸஞ்ஞங், பத²வீஸஞ்ஞாய அரஞ்ஞஸஞ்ஞங், ஆகாஸானஞ்சாயதனஸஞ்ஞாய பத²வீஸஞ்ஞங்…பே॰… நேவஸஞ்ஞானாஸஞ்ஞாயதனஸஞ்ஞாய ஆகிஞ்சஞ்ஞாயதனஸஞ்ஞங் , விபஸ்ஸனாய நேவஸஞ்ஞானாஸஞ்ஞாயதனஸஞ்ஞங், மக்³கே³ன விபஸ்ஸனங் நிவத்தெத்வா அனுபுப்³பே³ன அச்சந்தஸுஞ்ஞதங் நாம த³ஸ்ஸெஸ்ஸாமீ’’தி. தஸ்மா ஏவங் தே³ஸனங் ஆரபி⁴. தத்த² பத²வீஸஞ்ஞந்தி கஸ்மா அரஞ்ஞஸஞ்ஞங் பஹாய பத²வீஸஞ்ஞங் மனஸி கரோதி? அரஞ்ஞஸஞ்ஞாய விஸேஸானதி⁴க³மனதோ. யதா² ஹி புரிஸஸ்ஸ ரமணீயங் கெ²த்தட்டா²னங் தி³ஸ்வா – ‘‘இத⁴ வுத்தா ஸாலிஆத³யோ ஸுட்டு² ஸம்பஜ்ஜிஸ்ஸந்தி, மஹாலாப⁴ங் லபி⁴ஸ்ஸாமீ’’தி ஸத்தக்க²த்தும்பி கெ²த்தட்டா²னங் ஓலோகெந்தஸ்ஸ ஸாலிஆத³யோ ந ஸம்பஜ்ஜந்தேவ, ஸசே பன தங் டா²னங் விஹதகா²ணுககண்டகங் கத்வா கஸித்வா வபதி, ஏவங் ஸந்தே ஸம்பஜ்ஜந்தி, ஏவமேவ – ‘‘இத³ங் அரஞ்ஞங், அயங் ருக்கோ², அயங் பப்³ப³தோ, அயங் நீலோபா⁴ஸோ வனஸண்டோ³’’தி ஸசேபி ஸத்தக்க²த்துங் அரஞ்ஞஸஞ்ஞங் மனஸி கரோதி, நேவூபசாரங் ந ஸமாதி⁴ங் பாபுணாதி, பத²வீஸஞ்ஞாய பனஸ்ஸ து⁴வஸேவனங் கம்மட்டா²னங் பத²வீகஸிணங் பரிகம்மங் கத்வா ஜா²னானி நிப்³ப³த்தெத்வா ஜா²னபத³ட்டா²னம்பி விபஸ்ஸனங் வட்³டெ⁴த்வா ஸக்கா அரஹத்தங் பாபுணிதுங். தஸ்மா அரஞ்ஞஸஞ்ஞங் பஹாய பத²வீஸஞ்ஞங் மனஸி கரோதி. படிச்சாதி படிச்ச ஸம்பூ⁴தங்.
177.Amanasikaritvāmanussasaññanti idha gāmasaññaṃ na gaṇhāti. Kasmā? Evaṃ kirassa ahosi – ‘‘manussasaññāya gāmasaññaṃ nivattetvā, araññasaññāya manussasaññaṃ, pathavīsaññāya araññasaññaṃ, ākāsānañcāyatanasaññāya pathavīsaññaṃ…pe… nevasaññānāsaññāyatanasaññāya ākiñcaññāyatanasaññaṃ , vipassanāya nevasaññānāsaññāyatanasaññaṃ, maggena vipassanaṃ nivattetvā anupubbena accantasuññataṃ nāma dassessāmī’’ti. Tasmā evaṃ desanaṃ ārabhi. Tattha pathavīsaññanti kasmā araññasaññaṃ pahāya pathavīsaññaṃ manasi karoti? Araññasaññāya visesānadhigamanato. Yathā hi purisassa ramaṇīyaṃ khettaṭṭhānaṃ disvā – ‘‘idha vuttā sāliādayo suṭṭhu sampajjissanti, mahālābhaṃ labhissāmī’’ti sattakkhattumpi khettaṭṭhānaṃ olokentassa sāliādayo na sampajjanteva, sace pana taṃ ṭhānaṃ vihatakhāṇukakaṇṭakaṃ katvā kasitvā vapati, evaṃ sante sampajjanti, evameva – ‘‘idaṃ araññaṃ, ayaṃ rukkho, ayaṃ pabbato, ayaṃ nīlobhāso vanasaṇḍo’’ti sacepi sattakkhattuṃ araññasaññaṃ manasi karoti, nevūpacāraṃ na samādhiṃ pāpuṇāti, pathavīsaññāya panassa dhuvasevanaṃ kammaṭṭhānaṃ pathavīkasiṇaṃ parikammaṃ katvā jhānāni nibbattetvā jhānapadaṭṭhānampi vipassanaṃ vaḍḍhetvā sakkā arahattaṃ pāpuṇituṃ. Tasmā araññasaññaṃ pahāya pathavīsaññaṃ manasi karoti. Paṭiccāti paṭicca sambhūtaṃ.
இதா³னி யஸ்மிங் பத²வீகஸிணே ஸோ பத²வீஸஞ்ஞீ ஹோதி, தஸ்ஸ ஓபம்மத³ஸ்ஸனத்த²ங் ஸெய்யதா²பீதிஆதி³மாஹ. தத்த² உஸப⁴ஸ்ஸ ஏதந்தி ஆஸப⁴ங். அஞ்ஞேஸங் பன கு³ன்னங் க³ண்டா³பி ஹொந்தி பஹாராபி. தேஸஞ்ஹி சம்மங் பஸாரியமானங் நிப்³ப³லிகங் ந ஹோதி, உஸப⁴ஸ்ஸ லக்க²ணஸம்பன்னதாய தே தோ³ஸா நத்தி². தஸ்மா தஸ்ஸ சம்மங் க³ஹிதங். ஸங்குஸதேனாதி கி²லஸதேன. ஸுவிஹதந்தி பஸாரெத்வா ஸுட்டு² விஹதங். ஊனகஸதஸங்குவிஹதஞ்ஹி நிப்³ப³லிகங் ந ஹோதி, ஸங்குஸதேன விஹதங் பே⁴ரிதலங் விய நிப்³ப³லிகங் ஹோதி. தஸ்மா ஏவமாஹ. உக்கூலவிக்கூலந்தி உச்சனீசங் த²லட்டா²னங் நின்னட்டா²னங். நதீ³விது³க்³க³ந்தி நதி³யோ சேவ து³க்³க³மட்டா²னஞ்ச. பத²வீஸஞ்ஞங் படிச்ச மனஸி கரோதி ஏகத்தந்தி கஸிணபத²வியங்யேவ படிச்ச ஸம்பூ⁴தங் ஏகங் ஸஞ்ஞங் மனஸி கரோதி. த³ரத²மத்தாதி இதோ பட்டா²ய ஸப்³ப³வாரேஸு பவத்தத³ரத²வஸேன த³ரத²மத்தா வேதி³தப்³பா³.
Idāni yasmiṃ pathavīkasiṇe so pathavīsaññī hoti, tassa opammadassanatthaṃ seyyathāpītiādimāha. Tattha usabhassa etanti āsabhaṃ. Aññesaṃ pana gunnaṃ gaṇḍāpi honti pahārāpi. Tesañhi cammaṃ pasāriyamānaṃ nibbalikaṃ na hoti, usabhassa lakkhaṇasampannatāya te dosā natthi. Tasmā tassa cammaṃ gahitaṃ. Saṅkusatenāti khilasatena. Suvihatanti pasāretvā suṭṭhu vihataṃ. Ūnakasatasaṅkuvihatañhi nibbalikaṃ na hoti, saṅkusatena vihataṃ bheritalaṃ viya nibbalikaṃ hoti. Tasmā evamāha. Ukkūlavikkūlanti uccanīcaṃ thalaṭṭhānaṃ ninnaṭṭhānaṃ. Nadīvidugganti nadiyo ceva duggamaṭṭhānañca. Pathavīsaññaṃ paṭicca manasi karoti ekattanti kasiṇapathaviyaṃyeva paṭicca sambhūtaṃ ekaṃ saññaṃ manasi karoti. Darathamattāti ito paṭṭhāya sabbavāresu pavattadarathavasena darathamattā veditabbā.
182. அனிமித்தங் சேதோஸமாதி⁴ந்தி விபஸ்ஸனாசித்தஸமாதி⁴ங். ஸோ ஹி நிச்சனிமித்தாதி³விரஹிதோ அனிமித்தோதி வுச்சதி. இமமேவ காயந்தி விபஸ்ஸனாய வத்து²ங் த³ஸ்ஸேதி. தத்த² இமமேவாதி இமங் ஏவ சதுமஹாபூ⁴திகங். ஸளாயதனிகந்தி ஸளாயதனபடிஸங்யுத்தங். ஜீவிதபச்சயாதி யாவ ஜீவிதிந்த்³ரியானங் பவத்தி, தாவ ஜீவிதபச்சயா பவத்தத³ரத²மத்தா அத்தீ²தி வுத்தங் ஹோதி.
182.Animittaṃ cetosamādhinti vipassanācittasamādhiṃ. So hi niccanimittādivirahito animittoti vuccati. Imameva kāyanti vipassanāya vatthuṃ dasseti. Tattha imamevāti imaṃ eva catumahābhūtikaṃ. Saḷāyatanikanti saḷāyatanapaṭisaṃyuttaṃ. Jīvitapaccayāti yāva jīvitindriyānaṃ pavatti, tāva jīvitapaccayā pavattadarathamattā atthīti vuttaṃ hoti.
183. புன அனிமித்தந்தி விபஸ்ஸனாய படிவிபஸ்ஸனங் த³ஸ்ஸேதுங் வுத்தங். காமாஸவங் படிச்சாதி காமாஸவங் படிச்ச உப்பஜ்ஜனபவத்தத³ரதா² இத⁴ ந ஸந்தி, அரியமக்³கே³ சேவ அரியப²லே ச நத்தீ²தி வுத்தங் ஹோதி. இமமேவ காயந்தி இமங் உபாதி³ஸேஸத³ரத²த³ஸ்ஸனத்த²ங் வுத்தங். இதி மனுஸ்ஸஸஞ்ஞாய கா³மஸஞ்ஞங் நிவத்தெத்வா…பே॰… மக்³கே³ன விபஸ்ஸனங் நிவத்தெத்வா அனுபுப்³பே³ன அச்சந்தஸுஞ்ஞதா நாம த³ஸ்ஸிதா ஹோதி.
183. Puna animittanti vipassanāya paṭivipassanaṃ dassetuṃ vuttaṃ. Kāmāsavaṃ paṭiccāti kāmāsavaṃ paṭicca uppajjanapavattadarathā idha na santi, ariyamagge ceva ariyaphale ca natthīti vuttaṃ hoti. Imameva kāyanti imaṃ upādisesadarathadassanatthaṃ vuttaṃ. Iti manussasaññāya gāmasaññaṃ nivattetvā…pe… maggena vipassanaṃ nivattetvā anupubbena accantasuññatā nāma dassitā hoti.
184. பரிஸுத்³த⁴ந்தி நிருபக்கிலேஸங். அனுத்தரந்தி உத்தரவிரஹிதங் ஸப்³ப³ஸெட்ட²ங். ஸுஞ்ஞதந்தி ஸுஞ்ஞதப²லஸமாபத்திங். தஸ்மாதி யஸ்மா அதீதேபி, பு³த்³த⁴பச்சேகபு³த்³த⁴பு³த்³த⁴ஸாவகஸங்கா²தா ஸமணப்³ராஹ்மணா. அனாக³தேபி, ஏதரஹிபி பு³த்³த⁴பு³த்³த⁴ஸாவகஸங்கா²தா ஸமணப்³ராஹ்மணா இமங்யேவ பரிஸுத்³த⁴ங் பரமங் அனுத்தரங் ஸுஞ்ஞதங் உபஸம்பஜ்ஜ விஹரிங்ஸு விஹரிஸ்ஸந்தி விஹரந்தி ச, தஸ்மா. ஸேஸங் ஸப்³ப³த்த² உத்தானமேவாதி.
184.Parisuddhanti nirupakkilesaṃ. Anuttaranti uttaravirahitaṃ sabbaseṭṭhaṃ. Suññatanti suññataphalasamāpattiṃ. Tasmāti yasmā atītepi, buddhapaccekabuddhabuddhasāvakasaṅkhātā samaṇabrāhmaṇā. Anāgatepi, etarahipi buddhabuddhasāvakasaṅkhātā samaṇabrāhmaṇā imaṃyeva parisuddhaṃ paramaṃ anuttaraṃ suññataṃ upasampajja vihariṃsu viharissanti viharanti ca, tasmā. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளஸுஞ்ஞதஸுத்தவண்ணனா நிட்டி²தா.
Cūḷasuññatasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. சூளஸுஞ்ஞதஸுத்தங் • 1. Cūḷasuññatasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. சூளஸுஞ்ஞதஸுத்தவண்ணனா • 1. Cūḷasuññatasuttavaṇṇanā
