| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. சுந்த³ஸுத்தவண்ணனா
3. Cundasuttavaṇṇanā
379. புப்³பே³ ஸாவத்தி²தோ வேளுவகா³மஸ்ஸ க³தத்தா வுத்தங் ‘‘ஆக³தமக்³கே³னேவ படினிவத்தந்தோ’’தி. ஸத்தன்னந்தி உபஸேனோ, ரேவதோ, க²தி³ரவனியோ, சுந்தோ³, ஸமணுத்³தே³ஸோ அஹந்தி சதுன்னங், சாலா, உபசாலா, ஸீஸூபசாலாதி, திஸ்ஸன்னந்தி இமேஸங் ஸத்தன்னங் அரஹந்தானங். நத்தி² நு கோ²தி எத்தா²பி ‘‘ஓலோகெந்தோ’’தி ஆனெத்வா ஸம்ப³ந்தோ⁴ ஸீஹாவலோகனஞாயேன. ப⁴விஸ்ஸந்தி மே வத்தாரோ ஹரிதுங் நாஸக்கீ²தி ஸம்ப³ந்தோ⁴. இத³ங் தா³னி பச்சி²மத³ஸ்ஸனந்தி பூ⁴தகத²னமத்தங், ந தத்த² ஸாலயதாத³ஸ்ஸனங் யதா² ததா²க³தஸ்ஸ வேஸாலியா நிக்க²மித்வா நாகா³பலோகிதங்.
379. Pubbe sāvatthito veḷuvagāmassa gatattā vuttaṃ ‘‘āgatamaggeneva paṭinivattanto’’ti. Sattannanti upaseno, revato, khadiravaniyo, cundo, samaṇuddeso ahanti catunnaṃ, cālā, upacālā, sīsūpacālāti, tissannanti imesaṃ sattannaṃ arahantānaṃ. Natthi nu khoti etthāpi ‘‘olokento’’ti ānetvā sambandho sīhāvalokanañāyena. Bhavissanti me vattāro harituṃ nāsakkhīti sambandho. Idaṃ dāni pacchimadassananti bhūtakathanamattaṃ, na tattha sālayatādassanaṃ yathā tathāgatassa vesāliyā nikkhamitvā nāgāpalokitaṃ.
தஸ்ஸ தஸ்ஸ விஸேஸஸ்ஸ அதி⁴ட்டா²னவஸேனேவ இத்³தி⁴பே⁴த³த³ஸ்ஸனங் இத்³தி⁴விகுப்³ப³னங். ஸீஹஸ்ஸ விஜம்ப⁴னாதி³வஸேன கீளித்வா நாத³ஸதி³ஸீ அயங் த⁴ம்மகதா²தி வுத்தங் ‘‘ஸீஹவிகீளிதோ த⁴ம்மபரியாயோ’’தி. க³மனகாலோ மய்ஹந்தீதி எத்த² இதி-ஸத்³தோ³ பரிஸமாபனே. தேன தே²ரேன யதா²ரம்ப⁴ஸ்ஸ வசனபப³ந்த⁴ஸ்ஸ ஸமாபிதபா⁴வங் ஜோதேதி. ஏஸ நயோ ஸேஸேஸுபி ஏதி³ஸேஸு ஸப்³ப³ட்டா²னேஸு. யுக³ந்த⁴ராத³யோ பரிப⁴ண்ட³பப்³ப³தாதி வேதி³தப்³பா³. ஏகப்பஹாரேனேவாதி ஏகப்பஹாரேன இவ. ஸ்வாயங் இவ-ஸத்³தோ³ ந ஸக்கோமீதி எத்த² ஆனெத்வா ஸம்ப³ந்தி⁴தப்³போ³.
Tassa tassa visesassa adhiṭṭhānavaseneva iddhibhedadassanaṃ iddhivikubbanaṃ. Sīhassa vijambhanādivasena kīḷitvā nādasadisī ayaṃ dhammakathāti vuttaṃ ‘‘sīhavikīḷito dhammapariyāyo’’ti. Gamanakālo mayhantīti ettha iti-saddo parisamāpane. Tena therena yathārambhassa vacanapabandhassa samāpitabhāvaṃ joteti. Esa nayo sesesupi edisesu sabbaṭṭhānesu. Yugandharādayo paribhaṇḍapabbatāti veditabbā. Ekappahārenevāti ekappahārena iva. Svāyaṃ iva-saddo na sakkomīti ettha ānetvā sambandhitabbo.
படிபாதெ³ஸ்ஸாமீதி டி²தகாயங் படிபாதெ³ஸ்ஸாமி. பத்த²னாகாலே அனோமத³ஸ்ஸிஸ்ஸ ப⁴க³வதோ வசனஸுதானுஸாரேன ஞாணேன தி³ட்ட²மத்ததங் ஸந்தா⁴ய ‘‘தங் பட²மத³ஸ்ஸன’’ந்தி வுத்தங். தா⁴ரேதுங் அஸக்கொந்தீ கு³ணஸாரங். ஏஸ மக்³கோ³தி ஏஸோ ஜாதானங் ஸத்தானங் மரணனிட்டி²தோ பந்தோ². புனபி ஏவங்பா⁴வினோ நாம ஸங்கா²ராதி ஸங்கா²ரா நாம ஏவங்பா⁴வினோ, மரணபரியோஸானாதி அத்தோ². எத்தகந்தி எத்தகங் காலங். ஸங்கட்³டி⁴த்வா ஸங்ஹரித்வா. முக²ங் பிதா⁴யாதி முக²ங் சா²தெ³த்வா. அக்³கி⁴கஸதானீதி மகுளங்குரசேதியஸதானி.
Paṭipādessāmīti ṭhitakāyaṃ paṭipādessāmi. Patthanākāle anomadassissa bhagavato vacanasutānusārena ñāṇena diṭṭhamattataṃ sandhāya ‘‘taṃ paṭhamadassana’’nti vuttaṃ. Dhāretuṃ asakkontī guṇasāraṃ. Esa maggoti eso jātānaṃ sattānaṃ maraṇaniṭṭhito pantho. Punapi evaṃbhāvino nāma saṅkhārāti saṅkhārā nāma evaṃbhāvino, maraṇapariyosānāti attho. Ettakanti ettakaṃ kālaṃ. Saṅkaḍḍhitvā saṃharitvā. Mukhaṃ pidhāyāti mukhaṃ chādetvā. Agghikasatānīti makuḷaṅkuracetiyasatāni.
புரிமதி³வஸேதி அதீததி³வஸே. யஸ்மா த⁴ம்மஸேனாபதினோ அரஹத்தப்பத்ததி³வஸேயேவ ஸத்து² ஸாவகஸன்னிபாதோ அஹோஸி, தஸ்மா ‘‘பூரிதஸாவகஸன்னிபாதோ ஏஸ பி⁴க்கூ²’’தி வுத்தங். பஞ்ச ஜாதிஸதானீதி பு⁴ம்மத்தே², அச்சந்தஸங்யோகே³ வா உபயோக³வசனங்.
Purimadivaseti atītadivase. Yasmā dhammasenāpatino arahattappattadivaseyeva satthu sāvakasannipāto ahosi, tasmā ‘‘pūritasāvakasannipāto esa bhikkhū’’ti vuttaṃ. Pañca jātisatānīti bhummatthe, accantasaṃyoge vā upayogavacanaṃ.
களோபிஹத்தோ²தி விலீவமயபா⁴ஜனஹத்தோ². ‘‘சம்மமயபா⁴ஜனஹத்தோ²’’தி ச வத³ந்தி. புரந்தரேதி நக³ரமஜ்ஜே². வனேதி அரஞ்ஞே.
Kaḷopihatthoti vilīvamayabhājanahattho. ‘‘Cammamayabhājanahattho’’ti ca vadanti. Purantareti nagaramajjhe. Vaneti araññe.
ஓஸக்கனாகாரவிரஹிதோதி த⁴ம்மதே³ஸனாய ஸங்கோசஹேதுவிரஹிதோ. விஸாரதோ³தி ஸாரத³விரஹிதோ. த⁴ம்மோஜந்தி த⁴ம்மரஸங், ஓஜவந்தங் தே³ஸனாத⁴ம்மந்தி அத்தோ². த⁴ம்மபோ⁴க³ந்தி த⁴ம்மபரிபோ⁴க³ங், பரேஹி ஸத்³தி⁴ங் ஸங்விப⁴ஜனவஸேன பவத்தங் த⁴ம்மஸம்போ⁴க³ந்தி தே³ஸனாத⁴ம்மமேவ வத³தி. தேன வுத்தங் ‘‘உப⁴யேனபி த⁴ம்மபரிபோ⁴கோ³வ கதி²தோ’’தி.
Osakkanākāravirahitoti dhammadesanāya saṅkocahetuvirahito. Visāradoti sāradavirahito. Dhammojanti dhammarasaṃ, ojavantaṃ desanādhammanti attho. Dhammabhoganti dhammaparibhogaṃ, parehi saddhiṃ saṃvibhajanavasena pavattaṃ dhammasambhoganti desanādhammameva vadati. Tena vuttaṃ ‘‘ubhayenapi dhammaparibhogova kathito’’ti.
பியாயிதப்³ப³தோ பியேஹி. மனஸ்ஸ வட்³ட⁴னதோ மனாபேஹி. ஜாதியாதி க²த்தியாதி³ஜாதியா. நானாபா⁴வோ அஸஹபா⁴வோ விஸுங்பா⁴வோ. அஞ்ஞதா²பா⁴வோ அஞ்ஞத²த்தங். ஸரீரந்தி ரூபத⁴ம்மகாயஸங்கா²தங் ஸரீரங். ரூபகாயே ஹி பி⁴ஜ்ஜந்தே பி⁴ஜ்ஜந்தேவ. ஸோ பி⁴ஜ்ஜெய்யாதி ஸோ மஹந்ததரோ க²ந்தோ⁴ பி⁴ஜ்ஜெய்ய.
Piyāyitabbato piyehi. Manassa vaḍḍhanato manāpehi. Jātiyāti khattiyādijātiyā. Nānābhāvo asahabhāvo visuṃbhāvo. Aññathābhāvo aññathattaṃ. Sarīranti rūpadhammakāyasaṅkhātaṃ sarīraṃ. Rūpakāye hi bhijjante bhijjanteva. So bhijjeyyāti so mahantataro khandho bhijjeyya.
த³க்கி²ணதி³ஸங் க³தோதி த³க்கி²ணதி³ஸாமுகே² பவத்தோ. மஹாக²ந்தோ⁴ வியாதி மஹந்தோ ஸாரவந்தோ ஸாகா²க²ந்தோ⁴ விய. ஸாக²க²ந்தா⁴ ஹி தி³ஸாபி⁴முக²பவத்தாகாரா, மூலக²ந்தோ⁴ பன உத்³த⁴முக்³க³தோ. ஸோளஸன்னங் பஞ்ஹானந்தி ஸோளஸன்னங் அபராபரியபவத்தனியானங் அத்தா²னங். ஞாதுங் இச்சி²தோ ஹி அத்தோ² பஞ்ஹோ.
Dakkhiṇadisaṃ gatoti dakkhiṇadisāmukhe pavatto. Mahākhandho viyāti mahanto sāravanto sākhākhandho viya. Sākhakhandhā hi disābhimukhapavattākārā, mūlakhandho pana uddhamuggato. Soḷasannaṃ pañhānanti soḷasannaṃ aparāpariyapavattaniyānaṃ atthānaṃ. Ñātuṃ icchito hi attho pañho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. சுந்த³ஸுத்தங் • 3. Cundasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. சுந்த³ஸுத்தவண்ணனா • 3. Cundasuttavaṇṇanā
