| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. சுந்தீ³ஸுத்தங்
2. Cundīsuttaṃ
32. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² சுந்தீ³ ராஜகுமாரீ பஞ்சஹி ரத²ஸதேஹி பஞ்சஹி ச குமாரிஸதேஹி பரிவுதா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னா கோ² சுந்தீ³ ராஜகுமாரீ ப⁴க³வந்தங் ஏதத³வோச –
32. Ekaṃ samayaṃ bhagavā rājagahe viharati veḷuvane kalandakanivāpe. Atha kho cundī rājakumārī pañcahi rathasatehi pañcahi ca kumārisatehi parivutā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnā kho cundī rājakumārī bhagavantaṃ etadavoca –
‘‘அம்ஹாகங், ப⁴ந்தே, பா⁴தா சுந்தோ³ நாம ராஜகுமாரோ, ஸோ ஏவமாஹ – ‘யதே³வ ஸோ ஹோதி இத்தீ² வா புரிஸோ வா பு³த்³த⁴ங் ஸரணங் க³தோ, த⁴ம்மங் ஸரணங் க³தோ, ஸங்க⁴ங் ஸரணங் க³தோ, பாணாதிபாதா படிவிரதோ, அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ, ஸுராமேரயமஜ்ஜபமாத³ட்டா²னா படிவிரதோ, ஸோ காயஸ்ஸ பே⁴தா³ பரங் மரணா ஸுக³திங்யேவ உபபஜ்ஜதி, நோ து³க்³க³தி’ந்தி. ஸாஹங், ப⁴ந்தே, ப⁴க³வந்தங் புச்சா²மி – ‘கத²ங்ரூபே கோ², ப⁴ந்தே, ஸத்த²ரி பஸன்னோ காயஸ்ஸ பே⁴தா³ பரங் மரணா ஸுக³திங்யேவ உபபஜ்ஜதி, நோ து³க்³க³திங்? கத²ங்ரூபே த⁴ம்மே பஸன்னோ காயஸ்ஸ பே⁴தா³ பரங் மரணா ஸுக³திங்யேவ உபபஜ்ஜதி, நோ து³க்³க³திங்? கத²ங்ரூபே ஸங்கே⁴ பஸன்னோ காயஸ்ஸ பே⁴தா³ பரங் மரணா ஸுக³திங்யேவ உபபஜ்ஜதி, நோ து³க்³க³திங்? கத²ங்ரூபேஸு ஸீலேஸு பரிபூரகாரீ காயஸ்ஸ பே⁴தா³ பரங் மரணா ஸுக³திங்யேவ உபபஜ்ஜதி, நோ து³க்³க³தி’’’ந்தி?
‘‘Amhākaṃ, bhante, bhātā cundo nāma rājakumāro, so evamāha – ‘yadeva so hoti itthī vā puriso vā buddhaṃ saraṇaṃ gato, dhammaṃ saraṇaṃ gato, saṅghaṃ saraṇaṃ gato, pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, so kāyassa bhedā paraṃ maraṇā sugatiṃyeva upapajjati, no duggati’nti. Sāhaṃ, bhante, bhagavantaṃ pucchāmi – ‘kathaṃrūpe kho, bhante, satthari pasanno kāyassa bhedā paraṃ maraṇā sugatiṃyeva upapajjati, no duggatiṃ? Kathaṃrūpe dhamme pasanno kāyassa bhedā paraṃ maraṇā sugatiṃyeva upapajjati, no duggatiṃ? Kathaṃrūpe saṅghe pasanno kāyassa bhedā paraṃ maraṇā sugatiṃyeva upapajjati, no duggatiṃ? Kathaṃrūpesu sīlesu paripūrakārī kāyassa bhedā paraṃ maraṇā sugatiṃyeva upapajjati, no duggati’’’nti?
‘‘யாவதா, சுந்தி³, ஸத்தா அபதா³ வா த்³விபதா³ வா சதுப்பதா³ வா ப³ஹுப்பதா³ வா 1 ரூபினோ வா அரூபினோ வா ஸஞ்ஞினோ வா அஸஞ்ஞினோ வா நேவஸஞ்ஞினாஸஞ்ஞினோ வா, ததா²க³தோ தேஸங் அக்³க³மக்கா²யதி அரஹங் ஸம்மாஸம்பு³த்³தோ⁴. யே கோ², சுந்தி³, பு³த்³தே⁴ பஸன்னா, அக்³கே³ தே பஸன்னா. அக்³கே³ கோ² பன பஸன்னானங் அக்³கோ³ விபாகோ ஹோதி.
‘‘Yāvatā, cundi, sattā apadā vā dvipadā vā catuppadā vā bahuppadā vā 2 rūpino vā arūpino vā saññino vā asaññino vā nevasaññināsaññino vā, tathāgato tesaṃ aggamakkhāyati arahaṃ sammāsambuddho. Ye kho, cundi, buddhe pasannā, agge te pasannā. Agge kho pana pasannānaṃ aggo vipāko hoti.
‘‘யாவதா, சுந்தி³, த⁴ம்மா ஸங்க²தா, அரியோ அட்ட²ங்கி³கோ மக்³கோ³ தேஸங் அக்³க³மக்கா²யதி. யே, சுந்தி³, அரியே அட்ட²ங்கி³கே மக்³கே³ பஸன்னா, அக்³கே³ தே பஸன்னா, அக்³கே³ கோ² பன பஸன்னானங் அக்³கோ³ விபாகோ ஹோதி.
‘‘Yāvatā, cundi, dhammā saṅkhatā, ariyo aṭṭhaṅgiko maggo tesaṃ aggamakkhāyati. Ye, cundi, ariye aṭṭhaṅgike magge pasannā, agge te pasannā, agge kho pana pasannānaṃ aggo vipāko hoti.
‘‘யாவதா , சுந்தி³, த⁴ம்மா ஸங்க²தா வா அஸங்க²தா வா, விராகோ³ தேஸங் 3 அக்³க³மக்கா²யதி, யதி³த³ங் – மத³னிம்மத³னோ பிபாஸவினயோ ஆலயஸமுக்³கா⁴தோ வட்டுபச்சே²தோ³ தண்ஹாக்க²யோ விராகோ³ நிரோதோ⁴ நிப்³பா³னங். யே கோ², சுந்தி³ , விராகே³ த⁴ம்மே பஸன்னா, அக்³கே³ தே பஸன்னா. அக்³கே³ கோ² பன பஸன்னானங் அக்³கோ³ விபாகோ ஹோதி.
‘‘Yāvatā , cundi, dhammā saṅkhatā vā asaṅkhatā vā, virāgo tesaṃ 4 aggamakkhāyati, yadidaṃ – madanimmadano pipāsavinayo ālayasamugghāto vaṭṭupacchedo taṇhākkhayo virāgo nirodho nibbānaṃ. Ye kho, cundi , virāge dhamme pasannā, agge te pasannā. Agge kho pana pasannānaṃ aggo vipāko hoti.
‘‘யாவதா, சுந்தி³, ஸங்கா⁴ வா க³ணா வா, ததா²க³தஸாவகஸங்கோ⁴ தேஸங் அக்³க³மக்கா²யதி, யதி³த³ங் – சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴ ஆஹுனெய்யோ பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங் லோகஸ்ஸ. யே கோ², சுந்தி³, ஸங்கே⁴ பஸன்னா, அக்³கே³ தே பஸன்னா. அக்³கே³ கோ² பன பஸன்னானங் அக்³கோ³ விபாகோ ஹோதி.
‘‘Yāvatā, cundi, saṅghā vā gaṇā vā, tathāgatasāvakasaṅgho tesaṃ aggamakkhāyati, yadidaṃ – cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Ye kho, cundi, saṅghe pasannā, agge te pasannā. Agge kho pana pasannānaṃ aggo vipāko hoti.
‘‘யாவதா, சுந்தி³, ஸீலானி, அரியகந்தானி ஸீலானி தேஸங் 5 அக்³க³மக்கா²யதி, யதி³த³ங் – அக²ண்டா³னி அச்சி²த்³தா³னி அஸப³லானி அகம்மாஸானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸங்வத்தனிகானி. யே கோ², சுந்தி³, அரியகந்தேஸு ஸீலேஸு பரிபூரகாரினோ, அக்³கே³ தே பரிபூரகாரினோ. அக்³கே³ கோ² பன பரிபூரகாரீனங் அக்³கோ³ விபாகோ ஹோதீ’’தி.
‘‘Yāvatā, cundi, sīlāni, ariyakantāni sīlāni tesaṃ 6 aggamakkhāyati, yadidaṃ – akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṃvattanikāni. Ye kho, cundi, ariyakantesu sīlesu paripūrakārino, agge te paripūrakārino. Agge kho pana paripūrakārīnaṃ aggo vipāko hotī’’ti.
‘‘அக்³க³தோ வே பஸன்னானங், அக்³க³ங் த⁴ம்மங் விஜானதங்;
‘‘Aggato ve pasannānaṃ, aggaṃ dhammaṃ vijānataṃ;
அக்³கே³ பு³த்³தே⁴ பஸன்னானங், த³க்கி²ணெய்யே அனுத்தரே.
Agge buddhe pasannānaṃ, dakkhiṇeyye anuttare.
‘‘அக்³கே³ த⁴ம்மே பஸன்னானங், விராகூ³பஸமே ஸுகே²;
‘‘Agge dhamme pasannānaṃ, virāgūpasame sukhe;
அக்³கே³ ஸங்கே⁴ பஸன்னானங், புஞ்ஞக்கெ²த்தே அனுத்தரே.
Agge saṅghe pasannānaṃ, puññakkhette anuttare.
‘‘அக்³க³ஸ்மிங் தா³னங் த³த³தங், அக்³க³ங் புஞ்ஞங் பவட்³ட⁴தி;
‘‘Aggasmiṃ dānaṃ dadataṃ, aggaṃ puññaṃ pavaḍḍhati;
அக்³க³ங் ஆயு ச வண்ணோ ச, யஸோ கித்தி ஸுக²ங் ப³லங்.
Aggaṃ āyu ca vaṇṇo ca, yaso kitti sukhaṃ balaṃ.
‘‘அக்³க³ஸ்ஸ தா³தா மேதா⁴வீ, அக்³க³த⁴ம்மஸமாஹிதோ;
‘‘Aggassa dātā medhāvī, aggadhammasamāhito;
தே³வபூ⁴தோ மனுஸ்ஸோ வா, அக்³க³ப்பத்தோ பமோத³தீ’’தி. து³தியங்;
Devabhūto manusso vā, aggappatto pamodatī’’ti. dutiyaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. சுந்தீ³ஸுத்தவண்ணனா • 2. Cundīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. சுந்தீ³ஸுத்தவண்ணனா • 2. Cundīsuttavaṇṇanā
