| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. த³ப்³ப³ஸுத்தவண்ணனா
8. Dabbasuttavaṇṇanā
478. ஸோதோ ஆபஜ்ஜீயதி ஏதேனாதி ஸோதாபத்தி, அனாக³தங் பதி பட²மமக்³கோ³. ஸோதோதி அரியமக்³க³ஸோதோ த³ட்ட²ப்³போ³. ஆபஜ்ஜீயதீதிஆதி³தோ படிபஜ்ஜீயதி. பட²மமக்³க³படிலாப⁴னிமித்தானி ஸோதாபன்னஸ்ஸ அங்கா³னி இத⁴ ‘‘ஸோதாபத்தியங்கா³னீ’’தி வுத்தானி. தானி பன தீஸு டா²னேஸு ஸத்³தா⁴ அரியகந்தஸீலஞ்சாதி வேதி³தப்³பா³னி. ஸவிஸயேதி ஸகவிஸயே. ஜெட்ட²கபா⁴வத³ஸ்ஸனத்த²ந்தி பதா⁴னபா⁴வத³ஸ்ஸனத்த²ங். யத்த² ஸத்³தா⁴தி³இந்த்³ரியானங் ஸாதிஸயகிச்சங், தேஸங் கிச்சாதிரேகதங் த³ஸ்ஸேதுந்தி அத்தோ². இதா³னி தமத்த²ங் உபமாஹி விபா⁴வேதுங் ‘‘யதா² ஹீ’’திஆதி³ வுத்தங். பத்வாதி அத்தனோ கிச்சாதிரேகட்டா²னங் படிலபி⁴த்வா. புப்³ப³ங்க³மந்தி ஸத்³த³ஹனகிச்சேஸு புரேசாரங் தோ⁴ரய்ஹங். ஸேஸானி வீரியிந்த்³ரியாதீ³னி. தத³ன்வயானீதி தத³னுக³தானி தஸ்ஸ ஸத்³தி⁴ந்த்³ரியாதி³கஸ்ஸ பக்கி²கானி. ஏஸ நயோ ஸேஸேஸுபி. ஜா²னவிமொக்கே²தி ஜா²னஸங்கா²தே விமொக்கே² ஸமாதி⁴பதா⁴னதாய ஜா²னானங். ஏவஞ்ச கத்வா ‘‘ஸோதாபத்தியங்கா³னி பத்வா’’தி இத³ஞ்ச வசனங் ஸமத்தி²தங் ஹோதி. ஸத்³தூ⁴பனிஸஞ்ஹி ஸீலந்தி. அரியஸச்சானி பத்வாதி சத்தாரி ஸச்சானி அபி⁴ஸமேதப்³பா³னி பாபுணித்வா.
478. Soto āpajjīyati etenāti sotāpatti, anāgataṃ pati paṭhamamaggo. Sototi ariyamaggasoto daṭṭhabbo. Āpajjīyatītiādito paṭipajjīyati. Paṭhamamaggapaṭilābhanimittāni sotāpannassa aṅgāni idha ‘‘sotāpattiyaṅgānī’’ti vuttāni. Tāni pana tīsu ṭhānesu saddhā ariyakantasīlañcāti veditabbāni. Savisayeti sakavisaye. Jeṭṭhakabhāvadassanatthanti padhānabhāvadassanatthaṃ. Yattha saddhādiindriyānaṃ sātisayakiccaṃ, tesaṃ kiccātirekataṃ dassetunti attho. Idāni tamatthaṃ upamāhi vibhāvetuṃ ‘‘yathā hī’’tiādi vuttaṃ. Patvāti attano kiccātirekaṭṭhānaṃ paṭilabhitvā. Pubbaṅgamanti saddahanakiccesu purecāraṃ dhorayhaṃ. Sesāni vīriyindriyādīni. Tadanvayānīti tadanugatāni tassa saddhindriyādikassa pakkhikāni. Esa nayo sesesupi. Jhānavimokkheti jhānasaṅkhāte vimokkhe samādhipadhānatāya jhānānaṃ. Evañca katvā ‘‘sotāpattiyaṅgāni patvā’’ti idañca vacanaṃ samatthitaṃ hoti. Saddhūpanisañhi sīlanti. Ariyasaccāni patvāti cattāri saccāni abhisametabbāni pāpuṇitvā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. த³ட்ட²ப்³ப³ஸுத்தங் • 8. Daṭṭhabbasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. த³ட்ட²ப்³ப³ஸுத்தவண்ணனா • 8. Daṭṭhabbasuttavaṇṇanā
