| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. த³லித்³த³ஸுத்தவண்ணனா
4. Daliddasuttavaṇṇanā
260. மனுஸ்ஸத³லித்³தோ³தி மனுஸ்ஸேஸு து³க்³க³தோ. மனுஸ்ஸகாருஞ்ஞதந்தி மனுஸ்ஸேஸு பரமனிஹீனதங். மனுஸ்ஸகபணோதி மனுஸ்ஸேஸு வா பரமனிஹீனோ. தஸ்மிங் டா²னேதி தஸ்ஸ தே³வபுத்தஸ்ஸ தஸ்மிங் உப்பஜ்ஜனட்டா²னே. லாமகதோ சிந்தெந்தீதி தஸ்ஸ புரிமவத்து²ங் நிஸ்ஸாய ஹீனதோ சிந்தெந்தி. கதெ²ந்தீதி தமேவ பரேஸங் கதெ²ந்தி. வித்தா²ரெந்தீதி வுத்தமத்த²ங் வித்தா²ரிகங் கரொந்தி. ஸப்³ப³தா³ பரிச்சி²ஜ்ஜ பரிவாரஸம்பன்னோ ஹுத்வா அட்³ட⁴ட்ட²ரதனே ஹத்தி²க்க²ந்தே⁴ மஹச்சராஜானுபா⁴வேன நிஸின்னத்தா ஜனகாயேன ஸமுல்லோகியமானோ. அவலம்ப³ந்தீதி ஓலம்ப³ந்தி. வந்த³னமத்தங் வா நாஹோஸி, அஞ்ஞத³த்து² பச்சேகபு³த்³த⁴தோ அத்தனோ ஸமானாத³ரகிரியங் பச்சாஸீஸதி. தேன வுத்தங் ‘‘ஸோ’’திஆதி³. க்வாயந்தி கோ அயந்தி ப்³யாபன்னவஸேன வத³தி. காளரத்தேஹி ஸுத்தேஹி ஸிப்³பி³தத்தா வண்ணவிகாரங் தி³ஸ்வா ‘‘குட்டி²சீவரானி பாருதோ’’தி ஆஹ. மஹானிரயே நிப்³ப³த்தித்வா மஹாது³க்க²ங் பச்சனுபோ⁴தி. தத³னுரூபபாபகம்மஸ்ஸ விபாகாவஸேஸேன லத்³தோ⁴காஸேன ராஜக³ஹே…பே॰… படிஸந்தி⁴ங் க³ண்ஹி. காமஞ்ச எத்த² படிஸந்தி⁴க்³க³ஹணங் குஸலகம்மேனேவ, தஸ்ஸ பன அகுஸலகம்மஸ்ஸ விபாகினோ ப³லவபா⁴வதோ வுத்தங் ‘‘விபாகாவஸேஸேனா’’தி. தேனாஹ ‘‘க³ஹிதகாலதோ…பே॰… நிக்க²ந்தோ’’தி. பி⁴க்கா²ய சரிதுங் ஸமத்த²காலதோ பட்டா²ய ரோக³ஸ்ஸ ப³லவதாய மங்ஸானி…பே॰… பதந்தி. ஞாணங் பேஸெத்வாதி விபஸ்ஸனாபடிபாடியா பா⁴வனாஞாணங் நிப்³பா³னங் படிபேஸெத்வா பவத்தெத்வா. இந்த்³ரியானங் பரிபக்கத்தா ஸத்து² தே³ஸனாவிலாஸேன ஸோதாபத்திப²லே பதிட்டி²தோ. சும்ப³டந்தி பாத³சும்ப³டங். குட்டி²னோ ஹி ஸகலபாத³தலங் மா ருஜீதி சும்ப³டங் கத்வா தங் பாத³தலே ப³ந்தி⁴த்வா க³ச்ச²ந்தி, மத்திகபாதிங் பி⁴ந்தி³த்வா விய ததா² நிஹீனமனுஸ்ஸத்தபா⁴வதோ சவித்வா ஸுவண்ணபாதிங் படிலப⁴ந்தோ விய தே³வத்தபா⁴வங் க³ண்ஹந்தோ சுதிசித்ததோ து³தியசித்தவாரே ஆதா³னசித்தக்க²ணே தே³வலோகே நிப்³ப³த்தோ.
260.Manussadaliddoti manussesu duggato. Manussakāruññatanti manussesu paramanihīnataṃ. Manussakapaṇoti manussesu vā paramanihīno. Tasmiṃ ṭhāneti tassa devaputtassa tasmiṃ uppajjanaṭṭhāne. Lāmakato cintentīti tassa purimavatthuṃ nissāya hīnato cintenti. Kathentīti tameva paresaṃ kathenti. Vitthārentīti vuttamatthaṃ vitthārikaṃ karonti. Sabbadā paricchijja parivārasampanno hutvā aḍḍhaṭṭharatane hatthikkhandhe mahaccarājānubhāvena nisinnattā janakāyena samullokiyamāno. Avalambantīti olambanti. Vandanamattaṃ vā nāhosi, aññadatthu paccekabuddhato attano samānādarakiriyaṃ paccāsīsati. Tena vuttaṃ ‘‘so’’tiādi. Kvāyanti ko ayanti byāpannavasena vadati. Kāḷarattehi suttehi sibbitattā vaṇṇavikāraṃ disvā ‘‘kuṭṭhicīvarāni pāruto’’ti āha. Mahāniraye nibbattitvā mahādukkhaṃ paccanubhoti. Tadanurūpapāpakammassa vipākāvasesena laddhokāsena rājagahe…pe… paṭisandhiṃ gaṇhi. Kāmañca ettha paṭisandhiggahaṇaṃ kusalakammeneva, tassa pana akusalakammassa vipākino balavabhāvato vuttaṃ ‘‘vipākāvasesenā’’ti. Tenāha ‘‘gahitakālato…pe… nikkhanto’’ti. Bhikkhāya carituṃ samatthakālato paṭṭhāya rogassa balavatāya maṃsāni…pe… patanti. Ñāṇaṃ pesetvāti vipassanāpaṭipāṭiyā bhāvanāñāṇaṃ nibbānaṃ paṭipesetvā pavattetvā. Indriyānaṃ paripakkattā satthu desanāvilāsena sotāpattiphale patiṭṭhito. Cumbaṭanti pādacumbaṭaṃ. Kuṭṭhino hi sakalapādatalaṃ mā rujīti cumbaṭaṃ katvā taṃ pādatale bandhitvā gacchanti, mattikapātiṃ bhinditvā viya tathā nihīnamanussattabhāvato cavitvā suvaṇṇapātiṃ paṭilabhanto viya devattabhāvaṃ gaṇhanto cuticittato dutiyacittavāre ādānacittakkhaṇe devaloke nibbatto.
மக்³கே³னாக³தாதி மக்³கா³தி⁴க³மனேன ஆக³தா உப்பன்னா. அரியகந்தஸீலந்தி அரியானங் கந்தங் மனாபங் மனோரமங் ஸீலத⁴ம்மங். அரியானங் அதி⁴சித்தஅதி⁴பஞ்ஞாஸிக்கா² விய அதி⁴ஸீலஸிக்கா²பி ஸப்³பா³ அதிவிய கந்தா ஏவாதி ஆஹ ‘‘கிஞ்சாபீ’’திஆதி³. இமஸ்மிங் பனத்தே²தி இமஸ்மிங் ஸோதாபன்னஸ்ஸ ப⁴வஸங்கா²தே அத்தே² நித்³தா⁴ரெத்வா வுச்சமானே. பஞ்சஸீலம்பி யஸ்மா தி³ட்டி² விய ப⁴வந்தரேபி அப்பஹீனங்.
Maggenāgatāti maggādhigamanena āgatā uppannā. Ariyakantasīlanti ariyānaṃ kantaṃ manāpaṃ manoramaṃ sīladhammaṃ. Ariyānaṃ adhicittaadhipaññāsikkhā viya adhisīlasikkhāpi sabbā ativiya kantā evāti āha ‘‘kiñcāpī’’tiādi. Imasmiṃ panattheti imasmiṃ sotāpannassa bhavasaṅkhāte atthe niddhāretvā vuccamāne. Pañcasīlampi yasmā diṭṭhi viya bhavantarepi appahīnaṃ.
த³லித்³த³ஸுத்தவண்ணனா நிட்டி²தா.
Daliddasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. த³லித்³த³ஸுத்தங் • 4. Daliddasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. த³லித்³த³ஸுத்தவண்ணனா • 4. Daliddasuttavaṇṇanā
