| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. தா³னமஹப்ப²லஸுத்தங்
9. Dānamahapphalasuttaṃ
52. ஏகங் ஸமயங் ப⁴க³வா சம்பாயங் விஹரதி க³க்³க³ராய பொக்க²ரணியா தீரே. அத² கோ² ஸம்ப³ஹுலா சம்பெய்யகா உபாஸகா யேன ஆயஸ்மா ஸாரிபுத்தோ தேனுபஸங்கமிங்ஸு; உபஸங்கமித்வா ஆயஸ்மந்தங் ஸாரிபுத்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² சம்பெய்யகா உபாஸகா ஆயஸ்மந்தங் ஸாரிபுத்தங் ஏதத³வோசுங் – ‘‘சிரஸ்ஸுதா நோ, ப⁴ந்தே 1, ப⁴க³வதோ ஸம்முகா² த⁴ம்மீகதா². ஸாது⁴ மயங், ப⁴ந்தே, லபெ⁴ய்யாம ப⁴க³வதோ ஸம்முகா² த⁴ம்மிங் கத²ங் 2 ஸவனாயா’’தி. ‘‘தேனஹாவுஸோ, தத³ஹுபோஸதே² ஆக³ச்செ²ய்யாத², அப்பேவ நாம லபெ⁴ய்யாத² ப⁴க³வதோ ஸம்முகா² 3 த⁴ம்மிங் கத²ங் ஸவனாயா’’தி. ‘‘ஏவங், ப⁴ந்தே’’தி கோ² சம்பெய்யகா உபாஸகா ஆயஸ்மதோ ஸாரிபுத்தஸ்ஸ படிஸ்ஸுத்வா உட்டா²யாஸனா ஆயஸ்மந்தங் ஸாரிபுத்தங் அபி⁴வாதெ³த்வா பத³க்கி²ணங் கத்வா பக்கமிங்ஸு.
52. Ekaṃ samayaṃ bhagavā campāyaṃ viharati gaggarāya pokkharaṇiyā tīre. Atha kho sambahulā campeyyakā upāsakā yena āyasmā sāriputto tenupasaṅkamiṃsu; upasaṅkamitvā āyasmantaṃ sāriputtaṃ abhivādetvā ekamantaṃ nisīdiṃsu. Ekamantaṃ nisinnā kho campeyyakā upāsakā āyasmantaṃ sāriputtaṃ etadavocuṃ – ‘‘cirassutā no, bhante 4, bhagavato sammukhā dhammīkathā. Sādhu mayaṃ, bhante, labheyyāma bhagavato sammukhā dhammiṃ kathaṃ 5 savanāyā’’ti. ‘‘Tenahāvuso, tadahuposathe āgaccheyyātha, appeva nāma labheyyātha bhagavato sammukhā 6 dhammiṃ kathaṃ savanāyā’’ti. ‘‘Evaṃ, bhante’’ti kho campeyyakā upāsakā āyasmato sāriputtassa paṭissutvā uṭṭhāyāsanā āyasmantaṃ sāriputtaṃ abhivādetvā padakkhiṇaṃ katvā pakkamiṃsu.
அத² கோ² சம்பெய்யகா உபாஸகா தத³ஹுபோஸதே² யேனாயஸ்மா ஸாரிபுத்தோ தேனுபஸங்கமிங்ஸு; உபஸங்கமித்வா ஆயஸ்மந்தங் ஸாரிபுத்தங் அபி⁴வாதெ³த்வா ஏகமந்தங் அட்ட²ங்ஸு. அத² கோ² ஆயஸ்மா ஸாரிபுத்தோ தேஹி சம்பெய்யகேஹி உபாஸகேஹி ஸத்³தி⁴ங் யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச –
Atha kho campeyyakā upāsakā tadahuposathe yenāyasmā sāriputto tenupasaṅkamiṃsu; upasaṅkamitvā āyasmantaṃ sāriputtaṃ abhivādetvā ekamantaṃ aṭṭhaṃsu. Atha kho āyasmā sāriputto tehi campeyyakehi upāsakehi saddhiṃ yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca –
‘‘ஸியா நு கோ², ப⁴ந்தே, இதே⁴கச்சஸ்ஸ தாதி³ஸங்யேவ தா³னங் தி³ன்னங் ந மஹப்ப²லங் ஹோதி ந மஹானிஸங்ஸங்; ஸியா பன, ப⁴ந்தே, இதே⁴கச்சஸ்ஸ தாதி³ஸங்யேவ தா³னங் தி³ன்னங் மஹப்ப²லங் ஹோதி மஹானிஸங்ஸ’’ந்தி? ‘‘ஸியா, ஸாரிபுத்த, இதே⁴கச்சஸ்ஸ தாதி³ஸங்யேவ தா³னங் தி³ன்னங் ந மஹப்ப²லங் ஹோதி ந மஹானிஸங்ஸங்; ஸியா பன, ஸாரிபுத்த, இதே⁴கச்சஸ்ஸ தாதி³ஸங்யேவ தா³னங் தி³ன்னங் மஹப்ப²லங் ஹோதி மஹானிஸங்ஸ’’ந்தி. ‘‘கோ நு கோ², ப⁴ந்தே, ஹேது கோ பச்சயோ யேன மிதே⁴கச்சஸ்ஸ தாதி³ஸங்யேவ தா³னங் தி³ன்னங் ந மஹப்ப²லங் ஹோதி ந மஹானிஸங்ஸங்; கோ நு கோ², ப⁴ந்தே, ஹேது கோ பச்சயோ யேன மிதே⁴கச்சஸ்ஸ தாதி³ஸங்யேவ தா³னங் தி³ன்னங் மஹப்ப²லங் ஹோதி மஹானிஸங்ஸ’’ந்தி?
‘‘Siyā nu kho, bhante, idhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; siyā pana, bhante, idhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti? ‘‘Siyā, sāriputta, idhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; siyā pana, sāriputta, idhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti. ‘‘Ko nu kho, bhante, hetu ko paccayo yena midhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ; ko nu kho, bhante, hetu ko paccayo yena midhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti?
‘‘இத⁴, ஸாரிபுத்த, ஏகச்சோ ஸாபேகோ² 7 தா³னங் தே³தி, பதிப³த்³த⁴சித்தோ 8 தா³னங் தே³தி, ஸன்னிதி⁴பேகோ² தா³னங் தே³தி, ‘இமங் பேச்ச பரிபு⁴ஞ்ஜிஸ்ஸாமீ’தி தா³னங் தே³தி. ஸோ தங் தா³னங் தே³தி ஸமணஸ்ஸ வா ப்³ராஹ்மணஸ்ஸ வா அன்னங் பானங் வத்த²ங் யானங் மாலாக³ந்த⁴விலேபனங் ஸெய்யாவஸத²பதீ³பெய்யங். தங் கிங் மஞ்ஞஸி, ஸாரிபுத்த, த³தெ³ய்ய இதே⁴கச்சோ ஏவரூபங் தா³ன’’ந்தி? ‘‘ஏவங், ப⁴ந்தே’’.
‘‘Idha, sāriputta, ekacco sāpekho 9 dānaṃ deti, patibaddhacitto 10 dānaṃ deti, sannidhipekho dānaṃ deti, ‘imaṃ pecca paribhuñjissāmī’ti dānaṃ deti. So taṃ dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Taṃ kiṃ maññasi, sāriputta, dadeyya idhekacco evarūpaṃ dāna’’nti? ‘‘Evaṃ, bhante’’.
‘‘தத்ர, ஸாரிபுத்த, ய்வாயங் ஸாபேகோ² தா³னங் தே³தி , பதிப³த்³த⁴சித்தோ தா³னங் தே³தி, ஸன்னிதி⁴பேகோ² தா³னங் தே³தி, ‘இமங் பேச்ச பரிபு⁴ஞ்ஜிஸ்ஸாமீ’தி தா³னங் தே³தி. ஸோ தங் தா³னங் த³த்வா காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங் உபபஜ்ஜதி. ஸோ தங் கம்மங் கே²பெத்வா தங் இத்³தி⁴ங் தங் யஸங் தங் ஆதி⁴பச்சங் ஆகா³மீ ஹோதி ஆக³ந்தா இத்த²த்தங்.
‘‘Tatra, sāriputta, yvāyaṃ sāpekho dānaṃ deti , patibaddhacitto dānaṃ deti, sannidhipekho dānaṃ deti, ‘imaṃ pecca paribhuñjissāmī’ti dānaṃ deti. So taṃ dānaṃ datvā kāyassa bhedā paraṃ maraṇā cātumahārājikānaṃ devānaṃ sahabyataṃ upapajjati. So taṃ kammaṃ khepetvā taṃ iddhiṃ taṃ yasaṃ taṃ ādhipaccaṃ āgāmī hoti āgantā itthattaṃ.
‘‘இத⁴ பன, ஸாரிபுத்த, ஏகச்சோ ந ஹேவ கோ² ஸாபேகோ² தா³னங் தே³தி, ந பதிப³த்³த⁴சித்தோ தா³னங் தே³தி, ந ஸன்னிதி⁴பேகோ² தா³னங் தே³தி, ந ‘இமங் பேச்ச பரிபு⁴ஞ்ஜிஸ்ஸாமீ’தி தா³னங் தே³தி; அபி ச கோ² ‘ஸாஹு தா³ன’ந்தி தா³னங் தே³தி…பே॰… நபி ‘ஸாஹு தா³ன’ந்தி தா³னங் தே³தி; அபி ச கோ² ‘தி³ன்னபுப்³ப³ங் கதபுப்³ப³ங் பிதுபிதாமஹேஹி ந அரஹாமி போராணங் குலவங்ஸங் ஹாபேது’ந்தி தா³னங் தே³தி…பே॰… நபி ‘தி³ன்னபுப்³ப³ங் கதபுப்³ப³ங் பிதுபிதாமஹேஹி ந அரஹாமி போராணங் குலவங்ஸங் ஹாபேது’ந்தி தா³னங் தே³தி; அபி ச கோ² ‘அஹங் பசாமி, இமே ந பசந்தி, நாரஹாமி பசந்தோ அபசந்தானங் தா³னங் அதா³து’ந்தி தா³னங் தே³தி…பே॰… நபி ‘அஹங் பசாமி, இமே ந பசந்தி, நாரஹாமி பசந்தோ அபசந்தானங் தா³னங் அதா³து’ந்தி தா³னங் தே³தி; அபி ச கோ² ‘யதா² தேஸங் புப்³ப³கானங் இஸீனங் தானி மஹாயஞ்ஞானி அஹேஸுங், ஸெய்யதி²த³ங் – அட்ட²கஸ்ஸ வாமகஸ்ஸ வாமதே³வஸ்ஸ வெஸ்ஸாமித்தஸ்ஸ யமத³க்³கி³னோ அங்கீ³ரஸஸ்ஸ பா⁴ரத்³வாஜஸ்ஸ வாஸெட்ட²ஸ்ஸ கஸ்ஸபஸ்ஸ ப⁴கு³னோ, ஏவங் மே அயங் தா³னஸங்விபா⁴கோ³ ப⁴விஸ்ஸதீ’தி தா³னங் தே³தி…பே॰… நபி ‘யதா² தேஸங் புப்³ப³கானங் இஸீனங் தானி மஹாயஞ்ஞானி அஹேஸுங், ஸெய்யதி²த³ங் – அட்ட²கஸ்ஸ வாமகஸ்ஸ வாமதே³வஸ்ஸ வெஸ்ஸாமித்தஸ்ஸ யமத³க்³கி³னோ அங்கீ³ரஸஸ்ஸ பா⁴ரத்³வாஜஸ்ஸ வாஸெட்ட²ஸ்ஸ கஸ்ஸபஸ்ஸ ப⁴கு³னோ, ஏவங் மே அயங் தா³னஸங்விபா⁴கோ³ ப⁴விஸ்ஸதீ’தி தா³னங் தே³தி; அபி ச கோ² ‘இமங் மே தா³னங் த³த³தோ சித்தங் பஸீத³தி, அத்தமனதா ஸோமனஸ்ஸங் உபஜாயதீ’தி தா³னங் தே³தி…பே॰… நபி ‘இமங் மே தா³னங் த³த³தோ சித்தங் பஸீத³தி, அத்தமனதா ஸோமனஸ்ஸங் உபஜாயதீ’தி தா³னங் தே³தி; அபி ச கோ² சித்தாலங்காரசித்தபரிக்கா²ரங் தா³னங் தே³தி. ஸோ தங் தா³னங் தே³தி ஸமணஸ்ஸ வா ப்³ராஹ்மணஸ்ஸ வா அன்னங் பானங் வத்த²ங் யானங் மாலாக³ந்த⁴விலேபனங் ஸெய்யாவஸத²பதீ³பெய்யங். தங் கிங் மஞ்ஞஸி, ஸாரிபுத்த, த³தெ³ய்ய இதே⁴கச்சோ ஏவரூபங் தா³ன’’ந்தி? ‘‘ஏவங், ப⁴ந்தே’’.
‘‘Idha pana, sāriputta, ekacco na heva kho sāpekho dānaṃ deti, na patibaddhacitto dānaṃ deti, na sannidhipekho dānaṃ deti, na ‘imaṃ pecca paribhuñjissāmī’ti dānaṃ deti; api ca kho ‘sāhu dāna’nti dānaṃ deti…pe… napi ‘sāhu dāna’nti dānaṃ deti; api ca kho ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti…pe… napi ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti; api ca kho ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti…pe… napi ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti; api ca kho ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti…pe… napi ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti; api ca kho ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti…pe… napi ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti; api ca kho cittālaṅkāracittaparikkhāraṃ dānaṃ deti. So taṃ dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Taṃ kiṃ maññasi, sāriputta, dadeyya idhekacco evarūpaṃ dāna’’nti? ‘‘Evaṃ, bhante’’.
‘‘தத்ர, ஸாரிபுத்த, ய்வாயங் ந ஹேவ 11 ஸாபேகோ² தா³னங் தே³தி; ந பதிப³த்³த⁴சித்தோ தா³னங் தே³தி; ந ஸன்னிதி⁴பேகோ² தா³னங் தே³தி; ந ‘இமங் பேச்ச பரிபு⁴ஞ்ஜிஸ்ஸாமீ’தி தா³னங் தே³தி; நபி ‘ஸாஹு தா³ன’ந்தி தா³னங் தே³தி; நபி ‘தி³ன்னபுப்³ப³ங் கதபுப்³ப³ங் பிதுபிதாமஹேஹி ந அரஹாமி போராணங் குலவங்ஸங் ஹாபேது’ந்தி தா³னங் தே³தி; நபி ‘அஹங் பசாமி, இமே ந பசந்தி, நாரஹாமி பசந்தோ அபசந்தானங் தா³னங் அதா³து’ந்தி தா³னங் தே³தி; நபி ‘யதா² தேஸங் புப்³ப³கானங் இஸீனங் தானி மஹாயஞ்ஞானி அஹேஸுங், ஸெய்யதி²த³ங் – அட்ட²கஸ்ஸ வாமகஸ்ஸ வாமதே³வஸ்ஸ வெஸ்ஸாமித்தஸ்ஸ யமத³க்³கி³னோ அங்கீ³ரஸஸ்ஸ பா⁴ரத்³வாஜஸ்ஸ வாஸெட்ட²ஸ்ஸ கஸ்ஸபஸ்ஸ ப⁴கு³னோ, ஏவங் மே அயங் தா³னஸங்விபா⁴கோ³ ப⁴விஸ்ஸதீ’தி தா³னங் தே³தி; நபி ‘இமங் மே தா³னங் த³த³தோ சித்தங் பஸீத³தி, அத்தமனதா ஸோமனஸ்ஸங் உபஜாயதீ’தி தா³னங் தே³தி; அபி ச கோ² சித்தாலங்காரசித்தபரிக்கா²ரங் தா³னங் தே³தி. ஸோ தங் தா³னங் த³த்வா காயஸ்ஸ பே⁴தா³ பரங் மரணா ப்³ரஹ்மகாயிகானங் தே³வானங் ஸஹப்³யதங் உபபஜ்ஜதி. ஸோ தங் கம்மங் கே²பெத்வா தங் இத்³தி⁴ங் தங் யஸங் தங் ஆதி⁴பச்சங் அனாகா³மீ ஹோதி அனாக³ந்தா இத்த²த்தங். அயங் கோ², ஸாரிபுத்த, ஹேது அயங் பச்சயோ யேன மிதே⁴கச்சஸ்ஸ தாதி³ஸங்யேவ தா³னங் தி³ன்னங் ந மஹப்ப²லங் ஹோதி ந மஹானிஸங்ஸங். அயங் பன, ஸாரிபுத்த, ஹேது அயங் பச்சயோ யேன மிதே⁴கச்சஸ்ஸ தாதி³ஸங்யேவ தா³னங் தி³ன்னங் மஹப்ப²லங் ஹோதி மஹானிஸங்ஸ’’ந்தி. நவமங்.
‘‘Tatra, sāriputta, yvāyaṃ na heva 12 sāpekho dānaṃ deti; na patibaddhacitto dānaṃ deti; na sannidhipekho dānaṃ deti; na ‘imaṃ pecca paribhuñjissāmī’ti dānaṃ deti; napi ‘sāhu dāna’nti dānaṃ deti; napi ‘dinnapubbaṃ katapubbaṃ pitupitāmahehi na arahāmi porāṇaṃ kulavaṃsaṃ hāpetu’nti dānaṃ deti; napi ‘ahaṃ pacāmi, ime na pacanti, nārahāmi pacanto apacantānaṃ dānaṃ adātu’nti dānaṃ deti; napi ‘yathā tesaṃ pubbakānaṃ isīnaṃ tāni mahāyaññāni ahesuṃ, seyyathidaṃ – aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṃ me ayaṃ dānasaṃvibhāgo bhavissatī’ti dānaṃ deti; napi ‘imaṃ me dānaṃ dadato cittaṃ pasīdati, attamanatā somanassaṃ upajāyatī’ti dānaṃ deti; api ca kho cittālaṅkāracittaparikkhāraṃ dānaṃ deti. So taṃ dānaṃ datvā kāyassa bhedā paraṃ maraṇā brahmakāyikānaṃ devānaṃ sahabyataṃ upapajjati. So taṃ kammaṃ khepetvā taṃ iddhiṃ taṃ yasaṃ taṃ ādhipaccaṃ anāgāmī hoti anāgantā itthattaṃ. Ayaṃ kho, sāriputta, hetu ayaṃ paccayo yena midhekaccassa tādisaṃyeva dānaṃ dinnaṃ na mahapphalaṃ hoti na mahānisaṃsaṃ. Ayaṃ pana, sāriputta, hetu ayaṃ paccayo yena midhekaccassa tādisaṃyeva dānaṃ dinnaṃ mahapphalaṃ hoti mahānisaṃsa’’nti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. தா³னமஹப்ப²லஸுத்தவண்ணனா • 9. Dānamahapphalasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. தா³னமஹப்ப²லஸுத்தவண்ணனா • 9. Dānamahapphalasuttavaṇṇanā
