| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. தா³னஸுத்தவண்ணனா
6. Dānasuttavaṇṇanā
26. ச²ட்டே² ஏவஞ்சேதி எத்த² ஏவந்தி உபமாகாரே நிபாதோ, சேதி பரிகப்பனே. ஸத்தாதி ரூபாதீ³ஸு ஸத்தா விஸத்தா. ஜானெய்யுந்தி பு³ஜ்ஜெ²ய்யுங். தா³னஸங்விபா⁴க³ஸ்ஸாதி யாய ஹி சேதனாய அன்னாதி³தெ³ய்யத⁴ம்மங் ஸங்ஹரித்வா அனுகம்பாபூஜாஸு அஞ்ஞதரவஸேன பரேஸங் தீ³யதி, தங் தா³னங். யாய பன அத்தனா பரிபு⁴ஞ்ஜிதப்³ப³பா⁴வேன க³ஹிதவத்து²ஸ்ஸ ஏகதே³ஸோ ஸங்விப⁴ஜித்வா தீ³யதி, அயங் ஸங்விபா⁴கோ³. விபாகந்தி ப²லங். யதா²ஹங் ஜானாமீதி யதா² அஹங் ஜானாமி. இத³ங் வுத்தங் ஹோதி – திரச்சா²னக³தஸ்ஸபி தா³னங் த³த்வா அத்தபா⁴வஸதே பவத்தஸுக²விபச்சனவஸேன ஸதகு³ணா த³க்கி²ணா ஹோதீதி ஏவமாதி³னா, பி⁴க்க²வே, யேன பகாரேன அஹங் தா³னஸ்ஸ ஸங்விபா⁴க³ஸ்ஸ ச விபாகங் கம்மவிபாகங் ஞாணப³லேன பச்சக்க²தோ ஜானாமி, ஏவங் இமே ஸத்தா யதி³ ஜானெய்யுந்தி. ந அத³த்வா பு⁴ஞ்ஜெய்யுந்தி யங் பு⁴ஞ்ஜிதப்³ப³யுத்தகங் அத்தனோ அத்தி², ததோ பரேஸங் ந அத³த்வா மச்ச²ரியசித்தேன ச தண்ஹாலோப⁴வஸேன ச பு⁴ஞ்ஜெய்யுங், த³த்வாவ பு⁴ஞ்ஜெய்யுங். ந ச நேஸங் மச்சே²ரமலங் சித்தங் பரியாதா³ய திட்டெ²ய்யாதி அத்தனோ ஸம்பத்தீனங் பரேஹி ஸாதா⁴ரணபா⁴வாஸஹனலக்க²ணங் சித்தஸ்ஸ பப⁴ஸ்ஸரபா⁴வதூ³ஸகானங் உபக்கிலேஸபூ⁴தானங் கண்ஹத⁴ம்மானங் அஞ்ஞதரங் மச்சே²ரமலங். அத² வா யதா²வுத்தமச்சே²ரஞ்சேவ அஞ்ஞம்பி தா³னந்தராயகரங் இஸ்ஸாலோப⁴தோ³ஸாதி³மலஞ்ச நேஸங் ஸத்தானங் சித்தங் யதா² தா³னசேதனா ந பவத்ததி, ந வா ஸுபரிஸுத்³தா⁴ ஹோதி, ஏவங் பரியாதா³ய பரிதோ க³ஹெத்வா அபி⁴ப⁴வித்வா ந திட்டெ²ய்ய. கோ ஹி ஸம்மதே³வ தா³னப²லங் ஜானந்தோ அத்தனோ சித்தே மச்சே²ரமலஸ்ஸ ஓகாஸங் த³தெ³ய்ய.
26. Chaṭṭhe evañceti ettha evanti upamākāre nipāto, ceti parikappane. Sattāti rūpādīsu sattā visattā. Jāneyyunti bujjheyyuṃ. Dānasaṃvibhāgassāti yāya hi cetanāya annādideyyadhammaṃ saṃharitvā anukampāpūjāsu aññataravasena paresaṃ dīyati, taṃ dānaṃ. Yāya pana attanā paribhuñjitabbabhāvena gahitavatthussa ekadeso saṃvibhajitvā dīyati, ayaṃ saṃvibhāgo. Vipākanti phalaṃ. Yathāhaṃ jānāmīti yathā ahaṃ jānāmi. Idaṃ vuttaṃ hoti – tiracchānagatassapi dānaṃ datvā attabhāvasate pavattasukhavipaccanavasena sataguṇā dakkhiṇā hotīti evamādinā, bhikkhave, yena pakārena ahaṃ dānassa saṃvibhāgassa ca vipākaṃ kammavipākaṃ ñāṇabalena paccakkhato jānāmi, evaṃ ime sattā yadi jāneyyunti. Na adatvā bhuñjeyyunti yaṃ bhuñjitabbayuttakaṃ attano atthi, tato paresaṃ na adatvā macchariyacittena ca taṇhālobhavasena ca bhuñjeyyuṃ, datvāva bhuñjeyyuṃ. Na ca nesaṃ maccheramalaṃ cittaṃ pariyādāya tiṭṭheyyāti attano sampattīnaṃ parehi sādhāraṇabhāvāsahanalakkhaṇaṃ cittassa pabhassarabhāvadūsakānaṃ upakkilesabhūtānaṃ kaṇhadhammānaṃ aññataraṃ maccheramalaṃ. Atha vā yathāvuttamaccherañceva aññampi dānantarāyakaraṃ issālobhadosādimalañca nesaṃ sattānaṃ cittaṃ yathā dānacetanā na pavattati, na vā suparisuddhā hoti, evaṃ pariyādāya parito gahetvā abhibhavitvā na tiṭṭheyya. Ko hi sammadeva dānaphalaṃ jānanto attano citte maccheramalassa okāsaṃ dadeyya.
யோபி நேஸங் அஸ்ஸ சரிமோ ஆலோபோதி நேஸங் ஸத்தானங் யோ ஸப்³ப³பச்சி²மகோ ஆலோபோ ஸியா. சரிமங் கப³ளந்தி தஸ்ஸேவ வேவசனங். இத³ங் வுத்தங் ஹோதி – இமே ஸத்தா பகதியா யத்தகேஹி ஆலோபேஹி ஸயங் யாபெய்யுங், தேஸு ஏகமேவ ஆலோபங் அத்தனோ அத்தா²ய ட²பெத்வா தத³ஞ்ஞே ஸப்³பே³ ஆலோபே ஆக³தாக³தானங் அத்தி²கானங் த³த்வா யோ ட²பிதோ ஆலோபோ அஸ்ஸ, ஸோ இத⁴ சரிமோ ஆலோபோ நாம. ததோபி ந அஸங்விப⁴ஜித்வா பு⁴ஞ்ஜெய்யுங், ஸசே நேஸங் படிக்³கா³ஹகா அஸ்ஸூதி நேஸங் ஸத்தானங் படிக்³கா³ஹகா யதி³ ஸியுங், ததோபி யதா²வுத்தசரிமாலோபதோபி ஸங்விப⁴ஜித்வாவ ஏகதே³ஸங் த³த்வாவ பு⁴ஞ்ஜெய்யுங், யதா²ஹங் தா³னஸங்விபா⁴க³ஸ்ஸ விபாகங் பச்சக்க²தோ ஜானாமி, ஏவங் யதி³ ஜானெய்யுந்தி. யஸ்மா ச கோ²திஆதி³னா கம்மப²லஸ்ஸ அப்பச்சக்க²பா⁴வதோ ஏவமேதே ஸத்தா தா³னஸங்விபா⁴கே³ஸு ந பவத்தந்தீதி யதா²தி⁴ப்பேதமத்த²ங் காரணேன ஸம்படிபாதே³தி. ஏதேனேவ தேஸங் தத³ஞ்ஞபுஞ்ஞேஸு ச அப்படிபத்தியா அபுஞ்ஞேஸு ச படிபத்தியா காரணங் த³ஸ்ஸிதந்தி த³ட்ட²ப்³ப³ங்.
Yopi nesaṃ assa carimo ālopoti nesaṃ sattānaṃ yo sabbapacchimako ālopo siyā. Carimaṃ kabaḷanti tasseva vevacanaṃ. Idaṃ vuttaṃ hoti – ime sattā pakatiyā yattakehi ālopehi sayaṃ yāpeyyuṃ, tesu ekameva ālopaṃ attano atthāya ṭhapetvā tadaññe sabbe ālope āgatāgatānaṃ atthikānaṃ datvā yo ṭhapito ālopo assa, so idha carimo ālopo nāma. Tatopi na asaṃvibhajitvā bhuñjeyyuṃ, sace nesaṃ paṭiggāhakā assūti nesaṃ sattānaṃ paṭiggāhakā yadi siyuṃ, tatopi yathāvuttacarimālopatopi saṃvibhajitvāva ekadesaṃ datvāva bhuñjeyyuṃ, yathāhaṃ dānasaṃvibhāgassa vipākaṃ paccakkhato jānāmi, evaṃ yadi jāneyyunti. Yasmā ca khotiādinā kammaphalassa appaccakkhabhāvato evamete sattā dānasaṃvibhāgesu na pavattantīti yathādhippetamatthaṃ kāraṇena sampaṭipādeti. Eteneva tesaṃ tadaññapuññesu ca appaṭipattiyā apuññesu ca paṭipattiyā kāraṇaṃ dassitanti daṭṭhabbaṃ.
கா³தா²ஸு யதா²வுத்தங் மஹேஸினாதி மஹேஸினா ப⁴க³வதா ‘‘திரச்சா²னக³தே தா³னங் த³த்வா ஸதகு³ணா த³க்கி²ணா பாடிகங்கி²தப்³பா³’ திஆதி³னா, இதே⁴வ வா ‘‘ஏவங் சே ஸத்தா ஜானெய்யு’’ந்திஆதி³னா யதா²வுத்தங், ஞாணசாரேன தங் யதா²வுத்தங் சித்தங் ஞாதந்தி அத்தோ². விபாகங் ஸங்விபா⁴க³ஸ்ஸாதி ஸங்விபா⁴க³ஸ்ஸபி விபாகங், கோ பன வாதோ³ தா³னஸ்ஸ. யதா² ஹோதி மஹப்ப²லந்தி யதா² ஸோ விபாகோ மஹந்தங் ப²லங் ஹோதி, ஏவங் இமே ஸத்தா யதி³ ஜானெய்யுந்தி ஸம்ப³ந்தோ⁴. வினெய்ய மச்சே²ரமலந்தி மச்ச²ரியமலங் அபனெத்வா கம்மப²லஸத்³தா⁴ய ரதனத்தயஸத்³தா⁴ய ச விஸேஸதோ பஸன்னேன சித்தேன யேஸு கிலேஸேஹி ஆரகத்தா அரியேஸு ஸீலாதி³கு³ணஸம்பன்னேஸு தி³ன்னங் அப்பகம்பி தா³னங் மஹப்ப²லங் ஹோதி, தேஸு யுத்தகாலேன த³ஜ்ஜுங் த³தெ³ய்யுங்.
Gāthāsu yathāvuttaṃ mahesināti mahesinā bhagavatā ‘‘tiracchānagate dānaṃ datvā sataguṇā dakkhiṇā pāṭikaṅkhitabbā’ tiādinā, idheva vā ‘‘evaṃ ce sattā jāneyyu’’ntiādinā yathāvuttaṃ, ñāṇacārena taṃ yathāvuttaṃ cittaṃ ñātanti attho. Vipākaṃ saṃvibhāgassāti saṃvibhāgassapi vipākaṃ, ko pana vādo dānassa. Yathā hoti mahapphalanti yathā so vipāko mahantaṃ phalaṃ hoti, evaṃ ime sattā yadi jāneyyunti sambandho. Vineyya maccheramalanti macchariyamalaṃ apanetvā kammaphalasaddhāya ratanattayasaddhāya ca visesato pasannena cittena yesu kilesehi ārakattā ariyesu sīlādiguṇasampannesu dinnaṃ appakampi dānaṃ mahapphalaṃ hoti, tesu yuttakālena dajjuṃ dadeyyuṃ.
மஹப்ப²லபா⁴வகரணதோ த³க்கி²ணங் அரஹந்தீதி த³க்கி²ணெய்யா, ஸம்மாபடிபன்னா, தேஸு த³க்கி²ணெய்யேஸு. த³க்கி²ணங் பரலோகங் ஸத்³த³ஹித்வா தா³தப்³ப³ங் தெ³ய்யத⁴ம்மங் யதா² தங் தா³னங் ஹோதி மஹாதா³னங், ஏவங் த³த்வா. அத² வா ப³ஹுனோ அன்னங் த³த்வா, கத²ங் பன அன்னங் தா³தப்³ப³ந்தி ஆஹ ‘‘த³க்கி²ணெய்யேஸு த³க்கி²ண’’ந்தி. இதோ மனுஸ்ஸத்தா மனுஸ்ஸத்தபா⁴வதோ சுதா படிஸந்தி⁴வஸேன ஸக்³க³ங் க³ச்ச²ந்தி தா³யகா. காமகாமினோதி காமேதப்³பா³னங் உளாரானங் தே³வபோ⁴கா³னங் படிலத்³த⁴ரூபவிப⁴வேன கம்முனா உபக³மனே ஸாது⁴காரிதாய காமகாமினோ ஸப்³ப³காமஸமங்கி³னோ. மோத³ந்தி யதா²ருசி பரிசாரெந்தீதி அத்தோ².
Mahapphalabhāvakaraṇato dakkhiṇaṃ arahantīti dakkhiṇeyyā, sammāpaṭipannā, tesu dakkhiṇeyyesu. Dakkhiṇaṃ paralokaṃ saddahitvā dātabbaṃ deyyadhammaṃ yathā taṃ dānaṃ hoti mahādānaṃ, evaṃ datvā. Atha vā bahuno annaṃ datvā, kathaṃ pana annaṃ dātabbanti āha ‘‘dakkhiṇeyyesu dakkhiṇa’’nti. Ito manussattā manussattabhāvato cutā paṭisandhivasena saggaṃ gacchanti dāyakā. Kāmakāminoti kāmetabbānaṃ uḷārānaṃ devabhogānaṃ paṭiladdharūpavibhavena kammunā upagamane sādhukāritāya kāmakāmino sabbakāmasamaṅgino. Modanti yathāruci paricārentīti attho.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. தா³னஸுத்தங் • 6. Dānasuttaṃ
