| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
9. தா³னஸுத்தவண்ணனா
9. Dānasuttavaṇṇanā
98. நவமே தா³னந்தி தா³தப்³ப³ங், ஸவத்து²கா வா சேதனா தா³னங், ஸம்பத்திபரிச்சாக³ஸ்ஸேதங் அதி⁴வசனங். ஆமிஸதா³னந்தி சத்தாரோ பச்சயா தெ³ய்யபா⁴வவஸேன ஆமிஸதா³னங் நாம. தே ஹி தண்ஹாதீ³ஹி ஆமஸிதப்³ப³தோ ஆமிஸந்தி வுச்சந்தி. தேஸங் வா பரிச்சாக³சேதனா ஆமிஸதா³னங். த⁴ம்மதா³னந்தி இதே⁴கச்சோ ‘‘இமே த⁴ம்மா குஸலா, இமே த⁴ம்மா அகுஸலா, இமே த⁴ம்மா ஸாவஜ்ஜா, இமே த⁴ம்மா அனவஜ்ஜா, இமே விஞ்ஞுக³ரஹிதா, இமே விஞ்ஞுப்பஸத்தா²; இமே ஸமத்தா ஸமாதி³ன்னா அஹிதாய து³க்கா²ய ஸங்வத்தந்தி, இமே ஹிதாய ஸுகா²ய ஸங்வத்தந்தீ’’தி குஸலாகுஸலகம்மபதே² விப⁴ஜந்தோ கம்மகம்மவிபாகே இத⁴லோகபரலோகே பச்சக்க²தோ த³ஸ்ஸெந்தோ விய பாகடங் கரொந்தோ அகுஸலேஹி த⁴ம்மேஹி நிவத்தாபெந்தோ, குஸலேஸு த⁴ம்மேஸு பதிட்டா²பெந்தோ, த⁴ம்மங் தே³ஸேதி, இத³ங் த⁴ம்மதா³னங். யோ பன ‘‘இமே த⁴ம்மா அபி⁴ஞ்ஞெய்யா , இமே பரிஞ்ஞெய்யா, இமே பஹாதப்³பா³, இமே ஸச்சி²காதப்³பா³, இமே பா⁴வேதப்³பா³’’தி ஸச்சானி விபா⁴வெந்தோ அமதாதி⁴க³மாய படிபத்தித⁴ம்மங் தே³ஸேதி, இத³ங் ஸிகா²ப்பத்தங் த⁴ம்மதா³னங் நாம. ஏதத³க்³க³ந்தி ஏதங் அக்³க³ங். யதி³த³ந்தி யங் இத³ங் த⁴ம்மதா³னங் வுத்தங், ஏதங் இமேஸு த்³வீஸு தா³னேஸு அக்³க³ங் ஸெட்ட²ங் உத்தமங். விவட்டகா³மித⁴ம்மதா³னஞ்ஹி நிஸ்ஸாய ஸப்³பா³னத்த²தோ பரிமுச்சதி, ஸகலங் வட்டது³க்க²ங் அதிக்கமதி. லோகியங் பன த⁴ம்மதா³னங் ஸப்³பே³ஸங் தா³னானங் நிதா³னங் ஸப்³ப³ஸம்பத்தீனங் மூலங். தேனாஹ –
98. Navame dānanti dātabbaṃ, savatthukā vā cetanā dānaṃ, sampattipariccāgassetaṃ adhivacanaṃ. Āmisadānanti cattāro paccayā deyyabhāvavasena āmisadānaṃ nāma. Te hi taṇhādīhi āmasitabbato āmisanti vuccanti. Tesaṃ vā pariccāgacetanā āmisadānaṃ. Dhammadānanti idhekacco ‘‘ime dhammā kusalā, ime dhammā akusalā, ime dhammā sāvajjā, ime dhammā anavajjā, ime viññugarahitā, ime viññuppasatthā; ime samattā samādinnā ahitāya dukkhāya saṃvattanti, ime hitāya sukhāya saṃvattantī’’ti kusalākusalakammapathe vibhajanto kammakammavipāke idhalokaparaloke paccakkhato dassento viya pākaṭaṃ karonto akusalehi dhammehi nivattāpento, kusalesu dhammesu patiṭṭhāpento, dhammaṃ deseti, idaṃ dhammadānaṃ. Yo pana ‘‘ime dhammā abhiññeyyā , ime pariññeyyā, ime pahātabbā, ime sacchikātabbā, ime bhāvetabbā’’ti saccāni vibhāvento amatādhigamāya paṭipattidhammaṃ deseti, idaṃ sikhāppattaṃ dhammadānaṃ nāma. Etadagganti etaṃ aggaṃ. Yadidanti yaṃ idaṃ dhammadānaṃ vuttaṃ, etaṃ imesu dvīsu dānesu aggaṃ seṭṭhaṃ uttamaṃ. Vivaṭṭagāmidhammadānañhi nissāya sabbānatthato parimuccati, sakalaṃ vaṭṭadukkhaṃ atikkamati. Lokiyaṃ pana dhammadānaṃ sabbesaṃ dānānaṃ nidānaṃ sabbasampattīnaṃ mūlaṃ. Tenāha –
‘‘ஸப்³ப³தா³னங் த⁴ம்மதா³னங் ஜினாதி, ஸப்³ப³ரஸங் த⁴ம்மரஸோ ஜினாதி;
‘‘Sabbadānaṃ dhammadānaṃ jināti, sabbarasaṃ dhammaraso jināti;
ஸப்³ப³ரதிங் த⁴ம்மரதீ ஜினாதி, தண்ஹக்க²யோ ஸப்³ப³து³க்க²ங் ஜினாதீ’’தி. (த⁴॰ ப॰ 354) –
Sabbaratiṃ dhammaratī jināti, taṇhakkhayo sabbadukkhaṃ jinātī’’ti. (dha. pa. 354) –
அப⁴யதா³னமெத்த² த⁴ம்மதா³னேனேவ ஸங்க³ஹிதந்தி த³ட்ட²ப்³ப³ங்.
Abhayadānamettha dhammadāneneva saṅgahitanti daṭṭhabbaṃ.
ஸாதா⁴ரணபோ⁴கி³தாதி⁴ப்பாயேன அத்தனா பரிபு⁴ஞ்ஜிதப்³ப³தோ சதுபச்சயதோ ஸயமேவ அபு⁴ஞ்ஜித்வா பரேஸங் ஸங்விப⁴ஜனங் ஆமிஸஸங்விபா⁴கோ³. ஸாதா⁴ரணபோ⁴கி³தாதி⁴ப்பாயேனேவ அத்தனா விதி³தஸ்ஸ அதி⁴க³தஸ்ஸ த⁴ம்மஸ்ஸ அப்பொஸ்ஸுக்கோ அஹுத்வா பரேஸங் உபதே³ஸோ த⁴ம்மஸங்விபா⁴கோ³. சதூஹி பச்சயேஹி சதூஹி ச ஸங்க³ஹவத்தூ²ஹி பரேஸங் அனுக்³க³ண்ஹனங் அனுகம்பனங் ஆமிஸானுக்³க³ஹோ. வுத்தனயேனேவ த⁴ம்மேன பரேஸங் அனுக்³க³ண்ஹனங் அனுகம்பனங் த⁴ம்மானுக்³க³ஹோ. ஸேஸங் வுத்தனயமேவ.
Sādhāraṇabhogitādhippāyena attanā paribhuñjitabbato catupaccayato sayameva abhuñjitvā paresaṃ saṃvibhajanaṃ āmisasaṃvibhāgo. Sādhāraṇabhogitādhippāyeneva attanā viditassa adhigatassa dhammassa appossukko ahutvā paresaṃ upadeso dhammasaṃvibhāgo. Catūhi paccayehi catūhi ca saṅgahavatthūhi paresaṃ anuggaṇhanaṃ anukampanaṃ āmisānuggaho. Vuttanayeneva dhammena paresaṃ anuggaṇhanaṃ anukampanaṃ dhammānuggaho. Sesaṃ vuttanayameva.
கா³தா²ஸு யமாஹு தா³னங் பரமந்தி யங் தா³னங் சித்தகெ²த்ததெ³ய்யத⁴ம்மானங் உளாரபா⁴வேன பரமங் உத்தமங், போ⁴க³ஸம்பத்திஆதீ³னங் வா பூரணதோ ப²லனதோ, பரஸ்ஸ வா லோப⁴மச்ச²ரியாதி³கஸ்ஸ படிபக்க²ஸ்ஸ மத்³த³னதோ ஹிங்ஸனதோ ‘‘பரம’’ந்தி பு³த்³தா⁴ ப⁴க³வந்தோ ஆஹு. அனுத்தரந்தி யங் தா³னங் சேதனாதி³ஸம்பத்தியா ஸாதிஸயபவத்தியா அக்³க³பா⁴வேன அக்³க³விபாகத்தா ச உத்தரரஹிதங் அனுத்தரபா⁴வஸாத⁴னங் சாதி ஆஹு. யங் ஸங்விபா⁴க³ந்தி எத்தா²பி ‘‘பரமங் அனுத்தர’’ந்தி பத³த்³வயங் ஆனெத்வா யோஜேதப்³ப³ங். அவண்ணயீதி கித்தயி, ‘‘போ⁴ஜனங், பி⁴க்க²வே, த³த³மானோ தா³யகோ படிக்³கா³ஹகானங் பஞ்ச டா²னானி தே³தீ’’திஆதி³னா (அ॰ நி॰ 5.37), ‘‘ஏவங் சே, பி⁴க்க²வே, ஸத்தா ஜானெய்யுங் தா³னஸங்விபா⁴க³ஸ்ஸ விபாக’’ந்திஆதி³னா (இதிவு॰ 26) ச பஸங்ஸயி. யதா² பன தா³னங் ஸங்விபா⁴கோ³ ச பரமங் அனுத்தரஞ்ச ஹோதி, தங் த³ஸ்ஸேதுங் ‘‘அக்³க³ம்ஹீ’’திஆதி³ வுத்தங். தத்த² அக்³க³ம்ஹீதி ஸீலாதி³கு³ணவிஸேஸயோகே³ன ஸெட்டே² அனுத்தரே புஞ்ஞக்கெ²த்தே ஸம்மாஸம்பு³த்³தே⁴ அரியஸங்கே⁴ ச. பஸன்னசித்தோதி கம்மப²லஸத்³தா⁴ய ரதனத்தயஸத்³தா⁴ய ச சித்தங் பஸாதெ³ந்தோ ஓகப்பெந்தோ. சித்தஸம்பத்தியா ஹி கெ²த்தஸம்பத்தியா ச பரித்தேபி தெ³ய்யத⁴ம்மே தா³னங் மஹானுபா⁴வங் ஹோதி மஹாஜுதிகங் மஹாவிப்பா²ரங். வுத்தஞ்ஹேதங் –
Gāthāsu yamāhu dānaṃ paramanti yaṃ dānaṃ cittakhettadeyyadhammānaṃ uḷārabhāvena paramaṃ uttamaṃ, bhogasampattiādīnaṃ vā pūraṇato phalanato, parassa vā lobhamacchariyādikassa paṭipakkhassa maddanato hiṃsanato ‘‘parama’’nti buddhā bhagavanto āhu. Anuttaranti yaṃ dānaṃ cetanādisampattiyā sātisayapavattiyā aggabhāvena aggavipākattā ca uttararahitaṃ anuttarabhāvasādhanaṃ cāti āhu. Yaṃ saṃvibhāganti etthāpi ‘‘paramaṃ anuttara’’nti padadvayaṃ ānetvā yojetabbaṃ. Avaṇṇayīti kittayi, ‘‘bhojanaṃ, bhikkhave, dadamāno dāyako paṭiggāhakānaṃ pañca ṭhānāni detī’’tiādinā (a. ni. 5.37), ‘‘evaṃ ce, bhikkhave, sattā jāneyyuṃ dānasaṃvibhāgassa vipāka’’ntiādinā (itivu. 26) ca pasaṃsayi. Yathā pana dānaṃ saṃvibhāgo ca paramaṃ anuttarañca hoti, taṃ dassetuṃ ‘‘aggamhī’’tiādi vuttaṃ. Tattha aggamhīti sīlādiguṇavisesayogena seṭṭhe anuttare puññakkhette sammāsambuddhe ariyasaṅghe ca. Pasannacittoti kammaphalasaddhāya ratanattayasaddhāya ca cittaṃ pasādento okappento. Cittasampattiyā hi khettasampattiyā ca parittepi deyyadhamme dānaṃ mahānubhāvaṃ hoti mahājutikaṃ mahāvipphāraṃ. Vuttañhetaṃ –
‘‘நத்தி² சித்தே பஸன்னம்ஹி, அப்பகா நாம த³க்கி²ணா;
‘‘Natthi citte pasannamhi, appakā nāma dakkhiṇā;
ததா²க³தே வா ஸம்பு³த்³தே⁴, அத² வா தஸ்ஸ ஸாவகே’’தி. (வி॰ வ॰ 804; நெத்தி॰ 95);
Tathāgate vā sambuddhe, atha vā tassa sāvake’’ti. (vi. va. 804; netti. 95);
விஞ்ஞூதி ஸப்பஞ்ஞோ. பஜானந்தி ஸம்மதே³வ தா³னப²லங் தா³னானிஸங்ஸங் பஜானந்தோ. கோ ந யஜேத² காலேதி யுத்தப்பத்தகாலே கோ நாம தா³னங் ந த³தெ³ய்ய? ஸத்³தா⁴, தெ³ய்யத⁴ம்மோ, படிக்³கா³ஹகாதி இமேஸங் திண்ணங் ஸம்முகி²பூ⁴தகாலேயேவ ஹி தா³னங் ஸம்ப⁴வதி, ந அஞ்ஞதா², படிக்³கா³ஹகானங் வா தா³துங் யுத்தகாலே.
Viññūti sappañño. Pajānanti sammadeva dānaphalaṃ dānānisaṃsaṃ pajānanto. Ko na yajetha kāleti yuttappattakāle ko nāma dānaṃ na dadeyya? Saddhā, deyyadhammo, paṭiggāhakāti imesaṃ tiṇṇaṃ sammukhibhūtakāleyeva hi dānaṃ sambhavati, na aññathā, paṭiggāhakānaṃ vā dātuṃ yuttakāle.
ஏவங் பட²மகா³தா²ய ஆமிஸதா³னஸங்விபா⁴கா³னுக்³க³ஹே த³ஸ்ஸெத்வா இதா³னி த⁴ம்மதா³னஸங்விபா⁴கா³னுக்³க³ஹே த³ஸ்ஸேதுங் ‘‘யே சேவ பா⁴ஸந்தீ’’தி து³தியகா³த²மாஹ. தத்த² உப⁴யந்தி ‘‘பா⁴ஸந்தி ஸுணந்தீ’’தி வுத்தா தே³ஸகா படிக்³கா³ஹகாதி உப⁴யங். அயங் பனெத்த² ஸங்கே²பத்தோ² – யே ஸுக³தஸ்ஸ ப⁴க³வதோ ஸாஸனே ஸத்³த⁴ம்மே பஸன்னசித்தா விமுத்தாயதனஸீஸே ட²த்வா தே³ஸெந்தி படிக்³க³ண்ஹந்தி ச, தேஸங் தே³ஸகபடிக்³கா³ஹகானங் ஸோ த⁴ம்மதா³னத⁴ம்மஸங்விபா⁴க³த⁴ம்மானுக்³க³ஹஸங்கா²தோ அத்தோ². பரமத்த²ஸாத⁴னதோ பரமோ. தண்ஹாஸங்கிலேஸாதி³ஸப்³ப³ஸங்கிலேஸமலவிஸோத⁴னேன விஸுஜ்ஜ²தி. கீதி³ஸானங்? யே அப்பமத்தா ஸுக³தஸ்ஸ ஸாஸனே. யே ச –
Evaṃ paṭhamagāthāya āmisadānasaṃvibhāgānuggahe dassetvā idāni dhammadānasaṃvibhāgānuggahe dassetuṃ ‘‘ye ceva bhāsantī’’ti dutiyagāthamāha. Tattha ubhayanti ‘‘bhāsanti suṇantī’’ti vuttā desakā paṭiggāhakāti ubhayaṃ. Ayaṃ panettha saṅkhepattho – ye sugatassa bhagavato sāsane saddhamme pasannacittā vimuttāyatanasīse ṭhatvā desenti paṭiggaṇhanti ca, tesaṃ desakapaṭiggāhakānaṃ so dhammadānadhammasaṃvibhāgadhammānuggahasaṅkhāto attho. Paramatthasādhanato paramo. Taṇhāsaṃkilesādisabbasaṃkilesamalavisodhanena visujjhati. Kīdisānaṃ? Ye appamattā sugatassa sāsane. Ye ca –
‘‘ஸப்³ப³பாபஸ்ஸ அகரணங், குஸலஸ்ஸ உபஸம்பதா³;
‘‘Sabbapāpassa akaraṇaṃ, kusalassa upasampadā;
ஸசித்தபரியோத³பனங், ஏதங் பு³த்³தா⁴ன ஸாஸன’’ந்தி. (தீ³॰ நி॰ 2.90; த⁴॰ ப॰ 183) –
Sacittapariyodapanaṃ, etaṃ buddhāna sāsana’’nti. (dī. ni. 2.90; dha. pa. 183) –
ஸங்கே²பதோ ஏவங் பகாஸிதே ஸம்மாஸம்பு³த்³த⁴ஸ்ஸ ஸாஸனே ஓவாதே³ அனுஸிட்டி²யங் அப்பமத்தா அதி⁴ஸீலஸிக்கா²த³யோ ஸக்கச்சங் ஸம்பாதெ³ந்தி. தேஸங் விஸுஜ்ஜ²தி, அரஹத்தப²லவிஸுத்³தி⁴யா அதிவிய வோதா³யதீதி.
Saṅkhepato evaṃ pakāsite sammāsambuddhassa sāsane ovāde anusiṭṭhiyaṃ appamattā adhisīlasikkhādayo sakkaccaṃ sampādenti. Tesaṃ visujjhati, arahattaphalavisuddhiyā ativiya vodāyatīti.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 9. தா³னஸுத்தங் • 9. Dānasuttaṃ
