| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. த³ந்தபூ⁴மிஸுத்தவண்ணனா
5. Dantabhūmisuttavaṇṇanā
213. ஏவங் மே ஸுதந்தி த³ந்தபூ⁴மிஸுத்தங். தத்த² அரஞ்ஞகுடிகாயந்தி தஸ்ஸேவ வேளுவனஸ்ஸ ஏகஸ்மிங் விவித்தட்டா²னே பதா⁴னகம்மிகானங் பி⁴க்கூ²னங் அத்தா²ய கதஸேனாஸனே. ராஜகுமாரோதி பி³ம்பி³ஸாரஸ்ஸ புத்தோ ஓரஸகோ.
213.Evaṃme sutanti dantabhūmisuttaṃ. Tattha araññakuṭikāyanti tasseva veḷuvanassa ekasmiṃ vivittaṭṭhāne padhānakammikānaṃ bhikkhūnaṃ atthāya katasenāsane. Rājakumāroti bimbisārassa putto orasako.
பு²ஸெய்யாதி லபெ⁴ய்ய. ஏகக்³க³தந்தி ஏவங் படிபன்னோ ஸமாபத்திங் நாம லப⁴தி, ஜா²னங் நாம லப⁴தீதி இத³ங் மயா ஸுதந்தி வத³தி. கிலமதோ²தி காயகிலமதோ². விஹேஸாதி ஸ்வேவ கிலமதோ² வுத்தோ. யதா²ஸகே திட்டெ²ய்யாஸீதி அத்தனோ அஜானநகொட்டா²ஸேயேவ திட்டெ²ய்யாஸீதி.
Phuseyyāti labheyya. Ekaggatanti evaṃ paṭipanno samāpattiṃ nāma labhati, jhānaṃ nāma labhatīti idaṃ mayā sutanti vadati. Kilamathoti kāyakilamatho. Vihesāti sveva kilamatho vutto. Yathāsake tiṭṭheyyāsīti attano ajānanakoṭṭhāseyeva tiṭṭheyyāsīti.
214. தே³ஸேஸீதி சித்தேகக்³க³தங் நாம ஏவங் லப⁴தி, ஸமாபத்திங் ஏவங் நிப்³ப³த்தேதீதி அப்பனாஉபசாரங் பாபெத்வா ஏககஸிணபரிகம்மங் கதே²ஸி. பவேதெ³த்வாதி பகாஸெத்வா.
214.Desesīti cittekaggataṃ nāma evaṃ labhati, samāpattiṃ evaṃ nibbattetīti appanāupacāraṃ pāpetvā ekakasiṇaparikammaṃ kathesi. Pavedetvāti pakāsetvā.
நெக்க²ம்மேன ஞாதப்³ப³ந்தி காமதோ நிஸ்ஸடகு³ணேன ஞாதப்³ப³ங். காமதோ நிஸ்ஸடகு³ணே டி²தேன புக்³க³லேன ஏகக்³க³ங் நாம ஜானிதப்³ப³ந்தி அதி⁴ப்பாயேனேதங் வுத்தங் . ஸேஸானி தஸ்ஸேவ வேவசனானி. காமே பரிபு⁴ஞ்ஜந்தோதி து³விதே⁴பி காமே பு⁴ஞ்ஜமானோ.
Nekkhammena ñātabbanti kāmato nissaṭaguṇena ñātabbaṃ. Kāmato nissaṭaguṇe ṭhitena puggalena ekaggaṃ nāma jānitabbanti adhippāyenetaṃ vuttaṃ . Sesāni tasseva vevacanāni. Kāmeparibhuñjantoti duvidhepi kāme bhuñjamāno.
215. ஹத்தி²த³ம்மா வா அஸ்ஸத³ம்மா வா கோ³த³ம்மா வாதி எத்த² அத³ந்தஹத்தி²த³ம்மாத³யோ விய சித்தேகக்³க³ரஹிதா புக்³க³லா த³ட்ட²ப்³பா³. த³ந்தஹத்தி²ஆத³யோ விய சித்தேகக்³க³ஸம்பன்னா. யதா² அத³ந்தஹத்தி²த³ம்மாத³யோ கூடாகாரங் அகத்வா து⁴ரங் அச²ட்³டெ³த்வா த³ந்தக³மனங் வா க³ந்துங், த³ந்தேஹி வா பத்தப்³ப³ங் பூ⁴மிங் பாபுணிதுங் ந ஸக்கொந்தி, ஏவமேவ சித்தேகக்³க³ரஹிதா ஸம்பன்னசித்தேகக்³கே³ஹி நிப்³ப³த்திதகு³ணங் வா நிப்³ப³த்தேதுங் பத்தபூ⁴மிங் வா பாபுணிதுங் ந ஸக்கொந்தி.
215.Hatthidammā vā assadammā vā godammā vāti ettha adantahatthidammādayo viya cittekaggarahitā puggalā daṭṭhabbā. Dantahatthiādayo viya cittekaggasampannā. Yathā adantahatthidammādayo kūṭākāraṃ akatvā dhuraṃ achaḍḍetvā dantagamanaṃ vā gantuṃ, dantehi vā pattabbaṃ bhūmiṃ pāpuṇituṃ na sakkonti, evameva cittekaggarahitā sampannacittekaggehi nibbattitaguṇaṃ vā nibbattetuṃ pattabhūmiṃ vā pāpuṇituṃ na sakkonti.
216. ஹத்த²விலங்க⁴கேனாதி ஹத்தே²ன ஹத்த²ங் க³ஹெத்வா.
216.Hatthavilaṅghakenāti hatthena hatthaṃ gahetvā.
த³ட்டெ²ய்யந்தி பஸ்ஸிதப்³ப³யுத்தகங். ஆவுதோதி ஆவரிதோ. நிவுதோதி நிவாரிதோ. ஓபு²டோதி ஓனத்³தோ⁴.
Daṭṭheyyanti passitabbayuttakaṃ. Āvutoti āvarito. Nivutoti nivārito. Ophuṭoti onaddho.
217. நாக³வனிகந்தி ஹத்தி²பதோ³பமே (ம॰ நி॰ 1.288 ஆத³யோ) நாக³வனசரகோ புரிஸோ ‘‘நாக³வனிகோ’’தி வுத்தோ, இத⁴ ஹத்தி²ஸிக்கா²ய குஸலோ ஹத்தி²ங் க³ஹேதுங் ஸமத்தோ². அதிபஸ்ஸித்வாதி தி³ஸ்வா. எத்த²கே³தா⁴தி ஏதஸ்மிங் பவத்தகே³தா⁴. ஸரஸங்கப்பானந்தி தா⁴வனஸங்கப்பானங். மனுஸ்ஸகந்தேஸு ஸீலேஸு ஸமாத³பனாயாதி எத்த² யதா³ நாகோ³ இத்தி²புரிஸேஹி குமாரகுமாரிகாஹி ஸொண்டா³தீ³ஸு க³ஹெத்வா உபகேளயமானோ விகாரங் ந கரோதி ஸுகா²யதி, ததா³னேன மனுஸ்ஸகந்தானி ஸீலானி ஸமாதி³ன்னானி நாம ஹொந்தி.
217.Nāgavanikanti hatthipadopame (ma. ni. 1.288 ādayo) nāgavanacarako puriso ‘‘nāgavaniko’’ti vutto, idha hatthisikkhāya kusalo hatthiṃ gahetuṃ samattho. Atipassitvāti disvā. Etthagedhāti etasmiṃ pavattagedhā. Sarasaṅkappānanti dhāvanasaṅkappānaṃ. Manussakantesu sīlesu samādapanāyāti ettha yadā nāgo itthipurisehi kumārakumārikāhi soṇḍādīsu gahetvā upakeḷayamāno vikāraṃ na karoti sukhāyati, tadānena manussakantāni sīlāni samādinnāni nāma honti.
பேமனீயாதி தாத ராஜா தே பஸன்னோ மங்க³லஹத்தி²ட்டா²னேவ ட²பெஸ்ஸதி, ராஜாரஹானி போ⁴ஜனாதீ³னி லபி⁴ஸ்ஸஸீதி ஏவரூபீ நாகே³ஹி பியாபிதப்³பா³ கதா². ஸுஸ்ஸூஸதீதி தங் பேமனீயகத²ங் ஸோதுகாமோ ஹோதி. திணகா⁴ஸோத³கந்தி திணகா⁴ஸஞ்சேவ உத³கஞ்ச, திணகா⁴ஸந்தி கா⁴ஸிதப்³ப³ங் திணங், கா²தி³தப்³ப³ந்தி அத்தோ².
Pemanīyāti tāta rājā te pasanno maṅgalahatthiṭṭhāneva ṭhapessati, rājārahāni bhojanādīni labhissasīti evarūpī nāgehi piyāpitabbā kathā. Sussūsatīti taṃ pemanīyakathaṃ sotukāmo hoti. Tiṇaghāsodakanti tiṇaghāsañceva udakañca, tiṇaghāsanti ghāsitabbaṃ tiṇaṃ, khāditabbanti attho.
பணவோதி டி³ண்டி³மோ. ஸப்³ப³வங்கதோ³ஸனிஹிதனின்னீதகஸாவோதி நிஹிதஸப்³ப³வங்கதோ³ஸோ சேவ அபனீதகஸாவோ ச. அங்க³ந்தேவ ஸங்க²ங் க³ச்ச²தீதி அங்க³ஸமோ ஹோதி.
Paṇavoti ḍiṇḍimo. Sabbavaṅkadosanihitaninnītakasāvoti nihitasabbavaṅkadoso ceva apanītakasāvo ca. Aṅganteva saṅkhaṃ gacchatīti aṅgasamo hoti.
219. கே³ஹஸிதஸீலானந்தி பஞ்சகாமகு³ணனிஸ்ஸிதஸீலானங். ஞாயஸ்ஸாதி அட்ட²ங்கி³கமக்³க³ஸ்ஸ.
219.Gehasitasīlānanti pañcakāmaguṇanissitasīlānaṃ. Ñāyassāti aṭṭhaṅgikamaggassa.
222. அத³ந்தமரணங் மஹல்லகோ ரஞ்ஞோ நாகோ³ காலங்கதோதி ரஞ்ஞோ மஹல்லகோ நாகோ³ அத³ந்தமரணங் மதோ காலங் கதோ ஹோதி, அத³ந்தமரணங் காலங்கிரியங் நாம கரியதீதி அயமெத்த² அத்தோ². ஏஸ நயோ ஸப்³ப³த்த². ஸேஸங் உத்தானமேவாதி.
222.Adantamaraṇaṃ mahallako rañño nāgo kālaṅkatoti rañño mahallako nāgo adantamaraṇaṃ mato kālaṃ kato hoti, adantamaraṇaṃ kālaṃkiriyaṃ nāma kariyatīti ayamettha attho. Esa nayo sabbattha. Sesaṃ uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
த³ந்தபூ⁴மிஸுத்தவண்ணனா நிட்டி²தா.
Dantabhūmisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. த³ந்தபூ⁴மிஸுத்தங் • 5. Dantabhūmisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. த³ந்தபூ⁴மிஸுத்தவண்ணனா • 5. Dantabhūmisuttavaṇṇanā
