| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. தா³ருகம்மிகஸுத்தங்
5. Dārukammikasuttaṃ
59. ஏவங் மே ஸுதங் – ஏகங் ஸமயங் ப⁴க³வா நாதிகே விஹரதி கி³ஞ்ஜகாவஸதே². அத² கோ² தா³ருகம்மிகோ க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² தா³ருகம்மிகங் க³ஹபதிங் ப⁴க³வா ஏதத³வோச – ‘‘அபி நு தே, க³ஹபதி, குலே தா³னங் தீ³யதீ’’தி? ‘‘தீ³யதி மே, ப⁴ந்தே, குலே தா³னங். தஞ்ச கோ² யே தே பி⁴க்கூ² ஆரஞ்ஞிகா பிண்ட³பாதிகா பங்ஸுகூலிகா அரஹந்தோ வா அரஹத்தமக்³க³ங் வா ஸமாபன்னா, ததா²ரூபேஸு மே, ப⁴ந்தே, பி⁴க்கூ²ஸு தா³னங் தீ³யதீ’’தி.
59. Evaṃ me sutaṃ – ekaṃ samayaṃ bhagavā nātike viharati giñjakāvasathe. Atha kho dārukammiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho dārukammikaṃ gahapatiṃ bhagavā etadavoca – ‘‘api nu te, gahapati, kule dānaṃ dīyatī’’ti? ‘‘Dīyati me, bhante, kule dānaṃ. Tañca kho ye te bhikkhū āraññikā piṇḍapātikā paṃsukūlikā arahanto vā arahattamaggaṃ vā samāpannā, tathārūpesu me, bhante, bhikkhūsu dānaṃ dīyatī’’ti.
‘‘து³ஜ்ஜானங் கோ² ஏதங், க³ஹபதி, தயா கி³ஹினா காமபோ⁴கி³னா புத்தஸம்பா³த⁴ஸயனங் அஜ்ஜா²வஸந்தேன, காஸிகசந்த³னங் பச்சனுபொ⁴ந்தேன, மாலாக³ந்த⁴விலேபனங் தா⁴ரயந்தேன, ஜாதரூபரஜதங் ஸாதி³யந்தேன இமே வா அரஹந்தோ இமே வா அரஹத்தமக்³க³ங் ஸமாபன்னாதி.
‘‘Dujjānaṃ kho etaṃ, gahapati, tayā gihinā kāmabhoginā puttasambādhasayanaṃ ajjhāvasantena, kāsikacandanaṃ paccanubhontena, mālāgandhavilepanaṃ dhārayantena, jātarūparajataṃ sādiyantena ime vā arahanto ime vā arahattamaggaṃ samāpannāti.
‘‘ஆரஞ்ஞிகோ சேபி, க³ஹபதி, பி⁴க்கு² ஹோதி உத்³த⁴தோ உன்னளோ சபலோ முக²ரோ விகிண்ணவாசோ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ. ஏவங் ஸோ தேனங்கே³ன கா³ரய்ஹோ. ஆரஞ்ஞிகோ சேபி, க³ஹபதி, பி⁴க்கு² ஹோதி அனுத்³த⁴தோ அனுன்னளோ அசபலோ அமுக²ரோ அவிகிண்ணவாசோ உபட்டி²தஸ்ஸதி ஸம்பஜானோ ஸமாஹிதோ ஏகக்³க³சித்தோ ஸங்வுதிந்த்³ரியோ. ஏவங் ஸோ தேனங்கே³ன பாஸங்ஸோ.
‘‘Āraññiko cepi, gahapati, bhikkhu hoti uddhato unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo. Evaṃ so tenaṅgena gārayho. Āraññiko cepi, gahapati, bhikkhu hoti anuddhato anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṃvutindriyo. Evaṃ so tenaṅgena pāsaṃso.
‘‘கா³மந்தவிஹாரீ சேபி, க³ஹபதி, பி⁴க்கு² ஹோதி உத்³த⁴தோ…பே॰… ஏவங் ஸோ தேனங்கே³ன கா³ரய்ஹோ. கா³மந்தவிஹாரீ சேபி, க³ஹபதி, பி⁴க்கு² ஹோதி அனுத்³த⁴தோ…பே॰… ஏவங் ஸோ தேனங்கே³ன பாஸங்ஸோ.
‘‘Gāmantavihārī cepi, gahapati, bhikkhu hoti uddhato…pe… evaṃ so tenaṅgena gārayho. Gāmantavihārī cepi, gahapati, bhikkhu hoti anuddhato…pe… evaṃ so tenaṅgena pāsaṃso.
‘‘பிண்ட³பாதிகோ சேபி, க³ஹபதி, பி⁴க்கு² ஹோதி உத்³த⁴தோ…பே॰… ஏவங் ஸோ தேனங்கே³ன கா³ரய்ஹோ. பிண்ட³பாதிகோ சேபி, க³ஹபதி, பி⁴க்கு² ஹோதி அனுத்³த⁴தோ…பே॰… ஏவங் ஸோ தேனங்கே³ன பாஸங்ஸோ.
‘‘Piṇḍapātiko cepi, gahapati, bhikkhu hoti uddhato…pe… evaṃ so tenaṅgena gārayho. Piṇḍapātiko cepi, gahapati, bhikkhu hoti anuddhato…pe… evaṃ so tenaṅgena pāsaṃso.
‘‘நேமந்தனிகோ சேபி, க³ஹபதி, பி⁴க்கு² ஹோதி உத்³த⁴தோ…பே॰… ஏவங் ஸோ தேனங்கே³ன கா³ரய்ஹோ. நேமந்தனிகோ சேபி, க³ஹபதி, பி⁴க்கு² ஹோதி அனுத்³த⁴தோ…பே॰… ஏவங் ஸோ தேனங்கே³ன பாஸங்ஸோ.
‘‘Nemantaniko cepi, gahapati, bhikkhu hoti uddhato…pe… evaṃ so tenaṅgena gārayho. Nemantaniko cepi, gahapati, bhikkhu hoti anuddhato…pe… evaṃ so tenaṅgena pāsaṃso.
‘‘பங்ஸுகூலிகோ சேபி, க³ஹபதி, பி⁴க்கு² ஹோதி உத்³த⁴தோ…பே॰… ஏவங் ஸோ தேனங்கே³ன கா³ரய்ஹோ . பங்ஸுகூலிகோ சேபி, க³ஹபதி, பி⁴க்கு² ஹோதி அனுத்³த⁴தோ…பே॰… ஏவங் ஸோ தேனங்கே³ன பாஸங்ஸோ.
‘‘Paṃsukūliko cepi, gahapati, bhikkhu hoti uddhato…pe… evaṃ so tenaṅgena gārayho . Paṃsukūliko cepi, gahapati, bhikkhu hoti anuddhato…pe… evaṃ so tenaṅgena pāsaṃso.
‘‘க³ஹபதிசீவரத⁴ரோ சேபி, க³ஹபதி, பி⁴க்கு² ஹோதி உத்³த⁴தோ உன்னளோ சபலோ முக²ரோ விகிண்ணவாசோ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ. ஏவங் ஸோ தேனங்கே³ன கா³ரய்ஹோ. க³ஹபதிசீவரத⁴ரோ சேபி, க³ஹபதி, பி⁴க்கு² ஹோதி அனுத்³த⁴தோ அனுன்னளோ அசபலோ அமுக²ரோ அவிகிண்ணவாசோ உபட்டி²தஸ்ஸதி ஸம்பஜானோ ஸமாஹிதோ ஏகக்³க³சித்தோ ஸங்வுதிந்த்³ரியோ. ஏவங் ஸோ தேனங்கே³ன பாஸங்ஸோ.
‘‘Gahapaticīvaradharo cepi, gahapati, bhikkhu hoti uddhato unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo. Evaṃ so tenaṅgena gārayho. Gahapaticīvaradharo cepi, gahapati, bhikkhu hoti anuddhato anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṃvutindriyo. Evaṃ so tenaṅgena pāsaṃso.
‘‘இங்க⁴ த்வங், க³ஹபதி, ஸங்கே⁴ தா³னங் 1 தே³ஹி. ஸங்கே⁴ தே தா³னங் த³த³தோ சித்தங் பஸீதி³ஸ்ஸதி. ஸோ த்வங் பஸன்னசித்தோ காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிஸ்ஸஸீ’’தி. ‘‘ஏஸாஹங், ப⁴ந்தே, அஜ்ஜதக்³கே³ ஸங்கே⁴ தா³னங் த³ஸ்ஸாமீ’’தி. பஞ்சமங்.
‘‘Iṅgha tvaṃ, gahapati, saṅghe dānaṃ 2 dehi. Saṅghe te dānaṃ dadato cittaṃ pasīdissati. So tvaṃ pasannacitto kāyassa bhedā paraṃ maraṇā sugatiṃ saggaṃ lokaṃ upapajjissasī’’ti. ‘‘Esāhaṃ, bhante, ajjatagge saṅghe dānaṃ dassāmī’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. தா³ருகம்மிகஸுத்தவண்ணனா • 5. Dārukammikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. தா³ருகம்மிகஸுத்தவண்ணனா • 5. Dārukammikasuttavaṇṇanā
