| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
11. தா³ருக்க²ந்த⁴ஸுத்தங்
11. Dārukkhandhasuttaṃ
41. ஏவங் மே ஸுதங் – ஏகங் ஸமயங் ஆயஸ்மா ஸாரிபுத்தோ ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ஆயஸ்மா ஸாரிபுத்தோ புப்³ப³ண்ஹஸமயங் நிவாஸெத்வா பத்தசீவரமாதா³ய ஸம்ப³ஹுலேஹி பி⁴க்கூ²ஹி ஸத்³தி⁴ங் கி³ஜ்ஜ²கூடா பப்³ப³தா ஓரோஹந்தோ அத்³த³ஸ அஞ்ஞதரஸ்மிங் பதே³ஸே மஹந்தங் தா³ருக்க²ந்த⁴ங். தி³ஸ்வா பி⁴க்கூ² ஆமந்தேஸி – ‘‘பஸ்ஸத² நோ, ஆவுஸோ, தும்ஹே அமுங் மஹந்தங் தா³ருக்க²ந்த⁴’’ந்தி? ‘‘ஏவமாவுஸோ’’தி.
41. Evaṃ me sutaṃ – ekaṃ samayaṃ āyasmā sāriputto rājagahe viharati gijjhakūṭe pabbate. Atha kho āyasmā sāriputto pubbaṇhasamayaṃ nivāsetvā pattacīvaramādāya sambahulehi bhikkhūhi saddhiṃ gijjhakūṭā pabbatā orohanto addasa aññatarasmiṃ padese mahantaṃ dārukkhandhaṃ. Disvā bhikkhū āmantesi – ‘‘passatha no, āvuso, tumhe amuṃ mahantaṃ dārukkhandha’’nti? ‘‘Evamāvuso’’ti.
‘‘ஆகங்க²மானோ, ஆவுஸோ, பி⁴க்கு² இத்³தி⁴மா சேதோவஸிப்பத்தோ அமுங் தா³ருக்க²ந்த⁴ங் பத²வீத்வேவ அதி⁴முச்செய்ய. தங் கிஸ்ஸ ஹேது? அத்தி², ஆவுஸோ , அமும்ஹி தா³ருக்க²ந்தே⁴ பத²வீதா⁴து, யங் நிஸ்ஸாய பி⁴க்கு² இத்³தி⁴மா சேதோவஸிப்பத்தோ அமுங் தா³ருக்க²ந்த⁴ங் பத²வீத்வேவ அதி⁴முச்செய்ய. ஆகங்க²மானோ, ஆவுஸோ, பி⁴க்கு² இத்³தி⁴மா சேதோவஸிப்பத்தோ அமுங் தா³ருக்க²ந்த⁴ங் ஆபொத்வேவ அதி⁴முச்செய்ய …பே॰… தேஜொத்வேவ அதி⁴முச்செய்ய… வாயொத்வேவ அதி⁴முச்செய்ய… ஸுப⁴ந்த்வேவ அதி⁴முச்செய்ய… அஸுப⁴ந்த்வேவ அதி⁴முச்செய்ய. தங் கிஸ்ஸ ஹேது? அத்தி², ஆவுஸோ, அமும்ஹி தா³ருக்க²ந்தே⁴ அஸுப⁴தா⁴து, யங் நிஸ்ஸாய பி⁴க்கு² இத்³தி⁴மா சேதோவஸிப்பத்தோ அமுங் தா³ருக்க²ந்த⁴ங் அஸுப⁴ந்த்வேவ அதி⁴முச்செய்யா’’தி. ஏகாத³ஸமங்.
‘‘Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ pathavītveva adhimucceyya. Taṃ kissa hetu? Atthi, āvuso , amumhi dārukkhandhe pathavīdhātu, yaṃ nissāya bhikkhu iddhimā cetovasippatto amuṃ dārukkhandhaṃ pathavītveva adhimucceyya. Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ āpotveva adhimucceyya …pe… tejotveva adhimucceyya… vāyotveva adhimucceyya… subhantveva adhimucceyya… asubhantveva adhimucceyya. Taṃ kissa hetu? Atthi, āvuso, amumhi dārukkhandhe asubhadhātu, yaṃ nissāya bhikkhu iddhimā cetovasippatto amuṃ dārukkhandhaṃ asubhantveva adhimucceyyā’’ti. Ekādasamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 11. தா³ருக்க²ந்த⁴ஸுத்தவண்ணனா • 11. Dārukkhandhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-11. அத்தகாரீஸுத்தாதி³வண்ணனா • 8-11. Attakārīsuttādivaṇṇanā
