| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. த³ஸகம்மஸுத்தங்
4. Dasakammasuttaṃ
204. ‘‘அஸப்புரிஸஞ்ச வோ, பி⁴க்க²வே, தே³ஸெஸ்ஸாமி, அஸப்புரிஸேன அஸப்புரிஸதரஞ்ச ; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தங் ஸுணாத²…பே॰….
204. ‘‘Asappurisañca vo, bhikkhave, desessāmi, asappurisena asappurisatarañca ; sappurisañca, sappurisena sappurisatarañca. Taṃ suṇātha…pe….
‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி, ப்³யாபன்னசித்தோ ஹோதி, மிச்சா²தி³ட்டி²கோ ஹோதி. அயங் வுச்சதி, பி⁴க்க²வே, அஸப்புரிஸோ.
‘‘Katamo ca, bhikkhave, asappuriso? Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti. Ayaṃ vuccati, bhikkhave, asappuriso.
‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி…பே॰… அத்தனா ச அபி⁴ஜ்ஜா²லு ஹோதி, பரஞ்ச அபி⁴ஜ்ஜா²ய ஸமாத³பேதி; அத்தனா ச ப்³யாபன்னசித்தோ ஹோதி, பரஞ்ச ப்³யாபாதே³ ஸமாத³பேதி, அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி. அயங் வுச்சதி, பி⁴க்க²வே, அஸப்புரிஸேன அஸப்புரிஸதரோ.
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca pāṇātipātī hoti, parañca pāṇātipāte samādapeti…pe… attanā ca abhijjhālu hoti, parañca abhijjhāya samādapeti; attanā ca byāpannacitto hoti, parañca byāpāde samādapeti, attanā ca micchādiṭṭhiko hoti, parañca micchādiṭṭhiyā samādapeti. Ayaṃ vuccati, bhikkhave, asappurisena asappurisataro.
‘‘கதமோ ச, பி⁴க்க²வே, ஸப்புரிஸோ ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி…பே॰… அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி²கோ ஹோதி. அயங் வுச்சதி, பி⁴க்க²வே, ஸப்புரிஸோ.
‘‘Katamo ca, bhikkhave, sappuriso ? Idha, bhikkhave, ekacco pāṇātipātā paṭivirato hoti…pe… anabhijjhālu hoti, abyāpannacitto hoti, sammādiṭṭhiko hoti. Ayaṃ vuccati, bhikkhave, sappuriso.
‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி…பே॰… அத்தனா ச அனபி⁴ஜ்ஜா²லு ஹோதி, பரஞ்ச அனபி⁴ஜ்ஜா²ய ஸமாத³பேதி; அத்தனா ச அப்³யாபன்னசித்தோ ஹோதி, பரஞ்ச அப்³யாபாதே³ ஸமாத³பேதி; அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி. அயங் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. சதுத்த²ங்.
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti…pe… attanā ca anabhijjhālu hoti, parañca anabhijjhāya samādapeti; attanā ca abyāpannacitto hoti, parañca abyāpāde samādapeti; attanā ca sammādiṭṭhiko hoti, parañca sammādiṭṭhiyā samādapeti. Ayaṃ vuccati, bhikkhave, sappurisena sappurisataro’’ti. Catutthaṃ.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸிக்கா²பத³ஸுத்தாதி³வண்ணனா • 1-10. Sikkhāpadasuttādivaṇṇanā
