| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
2. தே³ஸனாஸுத்தவண்ணனா
2. Desanāsuttavaṇṇanā
39. து³தியே பரியாயேனாதி எத்த² பரியாய-ஸத்³தோ³ ‘‘மது⁴பிண்டி³கபரியாயொத்வேவ நங் தா⁴ரேஹீ’’திஆதீ³ஸு (ம॰ நி॰ 1.205) தே³ஸனாயங் ஆக³தோ. ‘‘அத்தி² க்²வேஸ , ப்³ராஹ்மண, பரியாயோ, யேன மங் பரியாயேன ஸம்மா வத³மானோ வதெ³ய்ய – அகிரியவாதோ³ ஸமணோ கோ³தமோ’’திஆதீ³ஸு (பாரா॰ 5; அ॰ நி॰ 8.11) காரணே. ‘‘கஸ்ஸ நு கோ², ஆனந்த³, அஜ்ஜ பரியாயோ பி⁴க்கு²னியோ ஓவதி³து’’ந்திஆதீ³ஸு (ம॰ நி॰ 3.398) வாரே. இத⁴ பன வாரேபி காரணேபி வட்டதி, தஸ்மா, பி⁴க்க²வே, ததா²க³தஸ்ஸ த்³வே த⁴ம்மதே³ஸனா யதா²ரஹங் காரணேன ப⁴வந்தி, வாரேன வாதி அயமெத்த² அத்தோ². ப⁴க³வா ஹி வேனெய்யஜ்ஜா²ஸயானுரூபங் கதா³சி ‘‘இமே த⁴ம்மா குஸலா, இமே, த⁴ம்மா அகுஸலா. இமே த⁴ம்மா ஸாவஜ்ஜா, இமே த⁴ம்மா அனவஜ்ஜா. இமே ஸேவிதப்³பா³, இமே ந ஸேவிதப்³பா³’’திஆதி³னா குஸலாகுஸலத⁴ம்மே விப⁴ஜந்தோ குஸலத⁴ம்மேஹி அகுஸலத⁴ம்மே அஸங்கரதோ பஞ்ஞாபெந்தோ ‘‘பாபங் பாபகதோ பஸ்ஸதா²’’தி த⁴ம்மங் தே³ஸேதி. கதா³சி ‘‘பாணாதிபாதோ, பி⁴க்க²வே, ஆஸேவிதோ பா⁴விதோ ப³ஹுலீகதோ நிரயஸங்வத்தனிகோ திரச்சா²னயோனிஸங்வத்தனிகோ பெத்திவிஸயஸங்வத்தனிகோ, யோ ஸப்³ப³லஹுகோ பாணாதிபாதோ, ஸோ அப்பாயுகஸங்வத்தனிகோ’’திஆதி³னா (அ॰ நி॰ 8.40) ஆதீ³னவங் பகாஸெந்தோ பாபதோ நிப்³பி³தா³தீ³ஹி நியோஜெந்தோ ‘‘நிப்³பி³ந்த³த² விரஜ்ஜதா²’’தி த⁴ம்மங் தே³ஸேதி.
39. Dutiye pariyāyenāti ettha pariyāya-saddo ‘‘madhupiṇḍikapariyāyotveva naṃ dhārehī’’tiādīsu (ma. ni. 1.205) desanāyaṃ āgato. ‘‘Atthi khvesa , brāhmaṇa, pariyāyo, yena maṃ pariyāyena sammā vadamāno vadeyya – akiriyavādo samaṇo gotamo’’tiādīsu (pārā. 5; a. ni. 8.11) kāraṇe. ‘‘Kassa nu kho, ānanda, ajja pariyāyo bhikkhuniyo ovaditu’’ntiādīsu (ma. ni. 3.398) vāre. Idha pana vārepi kāraṇepi vaṭṭati, tasmā, bhikkhave, tathāgatassa dve dhammadesanā yathārahaṃ kāraṇena bhavanti, vārena vāti ayamettha attho. Bhagavā hi veneyyajjhāsayānurūpaṃ kadāci ‘‘ime dhammā kusalā, ime, dhammā akusalā. Ime dhammā sāvajjā, ime dhammā anavajjā. Ime sevitabbā, ime na sevitabbā’’tiādinā kusalākusaladhamme vibhajanto kusaladhammehi akusaladhamme asaṅkarato paññāpento ‘‘pāpaṃ pāpakato passathā’’ti dhammaṃ deseti. Kadāci ‘‘pāṇātipāto, bhikkhave, āsevito bhāvito bahulīkato nirayasaṃvattaniko tiracchānayonisaṃvattaniko pettivisayasaṃvattaniko, yo sabbalahuko pāṇātipāto, so appāyukasaṃvattaniko’’tiādinā (a. ni. 8.40) ādīnavaṃ pakāsento pāpato nibbidādīhi niyojento ‘‘nibbindatha virajjathā’’ti dhammaṃ deseti.
ப⁴வந்தீதி ஹொந்தி பவத்தந்தி. பாபங் பாபகதோ பஸ்ஸதா²தி ஸப்³ப³ங் பாபத⁴ம்மங் தி³ட்டே²வ த⁴ம்மே ஆயதிஞ்ச அஹிதது³க்கா²வஹதோ லாமகதோ பஸ்ஸத². தத்த² நிப்³பி³ந்த³தா²தி தஸ்மிங் பாபத⁴ம்மே ‘‘அச்சந்தஹீனபா⁴வதோ லாமகட்டே²ன பாபங், அகோஸல்லஸம்பூ⁴தட்டே²ன அகுஸலங், பகதிபப⁴ஸ்ஸரஸ்ஸ பஸன்னஸ்ஸ ச சித்தஸ்ஸ பப⁴ஸ்ஸராதி³பா⁴வவினாஸனதோ ஸங்கிலேஸிகங், புனப்புனங் ப⁴வது³க்க²னிப்³ப³த்தனதோ போனொப்³ப⁴விகங், ஸஹேவ த³ரதே²ஹி பரிளாஹேஹி வத்தனதோ ஸத³ரத²ங், து³க்க²ஸ்ஸேவ விபச்சனதோ து³க்க²விபாகங், அபரிமாணம்பி காலங் அனாக³தே ஜாதிஜராமரணனிப்³ப³த்தனதோ ஆயதிங் ஜாதிஜராமரணியங், ஸப்³ப³ஹிதஸுக²வித்³த⁴ங்ஸனஸமத்த²’’ந்திஆதி³னா நயேன நானாவிதே⁴ ஆதீ³னவே, தஸ்ஸ ச பஹானே ஆனிஸங்ஸே ஸம்மபஞ்ஞாய பஸ்ஸந்தா நிப்³பி³ந்த³த² நிப்³பே³த³ங் ஆபஜ்ஜத². நிப்³பி³ந்த³ந்தா ச விபஸ்ஸனங் வட்³டெ⁴த்வா அரியமக்³கா³தி⁴க³மேன பாபதோ விரஜ்ஜத² சேவ விமுச்சத² ச. மக்³கே³ன வா ஸமுச்சே²த³விராக³வஸேன விரஜ்ஜத², ததோ ப²லேன படிப்பஸ்ஸத்³தி⁴விமுத்திவஸேன விமுச்சத². அத² வா பாபந்தி லாமகதோ பாபங். கிங் வுத்தங் ஹோதி? யங் அனிச்சது³க்கா²தி³பா⁴வேன குச்சி²தங் அரியேஹி ஜிகு³ச்ச²னீயங் வட்டது³க்க²ங் பாபேதீதி பாபங். கிங் பன தங்? தேபூ⁴மகத⁴ம்மஜாதங் . யதா²வுத்தேன அத்தே²ன பாபகதோ தி³ஸ்வா தத்த² அனிச்சதோ, து³க்க²தோ, ரோக³தோ, க³ண்ட³தோ, ஸல்லதோ, அக⁴தோ, ஆபா³த⁴தோதிஆதி³னா விபஸ்ஸனங் வட்³டெ⁴ந்தா நிப்³பி³ந்த³த². அயங் து³தியாதி யாதா²வதோ அஹிதானத்த²விபா⁴வனங் பட²மங் உபாதா³ய ததோ விவேசனங் அயங் து³தியா த⁴ம்மதே³ஸனா.
Bhavantīti honti pavattanti. Pāpaṃ pāpakato passathāti sabbaṃ pāpadhammaṃ diṭṭheva dhamme āyatiñca ahitadukkhāvahato lāmakato passatha. Tattha nibbindathāti tasmiṃ pāpadhamme ‘‘accantahīnabhāvato lāmakaṭṭhena pāpaṃ, akosallasambhūtaṭṭhena akusalaṃ, pakatipabhassarassa pasannassa ca cittassa pabhassarādibhāvavināsanato saṃkilesikaṃ, punappunaṃ bhavadukkhanibbattanato ponobbhavikaṃ, saheva darathehi pariḷāhehi vattanato sadarathaṃ, dukkhasseva vipaccanato dukkhavipākaṃ, aparimāṇampi kālaṃ anāgate jātijarāmaraṇanibbattanato āyatiṃ jātijarāmaraṇiyaṃ, sabbahitasukhaviddhaṃsanasamattha’’ntiādinā nayena nānāvidhe ādīnave, tassa ca pahāne ānisaṃse sammapaññāya passantā nibbindatha nibbedaṃ āpajjatha. Nibbindantā ca vipassanaṃ vaḍḍhetvā ariyamaggādhigamena pāpato virajjatha ceva vimuccatha ca. Maggena vā samucchedavirāgavasena virajjatha, tato phalena paṭippassaddhivimuttivasena vimuccatha. Atha vā pāpanti lāmakato pāpaṃ. Kiṃ vuttaṃ hoti? Yaṃ aniccadukkhādibhāvena kucchitaṃ ariyehi jigucchanīyaṃ vaṭṭadukkhaṃ pāpetīti pāpaṃ. Kiṃ pana taṃ? Tebhūmakadhammajātaṃ . Yathāvuttena atthena pāpakato disvā tattha aniccato, dukkhato, rogato, gaṇḍato, sallato, aghato, ābādhatotiādinā vipassanaṃ vaḍḍhentā nibbindatha. Ayaṃ dutiyāti yāthāvato ahitānatthavibhāvanaṃ paṭhamaṃ upādāya tato vivecanaṃ ayaṃ dutiyā dhammadesanā.
கா³தா²ஸு பு³த்³த⁴ஸ்ஸாதி ஸப்³ப³ஞ்ஞுபு³த்³த⁴ஸ்ஸ. ஸப்³ப³பூ⁴தானுகம்பினோதி ஸப்³பே³பி ஸத்தே மஹாகருணாய அனுகம்பனஸபா⁴வஸ்ஸ. பரியாயவசனந்தி பரியாயேன கத²னங் தே³ஸனங். பஸ்ஸாதி பரிஸங் ஆலபதி, பரிஸஜெட்ட²கங் வா ஸந்தா⁴ய வுத்தங். கேசி பனாஹு ‘‘அத்தானமேவ ஸந்தா⁴ய ப⁴க³வா ‘பஸ்ஸா’தி அவோசா’’தி. தத்தா²தி தஸ்மிங் பாபகே விரஜ்ஜத² ராக³ங் பஜஹதா²தி அத்தோ². ஸேஸங் வுத்தனயமேவ.
Gāthāsu buddhassāti sabbaññubuddhassa. Sabbabhūtānukampinoti sabbepi satte mahākaruṇāya anukampanasabhāvassa. Pariyāyavacananti pariyāyena kathanaṃ desanaṃ. Passāti parisaṃ ālapati, parisajeṭṭhakaṃ vā sandhāya vuttaṃ. Keci panāhu ‘‘attānameva sandhāya bhagavā ‘passā’ti avocā’’ti. Tatthāti tasmiṃ pāpake virajjatha rāgaṃ pajahathāti attho. Sesaṃ vuttanayameva.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 2. தே³ஸனாஸுத்தங் • 2. Desanāsuttaṃ
