| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. தே³வத³ஹஸுத்தவண்ணனா
2. Devadahasuttavaṇṇanā
2. தே³வா வுச்சந்தி ராஜானோ ‘‘தி³ப்³ப³ந்தி காமகு³ணேஹி கீளந்தி லளந்தி, அத்தனோ வா புஞ்ஞானுபா⁴வேன ஜோதந்தீ’’தி கத்வா. தேஸங் த³ஹோதி தே³வத³ஹோ. ஸயங்ஜாதோ வா ஸோ ஹோதி, தஸ்மாபி ‘‘தே³வத³ஹோ’’தி வுத்தோ. தஸ்ஸ அவிதூ³ரே நிக³மோ ‘‘தே³வத³ஹ’’ந்த்வேவ ஸங்க²ங் க³தோ யதா² ‘‘வரணானக³ரங், கோ³தா⁴கா³மோ’’தி. பச்சா²பூ⁴மியங் அபரதி³ஸாயங் நிவிட்ட²ஜனபதோ³ பச்சா²பூ⁴மங், தங் க³ந்துகாமா பச்சா²பூ⁴மக³மிகா. தே ஸபா⁴ரேதி தே பி⁴க்கூ² தே²ரஸ்ஸ வஸேன ஸபா⁴ரே காதுகாமதாய. யதி³ தே²ரோ தேஸங் பா⁴ரோ, தே²ரஸ்ஸபி தே பா⁴ரா ஏவாதி ‘‘தே ஸபா⁴ரே காதுகாமதாயா’’தி வுத்தங். ஏவஞ்ஹி தே²ரோ தே ஓவதி³தப்³பே³ அனுஸாஸிதப்³பே³ மஞ்ஞதீதி. இதா³னி தமத்த²ங் விவரந்தோ ‘‘யோ ஹீ’’திஆதி³மாஹ. அயங் நிப்³பா⁴ரோ நாம கஞ்சி புக்³க³லங் அத்தனோ பா⁴ரங் கத்வா அவத்தனதோ.
2.Devāvuccanti rājāno ‘‘dibbanti kāmaguṇehi kīḷanti laḷanti, attano vā puññānubhāvena jotantī’’ti katvā. Tesaṃ dahoti devadaho. Sayaṃjāto vā so hoti, tasmāpi ‘‘devadaho’’ti vutto. Tassa avidūre nigamo ‘‘devadaha’’ntveva saṅkhaṃ gato yathā ‘‘varaṇānagaraṃ, godhāgāmo’’ti. Pacchābhūmiyaṃ aparadisāyaṃ niviṭṭhajanapado pacchābhūmaṃ, taṃ gantukāmā pacchābhūmagamikā. Te sabhāreti te bhikkhū therassa vasena sabhāre kātukāmatāya. Yadi thero tesaṃ bhāro, therassapi te bhārā evāti ‘‘te sabhāre kātukāmatāyā’’ti vuttaṃ. Evañhi thero te ovaditabbe anusāsitabbe maññatīti. Idāni tamatthaṃ vivaranto ‘‘yo hī’’tiādimāha. Ayaṃ nibbhāro nāma kañci puggalaṃ attano bhāraṃ katvā avattanato.
சதுப்³பி³தே⁴னாதி தா⁴துகோஸல்லங் ஆயதனகோஸல்லங் படிச்சஸமுப்பாத³கோஸல்லங் டா²னாட்டா²னகோஸல்லந்தி ஏவங் சதுப்³பி³தே⁴ன.
Catubbidhenāti dhātukosallaṃ āyatanakosallaṃ paṭiccasamuppādakosallaṃ ṭhānāṭṭhānakosallanti evaṃ catubbidhena.
தே மஹல்லகாபா³தி⁴காதித³ஹரபுக்³க³லே க³ண்ஹித்வாவ க³ச்ச²தி. தே ஹி தி³வஸத்³வயேன வூபஸந்தபரிஸ்ஸமா ஏவ. ஹத்தி²வானரதித்திரபடிப³த்³த⁴ங் வத்து²ங் கதெ²த்வா. ‘‘ஏளகாளகு³ம்பே³தி காளதிணக³ச்ச²மண்ட³பே’’திபி வத³ந்தி.
Te mahallakābādhikātidaharapuggale gaṇhitvāva gacchati. Te hi divasadvayena vūpasantaparissamā eva. Hatthivānaratittirapaṭibaddhaṃ vatthuṃ kathetvā. ‘‘Eḷakāḷagumbeti kāḷatiṇagacchamaṇḍape’’tipi vadanti.
விவித⁴ங் நானாபூ⁴தங் ரஜ்ஜங் விரஜ்ஜங், விரஜ்ஜமேவ வேரஜ்ஜங், தத்த² க³தங், பரதே³ஸக³தந்தி அத்தோ². தேனாஹ ‘‘ஏகஸ்ஸா’’திஆதி³. சித்தஸுத³த்தாத³யோதி சித்தக³ஹபதிஅனாத²பிண்டி³காத³யோ. வீமங்ஸகாதி த⁴ம்மவிசாரகா. கிந்தி கீதி³ஸங். த³ஸ்ஸனந்தி ஸித்³த⁴ந்தங். ஆசிக்க²தி கீதி³ஸந்தி அதி⁴ப்பாயோ. த⁴ம்மஸ்ஸாதி ப⁴க³வதா வுத்தத⁴ம்மஸ்ஸ. அனுத⁴ம்மந்தி அனுகூலங் அவிருஜ்ஜ²னத⁴ம்மங். ஸோ பன வேனெய்யஜ்ஜா²ஸயானுரூபதே³ஸனாவித்தா²ரோதி ஆஹ – ‘‘வுத்தப்³யாகரணஸ்ஸ அனுப்³யாகரண’’ந்தி. தா⁴ரேதி அத்தனோ ப²லந்தி த⁴ம்மோ, காரணந்தி ஆஹ – ‘‘ஸஹத⁴ம்மிகோதி ஸகாரணோ’’தி. இமினாபி பாட²ந்தரேன வாதோ³ ஏவ தீ³பிதோ, ந தேன பகாஸிதா கிரியா.
Vividhaṃ nānābhūtaṃ rajjaṃ virajjaṃ, virajjameva verajjaṃ, tattha gataṃ, paradesagatanti attho. Tenāha ‘‘ekassā’’tiādi. Cittasudattādayoti cittagahapatianāthapiṇḍikādayo. Vīmaṃsakāti dhammavicārakā. Kinti kīdisaṃ. Dassananti siddhantaṃ. Ācikkhati kīdisanti adhippāyo. Dhammassāti bhagavatā vuttadhammassa. Anudhammanti anukūlaṃ avirujjhanadhammaṃ. So pana veneyyajjhāsayānurūpadesanāvitthāroti āha – ‘‘vuttabyākaraṇassa anubyākaraṇa’’nti. Dhāreti attano phalanti dhammo, kāraṇanti āha – ‘‘sahadhammikoti sakāraṇo’’ti. Imināpi pāṭhantarena vādo eva dīpito, na tena pakāsitā kiriyā.
தண்ஹாவஸேனேவ ச²ன்னம்பி பதா³னங் அத்தோ² வேதி³தப்³போ³. யஸ்மா ராகா³த³யோ தண்ஹாய ஏவ அவத்தா²விஸேஸாதி. தேனாஹ ‘‘தண்ஹா ஹீ’’திஆதி³. விஹனந்தி காயங் சித்தஞ்சாதி விகா⁴தோ, து³க்க²ந்தி ஆஹ – ‘‘அவிகா⁴தோதி நிது³க்கோ²’’தி. உபாயாஸேதி உபதாபேதீதி உபாயாஸோ, உபதாபோ. தப்படிபக்கோ² பன அனுபாயாஸோ நிரூபதாபோ த³ட்ட²ப்³போ³. ஸப்³ப³த்தா²தி ஸப்³ப³வாரேஸு.
Taṇhāvaseneva channampi padānaṃ attho veditabbo. Yasmā rāgādayo taṇhāya eva avatthāvisesāti. Tenāha ‘‘taṇhā hī’’tiādi. Vihananti kāyaṃ cittañcāti vighāto, dukkhanti āha – ‘‘avighātotinidukkho’’ti. Upāyāseti upatāpetīti upāyāso, upatāpo. Tappaṭipakkho pana anupāyāso nirūpatāpo daṭṭhabbo. Sabbatthāti sabbavāresu.
தே³வத³ஹஸுத்தவண்ணனா நிட்டி²தா.
Devadahasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. தே³வத³ஹஸுத்தங் • 2. Devadahasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. தே³வத³ஹஸுத்தவண்ணனா • 2. Devadahasuttavaṇṇanā
