| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. தே³வதூ³தஸுத்தவண்ணனா
10. Devadūtasuttavaṇṇanā
261. ஏவங் மே ஸுதந்தி தே³வதூ³தஸுத்தங். தத்த² த்³வே அகா³ராதிஆதி³ அஸ்ஸபுரஸுத்தே வித்தா²ரிதமேவ.
261.Evaṃme sutanti devadūtasuttaṃ. Tattha dve agārātiādi assapurasutte vitthāritameva.
262. நிரயங் உபபன்னாதி ப⁴க³வா கத்த²சி நிரயதோ பட்டா²ய தே³ஸனங் தே³வலோகேன ஓஸாபேதி, கத்த²சி தே³வலோகதோ பட்டா²ய நிரயேன ஓஸாபேதி. ஸசே ஸக்³க³ஸம்பத்திங் வித்தா²ரெத்வா கதே²துகாமோ ஹோதி, நிரயது³க்க²ங் ஏகதே³ஸதோ கதே²தி, திரச்சா²னயோனிது³க்க²ங் பெத்திவிஸயது³க்க²ங் மனுஸ்ஸலோகஸம்பத்திங் ஏகதே³ஸதோ கதே²தி, ஸக்³க³ஸம்பத்திமேவ வித்தா²ரேதி. ஸசே நிரயது³க்க²ங் வித்தா²ரெத்வா கதே²துகாமோ ஹோதி, தே³வலோகமனுஸ்ஸலோகேஸு ஸம்பத்திங் திரச்சா²னயோனிபெத்திவிஸயேஸு ச து³க்க²ங் ஏகதே³ஸதோ கதே²தி, நிரயது³க்க²மேவ வித்தா²ரேதி. ஸோ இமஸ்மிங் ஸுத்தே நிரயது³க்க²ங் வித்தா²ரேதுகாமோ, தஸ்மா தே³வலோகதோ பட்டா²ய தே³ஸனங் நிரயேன ஓஸாபேதி. தே³வலோகமனுஸ்ஸலோகஸம்பத்தியோ திரச்சா²னயோனிபெத்திவிஸயது³க்கா²னி ச ஏகதே³ஸதோ கதெ²த்வா நிரயது³க்க²மேவ வித்தா²ரேன கதே²துங் தமேனங், பி⁴க்க²வே, நிரயபாலாதிஆதி³மாஹ.
262.Nirayaṃ upapannāti bhagavā katthaci nirayato paṭṭhāya desanaṃ devalokena osāpeti, katthaci devalokato paṭṭhāya nirayena osāpeti. Sace saggasampattiṃ vitthāretvā kathetukāmo hoti, nirayadukkhaṃ ekadesato katheti, tiracchānayonidukkhaṃ pettivisayadukkhaṃ manussalokasampattiṃ ekadesato katheti, saggasampattimeva vitthāreti. Sace nirayadukkhaṃ vitthāretvā kathetukāmo hoti, devalokamanussalokesu sampattiṃ tiracchānayonipettivisayesu ca dukkhaṃ ekadesato katheti, nirayadukkhameva vitthāreti. So imasmiṃ sutte nirayadukkhaṃ vitthāretukāmo, tasmā devalokato paṭṭhāya desanaṃ nirayena osāpeti. Devalokamanussalokasampattiyo tiracchānayonipettivisayadukkhāni ca ekadesato kathetvā nirayadukkhameva vitthārena kathetuṃ tamenaṃ, bhikkhave, nirayapālātiādimāha.
தத்த² ஏகச்சே தே²ரா ‘‘நிரயபாலா நாம நத்தி², யந்தரூபங் விய கம்மமேவ காரணங் காரேதீ’’தி வத³ந்தி. தேஸங் தங் ‘‘அத்தி² நிரயே நிரயபாலாதி, ஆமந்தா, அத்தி² ச காரணிகா’’திஆதி³னா நயேன அபி⁴த⁴ம்மே (கதா²॰ 866) படிஸேதி⁴தமேவ. யதா² ஹி மனுஸ்ஸலோகே கம்மகாரணகாரகா அத்தி², ஏவமேவ நிரயே நிரயபாலா அத்தீ²தி. யமஸ்ஸ ரஞ்ஞோதி யமராஜா நாம வேமானிகபேதராஜா, ஏகஸ்மிங் காலே தி³ப்³ப³விமானே தி³ப்³ப³கப்பருக்க²தி³ப்³ப³உய்யானதி³ப்³ப³னாடகாதி³ஸம்பத்திங் அனுப⁴வதி, ஏகஸ்மிங் காலே கம்மவிபாகங், த⁴ம்மிகோ ராஜா. ந சேஸ ஏகோவ ஹோதி, சதூஸு பன த்³வாரேஸு சத்தாரோ ஜனா ஹொந்தி. நாத்³த³ஸந்தி அத்தனோ ஸந்திகே பேஸிதஸ்ஸ கஸ்ஸசி தே³வதூ³தஸ்ஸ அபா⁴வங் ஸந்தா⁴ய ஏவங் வத³தி. அத² நங் யமோ ‘‘நாயங் பா⁴ஸிதஸ்ஸ அத்த²ங் ஸல்லக்கே²தீ’’தி ஞத்வா ஸல்லக்கா²பேதுகாமோ அம்போ⁴திஆதி³மாஹ.
Tattha ekacce therā ‘‘nirayapālā nāma natthi, yantarūpaṃ viya kammameva kāraṇaṃ kāretī’’ti vadanti. Tesaṃ taṃ ‘‘atthi niraye nirayapālāti, āmantā, atthi ca kāraṇikā’’tiādinā nayena abhidhamme (kathā. 866) paṭisedhitameva. Yathā hi manussaloke kammakāraṇakārakā atthi, evameva niraye nirayapālā atthīti. Yamassa raññoti yamarājā nāma vemānikapetarājā, ekasmiṃ kāle dibbavimāne dibbakapparukkhadibbauyyānadibbanāṭakādisampattiṃ anubhavati, ekasmiṃ kāle kammavipākaṃ, dhammiko rājā. Na cesa ekova hoti, catūsu pana dvāresu cattāro janā honti. Nāddasanti attano santike pesitassa kassaci devadūtassa abhāvaṃ sandhāya evaṃ vadati. Atha naṃ yamo ‘‘nāyaṃ bhāsitassa atthaṃ sallakkhetī’’ti ñatvā sallakkhāpetukāmo ambhotiādimāha.
ஜாதித⁴ம்மோதி ஜாதிஸபா⁴வோ, அபரிமுத்தோ ஜாதியா, ஜாதி நாம மய்ஹங் அப்³ப⁴ந்தரேயேவ அத்தீ²தி. பரதோ ஜராத⁴ம்மோதிஆதீ³ஸுபி ஏஸேவ நயோ.
Jātidhammoti jātisabhāvo, aparimutto jātiyā, jāti nāma mayhaṃ abbhantareyeva atthīti. Parato jarādhammotiādīsupi eseva nayo.
263. பட²மங் தே³வதூ³தங் ஸமனுயுஞ்ஜித்வாதி எத்த² த³ஹரகுமாரோ அத்த²தோ ஏவங் வத³தி நாம ‘‘பஸ்ஸத², போ⁴, மய்ஹம்பி தும்ஹாகங் விய ஹத்த²பாதா³ அத்தி², ஸகே பனம்ஹி முத்தகரீஸே பலிபன்னோ, அத்தனோ த⁴ம்மதாய உட்ட²ஹித்வா ந்ஹாயிதுங் ந ஸக்கோமி, அஹங் கிலிட்ட²க³த்தொம்ஹி, ந்ஹாபேத² மந்தி வத்தும்பி ந ஸக்கோமி, ஜாதிதொம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி ஜாதிதோ அபரிமுத்தாவ. யதே²வ ஹி மய்ஹங், ஏவங் தும்ஹாகம்பி ஜாதி ஆக³மிஸ்ஸதி, இதி தஸ்ஸா புரே ஆக³மனாவ கல்யாணங் கரோதா²’’தி. தேனேஸ தே³வதூ³தோ நாம ஜாதோ, வசனத்தோ² பன மக⁴தே³வஸுத்தே வுத்தோவ.
263.Paṭhamaṃ devadūtaṃ samanuyuñjitvāti ettha daharakumāro atthato evaṃ vadati nāma ‘‘passatha, bho, mayhampi tumhākaṃ viya hatthapādā atthi, sake panamhi muttakarīse palipanno, attano dhammatāya uṭṭhahitvā nhāyituṃ na sakkomi, ahaṃ kiliṭṭhagattomhi, nhāpetha manti vattumpi na sakkomi, jātitomhi aparimuttatāya ediso jāto. Na kho panāhameva, tumhepi jātito aparimuttāva. Yatheva hi mayhaṃ, evaṃ tumhākampi jāti āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto, vacanattho pana maghadevasutte vuttova.
து³தியங் தே³வதூ³தந்தி எத்தா²பி ஜராஜிண்ணஸத்தோ அத்த²தோ ஏவங் வத³தி நாம – ‘‘பஸ்ஸத², போ⁴, அஹம்பி தும்ஹே விய தருணோ அஹோஸிங் ஊருப³லபா³ஹுப³லஜவனஸம்பன்னோ, தஸ்ஸ மே தா ப³லஜவனஸம்பத்தியோ அந்தரஹிதா, விஜ்ஜமானாபி மே ஹத்த²பாதா³ ஹத்த²பாத³கிச்சங் ந கரொந்தி, ஜராயம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி ஜராய அபரிமுத்தாவ. யதே²வ ஹி மய்ஹங், ஏவங் தும்ஹாகம்பி ஜரா ஆக³மிஸ்ஸதி, இதி தஸ்ஸா புரே ஆக³மனாவ கல்யாணங் கரோதா²’’தி. தேனேஸ தே³வதூ³தோ நாம ஜாதோ.
Dutiyaṃdevadūtanti etthāpi jarājiṇṇasatto atthato evaṃ vadati nāma – ‘‘passatha, bho, ahampi tumhe viya taruṇo ahosiṃ ūrubalabāhubalajavanasampanno, tassa me tā balajavanasampattiyo antarahitā, vijjamānāpi me hatthapādā hatthapādakiccaṃ na karonti, jarāyamhi aparimuttatāya ediso jāto. Na kho panāhameva, tumhepi jarāya aparimuttāva. Yatheva hi mayhaṃ, evaṃ tumhākampi jarā āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto.
ததியங் தே³வதூ³தந்தி எத்தா²பி கி³லானஸத்தோ அத்த²தோ ஏவ வத³தி நாம – ‘‘பஸ்ஸத², போ⁴, அஹம்பி தும்ஹே விய நிரோகோ³ அஹோஸிங், ஸொம்ஹி ஏதரஹி ப்³யாதி⁴னா அபி⁴ஹதோ ஸகே முத்தகரீஸே பலிபன்னோ, உட்டா²தும்பி ந ஸக்கோமி, விஜ்ஜமானாபி மே ஹத்த²பாதா³ ஹத்த²பாத³கிச்சங் ந கரொந்தி, ப்³யாதி⁴தொம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி ப்³யாதி⁴தோ அபரிமுத்தாவ. யதே²வ ஹி மய்ஹங், ஏவங் தும்ஹாகங் ப்³யாதி⁴ ஆக³மிஸ்ஸதி, இதி தஸ்ஸ புரே ஆக³மனாவ கல்யாணங் கரோதா²’’தி. தேனேஸ தே³வதூ³தோ நாம ஜாதோ.
Tatiyaṃ devadūtanti etthāpi gilānasatto atthato eva vadati nāma – ‘‘passatha, bho, ahampi tumhe viya nirogo ahosiṃ, somhi etarahi byādhinā abhihato sake muttakarīse palipanno, uṭṭhātumpi na sakkomi, vijjamānāpi me hatthapādā hatthapādakiccaṃ na karonti, byādhitomhi aparimuttatāya ediso jāto. Na kho panāhameva, tumhepi byādhito aparimuttāva. Yatheva hi mayhaṃ, evaṃ tumhākaṃ byādhi āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
265. சதுத்த²ங் தே³வதூ³தந்தி எத்த² பன கம்மகாரணா வா தே³வதூ³தாதி காதப்³பா³ கம்மகாரணிகா வா. தத்த² பன கம்மகாரணபக்கே² பா³த்திங்ஸ தாவ கம்மகாரணா அத்த²தோ ஏவங் வத³ந்தி நாம – ‘‘மயங் நிப்³ப³த்தமானா ந ருக்கே² வா பாஸாணே வா நிப்³ப³த்தாம, தும்ஹாதி³ஸானங் ஸரீரே நிப்³ப³த்தாம, இதி அம்ஹாகங் புரே நிப்³ப³த்திதோவ கல்யாணங் கரோதா²’’தி. தேனேதே தே³வதூ³தா நாம ஜாதா. கம்மகாரணிகாபி அத்த²தோ ஏவங் வத³ந்தி நாம – ‘‘மயங் த்³வத்திங்ஸ கம்மகாரணா கரொந்தா ந ருக்கா²தீ³ஸு கரோம, தும்ஹாதி³ஸேஸு ஸத்தேஸுயேவ கரோம, இதி அம்ஹாகங் தும்ஹேஸு புரே கம்மகாரணாகரணதோவ கல்யாணங் கரோதா²’’தி. தேனேதேபி தே³வதூ³தா நாம ஜாதா.
265.Catutthaṃ devadūtanti ettha pana kammakāraṇā vā devadūtāti kātabbā kammakāraṇikā vā. Tattha pana kammakāraṇapakkhe bāttiṃsa tāva kammakāraṇā atthato evaṃ vadanti nāma – ‘‘mayaṃ nibbattamānā na rukkhe vā pāsāṇe vā nibbattāma, tumhādisānaṃ sarīre nibbattāma, iti amhākaṃ pure nibbattitova kalyāṇaṃ karothā’’ti. Tenete devadūtā nāma jātā. Kammakāraṇikāpi atthato evaṃ vadanti nāma – ‘‘mayaṃ dvattiṃsa kammakāraṇā karontā na rukkhādīsu karoma, tumhādisesu sattesuyeva karoma, iti amhākaṃ tumhesu pure kammakāraṇākaraṇatova kalyāṇaṃ karothā’’ti. Tenetepi devadūtā nāma jātā.
266. பஞ்சமங் தே³வதூ³தந்தி எத்த² மதகஸத்தோ அத்த²தோ ஏவங் வத³தி நாம – ‘‘பஸ்ஸத² போ⁴ மங் ஆமகஸுஸானே ச²ட்³டி³தங் உத்³து⁴மாதகாதி³பா⁴வங் பத்தங், மரணதொம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி மரணதோ அபரிமுத்தாவ. யதே²வ ஹி மய்ஹங், ஏவங் தும்ஹாகம்பி மரணங் ஆக³மிஸ்ஸதி, இதி தஸ்ஸ புரே ஆக³மனாவ கல்யாணங் கரோதா²’’தி. தேனேஸ தே³வதூ³தோ நாம ஜாதோ.
266.Pañcamaṃ devadūtanti ettha matakasatto atthato evaṃ vadati nāma – ‘‘passatha bho maṃ āmakasusāne chaḍḍitaṃ uddhumātakādibhāvaṃ pattaṃ, maraṇatomhi aparimuttatāya ediso jāto. Na kho panāhameva, tumhepi maraṇato aparimuttāva. Yatheva hi mayhaṃ, evaṃ tumhākampi maraṇaṃ āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
இமங் பன தே³வதூ³தானுயோக³ங் கோ லப⁴தி, கோ ந லப⁴தீதி? யேன தாவ ப³ஹுங் பாபங் கதங், ஸோ க³ந்த்வா நிரயே நிப்³ப³த்ததியேவ. யேன பன பரித்தங் பாபகம்மங் கதங், ஸோ லப⁴தி. யதா² ஹி ஸப⁴ண்ட³ங் சோரங் க³ஹெத்வா கத்தப்³ப³மேவ கரொந்தி, ந வினிச்சி²னந்தி. அனுவிஜ்ஜித்வா க³ஹிதங் பன வினிச்ச²யட்டா²னங் நயந்தி, ஸோ வினிச்ச²யங் லப⁴தி. ஏவங்ஸம்பத³மேதங். பரித்தபாபகம்மா ஹி அத்தனோ த⁴ம்மதாயபி ஸரந்தி, ஸாரியமானாபி ஸரந்தி.
Imaṃ pana devadūtānuyogaṃ ko labhati, ko na labhatīti? Yena tāva bahuṃ pāpaṃ kataṃ, so gantvā niraye nibbattatiyeva. Yena pana parittaṃ pāpakammaṃ kataṃ, so labhati. Yathā hi sabhaṇḍaṃ coraṃ gahetvā kattabbameva karonti, na vinicchinanti. Anuvijjitvā gahitaṃ pana vinicchayaṭṭhānaṃ nayanti, so vinicchayaṃ labhati. Evaṃsampadametaṃ. Parittapāpakammā hi attano dhammatāyapi saranti, sāriyamānāpi saranti.
தத்த² தீ³க⁴ஜயந்தத³மிளோ நாம அத்தனோ த⁴ம்மதாய ஸரி. ஸோ கிர த³மிளோ ஸுமனகி³ரிவிஹாரே ஆகாஸசேதியங் ரத்தபடேன பூஜேஸி. அத² நிரயே உஸ்ஸத³ஸாமந்தே நிப்³ப³த்தோ அக்³கி³ஜாலஸத்³த³ங் ஸுத்வாவ அத்தனோ பூஜிதபடங் அனுஸ்ஸரி, ஸோ க³ந்த்வா ஸக்³கே³ நிப்³ப³த்தோ. அபரோபி புத்தஸ்ஸ த³ஹரபி⁴க்கு²னோ க²லிஸாடகங் தெ³ந்தோ பாத³மூலே ட²பேஸி, மரணகாலம்ஹி படபடாதி ஸத்³தே³ நிமித்தங் க³ண்ஹி, ஸோபி உஸ்ஸத³ஸாமந்தே நிப்³ப³த்தோ ஜாலஸத்³தே³ன தங் ஸாடகங் அனுஸ்ஸரித்வா ஸக்³கே³ நிப்³ப³த்தோ. ஏவங் தாவ அத்தனோ த⁴ம்மதாய குஸலங் கம்மங் ஸரித்வா ஸக்³கே³ நிப்³ப³த்ததீதி.
Tattha dīghajayantadamiḷo nāma attano dhammatāya sari. So kira damiḷo sumanagirivihāre ākāsacetiyaṃ rattapaṭena pūjesi. Atha niraye ussadasāmante nibbatto aggijālasaddaṃ sutvāva attano pūjitapaṭaṃ anussari, so gantvā sagge nibbatto. Aparopi puttassa daharabhikkhuno khalisāṭakaṃ dento pādamūle ṭhapesi, maraṇakālamhi paṭapaṭāti sadde nimittaṃ gaṇhi, sopi ussadasāmante nibbatto jālasaddena taṃ sāṭakaṃ anussaritvā sagge nibbatto. Evaṃ tāva attano dhammatāya kusalaṃ kammaṃ saritvā sagge nibbattatīti.
அத்தனோ த⁴ம்மதாய அஸரந்தே பன பஞ்ச தே³வதூ³தே புச்ச²தி. தத்த² கோசி பட²மேன தே³வதூ³தேன ஸரதி, கோசி து³தியாதீ³ஹி. யோ பன பஞ்சஹிபி ந ஸரதி, தங் யமோ ராஜா ஸயங் ஸாரேதி. ஏகோ கிர அமச்சோ ஸுமனபுப்ப²கும்பே⁴ன மஹாசேதியங் பூஜெத்வா யமஸ்ஸ பத்திங் அதா³ஸி, தங் அகுஸலகம்மேன நிரயே நிப்³ப³த்தங் யமஸ்ஸ ஸந்திகங் நயிங்ஸு. தஸ்மிங் பஞ்சஹிபி தே³வதூ³தேஹி குஸலே அஸரந்தே யமோ ஸயங் ஓலோகெந்தோ தி³ஸ்வா – ‘‘நனு த்வங் மஹாசேதியங் ஸுமனபுப்ப²கும்பே⁴ன பூஜெத்வா மய்ஹங் பத்திங் அதா³ஸீ’’தி ஸாரேஸி, ஸோ தஸ்மிங் காலே ஸரித்வா தே³வலோகங் க³தோ. யமோ பன ஸயங் ஓலோகெத்வாபி அபஸ்ஸந்தோ – ‘‘மஹாது³க்க²ங் நாம அனுப⁴விஸ்ஸதி அயங் ஸத்தோ’’தி துண்ஹீ ஹோதி.
Attano dhammatāya asarante pana pañca devadūte pucchati. Tattha koci paṭhamena devadūtena sarati, koci dutiyādīhi. Yo pana pañcahipi na sarati, taṃ yamo rājā sayaṃ sāreti. Eko kira amacco sumanapupphakumbhena mahācetiyaṃ pūjetvā yamassa pattiṃ adāsi, taṃ akusalakammena niraye nibbattaṃ yamassa santikaṃ nayiṃsu. Tasmiṃ pañcahipi devadūtehi kusale asarante yamo sayaṃ olokento disvā – ‘‘nanu tvaṃ mahācetiyaṃ sumanapupphakumbhena pūjetvā mayhaṃ pattiṃ adāsī’’ti sāresi, so tasmiṃ kāle saritvā devalokaṃ gato. Yamo pana sayaṃ oloketvāpi apassanto – ‘‘mahādukkhaṃ nāma anubhavissati ayaṃ satto’’ti tuṇhī hoti.
267. மஹானிரயேதி அவீசிமஹானிரயம்ஹி. கிங் பனஸ்ஸ பமாணங்? அப்³ப⁴ந்தரங் ஆயாமேன ச வித்தா²ரேன ச யோஜனஸதங் ஹோதி. லோஹபத²வீ லோஹச²த³னங் ஏகேகா ச பி⁴த்தி நவனவயோஜனிகா ஹோதி. புரத்தி²மாய பி⁴த்தியா அச்சி உட்டி²தா பச்சி²மங் பி⁴த்திங் க³ஹெத்வா தங் வினிவிஜ்ஜி²த்வா பரதோ யோஜனஸதங் க³ச்ச²தி. ஸேஸதி³ஸாஸுபி ஏஸேவ நயோ. இதி ஜாலபரியந்தவஸேன ஆயாமவித்தா²ரதோ அட்டா²ரஸயோஜனாதி⁴கானி தீணி யோஜனஸதானி, பரிக்கே²பதோ பன நவயோஜனஸதானி சதுபண்ணாஸயோஜனானி, ஸமந்தா பன உஸ்ஸதே³ஹி ஸத்³தி⁴ங் த³ஸயோஜனஸஹஸ்ஸங் ஹோதி.
267.Mahānirayeti avīcimahānirayamhi. Kiṃ panassa pamāṇaṃ? Abbhantaraṃ āyāmena ca vitthārena ca yojanasataṃ hoti. Lohapathavī lohachadanaṃ ekekā ca bhitti navanavayojanikā hoti. Puratthimāya bhittiyā acci uṭṭhitā pacchimaṃ bhittiṃ gahetvā taṃ vinivijjhitvā parato yojanasataṃ gacchati. Sesadisāsupi eseva nayo. Iti jālapariyantavasena āyāmavitthārato aṭṭhārasayojanādhikāni tīṇi yojanasatāni, parikkhepato pana navayojanasatāni catupaṇṇāsayojanāni, samantā pana ussadehi saddhiṃ dasayojanasahassaṃ hoti.
268. உப்³ப⁴தங் தாதி³ஸமேவ ஹோதீதி எத்த² அக்கந்தபத³ங் யாவ அட்டி²தோ த³ள்ஹங் உத்³த⁴ரிதுமேவ ந ஸக்கா. அயங் பனெத்த² அத்தோ² – ஹெட்ட²தோ பட்டா²ய ட³ய்ஹதி, உபரிதோ பட்டா²ய ஜா²யதி, இதி அக்கமனகாலே ட³ய்ஹமானங் பஞ்ஞாயதி, உத்³த⁴ரணகாலே தாதி³ஸமேவ, தஸ்மா ஏவங் வுத்தங். ப³ஹுஸம்பத்தோதி ப³ஹூனி வஸ்ஸஸதவஸ்ஸஸஹஸ்ஸானி ஸம்பத்தோ.
268.Ubbhataṃ tādisameva hotīti ettha akkantapadaṃ yāva aṭṭhito daḷhaṃ uddharitumeva na sakkā. Ayaṃ panettha attho – heṭṭhato paṭṭhāya ḍayhati, uparito paṭṭhāya jhāyati, iti akkamanakāle ḍayhamānaṃ paññāyati, uddharaṇakāle tādisameva, tasmā evaṃ vuttaṃ. Bahusampattoti bahūni vassasatavassasahassāni sampatto.
கஸ்மா பனேஸ நரகோ அவீசீதி ஸங்க²ங் க³தோதி. வீசி நாம அந்தரங் வுச்சதி, தத்த² ச அக்³கி³ஜாலானங் வா ஸத்தானங் வா து³க்க²ஸ்ஸ வா அந்தரங் நத்தி². தஸ்மா ஸோ அவீசீதி ஸங்க²ங் க³தோதி. தஸ்ஸ ஹி புரத்தி²மபி⁴த்திதோ ஜாலா உட்டி²தா ஸங்ஸிப்³ப³மானா யோஜனஸதங் க³ந்த்வா பச்சி²மபி⁴த்திங் வினிவிஜ்ஜி²த்வா பரதோ யோஜனஸதங் க³ச்ச²தி. ஸேஸதி³ஸாஸுபி ஏஸேவ நயோ.
Kasmā panesa narako avīcīti saṅkhaṃ gatoti. Vīci nāma antaraṃ vuccati, tattha ca aggijālānaṃ vā sattānaṃ vā dukkhassa vā antaraṃ natthi. Tasmā so avīcīti saṅkhaṃ gatoti. Tassa hi puratthimabhittito jālā uṭṭhitā saṃsibbamānā yojanasataṃ gantvā pacchimabhittiṃ vinivijjhitvā parato yojanasataṃ gacchati. Sesadisāsupi eseva nayo.
இமேஸங் ச²ன்னங் ஜாலானங் மஜ்ஜே² நிப்³ப³த்தோ தே³வத³த்தோ, தஸ்ஸ யோஜனஸதப்பமாணோ அத்தபா⁴வோ, த்³வே பாதா³ யாவ கொ³ப்ப²கா லோஹபத²விங் பவிட்டா², த்³வே ஹத்தா² யாவ மணிப³ந்தா⁴ லோஹபி⁴த்தியோ பவிட்டா², ஸீஸங் யாவ ப⁴முகட்டி²தோ லோஹச²த³னே பவிட்ட²ங், அதோ⁴பா⁴கே³ன ஏகங் லோஹஸூலங் பவிஸித்வா காயங் வினிவிஜ்ஜ²ந்தங் ச²த³னே பவிட்ட²ங், பாசீனபி⁴த்திதோ நிக்க²ந்தஸூலங் ஹத³யங் வினிவிஜ்ஜி²த்வா பச்சி²மபி⁴த்திங் பவிட்ட²ங் , உத்தரபி⁴த்திதோ நிக்க²ந்தஸூலங் பா²ஸுகா வினிவிஜ்ஜி²த்வா த³க்கி²ணபி⁴த்திங் பவிட்ட²ங். நிச்சலே ததா²க³தம்ஹி அபரத்³த⁴த்தா நிச்சலோவ ஹுத்வா பச்சதீதி கம்மஸரிக்க²தாய ஏதி³ஸோ ஜாதோ. ஏவங் ஜாலானங் நிரந்தரதாய அவீசி நாம.
Imesaṃ channaṃ jālānaṃ majjhe nibbatto devadatto, tassa yojanasatappamāṇo attabhāvo, dve pādā yāva gopphakā lohapathaviṃ paviṭṭhā, dve hatthā yāva maṇibandhā lohabhittiyo paviṭṭhā, sīsaṃ yāva bhamukaṭṭhito lohachadane paviṭṭhaṃ, adhobhāgena ekaṃ lohasūlaṃ pavisitvā kāyaṃ vinivijjhantaṃ chadane paviṭṭhaṃ, pācīnabhittito nikkhantasūlaṃ hadayaṃ vinivijjhitvā pacchimabhittiṃ paviṭṭhaṃ , uttarabhittito nikkhantasūlaṃ phāsukā vinivijjhitvā dakkhiṇabhittiṃ paviṭṭhaṃ. Niccale tathāgatamhi aparaddhattā niccalova hutvā paccatīti kammasarikkhatāya ediso jāto. Evaṃ jālānaṃ nirantaratāya avīci nāma.
அப்³ப⁴ந்தரே பனஸ்ஸ யோஜனஸதிகே டா²னே நாளியங் கொட்டெத்வா பூரிதபிட்ட²ங் விய ஸத்தா நிரந்தரா, ‘‘இமஸ்மிங் டா²னே ஸத்தோ அத்தி², இமஸ்மிங் நத்தீ²’’தி ந வத்தப்³ப³ங், க³ச்ச²ந்தானங் டி²தானங் நிஸின்னானங் நிபன்னானங் அந்தோ நத்தி², க³ச்ச²ந்தே வா டி²தே வா நிஸின்னே வா நிபன்னே வா அஞ்ஞமஞ்ஞங் ந பா³த⁴ந்தி. ஏவங் ஸத்தானங் நிரந்தரதாய அவீசி.
Abbhantare panassa yojanasatike ṭhāne nāḷiyaṃ koṭṭetvā pūritapiṭṭhaṃ viya sattā nirantarā, ‘‘imasmiṃ ṭhāne satto atthi, imasmiṃ natthī’’ti na vattabbaṃ, gacchantānaṃ ṭhitānaṃ nisinnānaṃ nipannānaṃ anto natthi, gacchante vā ṭhite vā nisinne vā nipanne vā aññamaññaṃ na bādhanti. Evaṃ sattānaṃ nirantaratāya avīci.
காயத்³வாரே பன ச² உபெக்கா²ஸஹக³தானி சித்தானி உப்பஜ்ஜந்தி, ஏகங் து³க்க²ஸஹக³தங். ஏவங் ஸந்தேபி யதா² ஜிவ்ஹக்³கே³ ச² மது⁴பி³ந்தூ³னி ட²பெத்வா ஏகஸ்மிங் தம்ப³லோஹபி³ந்து³ம்ஹி ட²பிதே அனுத³ஹனப³லவதாய ததே³வ பஞ்ஞாயதி, இதரானி அப்³போ³ஹாரிகானி ஹொந்தி, ஏவங் அனுத³ஹனப³லவதாய து³க்க²மேவெத்த² நிரந்தரங், இதரானி அப்³போ³ஹாரிகானீதி. ஏவங் து³க்க²ஸ்ஸ நிரந்தரதாய அவீசி.
Kāyadvāre pana cha upekkhāsahagatāni cittāni uppajjanti, ekaṃ dukkhasahagataṃ. Evaṃ santepi yathā jivhagge cha madhubindūni ṭhapetvā ekasmiṃ tambalohabindumhi ṭhapite anudahanabalavatāya tadeva paññāyati, itarāni abbohārikāni honti, evaṃ anudahanabalavatāya dukkhamevettha nirantaraṃ, itarāni abbohārikānīti. Evaṃ dukkhassa nirantaratāya avīci.
269. மஹந்தோதி யோஜனஸதிகோ. ஸோ தத்த² பததீதி ஏகோ பாதோ³ மஹானிரயே ஹோதி, ஏகோ கூ³த²னிரயே நிபததி. ஸூசிமுகா²தி ஸூசிஸதி³ஸமுகா², தே ஹத்தி²கீ³வப்பமாணா ஏகதோ³ணிகனாவாப்பமாணா வா ஹொந்தி.
269.Mahantoti yojanasatiko. So tattha patatīti eko pādo mahāniraye hoti, eko gūthaniraye nipatati. Sūcimukhāti sūcisadisamukhā, te hatthigīvappamāṇā ekadoṇikanāvāppamāṇā vā honti.
குக்குலனிரயோதி யோஜனஸதப்பமாணோவ அந்தோ கூடாகா³ரமத்தவிதச்சிதஅங்கா³ரபுண்ணோ ஆதி³த்தசா²ரிகனிரயோ, யத்த² பதிதபதிதா குத்³ரூஸகராஸிம்ஹி கி²த்தபா²லவாஸிஸிலாதீ³னி விய ஹெட்டி²மதலமேவ க³ண்ஹந்தி.
Kukkulanirayoti yojanasatappamāṇova anto kūṭāgāramattavitaccitaaṅgārapuṇṇo ādittachārikanirayo, yattha patitapatitā kudrūsakarāsimhi khittaphālavāsisilādīni viya heṭṭhimatalameva gaṇhanti.
ஆரோபெந்தீதி அயத³ண்டே³ஹி போதெ²ந்தா ஆரோபெந்தி. தேஸங் ஆரோஹனகாலே தே கண்டகா அதோ⁴முகா² ஹொந்தி, ஓரோஹனகாலே உத்³த⁴ங்முகா².
Āropentīti ayadaṇḍehi pothentā āropenti. Tesaṃ ārohanakāle te kaṇṭakā adhomukhā honti, orohanakāle uddhaṃmukhā.
வாதேரிதானீதி கம்மமயேன வாதேன சலிதானி. ஹத்த²ம்பி சி²ந்த³ந்தீதி ப²லகே மங்ஸங் விய கொட்டயமானானி சி²ந்த³ந்தி. ஸசே உட்டா²ய பலாயதி, அயோபாகாரோ ஸமுட்ட²ஹித்வா பரிக்கி²பதி, ஹெட்டா² கு²ரதா⁴ரா ஸமுட்டா²தி.
Vāteritānīti kammamayena vātena calitāni. Hatthampi chindantīti phalake maṃsaṃ viya koṭṭayamānāni chindanti. Sace uṭṭhāya palāyati, ayopākāro samuṭṭhahitvā parikkhipati, heṭṭhā khuradhārā samuṭṭhāti.
கா²ரோத³கா நதீ³தி வேதரணீ நாம தம்ப³லோஹனதீ³. தத்த² அயோமயானி க²ரவாலிக-பொக்க²ரபத்தானி, ஹெட்டா² கு²ரதா⁴ரா உபோ⁴ஸு தீரேஸு வெத்தலதா ச குஸதிணானி ச. ஸோ தத்த² து³க்கா² திப்³பா³ க²ராதி ஸோ தத்த² உத்³த⁴ஞ்ச அதோ⁴ ச வுய்ஹமானோ பொக்க²ரபத்தேஸு சி²ஜ்ஜதி. ஸிங்கா⁴டகஸண்டா²னாய க²ரவாலிகாய கண்டகேஹி விஜ்ஜி²யதி, கு²ரதா⁴ராஹி பா²லியதி, உபோ⁴ஸு தீரேஸு குஸதிணேஹி விலேக²தி, வெத்தலதாஹி ஆகட்³டி⁴யதி, திக்க²ஸத்தீஹி பா²லியதி.
Khārodakā nadīti vetaraṇī nāma tambalohanadī. Tattha ayomayāni kharavālika-pokkharapattāni, heṭṭhā khuradhārā ubhosu tīresu vettalatā ca kusatiṇāni ca. So tattha dukkhā tibbā kharāti so tattha uddhañca adho ca vuyhamāno pokkharapattesu chijjati. Siṅghāṭakasaṇṭhānāya kharavālikāya kaṇṭakehi vijjhiyati, khuradhārāhi phāliyati, ubhosu tīresu kusatiṇehi vilekhati, vettalatāhi ākaḍḍhiyati, tikkhasattīhi phāliyati.
270. தத்தேன அயோஸங்குனாதி தேன ஜிக³ச்சி²தொம்ஹீதி வுத்தே மஹந்தங் லோஹபச்சி²ங் லோஹகு³ளானங் பூரெத்வா தங் உபக³ச்ச²ந்தி, ஸோ லோஹகு³ளபா⁴வங் ஞத்வா த³ந்தே ஸம்பு²ஸேதி, அத²ஸ்ஸ தே தத்தேன அயோஸங்குனா முக²ங் விவரந்தி, தம்ப³லோஹதா⁴ரேஹி மஹந்தேன லோஹகடாஹேன தம்ப³லோஹங் உபனெத்வா ஏவமேவங் கரொந்தி. புன மஹானிரயேதி ஏவங் பஞ்சவித⁴ப³ந்த⁴னதோ பட்டா²ய யாவ தம்ப³லோஹபானா தம்ப³லோஹபானதோ பட்டா²ய புன பஞ்சவித⁴ப³ந்த⁴னாதீ³னி காரெத்வா மஹானிரயே பக்கி²பந்தி. தத்த² கோசி பஞ்சவித⁴ப³ந்த⁴னேனேவ முச்சதி, கோசி து³தியேன, கோசி ததியேன, கோசி தம்ப³லோஹபானேன முச்சதி, கம்மே பன அபரிக்கீ²ணே புன மஹானிரயே பக்கி²பந்தி.
270.Tattenaayosaṅkunāti tena jigacchitomhīti vutte mahantaṃ lohapacchiṃ lohaguḷānaṃ pūretvā taṃ upagacchanti, so lohaguḷabhāvaṃ ñatvā dante samphuseti, athassa te tattena ayosaṅkunā mukhaṃ vivaranti, tambalohadhārehi mahantena lohakaṭāhena tambalohaṃ upanetvā evamevaṃ karonti. Puna mahānirayeti evaṃ pañcavidhabandhanato paṭṭhāya yāva tambalohapānā tambalohapānato paṭṭhāya puna pañcavidhabandhanādīni kāretvā mahāniraye pakkhipanti. Tattha koci pañcavidhabandhaneneva muccati, koci dutiyena, koci tatiyena, koci tambalohapānena muccati, kamme pana aparikkhīṇe puna mahāniraye pakkhipanti.
இத³ங் பன ஸுத்தங் க³ண்ஹந்தோ ஏகோ த³ஹரபி⁴க்கு², – ‘‘ப⁴ந்தே, எத்தகங் து³க்க²மனுப⁴விதஸத்தங் புனபி மஹானிரயே பக்கி²பந்தீ’’தி ஆஹ. ஆம, ஆவுஸோ, கம்மே அபரிக்கீ²ணே புனப்புனங் ஏவங் கரொந்தீதி. திட்ட²து, ப⁴ந்தே, உத்³தே³ஸோ, கம்மட்டா²னமேவ கதே²தா²தி கம்மட்டா²னங் கதா²பெத்வா ஸோதாபன்னோ ஹுத்வா ஆக³ம்ம உத்³தே³ஸங் அக்³க³ஹேஸி. அஞ்ஞேஸம்பி இமஸ்மிங் பதே³ஸே உத்³தே³ஸங் ட²பெத்வா அரஹத்தங் பத்தானங் க³ணனா நத்தி². ஸப்³ப³பு³த்³தா⁴னஞ்சேதங் ஸுத்தங் அவிஜஹிதமேவ ஹோதி.
Idaṃ pana suttaṃ gaṇhanto eko daharabhikkhu, – ‘‘bhante, ettakaṃ dukkhamanubhavitasattaṃ punapi mahāniraye pakkhipantī’’ti āha. Āma, āvuso, kamme aparikkhīṇe punappunaṃ evaṃ karontīti. Tiṭṭhatu, bhante, uddeso, kammaṭṭhānameva kathethāti kammaṭṭhānaṃ kathāpetvā sotāpanno hutvā āgamma uddesaṃ aggahesi. Aññesampi imasmiṃ padese uddesaṃ ṭhapetvā arahattaṃ pattānaṃ gaṇanā natthi. Sabbabuddhānañcetaṃ suttaṃ avijahitameva hoti.
271. ஹீனகாயூபகா³தி ஹீனகாயங் உபக³தா ஹுத்வா. உபாதா³னேதி தண்ஹாதி³ட்டி²க³ஹணே. ஜாதிமரணஸம்ப⁴வேதி ஜாதியா ச மரணஸ்ஸ ச காரணபூ⁴தே. அனுபாதா³தி சதூஹி உபாதா³னேஹி அனுபாதி³யித்வா. ஜாதிமரணஸங்க²யேதி ஜாதிமரணஸங்க²யஸங்கா²தே நிப்³பா³னே விமுச்சந்தி.
271.Hīnakāyūpagāti hīnakāyaṃ upagatā hutvā. Upādāneti taṇhādiṭṭhigahaṇe. Jātimaraṇasambhaveti jātiyā ca maraṇassa ca kāraṇabhūte. Anupādāti catūhi upādānehi anupādiyitvā. Jātimaraṇasaṅkhayeti jātimaraṇasaṅkhayasaṅkhāte nibbāne vimuccanti.
தி³ட்ட²த⁴ம்மாபி⁴னிப்³பு³தாதி தி³ட்ட²த⁴ம்மே இமஸ்மிங்யேவ அத்தபா⁴வே ஸப்³ப³கிலேஸனிப்³பா³னேன நிப்³பு³தா. ஸப்³ப³து³க்க²ங் உபச்சகு³ந்தி ஸப்³ப³து³க்கா²திக்கந்தா நாம ஹொந்தி.
Diṭṭhadhammābhinibbutāti diṭṭhadhamme imasmiṃyeva attabhāve sabbakilesanibbānena nibbutā. Sabbadukkhaṃ upaccagunti sabbadukkhātikkantā nāma honti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
தே³வதூ³தஸுத்தவண்ணனா நிட்டி²தா.
Devadūtasuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. தே³வதூ³தஸுத்தங் • 10. Devadūtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. தே³வதூ³தஸுத்தவண்ணனா • 10. Devadūtasuttavaṇṇanā
