| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. தே³வஹிதஸுத்தவண்ணனா
3. Devahitasuttavaṇṇanā
199. உத³ரவாதேஹீதி வாதகதவிஜ்ஜ²னதோத³னாதி³வஸேன அபராபரங் வத்தமானேஹி உத³ரவாதேஹி, தஸ்ஸ வா விகாரேஹி. நிப³த்³து⁴பட்டா²ககாலே பன த⁴ம்மப⁴ண்டா³கா³ரிகோவ. அரஞ்ஞந்தி ப⁴க³வதோ பி⁴க்கூ²னஞ்ச வஸனட்டா²னபூ⁴தங் தபோவனங். தங் நித்³தூ⁴மங் ஹோதி உத³கதாபனஸ்ஸபி அகரணதோ. தஸ்மாதி யஸ்மா தஸ்ஸ உண்ஹோத³கவிக்கிணனசரியாய ஜீவிகாகப்பனங் ஹோதி, தஸ்மா.
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
வத்தமேதங் தஸ்ஸ பதிகாரத்த²ங் பரிகதா²தீ³னம்பி காதுங் லப்³ப⁴னதோ. இதா³னி தத்த² காரணம்பி ஸவிஸயங் த³ஸ்ஸேதுங் ‘‘வண்ணங் ஹீ’’திஆதி³ வுத்தங். ப⁴க³வா ஹி ஆயஸ்மதோ உபவாணஸ்ஸ தே³வஹிதப்³ராஹ்மணஸ்ஸ தங் ஸம்பா⁴விதங் ப⁴விஸ்ஸதி திகிச்சா²படியத்தங், தாய ச அத்தனோ ரோக³ஸ்ஸ வூபஸமனங், தப்பஸங்கே³ன ச தே³வஹிதப்³ராஹ்மணோ மம ஸந்திகங் ஆக³ந்த்வா த⁴ம்மஸ்ஸவனேன ஸரணேஸு ஸீலேஸு ச பதிட்ட²ஹிஸ்ஸதீதி ஸப்³ப³மித³ங் ஞத்வா ஏவங் ‘‘இங்க⁴ மே த்வங், உபவாண, உண்ஹோத³கங் ஜானாஹீ’’தி அவோச. ஆக³மனீயப்படிபத³ங் புப்³ப³பா⁴க³ப்படிபத³ங் புப்³ப³பா⁴க³ப்படிபத்திங் கதே²துங் வட்டதி அனுத்தரிமனுஸ்ஸத⁴ம்மத்தா. ஸதே³வகேன லோகேனாதி அனவஸேஸதோ லோகஸ்ஸ க³ஹணங். ப²லவிஸேஸாகங்கா²ய பூஜேதப்³பா³தி பூஜனீயா, தே ஏவ இத⁴ ‘‘பூஜனெய்யா’’தி வுத்தா. ததா² ஆத³ரேன பூஜேதப்³ப³தாய ஸக்காரியா, ஆ-காரஸ்ஸ ரஸ்ஸத்தங், ரி-ஸத்³த³ஸ்ஸ ச ரே-ஆதே³ஸங் கத்வா ‘‘ஸக்கரெய்யா’’தி வுத்தங். ‘‘அபசயெய்யா’’தி வத்தப்³பே³ ய-காரலோபங் கத்வா ‘‘அபசெய்யா’’தி வுத்தங். தேஸந்தி ஸதே³வகேன பூஜனெய்யாதீ³னங். ஹரிதுந்தி நேதுங்.
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
எத்தகேனபீதி உபஸங்கமனாதி³னா எத்தகேன அப்பமத்தகேனபி கதவத்தேன அயங் கித்தி…பே॰… ஸோமனஸ்ஸஜாதோ.
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
யஜமானஸ்ஸாதி தெ³ய்யத⁴ம்மங் தெ³ந்தஸ்ஸ. த³க்கி²ணாய இஜ்ஜ²னங் நாம விபுலப²லபா⁴வோதி ஆஹ ‘‘மஹப்ப²லோ ஹோதீ’’தி. விதி³தந்தி படிவித்³த⁴பச்சக்க²கதங். ஆஜானாதீதி வுத்த²ப⁴வாதி³ங் பரியாதா³ய ஜானாதி படிவிஜ்ஜ²தி. ஜானித்வாதி சத்தாரி ஸச்சானி மக்³க³படிபாடியா படிவிஜ்ஜி²த்வா. அக்³க³ப்பத்ததாய கதகிச்சதங் பத்தோ. ப்³ராஹ்மணேன அத்தனா கதோ காரோ ச ப⁴க³வதோ ஏவ பச்சுபட்டா²தீதி தங் த³ஸ்ஸெந்தோ ‘‘இமினா கீ²ணாஸவே யஜனாகாரேன யஜந்தஸ்ஸா’’தி வுத்தங்.
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
தே³வஹிதஸுத்தவண்ணனா நிட்டி²தா.
Devahitasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. தே³வஹிதஸுத்தங் • 3. Devahitasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. தே³வஹிதஸுத்தவண்ணனா • 3. Devahitasuttavaṇṇanā
