| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. દેવહિતસુત્તવણ્ણના
3. Devahitasuttavaṇṇanā
૧૯૯. ઉદરવાતેહીતિ વાતકતવિજ્ઝનતોદનાદિવસેન અપરાપરં વત્તમાનેહિ ઉદરવાતેહિ, તસ્સ વા વિકારેહિ. નિબદ્ધુપટ્ઠાકકાલે પન ધમ્મભણ્ડાગારિકોવ. અરઞ્ઞન્તિ ભગવતો ભિક્ખૂનઞ્ચ વસનટ્ઠાનભૂતં તપોવનં. તં નિદ્ધૂમં હોતિ ઉદકતાપનસ્સપિ અકરણતો. તસ્માતિ યસ્મા તસ્સ ઉણ્હોદકવિક્કિણનચરિયાય જીવિકાકપ્પનં હોતિ, તસ્મા.
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
વત્તમેતં તસ્સ પતિકારત્થં પરિકથાદીનમ્પિ કાતું લબ્ભનતો. ઇદાનિ તત્થ કારણમ્પિ સવિસયં દસ્સેતું ‘‘વણ્ણં હી’’તિઆદિ વુત્તં. ભગવા હિ આયસ્મતો ઉપવાણસ્સ દેવહિતબ્રાહ્મણસ્સ તં સમ્ભાવિતં ભવિસ્સતિ તિકિચ્છાપટિયત્તં, તાય ચ અત્તનો રોગસ્સ વૂપસમનં, તપ્પસઙ્ગેન ચ દેવહિતબ્રાહ્મણો મમ સન્તિકં આગન્ત્વા ધમ્મસ્સવનેન સરણેસુ સીલેસુ ચ પતિટ્ઠહિસ્સતીતિ સબ્બમિદં ઞત્વા એવં ‘‘ઇઙ્ઘ મે ત્વં, ઉપવાણ, ઉણ્હોદકં જાનાહી’’તિ અવોચ. આગમનીયપ્પટિપદં પુબ્બભાગપ્પટિપદં પુબ્બભાગપ્પટિપત્તિં કથેતું વટ્ટતિ અનુત્તરિમનુસ્સધમ્મત્તા. સદેવકેન લોકેનાતિ અનવસેસતો લોકસ્સ ગહણં. ફલવિસેસાકઙ્ખાય પૂજેતબ્બાતિ પૂજનીયા, તે એવ ઇધ ‘‘પૂજનેય્યા’’તિ વુત્તા. તથા આદરેન પૂજેતબ્બતાય સક્કારિયા, આ-કારસ્સ રસ્સત્તં, રિ-સદ્દસ્સ ચ રે-આદેસં કત્વા ‘‘સક્કરેય્યા’’તિ વુત્તં. ‘‘અપચયેય્યા’’તિ વત્તબ્બે ય-કારલોપં કત્વા ‘‘અપચેય્યા’’તિ વુત્તં. તેસન્તિ સદેવકેન પૂજનેય્યાદીનં. હરિતુન્તિ નેતું.
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
એત્તકેનપીતિ ઉપસઙ્કમનાદિના એત્તકેન અપ્પમત્તકેનપિ કતવત્તેન અયં કિત્તિ…પે॰… સોમનસ્સજાતો.
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
યજમાનસ્સાતિ દેય્યધમ્મં દેન્તસ્સ. દક્ખિણાય ઇજ્ઝનં નામ વિપુલફલભાવોતિ આહ ‘‘મહપ્ફલો હોતી’’તિ. વિદિતન્તિ પટિવિદ્ધપચ્ચક્ખકતં. આજાનાતીતિ વુત્થભવાદિં પરિયાદાય જાનાતિ પટિવિજ્ઝતિ. જાનિત્વાતિ ચત્તારિ સચ્ચાનિ મગ્ગપટિપાટિયા પટિવિજ્ઝિત્વા. અગ્ગપ્પત્તતાય કતકિચ્ચતં પત્તો. બ્રાહ્મણેન અત્તના કતો કારો ચ ભગવતો એવ પચ્ચુપટ્ઠાતીતિ તં દસ્સેન્તો ‘‘ઇમિના ખીણાસવે યજનાકારેન યજન્તસ્સા’’તિ વુત્તં.
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
દેવહિતસુત્તવણ્ણના નિટ્ઠિતા.
Devahitasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. દેવહિતસુત્તં • 3. Devahitasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. દેવહિતસુત્તવણ્ણના • 3. Devahitasuttavaṇṇanā
