| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
3. தே³வஸத்³த³ஸுத்தவண்ணனா
3. Devasaddasuttavaṇṇanā
82. ததியே தே³வேஸூதி ட²பெத்வா அரூபாவசரதே³வே சேவ அஸஞ்ஞதே³வே ச தத³ஞ்ஞேஸு உபபத்திதே³வேஸு. தே³வஸத்³தா³தி தே³வானங் பீதிஸமுதா³ஹாரஸத்³தா³. நிச்ச²ரந்தீதி அஞ்ஞமஞ்ஞங் ஆலாபஸல்லாபவஸேன பவத்தந்தி. ஸமயா ஸமயங் உபாதா³யாதி ஸமயதோ ஸமயங் படிச்ச. இத³ங் வுத்தங் ஹோதி – யஸ்மிங் காலே டி²தா தே தே³வா தங் காலங் ஆக³ம்ம நங் பஸ்ஸிஸ்ஸந்தி, ததோ தங் ஸமயங் ஸம்பத்தங் ஆக³ம்மாதி. ‘‘ஸமயங் ஸமயங் உபாதா³யா’’தி ச கேசி பட²ந்தி, தேஸங் தங் தங் ஸமயங் படிச்சாதி அத்தோ². யஸ்மிங் ஸமயேதி யதா³ ‘‘அட்டி²கங்கலூபமா காமா’’திஆதி³னா (ம॰ நி॰ 1.234; பாசி॰ 417), ‘‘ஸம்பா³தோ⁴ க⁴ராவாஸோ’’திஆதி³னா (தீ³॰ நி॰ 1.191; ஸங்॰ நி॰ 2.154) ச காமேஸு க⁴ராவாஸே ச ஆதீ³னவா, தப்படிபக்க²தோ நெக்க²ம்மே ஆனிஸங்ஸா ச ஸுதி³ட்டா² ஹொந்தி, தஸ்மிங் ஸமயே. ததா³ ஹிஸ்ஸ ஏகந்தேன பப்³ப³ஜ்ஜாய சித்தங் நமதி. அரியஸாவகோதி அரியஸ்ஸ பு³த்³த⁴ஸ்ஸ ப⁴க³வதோ ஸாவகோ, ஸாவகபா⁴வங் உபக³ந்துகாமோ, அரியஸாவகோ வா அவஸ்ஸங்பா⁴வீ . அந்திமப⁴விகங் ஸாவகபோ³தி⁴ஸத்தங் ஸந்தா⁴ய அயமாரம்போ⁴. கேஸமஸ்ஸுங் ஓஹாரெத்வாதி கேஸே ச மஸ்ஸுஞ்ச ஓஹாரெத்வா அபனெத்வா. காஸாயானி வத்தா²னி அச்சா²தெ³த்வாதி கஸாயேன ரத்ததாய காஸாயானி ப்³ரஹ்மசரியங் சரந்தானங் அனுச்ச²விகானி வத்தா²னி நிவாஸெத்வா சேவ பாருபித்வா ச. அகா³ரஸ்மா அனகா³ரியங் பப்³ப³ஜ்ஜாய சேதேதீதி அகா³ரஸ்மா க⁴ரா நிக்க²மித்வா அனகா³ரியங் பப்³ப³ஜ்ஜங் பப்³ப³ஜெய்யந்தி பப்³ப³ஜ்ஜாய சேதேதி பகப்பேதி, பப்³ப³ஜதீதி அத்தோ². எத்த² ச யஸ்மா அகா³ரஸ்ஸ ஹிதங் கஸிவணிஜ்ஜாதி³கம்மங் அகா³ரியந்தி வுச்சதி, தஞ்ச பப்³ப³ஜ்ஜாய நத்தி², தஸ்மா பப்³ப³ஜ்ஜா அனகா³ரியந்தி ஞாதப்³பா³.
82. Tatiye devesūti ṭhapetvā arūpāvacaradeve ceva asaññadeve ca tadaññesu upapattidevesu. Devasaddāti devānaṃ pītisamudāhārasaddā. Niccharantīti aññamaññaṃ ālāpasallāpavasena pavattanti. Samayā samayaṃ upādāyāti samayato samayaṃ paṭicca. Idaṃ vuttaṃ hoti – yasmiṃ kāle ṭhitā te devā taṃ kālaṃ āgamma naṃ passissanti, tato taṃ samayaṃ sampattaṃ āgammāti. ‘‘Samayaṃ samayaṃ upādāyā’’ti ca keci paṭhanti, tesaṃ taṃ taṃ samayaṃ paṭiccāti attho. Yasmiṃ samayeti yadā ‘‘aṭṭhikaṅkalūpamā kāmā’’tiādinā (ma. ni. 1.234; pāci. 417), ‘‘sambādho gharāvāso’’tiādinā (dī. ni. 1.191; saṃ. ni. 2.154) ca kāmesu gharāvāse ca ādīnavā, tappaṭipakkhato nekkhamme ānisaṃsā ca sudiṭṭhā honti, tasmiṃ samaye. Tadā hissa ekantena pabbajjāya cittaṃ namati. Ariyasāvakoti ariyassa buddhassa bhagavato sāvako, sāvakabhāvaṃ upagantukāmo, ariyasāvako vā avassaṃbhāvī . Antimabhavikaṃ sāvakabodhisattaṃ sandhāya ayamārambho. Kesamassuṃ ohāretvāti kese ca massuñca ohāretvā apanetvā. Kāsāyāni vatthāni acchādetvāti kasāyena rattatāya kāsāyāni brahmacariyaṃ carantānaṃ anucchavikāni vatthāni nivāsetvā ceva pārupitvā ca. Agārasmā anagāriyaṃ pabbajjāya cetetīti agārasmā gharā nikkhamitvā anagāriyaṃ pabbajjaṃ pabbajeyyanti pabbajjāya ceteti pakappeti, pabbajatīti attho. Ettha ca yasmā agārassa hitaṃ kasivaṇijjādikammaṃ agāriyanti vuccati, tañca pabbajjāya natthi, tasmā pabbajjā anagāriyanti ñātabbā.
மாரேனாதி கிலேஸமாரேன. ஸங்கா³மாய சேதேதீதி யுஜ்ஜ²னத்தா²ய சித்தங் உப்பாதே³தி, மாரங் அபி⁴விஜேதுங் ஸன்னய்ஹதி. யஸ்மா பன ஏவரூபஸ்ஸ படிபஜ்ஜனகபுக்³க³லஸ்ஸ தே³வபுத்தமாரோபி அந்தராயாய உபக்கமதி, தஸ்மா தஸ்ஸபி வஸேன மாரேனாதி எத்த² தே³வபுத்தமாரேனாதிபி அத்தோ² வேதி³தப்³போ³. தஸ்ஸாபி அயங் இச்சா²விகா⁴தங் கரிஸ்ஸதேவாதி. யஸ்மா பன பப்³ப³ஜிததி³வஸதோ பட்டா²ய கு²ரக்³க³தோ வா பட்டா²ய ஸீலானி ஸமாதி³யந்தோ பரிஸோதெ⁴ந்தோ ஸமத²விபஸ்ஸனாஸு கம்மங் கரொந்தோ யதா²ரஹங் தத³ங்க³ப்பஹானவிக்க²ம்ப⁴னப்பஹானானங் வஸேன கிலேஸமாரங் பரிபாதேதி நாம, ந யுஜ்ஜ²தி நாம ஸம்பஹாரஸ்ஸ அபா⁴வதோ, தஸ்மா வுத்தங் ‘‘மாரேன ஸத்³தி⁴ங் ஸங்கா³மாய சேதேதீ’’தி.
Mārenāti kilesamārena. Saṅgāmāya cetetīti yujjhanatthāya cittaṃ uppādeti, māraṃ abhivijetuṃ sannayhati. Yasmā pana evarūpassa paṭipajjanakapuggalassa devaputtamāropi antarāyāya upakkamati, tasmā tassapi vasena mārenāti ettha devaputtamārenātipi attho veditabbo. Tassāpi ayaṃ icchāvighātaṃ karissatevāti. Yasmā pana pabbajitadivasato paṭṭhāya khuraggato vā paṭṭhāya sīlāni samādiyanto parisodhento samathavipassanāsu kammaṃ karonto yathārahaṃ tadaṅgappahānavikkhambhanappahānānaṃ vasena kilesamāraṃ paripāteti nāma, na yujjhati nāma sampahārassa abhāvato, tasmā vuttaṃ ‘‘mārena saddhiṃ saṅgāmāya cetetī’’ti.
ஸத்தன்னந்தி கொட்டா²ஸதோ ஸத்தன்னங், பபே⁴த³தோ பன தே ஸத்ததிங்ஸ ஹொந்தி. கத²ங்? சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த பொ³ஜ்ஜ²ங்கா³ , அரியோ அட்ட²ங்கி³கோ மக்³கோ³தி. ஏவங் பபே⁴த³தோ ஸத்ததிங்ஸவிதா⁴பி ஸதிபட்டா²னாதி³கொட்டா²ஸதோ ஸத்தேவ ஹொந்தீதி வுத்தங் ‘‘ஸத்தன்ன’’ந்தி. போ³தி⁴பக்கி²யானந்தி பு³ஜ்ஜ²னட்டே²ன போ³தீ⁴தி லத்³த⁴னாமஸ்ஸ அரியபுக்³க³லஸ்ஸ மக்³க³ஞாணஸ்ஸேவ வா பக்கே² ப⁴வானங் போ³தி⁴பக்கி²யானங் , போ³தி⁴கொட்டா²ஸியானந்தி அத்தோ². ‘‘போ³தி⁴பக்கி²கான’’ந்திபி பாடோ², போ³தி⁴பக்க²வந்தானங், போ³தி⁴பக்கே² வா நியுத்தானந்தி அத்தோ². பா⁴வனானுயோக³மனுயுத்தோதி விபஸ்ஸனங் உஸ்ஸுக்காபெத்வா அரியமக்³க³பா⁴வனானுயோக³மனுயுத்தோ. விபஸ்ஸனாக்க²ணே ஹி ஸதிபட்டா²னாத³யோ பரியாயேன போ³தி⁴பக்கி²யா நாம, மக்³க³க்க²ணேயேவ பன தே நிப்பரியாயேன போ³தி⁴பக்கி²யா நாம ஹொந்தி.
Sattannanti koṭṭhāsato sattannaṃ, pabhedato pana te sattatiṃsa honti. Kathaṃ? Cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā , ariyo aṭṭhaṅgiko maggoti. Evaṃ pabhedato sattatiṃsavidhāpi satipaṭṭhānādikoṭṭhāsato satteva hontīti vuttaṃ ‘‘sattanna’’nti. Bodhipakkhiyānanti bujjhanaṭṭhena bodhīti laddhanāmassa ariyapuggalassa maggañāṇasseva vā pakkhe bhavānaṃ bodhipakkhiyānaṃ , bodhikoṭṭhāsiyānanti attho. ‘‘Bodhipakkhikāna’’ntipi pāṭho, bodhipakkhavantānaṃ, bodhipakkhe vā niyuttānanti attho. Bhāvanānuyogamanuyuttoti vipassanaṃ ussukkāpetvā ariyamaggabhāvanānuyogamanuyutto. Vipassanākkhaṇe hi satipaṭṭhānādayo pariyāyena bodhipakkhiyā nāma, maggakkhaṇeyeva pana te nippariyāyena bodhipakkhiyā nāma honti.
ஆஸவானங் க²யாதி காமாஸவாதீ³னங் ஸப்³பே³ஸங் ஆஸவானங் க²யா. ஆஸவேஸு ஹி கீ²ணேஸு ஸப்³பே³ கிலேஸா கீ²ணாயேவ ஹொந்தி. தேன அரஹத்தமக்³கோ³ வுத்தோ ஹோதி. அனாஸவந்தி ஆஸவவிரஹிதங். சேதோவிமுத்திங் பஞ்ஞாவிமுத்திந்தி எத்த² சேதோவசனேன அரஹத்தப²லஸமாதி⁴, பஞ்ஞாவசனேன தங்ஸம்பயுத்தா ச பஞ்ஞா வுத்தா. தத்த² ஸமாதி⁴ ராக³தோ விமுத்தத்தா சேதோவிமுத்தி, பஞ்ஞா அவிஜ்ஜாய விமுத்தத்தா பஞ்ஞாவிமுத்தீதி வேதி³தப்³பா³. வுத்தஞ்ஹேதங் ப⁴க³வதா –
Āsavānaṃ khayāti kāmāsavādīnaṃ sabbesaṃ āsavānaṃ khayā. Āsavesu hi khīṇesu sabbe kilesā khīṇāyeva honti. Tena arahattamaggo vutto hoti. Anāsavanti āsavavirahitaṃ. Cetovimuttiṃ paññāvimuttinti ettha cetovacanena arahattaphalasamādhi, paññāvacanena taṃsampayuttā ca paññā vuttā. Tattha samādhi rāgato vimuttattā cetovimutti, paññā avijjāya vimuttattā paññāvimuttīti veditabbā. Vuttañhetaṃ bhagavatā –
‘‘யோ ஹிஸ்ஸ, பி⁴க்க²வே, ஸமாதி⁴, தத³ஸ்ஸ ஸமாதி⁴ந்த்³ரியங். யா ஹிஸ்ஸ, பி⁴க்க²வே, பஞ்ஞா, தத³ஸ்ஸ பஞ்ஞிந்த்³ரியங். இதி கோ², பி⁴க்க²வே, ராக³விராகா³ சேதோவிமுத்தி, அவிஜ்ஜாவிராகா³ பஞ்ஞாவிமுத்தீ’’தி (ஸங்॰ நி॰ 5.516).
‘‘Yo hissa, bhikkhave, samādhi, tadassa samādhindriyaṃ. Yā hissa, bhikkhave, paññā, tadassa paññindriyaṃ. Iti kho, bhikkhave, rāgavirāgā cetovimutti, avijjāvirāgā paññāvimuttī’’ti (saṃ. ni. 5.516).
அபிசெத்த² ஸமத²ப²லங் சேதோவிமுத்தி, விபஸ்ஸனாப²லங் பஞ்ஞாவிமுத்தீதி வேதி³தப்³பா³. தி³ட்டே²வ த⁴ம்மேதி இமஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ அபி⁴விஸிட்டா²ய பஞ்ஞாய பச்சக்க²ங் கத்வா அபரப்பச்சயேன ஞத்வா. உபஸம்பஜ்ஜ விஹரதீதி பாபுணித்வா ஸம்பாதெ³த்வா விஹரதி. தமேவ ஸங்கா³மஸீஸங் அபி⁴விஜிய அஜ்ஜா²வஸதீதி மாரங் அபி⁴விஜினித்வா விஜிதவிஜயத்தா தேன கதஸங்கா³மஸங்கா²தஸ்ஸ அரியமக்³க³ஸ்ஸ ஸீஸபூ⁴தங் அரஹத்தப²லஸமாபத்திஇஸ்ஸரியட்டா²னங், அபி⁴ப⁴வந்தோ ஆவஸதி, ஸமாபஜ்ஜதி இச்சேவ அத்தோ². இமே ச தே³வஸத்³தா³ தி³ட்ட²ஸச்சேஸு தே³வேஸு பவத்தந்தி, விஸேஸதோ ஸுத்³தா⁴வாஸதே³வேஸூதி வேதி³தப்³ப³ங்.
Apicettha samathaphalaṃ cetovimutti, vipassanāphalaṃ paññāvimuttīti veditabbā. Diṭṭheva dhammeti imasmiṃyeva attabhāve. Sayaṃ abhiññā sacchikatvāti attanāyeva abhivisiṭṭhāya paññāya paccakkhaṃ katvā aparappaccayena ñatvā. Upasampajja viharatīti pāpuṇitvā sampādetvā viharati. Tameva saṅgāmasīsaṃ abhivijiya ajjhāvasatīti māraṃ abhivijinitvā vijitavijayattā tena katasaṅgāmasaṅkhātassa ariyamaggassa sīsabhūtaṃ arahattaphalasamāpattiissariyaṭṭhānaṃ, abhibhavanto āvasati, samāpajjati icceva attho. Ime ca devasaddā diṭṭhasaccesu devesu pavattanti, visesato suddhāvāsadevesūti veditabbaṃ.
கா³தா²ஸு மஹந்தந்தி ஸீலாதி³கு³ணமஹத்தேன மஹந்தங். வீதஸாரத³ந்தி ஸாரஜ்ஜகரானங் கிலேஸானங் அபா⁴வேன விக³தஸாரஜ்ஜங் அபக³தமங்குபா⁴வங். புரிஸாஜஞ்ஞாதி அஸ்ஸாதீ³ஸு அஸ்ஸாஜானீயாத³யோ விய புரிஸேஸு ஆஜானீயபூ⁴தா உத்தமபுரிஸா. து³ஜ்ஜயமஜ்ஜ²பூ⁴தி பசுரஜனேஹி ஜேதுங் அஸக்குணெய்யங் கிலேஸவாஹினிங் அபி⁴ப⁴வி அஜ்ஜொ²த்த²ரி. ‘‘அஜ்ஜயீ’’திபி பட²ந்தி, அஜினீதி அத்தோ². ஜெத்வான மச்சுனோ ஸேனங், விமொக்கே²ன அனாவரந்தி லோகத்தயாபி⁴ப்³யாபனதோ தி³யட்³ட⁴ஸஹஸ்ஸாதி³விபா⁴க³தோ ச விபுலத்தா அஞ்ஞேஹி ஆவரிதுங் படிஸேதே⁴துங் அஸக்குணெய்யத்தா ச அனாவரங், மச்சுனோ மாரஸ்ஸ ஸேனங் விமொக்கே²ன அரியமக்³கே³ன ஜெத்வா யோ த்வங் து³ஜ்ஜயங் அஜயி, தஸ்ஸ நமோ, தே புரிஸாஜஞ்ஞாதி ஸம்ப³ந்தோ⁴.
Gāthāsu mahantanti sīlādiguṇamahattena mahantaṃ. Vītasāradanti sārajjakarānaṃ kilesānaṃ abhāvena vigatasārajjaṃ apagatamaṅkubhāvaṃ. Purisājaññāti assādīsu assājānīyādayo viya purisesu ājānīyabhūtā uttamapurisā. Dujjayamajjhabhūti pacurajanehi jetuṃ asakkuṇeyyaṃ kilesavāhiniṃ abhibhavi ajjhotthari. ‘‘Ajjayī’’tipi paṭhanti, ajinīti attho. Jetvāna maccunosenaṃ, vimokkhena anāvaranti lokattayābhibyāpanato diyaḍḍhasahassādivibhāgato ca vipulattā aññehi āvarituṃ paṭisedhetuṃ asakkuṇeyyattā ca anāvaraṃ, maccuno mārassa senaṃ vimokkhena ariyamaggena jetvā yo tvaṃ dujjayaṃ ajayi, tassa namo, te purisājaññāti sambandho.
இதீதி வுத்தப்பகாரேன. ஹி-இதி நிபாதமத்தங். ஏதங் பத்தமானஸங் அதி⁴க³தாரஹத்தங் கீ²ணாஸவங் தே³வதா நமஸ்ஸந்தீதி வுத்தமேவத்த²ங் நிக³மனவஸேன த³ஸ்ஸேதி. அத² வா இதீதி இமினா காரணேன. கிங் பன ஏதங் காரணங்? நமுசிஸேனாவிஜயேன பத்தமானஸத்தங். இமினா காரணேன தங் தே³வதா நமஸ்ஸந்தீதி அத்தோ². இதா³னி தங் காரணங் ப²லதோ த³ஸ்ஸேதுங் ‘‘தஞ்ஹி தஸ்ஸ ந பஸ்ஸந்தி, யேன மச்சுவஸங் வஜே’’தி வுத்தங். தஸ்ஸத்தோ² – யஸ்மா தஸ்ஸ புரிஸாஜஞ்ஞஸ்ஸ பணிதா⁴ய க³வேஸந்தாபி தே³வா அணுமத்தம்பி தங் காரணங் ந பஸ்ஸந்தி, யேன ஸோ மச்சுனோ மரணஸ்ஸ வஸங் வஜே உபக³ச்செ²ய்ய. தஸ்மா தங் விஸுத்³தி⁴தே³வா நமஸ்ஸந்தீதி.
Itīti vuttappakārena. Hi-iti nipātamattaṃ. Etaṃ pattamānasaṃ adhigatārahattaṃ khīṇāsavaṃ devatānamassantīti vuttamevatthaṃ nigamanavasena dasseti. Atha vā itīti iminā kāraṇena. Kiṃ pana etaṃ kāraṇaṃ? Namucisenāvijayena pattamānasattaṃ. Iminā kāraṇena taṃ devatā namassantīti attho. Idāni taṃ kāraṇaṃ phalato dassetuṃ ‘‘tañhi tassa na passanti, yena maccuvasaṃ vaje’’ti vuttaṃ. Tassattho – yasmā tassa purisājaññassa paṇidhāya gavesantāpi devā aṇumattampi taṃ kāraṇaṃ na passanti, yena so maccuno maraṇassa vasaṃ vaje upagaccheyya. Tasmā taṃ visuddhidevā namassantīti.
ததியஸுத்தவண்ணனா நிட்டி²தா.
Tatiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 3. தே³வஸத்³த³ஸுத்தங் • 3. Devasaddasuttaṃ
