| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. தே³வதாஸுத்தங்
5. Devatāsuttaṃ
69. அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் ஜேதவனங் ஓபா⁴ஸெத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா ப⁴க³வந்தங் ஏதத³வோச – ‘‘ச²யிமே, ப⁴ந்தே, த⁴ம்மா பி⁴க்கு²னோ அபரிஹானாய ஸங்வத்தந்தி. கதமே ச²? ஸத்து²கா³ரவதா, த⁴ம்மகா³ரவதா, ஸங்க⁴கா³ரவதா, ஸிக்கா²கா³ரவதா, ஸோவசஸ்ஸதா, கல்யாணமித்ததா – இமே கோ², ப⁴ந்தே, ச² த⁴ம்மா பி⁴க்கு²னோ அபரிஹானாய ஸங்வத்தந்தீ’’தி. இத³மவோச ஸா தே³வதா. ஸமனுஞ்ஞோ ஸத்தா² அஹோஸி. அத² கோ² ஸா தே³வதா ‘‘ஸமனுஞ்ஞோ மே ஸத்தா²’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி.
69. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca – ‘‘chayime, bhante, dhammā bhikkhuno aparihānāya saṃvattanti. Katame cha? Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā – ime kho, bhante, cha dhammā bhikkhuno aparihānāya saṃvattantī’’ti. Idamavoca sā devatā. Samanuñño satthā ahosi. Atha kho sā devatā ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமங் , பி⁴க்க²வே, ரத்திங் அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் ஜேதவனங் ஓபா⁴ஸெத்வா யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ², பி⁴க்க²வே, ஸா தே³வதா மங் ஏதத³வோச – ‘ச²யிமே, ப⁴ந்தே, த⁴ம்மா பி⁴க்கு²னோ அபரிஹானாய ஸங்வத்தந்தி. கதமே ச²? ஸத்து²கா³ரவதா, த⁴ம்மகா³ரவதா, ஸங்க⁴கா³ரவதா, ஸிக்கா²கா³ரவதா, ஸோவசஸ்ஸதா, கல்யாணமித்ததா – இமே கோ², ப⁴ந்தே, ச² த⁴ம்மா பி⁴க்கு²னோ அபரிஹானாய ஸங்வத்தந்தீ’தி. இத³மவோச, பி⁴க்க²வே, ஸா தே³வதா. இத³ங் வத்வா மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யீ’’தி.
Atha kho bhagavā tassā rattiyā accayena bhikkhū āmantesi – ‘‘imaṃ , bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘chayime, bhante, dhammā bhikkhuno aparihānāya saṃvattanti. Katame cha? Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā – ime kho, bhante, cha dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
ஏவங் வுத்தே ஆயஸ்மா ஸாரிபுத்தோ ப⁴க³வந்தங் அபி⁴வாதெ³த்வா ஏதத³வோச – ‘‘இமஸ்ஸ கோ² அஹங், ப⁴ந்தே, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமி. இத⁴, ப⁴ந்தே, பி⁴க்கு² அத்தனா ச ஸத்து²கா³ரவோ ஹோதி ஸத்து²கா³ரவதாய ச வண்ணவாதீ³. யே சஞ்ஞே பி⁴க்கூ² ந ஸத்து²கா³ரவா தே ச ஸத்து²கா³ரவதாய ஸமாத³பேதி. யே சஞ்ஞே பி⁴க்கூ² ஸத்து²கா³ரவா தேஸஞ்ச வண்ணங் ப⁴ணதி பூ⁴தங் தச்ச²ங் காலேன. அத்தனா ச த⁴ம்மகா³ரவோ ஹோதி…பே॰… ஸங்க⁴கா³ரவோ ஹோதி… ஸிக்கா²கா³ரவோ ஹோதி … ஸுவசோ ஹோதி… கல்யாணமித்தோ ஹோதி கல்யாணமித்ததாய ச வண்ணவாதீ³. யே சஞ்ஞே பி⁴க்கூ² ந கல்யாணமித்தா தே ச கல்யாணமித்ததாய ஸமாத³பேதி. யே சஞ்ஞே பி⁴க்கூ² கல்யாணமித்தா தேஸஞ்ச வண்ணங் ப⁴ணதி பூ⁴தங் தச்ச²ங் காலேன . இமஸ்ஸ கோ² அஹங், ப⁴ந்தே, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமீ’’தி.
Evaṃ vutte āyasmā sāriputto bhagavantaṃ abhivādetvā etadavoca – ‘‘imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmi. Idha, bhante, bhikkhu attanā ca satthugāravo hoti satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti. Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti … suvaco hoti… kalyāṇamitto hoti kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti. Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālena . Imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘ஸாது⁴ ஸாது⁴, ஸாரிபுத்த! ஸாது⁴ கோ² த்வங், ஸாரிபுத்த, இமஸ்ஸ மயா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாஸி. இத⁴, ஸாரிபுத்த, பி⁴க்கு² அத்தனா ச ஸத்து²கா³ரவோ ஹோதி ஸத்து²கா³ரவதாய ச வண்ணவாதீ³. யே சஞ்ஞே பி⁴க்கூ² ந ஸத்து²கா³ரவா தே ச ஸத்து²கா³ரவதாய ஸமாத³பேதி. யே சஞ்ஞே பி⁴க்கூ² ஸத்து²கா³ரவா தேஸஞ்ச வண்ணங் ப⁴ணதி பூ⁴தங் தச்ச²ங் காலேன. அத்தனா ச த⁴ம்மகா³ரவோ ஹோதி…பே॰… ஸங்க⁴கா³ரவோ ஹோதி… ஸிக்கா²கா³ரவோ ஹோதி… ஸுவசோ ஹோதி… கல்யாணமித்தோ ஹோதி கல்யாணமித்ததாய ச வண்ணவாதீ³. யே சஞ்ஞே பி⁴க்கூ² ந கல்யாணமித்தா தே ச கல்யாணமித்ததாய ஸமாத³பேதி. யே சஞ்ஞே பி⁴க்கூ² கல்யாணமித்தா தேஸஞ்ச வண்ணங் ப⁴ணதி பூ⁴தங் தச்ச²ங் காலேன. இமஸ்ஸ கோ², ஸாரிபுத்த, மயா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்தோ² த³ட்ட²ப்³போ³’’தி. பஞ்சமங்.
‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa evaṃ vitthārena atthaṃ ājānāsi. Idha, sāriputta, bhikkhu attanā ca satthugāravo hoti satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti. Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti… suvaco hoti… kalyāṇamitto hoti kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti. Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālena. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. தே³வதாஸுத்தவண்ணனா • 5. Devatāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-5. ஸங்க³ணிகாராமஸுத்தாதி³வண்ணனா • 4-5. Saṅgaṇikārāmasuttādivaṇṇanā
