| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. தே³வதாஸுத்தங்
9. Devatāsuttaṃ
19. ‘‘இமஞ்ச, பி⁴க்க²வே, ரத்திங் ஸம்ப³ஹுலா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் ஜேதவனங் ஓபா⁴ஸெத்வா யேனாஹங் தேனுபஸங்கமிங்ஸு; உபஸங்கமித்வா மங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ², பி⁴க்க²வே, தா தே³வதா மங் ஏதத³வோசுங் – ‘உபஸங்கமிங்ஸு நோ, ப⁴ந்தே, புப்³பே³ மனுஸ்ஸபூ⁴தானங் பப்³ப³ஜிதா அகா³ரானி. தே மயங், ப⁴ந்தே, பச்சுட்டி²ம்ஹ, நோ ச கோ² அபி⁴வாதி³ம்ஹ. தா மயங், ப⁴ந்தே, அபரிபுண்ணகம்மந்தா விப்படிஸாரினியோ பச்சானுதாபினியோ ஹீனங் காயங் உபபன்னா’’’தி.
19. ‘‘Imañca, bhikkhave, rattiṃ sambahulā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkamiṃsu; upasaṅkamitvā maṃ abhivādetvā ekamantaṃ aṭṭhaṃsu. Ekamantaṃ ṭhitā kho, bhikkhave, tā devatā maṃ etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha, no ca kho abhivādimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘அபராபி மங், பி⁴க்க²வே, ஸம்ப³ஹுலா தே³வதா உபஸங்கமித்வா ஏதத³வோசுங் – ‘உபஸங்கமிங்ஸு நோ, ப⁴ந்தே, புப்³பே³ மனுஸ்ஸபூ⁴தானங் பப்³ப³ஜிதா அகா³ரானி. தே மயங், ப⁴ந்தே, பச்சுட்டி²ம்ஹ அபி⁴வாதி³ம்ஹ 1, நோ ச தேஸங் ஆஸனங் அத³ம்ஹ. தா மயங், ப⁴ந்தே, அபரிபுண்ணகம்மந்தா விப்படிஸாரினியோ பச்சானுதாபினியோ ஹீனங் காயங் உபபன்னா’’’தி.
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 2, no ca tesaṃ āsanaṃ adamha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘அபராபி மங், பி⁴க்க²வே, ஸம்ப³ஹுலா தே³வதா உபஸங்கமித்வா ஏதத³வோசுங் – ‘உபஸங்கமிங்ஸு நோ, ப⁴ந்தே, புப்³பே³ மனுஸ்ஸபூ⁴தானங் பப்³ப³ஜிதா அகா³ரானி. தே மயங், ப⁴ந்தே, பச்சுட்டி²ம்ஹ அபி⁴வாதி³ம்ஹ 3 ஆஸனங் 4 அத³ம்ஹ, நோ ச கோ² யதா²ஸத்தி யதா²ப³லங் ஸங்விப⁴ஜிம்ஹ…பே॰… யதா²ஸத்தி யதா²ப³லங் 5 ஸங்விப⁴ஜிம்ஹ, நோ ச கோ² உபனிஸீதி³ம்ஹ த⁴ம்மஸ்ஸவனாய…பே॰… உபனிஸீதி³ம்ஹ 6 த⁴ம்மஸ்ஸவனாய, நோ ச கோ² ஓஹிதஸோதா த⁴ம்மங் ஸுணிம்ஹ…பே॰… ஓஹிதஸோதா ச த⁴ம்மங் ஸுணிம்ஹ, நோ ச கோ² ஸுத்வா த⁴ம்மங் தா⁴ரயிம்ஹ…பே॰… ஸுத்வா ச த⁴ம்மங் தா⁴ரயிம்ஹ, நோ ச கோ² தா⁴தானங் த⁴ம்மானங் அத்த²ங் உபபரிக்கி²ம்ஹ…பே॰… தா⁴தானஞ்ச த⁴ம்மானங் அத்த²ங் உபபரிக்கி²ம்ஹ, நோ ச கோ² அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மங் படிபஜ்ஜிம்ஹ. தா மயங், ப⁴ந்தே, அபரிபுண்ணகம்மந்தா விப்படிஸாரினியோ பச்சானுதாபினியோ ஹீனங் காயங் உபபன்னா’’’தி.
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 7 āsanaṃ 8 adamha, no ca kho yathāsatti yathābalaṃ saṃvibhajimha…pe… yathāsatti yathābalaṃ 9 saṃvibhajimha, no ca kho upanisīdimha dhammassavanāya…pe… upanisīdimha 10 dhammassavanāya, no ca kho ohitasotā dhammaṃ suṇimha…pe… ohitasotā ca dhammaṃ suṇimha, no ca kho sutvā dhammaṃ dhārayimha…pe… sutvā ca dhammaṃ dhārayimha, no ca kho dhātānaṃ dhammānaṃ atthaṃ upaparikkhimha…pe… dhātānañca dhammānaṃ atthaṃ upaparikkhimha, no ca kho atthamaññāya dhammamaññāya dhammānudhammaṃ paṭipajjimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘அபராபி மங், பி⁴க்க²வே, ஸம்ப³ஹுலா தே³வதா உபஸங்கமித்வா ஏதத³வோசுங் – ‘உபஸங்கமிங்ஸு நோ, ப⁴ந்தே, புப்³பே³ மனுஸ்ஸபூ⁴தானங் பப்³ப³ஜிதா அகா³ரானி. தே மயங், ப⁴ந்தே, பச்சுட்டி²ம்ஹ அபி⁴வாதி³ம்ஹ 11, ஆஸனங் 12 அத³ம்ஹ, யதா²ஸத்தி யதா²ப³லங் 13 ஸங்விப⁴ஜிம்ஹ, உபனிஸீதி³ம்ஹ 14 த⁴ம்மஸ்ஸவனாய, ஓஹிதஸோதா ச த⁴ம்மங் ஸுணிம்ஹ, ஸுத்வா ச த⁴ம்மங் தா⁴ரயிம்ஹ, தா⁴தானஞ்ச த⁴ம்மானங் அத்த²ங் உபபரிக்கி²ம்ஹ, அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மங் 15 படிபஜ்ஜிம்ஹ. தா மயங், ப⁴ந்தே, பரிபுண்ணகம்மந்தா அவிப்படிஸாரினியோ அபச்சானுதாபினியோ பணீதங் காயங் உபபன்னா’தி. ஏதானி, பி⁴க்க²வே, ருக்க²மூலானி ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த², மா பச்சா² விப்படிஸாரினோ அஹுவத்த² ஸெய்யதா²பி தா புரிமிகா தே³வதா’’தி. நவமங்.
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 16, āsanaṃ 17 adamha, yathāsatti yathābalaṃ 18 saṃvibhajimha, upanisīdimha 19 dhammassavanāya, ohitasotā ca dhammaṃ suṇimha, sutvā ca dhammaṃ dhārayimha, dhātānañca dhammānaṃ atthaṃ upaparikkhimha, atthamaññāya dhammamaññāya dhammānudhammaṃ 20 paṭipajjimha. Tā mayaṃ, bhante, paripuṇṇakammantā avippaṭisāriniyo apaccānutāpiniyo paṇītaṃ kāyaṃ upapannā’ti. Etāni, bhikkhave, rukkhamūlāni etāni suññāgārāni. Jhāyatha, bhikkhave, mā pamādattha, mā pacchā vippaṭisārino ahuvattha seyyathāpi tā purimikā devatā’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. தே³வதாஸுத்தவண்ணனா • 9. Devatāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-9. க³ண்ட³ஸுத்தாதி³வண்ணனா • 5-9. Gaṇḍasuttādivaṇṇanā
