| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. த⁴ஜக்³க³ஸுத்தவண்ணனா
3. Dhajaggasuttavaṇṇanā
249. ஸமுபப்³யூள்ஹோதி உபி⁴ன்னங் ஸஹ ஏவ ஸமாக³மோ, பு⁴ஸங் வா ப்³யூள்ஹோதி அத்தோ². பு⁴ஸா பனஸ்ஸ ப்³யூள்ஹதா த்³வின்னங் ஸேனானங் ஸமாக³ந்த்வா ஸம்பிண்டி³தபா⁴வேனாதி ஆஹ ‘‘ஸம்பிண்டி³தோ ராஸிபூ⁴தோ’’தி. பச்சி²மந்தோதி ரத²பஞ்ஜரஸ்ஸ பரந்தோ பச்சி²மந்தோ பச்சி²மகொட்டா²ஸோ. ரத²ஸந்தி⁴தோதி ரத²பஞ்ஜரஸ்ஸ குப்³ப³ரேன ஸத்³தி⁴ங் ஸம்ப³ந்த⁴னட்டா²னதோ. ததே³வ பமாணந்தி ததே³வ ‘‘தி³யட்³ட⁴யோஜனஸதாயாமோ’’தி வுத்தப்பமாணமேவ. தி³கு³ணங் கத்வாதி ‘‘பச்சி²மந்தோ ஸதயோஜனோ’’திஆதி³னா தி³கு³ணங் கத்வா. சந்த³மண்ட³லஸூரியமண்ட³லகிங்கிணிகஜாலாதி³பே⁴த³ஸ்ஸ ஸேஸாலங்காரஸ்ஸ. பஸ்ஸந்தானங் தே³வானங். ராஜா நோதி அம்ஹாகங் ராஜா தே³வஸெட்டோ². து³தியங் ஆஸனங் லப⁴தீதி ஸக்கே நிஸின்னே தஸ்ஸ அனந்தரங் து³தியங் ஆஸனங் லப⁴தி. தஸ்மா தே³வஸெட்ட²தாய ஸக்கோ விய கா³ரவட்டா²னியோ, யதோ ஸக்கோ ‘‘தஸ்ஸ த⁴ஜக்³க³ங் உல்லோகெய்யாதா²’’தி ஆஹ. ஏஸ நயோ ஸேஸேஸுபி. அஸுரேஹி பராஜிதோதி அஸுரேஹி பராஜயங் ஆபாதி³தோ. ரஜத⁴ஜங் தி³ஸ்வாதி பரஸேனாய உபக³ச்ச²ந்தியா உட்டி²தரஜமத்தம்பி தி³ஸ்வா டி²தோபி தங் ரஜத⁴ஜங் தி³ஸ்வா பீ⁴ருபா⁴வேன பலாயனத⁴ம்மோ.
249.Samupabyūḷhoti ubhinnaṃ saha eva samāgamo, bhusaṃ vā byūḷhoti attho. Bhusā panassa byūḷhatā dvinnaṃ senānaṃ samāgantvā sampiṇḍitabhāvenāti āha ‘‘sampiṇḍito rāsibhūto’’ti. Pacchimantoti rathapañjarassa paranto pacchimanto pacchimakoṭṭhāso. Rathasandhitoti rathapañjarassa kubbarena saddhiṃ sambandhanaṭṭhānato. Tadeva pamāṇanti tadeva ‘‘diyaḍḍhayojanasatāyāmo’’ti vuttappamāṇameva. Diguṇaṃ katvāti ‘‘pacchimanto satayojano’’tiādinā diguṇaṃ katvā. Candamaṇḍalasūriyamaṇḍalakiṅkiṇikajālādibhedassa sesālaṅkārassa. Passantānaṃ devānaṃ. Rājā noti amhākaṃ rājā devaseṭṭho. Dutiyaṃ āsanaṃ labhatīti sakke nisinne tassa anantaraṃ dutiyaṃ āsanaṃ labhati. Tasmā devaseṭṭhatāya sakko viya gāravaṭṭhāniyo, yato sakko ‘‘tassa dhajaggaṃ ullokeyyāthā’’ti āha. Esa nayo sesesupi. Asurehi parājitoti asurehi parājayaṃ āpādito. Rajadhajaṃ disvāti parasenāya upagacchantiyā uṭṭhitarajamattampi disvā ṭhitopi taṃ rajadhajaṃ disvā bhīrubhāvena palāyanadhammo.
யஸ்ஸ த⁴ஜக்³க³பரித்தஸ்ஸ. ஆனுபா⁴வோ வத்ததி அஸம்முகீ²பூ⁴தாஹிபி தே³வதாஹி ஸிரஸா ஸம்படிச்சி²தப்³ப³தோ. சோரப⁴யாதீ³ஹீதி ஆதி³-ஸத்³தே³ன ரோக³ப⁴யாதீ³னஞ்சேவ வட்டது³க்க²ஸ்ஸ ச ஸங்க³ஹோ த³ட்ட²ப்³போ³ விதி⁴னா பா⁴விதே பரித்தஸ்ஸ அத்தே² உபசாரஜ்ஜா²னாதீ³னம்பி இஜ்ஜ²னதோ.
Yassa dhajaggaparittassa. Ānubhāvo vattati asammukhībhūtāhipi devatāhi sirasā sampaṭicchitabbato. Corabhayādīhīti ādi-saddena rogabhayādīnañceva vaṭṭadukkhassa ca saṅgaho daṭṭhabbo vidhinā bhāvite parittassa atthe upacārajjhānādīnampi ijjhanato.
தீ³க⁴வாபீனாமகே கா³மே சேதியங் தீ³க⁴வாபிசேதியங். முத்³த⁴வேதி³கா நாம ஹம்மியங் பரிக்கி²பித்வா கதவேதி³கா. பு³த்³த⁴க³தங் ஸதிங் உபட்ட²பெத்வா பரித்தரக்க²கு³த்திங் ஆஹ. பரித்தஸ்ஸ ஆனுபா⁴வேன த்³வே இட்ட²கா…பே॰… அட்ட²ங்ஸு. ததா² ஹி தஸ்மிங் நிஸ்ஸேணியங் டி²தே…பே॰… அட்ட²ங்ஸூதி.
Dīghavāpīnāmake gāme cetiyaṃ dīghavāpicetiyaṃ. Muddhavedikā nāma hammiyaṃ parikkhipitvā katavedikā. Buddhagataṃ satiṃ upaṭṭhapetvā parittarakkhaguttiṃ āha. Parittassa ānubhāvena dve iṭṭhakā…pe… aṭṭhaṃsu. Tathā hi tasmiṃ nisseṇiyaṃ ṭhite…pe… aṭṭhaṃsūti.
த⁴ஜக்³க³ஸுத்தவண்ணனா நிட்டி²தா.
Dhajaggasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. த⁴ஜக்³க³ஸுத்தங் • 3. Dhajaggasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. த⁴ஜக்³க³ஸுத்தவண்ணனா • 3. Dhajaggasuttavaṇṇanā
