| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. ધજગ્ગસુત્તવણ્ણના
3. Dhajaggasuttavaṇṇanā
૨૪૯. સમુપબ્યૂળ્હોતિ ઉભિન્નં સહ એવ સમાગમો, ભુસં વા બ્યૂળ્હોતિ અત્થો. ભુસા પનસ્સ બ્યૂળ્હતા દ્વિન્નં સેનાનં સમાગન્ત્વા સમ્પિણ્ડિતભાવેનાતિ આહ ‘‘સમ્પિણ્ડિતો રાસિભૂતો’’તિ. પચ્છિમન્તોતિ રથપઞ્જરસ્સ પરન્તો પચ્છિમન્તો પચ્છિમકોટ્ઠાસો. રથસન્ધિતોતિ રથપઞ્જરસ્સ કુબ્બરેન સદ્ધિં સમ્બન્ધનટ્ઠાનતો. તદેવ પમાણન્તિ તદેવ ‘‘દિયડ્ઢયોજનસતાયામો’’તિ વુત્તપ્પમાણમેવ. દિગુણં કત્વાતિ ‘‘પચ્છિમન્તો સતયોજનો’’તિઆદિના દિગુણં કત્વા. ચન્દમણ્ડલસૂરિયમણ્ડલકિઙ્કિણિકજાલાદિભેદસ્સ સેસાલઙ્કારસ્સ. પસ્સન્તાનં દેવાનં. રાજા નોતિ અમ્હાકં રાજા દેવસેટ્ઠો. દુતિયં આસનં લભતીતિ સક્કે નિસિન્ને તસ્સ અનન્તરં દુતિયં આસનં લભતિ. તસ્મા દેવસેટ્ઠતાય સક્કો વિય ગારવટ્ઠાનિયો, યતો સક્કો ‘‘તસ્સ ધજગ્ગં ઉલ્લોકેય્યાથા’’તિ આહ. એસ નયો સેસેસુપિ. અસુરેહિ પરાજિતોતિ અસુરેહિ પરાજયં આપાદિતો. રજધજં દિસ્વાતિ પરસેનાય ઉપગચ્છન્તિયા ઉટ્ઠિતરજમત્તમ્પિ દિસ્વા ઠિતોપિ તં રજધજં દિસ્વા ભીરુભાવેન પલાયનધમ્મો.
249.Samupabyūḷhoti ubhinnaṃ saha eva samāgamo, bhusaṃ vā byūḷhoti attho. Bhusā panassa byūḷhatā dvinnaṃ senānaṃ samāgantvā sampiṇḍitabhāvenāti āha ‘‘sampiṇḍito rāsibhūto’’ti. Pacchimantoti rathapañjarassa paranto pacchimanto pacchimakoṭṭhāso. Rathasandhitoti rathapañjarassa kubbarena saddhiṃ sambandhanaṭṭhānato. Tadeva pamāṇanti tadeva ‘‘diyaḍḍhayojanasatāyāmo’’ti vuttappamāṇameva. Diguṇaṃ katvāti ‘‘pacchimanto satayojano’’tiādinā diguṇaṃ katvā. Candamaṇḍalasūriyamaṇḍalakiṅkiṇikajālādibhedassa sesālaṅkārassa. Passantānaṃ devānaṃ. Rājā noti amhākaṃ rājā devaseṭṭho. Dutiyaṃ āsanaṃ labhatīti sakke nisinne tassa anantaraṃ dutiyaṃ āsanaṃ labhati. Tasmā devaseṭṭhatāya sakko viya gāravaṭṭhāniyo, yato sakko ‘‘tassa dhajaggaṃ ullokeyyāthā’’ti āha. Esa nayo sesesupi. Asurehi parājitoti asurehi parājayaṃ āpādito. Rajadhajaṃ disvāti parasenāya upagacchantiyā uṭṭhitarajamattampi disvā ṭhitopi taṃ rajadhajaṃ disvā bhīrubhāvena palāyanadhammo.
યસ્સ ધજગ્ગપરિત્તસ્સ. આનુભાવો વત્તતિ અસમ્મુખીભૂતાહિપિ દેવતાહિ સિરસા સમ્પટિચ્છિતબ્બતો. ચોરભયાદીહીતિ આદિ-સદ્દેન રોગભયાદીનઞ્ચેવ વટ્ટદુક્ખસ્સ ચ સઙ્ગહો દટ્ઠબ્બો વિધિના ભાવિતે પરિત્તસ્સ અત્થે ઉપચારજ્ઝાનાદીનમ્પિ ઇજ્ઝનતો.
Yassa dhajaggaparittassa. Ānubhāvo vattati asammukhībhūtāhipi devatāhi sirasā sampaṭicchitabbato. Corabhayādīhīti ādi-saddena rogabhayādīnañceva vaṭṭadukkhassa ca saṅgaho daṭṭhabbo vidhinā bhāvite parittassa atthe upacārajjhānādīnampi ijjhanato.
દીઘવાપીનામકે ગામે ચેતિયં દીઘવાપિચેતિયં. મુદ્ધવેદિકા નામ હમ્મિયં પરિક્ખિપિત્વા કતવેદિકા. બુદ્ધગતં સતિં ઉપટ્ઠપેત્વા પરિત્તરક્ખગુત્તિં આહ. પરિત્તસ્સ આનુભાવેન દ્વે ઇટ્ઠકા…પે॰… અટ્ઠંસુ. તથા હિ તસ્મિં નિસ્સેણિયં ઠિતે…પે॰… અટ્ઠંસૂતિ.
Dīghavāpīnāmake gāme cetiyaṃ dīghavāpicetiyaṃ. Muddhavedikā nāma hammiyaṃ parikkhipitvā katavedikā. Buddhagataṃ satiṃ upaṭṭhapetvā parittarakkhaguttiṃ āha. Parittassa ānubhāvena dve iṭṭhakā…pe… aṭṭhaṃsu. Tathā hi tasmiṃ nisseṇiyaṃ ṭhite…pe… aṭṭhaṃsūti.
ધજગ્ગસુત્તવણ્ણના નિટ્ઠિતા.
Dhajaggasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. ધજગ્ગસુત્તં • 3. Dhajaggasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. ધજગ્ગસુત્તવણ્ણના • 3. Dhajaggasuttavaṇṇanā
