| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૯. ધમ્મચક્કિકત્થેરઅપદાનવણ્ણના
9. Dhammacakkikattheraapadānavaṇṇanā
સિદ્ધત્થસ્સ ભગવતોતિઆદિકં આયસ્મતો ધમ્મચક્કિકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે એકસ્મિં કુલગેહે નિબ્બત્તો વુદ્ધિપ્પત્તો પુત્તદારેહિ વડ્ઢિતો વિભવસમ્પન્નો મહાભોગો, સો રતનત્તયે પસન્નો સદ્ધાજાતો ધમ્મસભાયં ધમ્માસનસ્સ પિટ્ઠિતો રતનમયં ધમ્મચક્કં કારેત્વા પૂજેસિ. સો તેન પુઞ્ઞકમ્મેન દેવમનુસ્સેસુ નિબ્બત્તટ્ઠાનેસુ સક્કસમ્પત્તિં ચક્કવત્તિસમ્પત્તિઞ્ચ અનુભવિત્વા કમેન ઇમસ્મિં બુદ્ધુપ્પાદે એકસ્મિં કુલગેહે ઉપ્પન્નો વિભવસમ્પન્નો સઞ્જાતસદ્ધો પબ્બજિત્વા વિપસ્સનં વડ્ઢેત્વા નચિરસ્સેવ અરહત્તં પત્વા પુબ્બે કતકુસલનામસદિસનામેન ધમ્મચક્કિકત્થેરોતિ પાકટો જાતો અહોસિ.
Siddhatthassa bhagavatotiādikaṃ āyasmato dhammacakkikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto puttadārehi vaḍḍhito vibhavasampanno mahābhogo, so ratanattaye pasanno saddhājāto dhammasabhāyaṃ dhammāsanassa piṭṭhito ratanamayaṃ dhammacakkaṃ kāretvā pūjesi. So tena puññakammena devamanussesu nibbattaṭṭhānesu sakkasampattiṃ cakkavattisampattiñca anubhavitvā kamena imasmiṃ buddhuppāde ekasmiṃ kulagehe uppanno vibhavasampanno sañjātasaddho pabbajitvā vipassanaṃ vaḍḍhetvā nacirasseva arahattaṃ patvā pubbe katakusalanāmasadisanāmena dhammacakkikattheroti pākaṭo jāto ahosi.
૧૦૨. સો પુઞ્ઞસમ્ભારાનુરૂપેન પત્તઅરહત્તફલો અત્તનો પુબ્બકમ્મં સરિત્વા જાતસોમનસ્સો પુબ્બચરિતાપદાનં પકાસેન્તો સિદ્ધત્થસ્સ ભગવતોતિઆદિમાહ. સીહાસનસ્સ સમ્મુખાતિ સીહસ્સ ભગવતો નિસિન્નસ્સ સમ્મુખા બુદ્ધાસનસ્સ અભિમુખટ્ઠાનેતિ અત્થો, ધમ્મચક્કં મે ઠપિતન્તિ મયા ધમ્મચક્કાકારેન ઉભતો સીહરૂપં દસ્સેત્વા મજ્ઝે આદાસસદિસં કારેત્વા કતં ધમ્મચક્કં ઠપિતં પૂજિતં. કિં ભૂતં? વિઞ્ઞૂહિ મેધાવીહિ ‘‘અતીવ સુન્દર’’ન્તિ વણ્ણિતં થોમિતં સુકતં ધમ્મચક્કન્તિ સમ્બન્ધો.
102. So puññasambhārānurūpena pattaarahattaphalo attano pubbakammaṃ saritvā jātasomanasso pubbacaritāpadānaṃ pakāsento siddhatthassa bhagavatotiādimāha. Sīhāsanassa sammukhāti sīhassa bhagavato nisinnassa sammukhā buddhāsanassa abhimukhaṭṭhāneti attho, dhammacakkaṃ me ṭhapitanti mayā dhammacakkākārena ubhato sīharūpaṃ dassetvā majjhe ādāsasadisaṃ kāretvā kataṃ dhammacakkaṃ ṭhapitaṃ pūjitaṃ. Kiṃ bhūtaṃ? Viññūhi medhāvīhi ‘‘atīva sundara’’nti vaṇṇitaṃ thomitaṃ sukataṃ dhammacakkanti sambandho.
૧૦૩. ચારુવણ્ણોવ સોભામીતિ સુવણ્ણવણ્ણો ઇવ સોભામિ વિરોચામીતિ અત્થો. ‘‘ચતુવણ્ણેહિ સોભામી’’તિપિ પાઠો, તસ્સ ખત્તિયબ્રાહ્મણવેસ્સસુદ્દજાતિસઙ્ખાતેહિ ચતૂહિ વણ્ણેહિ સોભામિ વિરોચામીતિ અત્થો. સયોગ્ગબલવાહનોતિ સુવણ્ણસિવિકાદીહિ યોગ્ગેહિ ચ સેનાપતિમહામત્તાદીહિ સેવકેહિ બલેહિ ચ હત્થિઅસ્સરથસઙ્ખાતેહિ વાહનેહિ ચ સહિતોતિ અત્થો. બહુજ્જના બહવો મનુસ્સા અનુયન્તા મમાનુવત્તન્તા નિચ્ચં નિચ્ચકાલં પરિવારેન્તીતિ સમ્બન્ધો. સેસં સુવિઞ્ઞેય્યમેવાતિ.
103.Cāruvaṇṇovasobhāmīti suvaṇṇavaṇṇo iva sobhāmi virocāmīti attho. ‘‘Catuvaṇṇehi sobhāmī’’tipi pāṭho, tassa khattiyabrāhmaṇavessasuddajātisaṅkhātehi catūhi vaṇṇehi sobhāmi virocāmīti attho. Sayoggabalavāhanoti suvaṇṇasivikādīhi yoggehi ca senāpatimahāmattādīhi sevakehi balehi ca hatthiassarathasaṅkhātehi vāhanehi ca sahitoti attho. Bahujjanā bahavo manussā anuyantā mamānuvattantā niccaṃ niccakālaṃ parivārentīti sambandho. Sesaṃ suviññeyyamevāti.
ધમ્મચક્કિકત્થેરઅપદાનવણ્ણના સમત્તા.
Dhammacakkikattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૯. ધમ્મચક્કિકત્થેરઅપદાનં • 9. Dhammacakkikattheraapadānaṃ
