| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
3. த⁴ம்மதா³யாத³ஸுத்தங்
3. Dhammadāyādasuttaṃ
29. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
29. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³. அத்தி² மே தும்ஹேஸு அனுகம்பா – ‘கிந்தி மே ஸாவகா த⁴ம்மதா³யாதா³ ப⁴வெய்யுங், நோ ஆமிஸதா³யாதா³’தி. தும்ஹே ச மே, பி⁴க்க²வே, ஆமிஸதா³யாதா³ ப⁴வெய்யாத² நோ த⁴ம்மதா³யாதா³, தும்ஹேபி தேன ஆதி³யா 1 ப⁴வெய்யாத² – ‘ஆமிஸதா³யாதா³ ஸத்து²ஸாவகா விஹரந்தி, நோ த⁴ம்மதா³யாதா³’தி; அஹம்பி தேன ஆதி³யோ ப⁴வெய்யங் – ‘ஆமிஸதா³யாதா³ ஸத்து²ஸாவகா விஹரந்தி, நோ த⁴ம்மதா³யாதா³’தி. தும்ஹே ச மே, பி⁴க்க²வே, த⁴ம்மதா³யாதா³ ப⁴வெய்யாத², நோ ஆமிஸதா³யாதா³, தும்ஹேபி தேன ந ஆதி³யா ப⁴வெய்யாத² – ‘த⁴ம்மதா³யாதா³ ஸத்து²ஸாவகா விஹரந்தி, நோ ஆமிஸதா³யாதா³’தி; அஹம்பி தேன ந ஆதி³யோ ப⁴வெய்யங் – ‘த⁴ம்மதா³யாதா³ ஸத்து²ஸாவகா விஹரந்தி, நோ ஆமிஸதா³யாதா³’தி. தஸ்மாதிஹ மே, பி⁴க்க²வே, த⁴ம்மதா³யாதா³ ப⁴வத², மா ஆமிஸதா³யாதா³. அத்தி² மே தும்ஹேஸு அனுகம்பா – ‘கிந்தி மே ஸாவகா த⁴ம்மதா³யாதா³ ப⁴வெய்யுங், நோ ஆமிஸதா³யாதா³’தி.
‘‘Dhammadāyādā me, bhikkhave, bhavatha, mā āmisadāyādā. Atthi me tumhesu anukampā – ‘kinti me sāvakā dhammadāyādā bhaveyyuṃ, no āmisadāyādā’ti. Tumhe ca me, bhikkhave, āmisadāyādā bhaveyyātha no dhammadāyādā, tumhepi tena ādiyā 2 bhaveyyātha – ‘āmisadāyādā satthusāvakā viharanti, no dhammadāyādā’ti; ahampi tena ādiyo bhaveyyaṃ – ‘āmisadāyādā satthusāvakā viharanti, no dhammadāyādā’ti. Tumhe ca me, bhikkhave, dhammadāyādā bhaveyyātha, no āmisadāyādā, tumhepi tena na ādiyā bhaveyyātha – ‘dhammadāyādā satthusāvakā viharanti, no āmisadāyādā’ti; ahampi tena na ādiyo bhaveyyaṃ – ‘dhammadāyādā satthusāvakā viharanti, no āmisadāyādā’ti. Tasmātiha me, bhikkhave, dhammadāyādā bhavatha, mā āmisadāyādā. Atthi me tumhesu anukampā – ‘kinti me sāvakā dhammadāyādā bhaveyyuṃ, no āmisadāyādā’ti.
30. ‘‘இதா⁴ஹங், பி⁴க்க²வே, பு⁴த்தாவீ அஸ்ஸங் பவாரிதோ பரிபுண்ணோ பரியோஸிதோ ஸுஹிதோ யாவத³த்தோ²; ஸியா ச மே பிண்ட³பாதோ அதிரேகத⁴ம்மோ ச²ட்³ட³னீயத⁴ம்மோ 3. அத² த்³வே பி⁴க்கூ² ஆக³ச்செ²ய்யுங் ஜிக⁴ச்சா²து³ப்³ப³ல்ய- 4 பரேதா . த்யாஹங் ஏவங் வதெ³ய்யங் – ‘அஹங் கொ²ம்ஹி, பி⁴க்க²வே, பு⁴த்தாவீ பவாரிதோ பரிபுண்ணோ பரியோஸிதோ ஸுஹிதோ யாவத³த்தோ²; அத்தி² ச மே அயங் பிண்ட³பாதோ அதிரேகத⁴ம்மோ ச²ட்³ட³னீயத⁴ம்மோ. ஸசே ஆகங்க²த², பு⁴ஞ்ஜத², நோ சே தும்ஹே பு⁴ஞ்ஜிஸ்ஸத² 5, இதா³னாஹங் அப்பஹரிதே வா ச²ட்³டெ³ஸ்ஸாமி, அப்பாணகே வா உத³கே ஓபிலாபெஸ்ஸாமீ’தி. தத்ரேகஸ்ஸ பி⁴க்கு²னோ ஏவமஸ்ஸ – ‘ப⁴க³வா கோ² பு⁴த்தாவீ பவாரிதோ பரிபுண்ணோ பரியோஸிதோ ஸுஹிதோ யாவத³த்தோ²; அத்தி² சாயங் ப⁴க³வதோ பிண்ட³பாதோ அதிரேகத⁴ம்மோ ச²ட்³ட³னீயத⁴ம்மோ. ஸசே மயங் ந பு⁴ஞ்ஜிஸ்ஸாம, இதா³னி ப⁴க³வா அப்பஹரிதே வா ச²ட்³டெ³ஸ்ஸதி, அப்பாணகே வா உத³கே ஓபிலாபெஸ்ஸதி’ . வுத்தங் கோ² பனேதங் ப⁴க³வதா – ‘த⁴ம்மதா³யாதா³ மே, பி⁴க்க²வே, ப⁴வத², மா ஆமிஸதா³யாதா³’தி. ஆமிஸஞ்ஞதரங் கோ² பனேதங், யதி³த³ங் பிண்ட³பாதோ. யங்னூனாஹங் இமங் பிண்ட³பாதங் அபு⁴ஞ்ஜித்வா இமினாவ ஜிக⁴ச்சா²து³ப்³ப³ல்யேன ஏவங் இமங் ரத்திந்தி³வங் 6 வீதினாமெய்ய’’ந்தி. ஸோ தங் பிண்ட³பாதங் அபு⁴ஞ்ஜித்வா தேனேவ ஜிக⁴ச்சா²து³ப்³ப³ல்யேன ஏவங் தங் ரத்திந்தி³வங் வீதினாமெய்ய. அத² து³தியஸ்ஸ பி⁴க்கு²னோ ஏவமஸ்ஸ – ‘ப⁴க³வா கோ² பு⁴த்தாவீ பவாரிதோ பரிபுண்ணோ பரியோஸிதோ ஸுஹிதோ யாவத³த்தோ²; அத்தி² சாயங் ப⁴க³வதோ பிண்ட³பாதோ அதிரேகத⁴ம்மோ ச²ட்³ட³னீயத⁴ம்மோ. ஸசே மயங் ந பு⁴ஞ்ஜிஸ்ஸாம, இதா³னி ப⁴க³வா அப்பஹரிதே வா ச²ட்³டெ³ஸ்ஸதி, அப்பாணகே வா உத³கே ஓபிலாபெஸ்ஸதி. யங்னூனாஹங் இமங் பிண்ட³பாதங் பு⁴ஞ்ஜித்வா ஜிக⁴ச்சா²து³ப்³ப³ல்யங் படிவினோதெ³த்வா 7 ஏவங் இமங் ரத்திந்தி³வங் வீதினாமெய்ய’ந்தி. ஸோ தங் பிண்ட³பாதங் பு⁴ஞ்ஜித்வா ஜிக⁴ச்சா²து³ப்³ப³ல்யங் படிவினோதெ³த்வா ஏவங் தங் ரத்திந்தி³வங் வீதினாமெய்ய. கிஞ்சாபி ஸோ, பி⁴க்க²வே, பி⁴க்கு² தங் பிண்ட³பாதங் பு⁴ஞ்ஜித்வா ஜிக⁴ச்சா²து³ப்³ப³ல்யங் படிவினோதெ³த்வா ஏவங் தங் ரத்திந்தி³வங் வீதினாமெய்ய, அத² கோ² அஸுயேவ மே புரிமோ பி⁴க்கு² புஜ்ஜதரோ ச பாஸங்ஸதரோ ச. தங் கிஸ்ஸ ஹேது? தஞ்ஹி தஸ்ஸ, பி⁴க்க²வே, பி⁴க்கு²னோ தீ³க⁴ரத்தங் அப்பிச்ச²தாய ஸந்துட்டி²யா ஸல்லேகா²ய ஸுப⁴ரதாய வீரியாரம்பா⁴ய ஸங்வத்திஸ்ஸதி. தஸ்மாதிஹ மே, பி⁴க்க²வே, த⁴ம்மதா³யாதா³ ப⁴வத², மா ஆமிஸதா³யாதா³. அத்தி² மே தும்ஹேஸு அனுகம்பா – ‘கிந்தி மே ஸாவகா த⁴ம்மதா³யாதா³ ப⁴வெய்யுங், நோ ஆமிஸதா³யாதா³’’’தி.
30. ‘‘Idhāhaṃ, bhikkhave, bhuttāvī assaṃ pavārito paripuṇṇo pariyosito suhito yāvadattho; siyā ca me piṇḍapāto atirekadhammo chaḍḍanīyadhammo 8. Atha dve bhikkhū āgaccheyyuṃ jighacchādubbalya- 9 paretā . Tyāhaṃ evaṃ vadeyyaṃ – ‘ahaṃ khomhi, bhikkhave, bhuttāvī pavārito paripuṇṇo pariyosito suhito yāvadattho; atthi ca me ayaṃ piṇḍapāto atirekadhammo chaḍḍanīyadhammo. Sace ākaṅkhatha, bhuñjatha, no ce tumhe bhuñjissatha 10, idānāhaṃ appaharite vā chaḍḍessāmi, appāṇake vā udake opilāpessāmī’ti. Tatrekassa bhikkhuno evamassa – ‘bhagavā kho bhuttāvī pavārito paripuṇṇo pariyosito suhito yāvadattho; atthi cāyaṃ bhagavato piṇḍapāto atirekadhammo chaḍḍanīyadhammo. Sace mayaṃ na bhuñjissāma, idāni bhagavā appaharite vā chaḍḍessati, appāṇake vā udake opilāpessati’ . Vuttaṃ kho panetaṃ bhagavatā – ‘dhammadāyādā me, bhikkhave, bhavatha, mā āmisadāyādā’ti. Āmisaññataraṃ kho panetaṃ, yadidaṃ piṇḍapāto. Yaṃnūnāhaṃ imaṃ piṇḍapātaṃ abhuñjitvā imināva jighacchādubbalyena evaṃ imaṃ rattindivaṃ 11 vītināmeyya’’nti. So taṃ piṇḍapātaṃ abhuñjitvā teneva jighacchādubbalyena evaṃ taṃ rattindivaṃ vītināmeyya. Atha dutiyassa bhikkhuno evamassa – ‘bhagavā kho bhuttāvī pavārito paripuṇṇo pariyosito suhito yāvadattho; atthi cāyaṃ bhagavato piṇḍapāto atirekadhammo chaḍḍanīyadhammo. Sace mayaṃ na bhuñjissāma, idāni bhagavā appaharite vā chaḍḍessati, appāṇake vā udake opilāpessati. Yaṃnūnāhaṃ imaṃ piṇḍapātaṃ bhuñjitvā jighacchādubbalyaṃ paṭivinodetvā 12 evaṃ imaṃ rattindivaṃ vītināmeyya’nti. So taṃ piṇḍapātaṃ bhuñjitvā jighacchādubbalyaṃ paṭivinodetvā evaṃ taṃ rattindivaṃ vītināmeyya. Kiñcāpi so, bhikkhave, bhikkhu taṃ piṇḍapātaṃ bhuñjitvā jighacchādubbalyaṃ paṭivinodetvā evaṃ taṃ rattindivaṃ vītināmeyya, atha kho asuyeva me purimo bhikkhu pujjataro ca pāsaṃsataro ca. Taṃ kissa hetu? Tañhi tassa, bhikkhave, bhikkhuno dīgharattaṃ appicchatāya santuṭṭhiyā sallekhāya subharatāya vīriyārambhāya saṃvattissati. Tasmātiha me, bhikkhave, dhammadāyādā bhavatha, mā āmisadāyādā. Atthi me tumhesu anukampā – ‘kinti me sāvakā dhammadāyādā bhaveyyuṃ, no āmisadāyādā’’’ti.
இத³மவோச ப⁴க³வா. இத³ங் வத்வான 13 ஸுக³தோ உட்டா²யாஸனா விஹாரங் பாவிஸி.
Idamavoca bhagavā. Idaṃ vatvāna 14 sugato uṭṭhāyāsanā vihāraṃ pāvisi.
31. தத்ர கோ² ஆயஸ்மா ஸாரிபுத்தோ அசிரபக்கந்தஸ்ஸ ப⁴க³வதோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
31. Tatra kho āyasmā sāriputto acirapakkantassa bhagavato bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘கித்தாவதா நு கோ², ஆவுஸோ, ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தி, கித்தாவதா ச பன ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தீ’’தி? ‘‘தூ³ரதோபி கோ² மயங், ஆவுஸோ, ஆக³ச்சா²ம ஆயஸ்மதோ ஸாரிபுத்தஸ்ஸ ஸந்திகே ஏதஸ்ஸ பா⁴ஸிதஸ்ஸ அத்த²மஞ்ஞாதுங். ஸாது⁴ வதாயஸ்மந்தங்யேவ ஸாரிபுத்தங் படிபா⁴து ஏதஸ்ஸ பா⁴ஸிதஸ்ஸ அத்தோ²; ஆயஸ்மதோ ஸாரிபுத்தஸ்ஸ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேன ஹாவுஸோ, ஸுணாத², ஸாது⁴கங் மனஸி கரோத², பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
‘‘Kittāvatā nu kho, āvuso, satthu pavivittassa viharato sāvakā vivekaṃ nānusikkhanti, kittāvatā ca pana satthu pavivittassa viharato sāvakā vivekamanusikkhantī’’ti? ‘‘Dūratopi kho mayaṃ, āvuso, āgacchāma āyasmato sāriputtassa santike etassa bhāsitassa atthamaññātuṃ. Sādhu vatāyasmantaṃyeva sāriputtaṃ paṭibhātu etassa bhāsitassa attho; āyasmato sāriputtassa sutvā bhikkhū dhāressantī’’ti. ‘‘Tena hāvuso, suṇātha, sādhukaṃ manasi karotha, bhāsissāmī’’ti. ‘‘Evamāvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘கித்தாவதா நு கோ², ஆவுஸோ, ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தி? இதா⁴வுஸோ, ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தி, யேஸஞ்ச த⁴ம்மானங் ஸத்தா² பஹானமாஹ, தே ச த⁴ம்மே நப்பஜஹந்தி, பா³ஹுலிகா 15 ச ஹொந்தி, ஸாத²லிகா, ஓக்கமனே புப்³ப³ங்க³மா, பவிவேகே நிக்கி²த்தது⁴ரா. தத்ராவுஸோ, தே²ரா பி⁴க்கூ² தீஹி டா²னேஹி கா³ரய்ஹா ப⁴வந்தி. ‘ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தீ’தி – இமினா பட²மேன டா²னேன தே²ரா பி⁴க்கூ² கா³ரய்ஹா ப⁴வந்தி. ‘யேஸஞ்ச த⁴ம்மானங் ஸத்தா² பஹானமாஹ தே ச த⁴ம்மே நப்பஜஹந்தீ’தி – இமினா து³தியேன டா²னேன தே²ரா பி⁴க்கூ² கா³ரய்ஹா ப⁴வந்தி. ‘பா³ஹுலிகா ச, ஸாத²லிகா, ஓக்கமனே புப்³ப³ங்க³மா, பவிவேகே நிக்கி²த்தது⁴ரா’தி – இமினா ததியேன டா²னேன தே²ரா பி⁴க்கூ² கா³ரய்ஹா ப⁴வந்தி. தே²ரா, ஆவுஸோ, பி⁴க்கூ² இமேஹி தீஹி டா²னேஹி கா³ரய்ஹா ப⁴வந்தி. தத்ராவுஸோ, மஜ்ஜி²மா பி⁴க்கூ²…பே॰… நவா பி⁴க்கூ² தீஹி டா²னேஹி கா³ரய்ஹா ப⁴வந்தி. ‘ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தீ’தி – இமினா பட²மேன டா²னேன நவா பி⁴க்கூ² கா³ரய்ஹா ப⁴வந்தி. ‘யேஸஞ்ச த⁴ம்மானங் ஸத்தா² பஹானமாஹ தே ச த⁴ம்மே நப்பஜஹந்தீ’தி – இமினா து³தியேன டா²னேன நவா பி⁴க்கூ² கா³ரய்ஹா ப⁴வந்தி. ‘பா³ஹுலிகா ச ஹொந்தி, ஸாத²லிகா, ஓக்கமனே புப்³ப³ங்க³மா, பவிவேகே நிக்கி²த்தது⁴ரா’தி – இமினா ததியேன டா²னேன நவா பி⁴க்கூ² கா³ரய்ஹா ப⁴வந்தி. நவா, ஆவுஸோ, பி⁴க்கூ² இமேஹி தீஹி டா²னேஹி கா³ரய்ஹா ப⁴வந்தி. எத்தாவதா கோ², ஆவுஸோ, ஸத்து² பவிவித்தஸ்ஸ விஹரதோ ஸாவகா விவேகங் நானுஸிக்க²ந்தி.
‘‘Kittāvatā nu kho, āvuso, satthu pavivittassa viharato sāvakā vivekaṃ nānusikkhanti? Idhāvuso, satthu pavivittassa viharato sāvakā vivekaṃ nānusikkhanti, yesañca dhammānaṃ satthā pahānamāha, te ca dhamme nappajahanti, bāhulikā 16 ca honti, sāthalikā, okkamane pubbaṅgamā, paviveke nikkhittadhurā. Tatrāvuso, therā bhikkhū tīhi ṭhānehi gārayhā bhavanti. ‘Satthu pavivittassa viharato sāvakā vivekaṃ nānusikkhantī’ti – iminā paṭhamena ṭhānena therā bhikkhū gārayhā bhavanti. ‘Yesañca dhammānaṃ satthā pahānamāha te ca dhamme nappajahantī’ti – iminā dutiyena ṭhānena therā bhikkhū gārayhā bhavanti. ‘Bāhulikā ca, sāthalikā, okkamane pubbaṅgamā, paviveke nikkhittadhurā’ti – iminā tatiyena ṭhānena therā bhikkhū gārayhā bhavanti. Therā, āvuso, bhikkhū imehi tīhi ṭhānehi gārayhā bhavanti. Tatrāvuso, majjhimā bhikkhū…pe… navā bhikkhū tīhi ṭhānehi gārayhā bhavanti. ‘Satthu pavivittassa viharato sāvakā vivekaṃ nānusikkhantī’ti – iminā paṭhamena ṭhānena navā bhikkhū gārayhā bhavanti. ‘Yesañca dhammānaṃ satthā pahānamāha te ca dhamme nappajahantī’ti – iminā dutiyena ṭhānena navā bhikkhū gārayhā bhavanti. ‘Bāhulikā ca honti, sāthalikā, okkamane pubbaṅgamā, paviveke nikkhittadhurā’ti – iminā tatiyena ṭhānena navā bhikkhū gārayhā bhavanti. Navā, āvuso, bhikkhū imehi tīhi ṭhānehi gārayhā bhavanti. Ettāvatā kho, āvuso, satthu pavivittassa viharato sāvakā vivekaṃ nānusikkhanti.
32. ‘‘கித்தாவதா ச, பனாவுஸோ, ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தி ? இதா⁴வுஸோ, ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தி – யேஸஞ்ச த⁴ம்மானங் ஸத்தா² பஹானமாஹ தே ச த⁴ம்மே பஜஹந்தி; ந ச பா³ஹுலிகா ஹொந்தி, ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா. தத்ராவுஸோ, தே²ரா பி⁴க்கூ² தீஹி டா²னேஹி பாஸங்ஸா ப⁴வந்தி. ‘ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தீ’தி – இமினா பட²மேன டா²னேன தே²ரா பி⁴க்கூ² பாஸங்ஸா ப⁴வந்தி. ‘யேஸஞ்ச த⁴ம்மானங் ஸத்தா² பஹானமாஹ தே ச த⁴ம்மே பஜஹந்தீ’தி – இமினா து³தியேன டா²னேன தே²ரா பி⁴க்கூ² பாஸங்ஸா ப⁴வந்தி. ‘ந ச பா³ஹுலிகா, ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா’தி – இமினா ததியேன டா²னேன தே²ரா பி⁴க்கூ² பாஸங்ஸா ப⁴வந்தி. தே²ரா, ஆவுஸோ, பி⁴க்கூ² இமேஹி தீஹி டா²னேஹி பாஸங்ஸா ப⁴வந்தி . தத்ராவுஸோ, மஜ்ஜி²மா பி⁴க்கூ²…பே॰… நவா பி⁴க்கூ² தீஹி டா²னேஹி பாஸங்ஸா ப⁴வந்தி. ‘ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தீ’தி – இமினா பட²மேன டா²னேன நவா பி⁴க்கூ² பாஸங்ஸா ப⁴வந்தி. ‘யேஸஞ்ச த⁴ம்மானங் ஸத்தா² பஹானமாஹ தே ச த⁴ம்மே பஜஹந்தீ’தி – இமினா து³தியேன டா²னேன நவா பி⁴க்கூ² பாஸங்ஸா ப⁴வந்தி. ‘ந ச பா³ஹுலிகா, ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா’தி – இமினா ததியேன டா²னேன நவா பி⁴க்கூ² பாஸங்ஸா ப⁴வந்தி. நவா, ஆவுஸோ, பி⁴க்கூ² இமேஹி தீஹி டா²னேஹி பாஸங்ஸா ப⁴வந்தி. எத்தாவதா கோ², ஆவுஸோ, ஸத்து² பவிவித்தஸ்ஸ விஹரதோ ஸாவகா விவேகமனுஸிக்க²ந்தி.
32. ‘‘Kittāvatā ca, panāvuso, satthu pavivittassa viharato sāvakā vivekamanusikkhanti ? Idhāvuso, satthu pavivittassa viharato sāvakā vivekamanusikkhanti – yesañca dhammānaṃ satthā pahānamāha te ca dhamme pajahanti; na ca bāhulikā honti, na sāthalikā okkamane nikkhittadhurā paviveke pubbaṅgamā. Tatrāvuso, therā bhikkhū tīhi ṭhānehi pāsaṃsā bhavanti. ‘Satthu pavivittassa viharato sāvakā vivekamanusikkhantī’ti – iminā paṭhamena ṭhānena therā bhikkhū pāsaṃsā bhavanti. ‘Yesañca dhammānaṃ satthā pahānamāha te ca dhamme pajahantī’ti – iminā dutiyena ṭhānena therā bhikkhū pāsaṃsā bhavanti. ‘Na ca bāhulikā, na sāthalikā okkamane nikkhittadhurā paviveke pubbaṅgamā’ti – iminā tatiyena ṭhānena therā bhikkhū pāsaṃsā bhavanti. Therā, āvuso, bhikkhū imehi tīhi ṭhānehi pāsaṃsā bhavanti . Tatrāvuso, majjhimā bhikkhū…pe… navā bhikkhū tīhi ṭhānehi pāsaṃsā bhavanti. ‘Satthu pavivittassa viharato sāvakā vivekamanusikkhantī’ti – iminā paṭhamena ṭhānena navā bhikkhū pāsaṃsā bhavanti. ‘Yesañca dhammānaṃ satthā pahānamāha te ca dhamme pajahantī’ti – iminā dutiyena ṭhānena navā bhikkhū pāsaṃsā bhavanti. ‘Na ca bāhulikā, na sāthalikā okkamane nikkhittadhurā paviveke pubbaṅgamā’ti – iminā tatiyena ṭhānena navā bhikkhū pāsaṃsā bhavanti. Navā, āvuso, bhikkhū imehi tīhi ṭhānehi pāsaṃsā bhavanti. Ettāvatā kho, āvuso, satthu pavivittassa viharato sāvakā vivekamanusikkhanti.
33. ‘‘தத்ராவுஸோ, லோபோ⁴ ச பாபகோ தோ³ஸோ ச பாபகோ. லோப⁴ஸ்ஸ ச பஹானாய தோ³ஸஸ்ஸ ச பஹானாய அத்தி² மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. கதமா ச ஸா, ஆவுஸோ, மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் 17 – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயங் கோ² ஸா, ஆவுஸோ, மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
33. ‘‘Tatrāvuso, lobho ca pāpako doso ca pāpako. Lobhassa ca pahānāya dosassa ca pahānāya atthi majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati. Katamā ca sā, āvuso, majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati? Ayameva ariyo aṭṭhaṅgiko maggo, seyyathidaṃ 18 – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho sā, āvuso, majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati.
‘‘தத்ராவுஸோ, கோதோ⁴ ச பாபகோ உபனாஹோ ச பாபகோ…பே॰… மக்கோ² ச பாபகோ பளாஸோ ச பாபகோ, இஸ்ஸா ச பாபிகா மச்சே²ரஞ்ச பாபகங், மாயா ச பாபிகா ஸாடெ²ய்யஞ்ச பாபகங், த²ம்போ⁴ ச பாபகோ ஸாரம்போ⁴ ச பாபகோ, மானோ ச பாபகோ அதிமானோ ச பாபகோ, மதோ³ ச பாபகோ பமாதோ³ ச பாபகோ. மத³ஸ்ஸ ச பஹானாய பமாத³ஸ்ஸ ச பஹானாய அத்தி² மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. கதமா ச ஸா, ஆவுஸோ, மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயங் கோ² ஸா, ஆவுஸோ, மஜ்ஜி²மா படிபதா³ சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததீ’’தி.
‘‘Tatrāvuso, kodho ca pāpako upanāho ca pāpako…pe… makkho ca pāpako paḷāso ca pāpako, issā ca pāpikā maccherañca pāpakaṃ, māyā ca pāpikā sāṭheyyañca pāpakaṃ, thambho ca pāpako sārambho ca pāpako, māno ca pāpako atimāno ca pāpako, mado ca pāpako pamādo ca pāpako. Madassa ca pahānāya pamādassa ca pahānāya atthi majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati. Katamā ca sā, āvuso, majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati? Ayameva ariyo aṭṭhaṅgiko maggo, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho sā, āvuso, majjhimā paṭipadā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattatī’’ti.
இத³மவோசாயஸ்மா ஸாரிபுத்தோ. அத்தமனா தே பி⁴க்கூ² ஆயஸ்மதோ ஸாரிபுத்தஸ்ஸ பா⁴ஸிதங் அபி⁴னந்து³ந்தி.
Idamavocāyasmā sāriputto. Attamanā te bhikkhū āyasmato sāriputtassa bhāsitaṃ abhinandunti.
த⁴ம்மதா³யாத³ஸுத்தங் நிட்டி²தங் ததியங்.
Dhammadāyādasuttaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. த⁴ம்மதா³யாத³ஸுத்தவண்ணனா • 3. Dhammadāyādasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. த⁴ம்மதா³யாத³ஸுத்தவண்ணனா • 3. Dhammadāyādasuttavaṇṇanā
