| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. த⁴ம்மகதி²கஸுத்தவண்ணனா
6. Dhammakathikasuttavaṇṇanā
16. நிப்³பி³ந்த³னத்தா²யாதி நிப்³பி³தா³னுபஸ்ஸனாபடிலாபா⁴ய. ஸா ஹி ஜராமரணஸீஸேன வுத்தேஸு ஸங்க²தத⁴ம்மேஸு நிப்³பி³ந்த³னாகாரேன பவத்ததி. விரஜ்ஜனத்தா²யாதி விராகா³னுபஸ்ஸனாபடிலாபா⁴ய. ஸீலதோ பட்டா²யாதி விவட்டஸன்னிஸ்ஸிதஸீலஸமாதா³னதோ பட்டா²ய. ஸோதாபத்தியங்கே³ஹி ஸமன்னாக³தோ விவட்டஸன்னிஸ்ஸிதஸீலே பதிட்டி²தோ உபாஸகோபி பகே³வ சதுபாரிஸுத்³தி⁴ஸீலே பதிட்டி²தோ பி⁴க்கு² ஸம்மாபடிபன்னோ நாம. தேனாஹ ‘‘யாவ அரஹத்தமக்³கா³ படிபன்னோதி வேதி³தப்³போ³’’தி. நிப்³பா³னத⁴ம்மஸ்ஸாதி நிப்³பா³னாவஹஸ்ஸ அரியஸ்ஸ மக்³க³ஸ்ஸ. அனுரூபஸபா⁴வபூ⁴தந்தி நிப்³பா³னாதி⁴க³மஸ்ஸ அனுச்ச²விகஸபா⁴வபூ⁴தங். நிப்³பி³தா³தி இமினா வுட்டா²னகா³மினிபரியோஸானங் விபஸ்ஸனங் வத³தி. விராகா³ நிரோதா⁴தி பத³த்³வயேன அரியமக்³க³ங், இதரேன ப²லங். எத்தா²தி இமஸ்மிங் ஸுத்தே. ஏகேன நயேனாதி பட²மேன நயேன. தத்த² ஹி ப⁴க³வா தேன பி⁴க்கு²னா த⁴ம்மகதி²கலக்க²ணங் புச்சி²தோ தங் மத்த²கங் பாபெத்வா விஸ்ஸஜ்ஜேஸி. யோ ஹி விபஸ்ஸனங் மக்³க³ங் அனுபாதா³விமுத்திங் பாபெத்வா கதே²துங் ஸக்கோதி, ஸோ ஏகந்தத⁴ம்மகதி²கோ. தேனாஹ ‘‘த⁴ம்மகதி²கஸ்ஸ புச்சா² கதி²தா’’தி. த்³வீஹீதி து³தியததியனயேஹி. தந்தி புச்ச²ங். விஸேஸெத்வாதி விஸிட்ட²ங் கத்வா. யதா²புச்சி²தமத்தமேவ அகதெ²த்வா அபுச்சி²தம்பி அத்த²ங் த³ஸ்ஸெந்தோ த⁴ம்மானுத⁴ம்மபடிபத்திங் அனுபாதா³ய விமுத்திஸங்கா²தங் விஸேஸங் பாபெத்வா. ப⁴க³வா ஹி அப்பங் யாசிதோ ப³ஹுங் தெ³ந்தோ உளாரபுரிஸோ விய த⁴ம்மகதி²கலக்க²ணங் புச்சி²தோ படிச்சஸமுப்பாத³முகே²ன தஞ்சேவ ததோ ச உத்தரிங் த⁴ம்மானுத⁴ம்மபடிபத்திங் அனுபாதா³விமுத்தஞ்ச விஸ்ஸஜ்ஜேஸி. தத்த² ‘‘நிப்³பி³தா³ய…பே॰… த⁴ம்மங் தே³ஸேதீ’’தி இமினா த⁴ம்மதே³ஸனங் வாஸனாபா⁴கி³யங் கத்வா த³ஸ்ஸேஸி. ‘‘நிரோதா⁴ய படிபன்னோ ஹோதீ’’தி இமினா நிப்³பே³த⁴பா⁴கி³யங், ‘‘அனுபாதா³விமுத்தோ ஹோதீ’’தி இமினா தே³ஸனங் அஸெக்க²பா⁴கி³யங் கத்வா த³ஸ்ஸேஸி. தேனாஹ ‘‘ஸெக்கா²ஸெக்க²பூ⁴மியோ நித்³தி³ட்டா²’’தி.
16.Nibbindanatthāyāti nibbidānupassanāpaṭilābhāya. Sā hi jarāmaraṇasīsena vuttesu saṅkhatadhammesu nibbindanākārena pavattati. Virajjanatthāyāti virāgānupassanāpaṭilābhāya. Sīlato paṭṭhāyāti vivaṭṭasannissitasīlasamādānato paṭṭhāya. Sotāpattiyaṅgehi samannāgato vivaṭṭasannissitasīle patiṭṭhito upāsakopi pageva catupārisuddhisīle patiṭṭhito bhikkhu sammāpaṭipanno nāma. Tenāha ‘‘yāva arahattamaggā paṭipannoti veditabbo’’ti. Nibbānadhammassāti nibbānāvahassa ariyassa maggassa. Anurūpasabhāvabhūtanti nibbānādhigamassa anucchavikasabhāvabhūtaṃ. Nibbidāti iminā vuṭṭhānagāminipariyosānaṃ vipassanaṃ vadati. Virāgā nirodhāti padadvayena ariyamaggaṃ, itarena phalaṃ. Etthāti imasmiṃ sutte. Ekena nayenāti paṭhamena nayena. Tattha hi bhagavā tena bhikkhunā dhammakathikalakkhaṇaṃ pucchito taṃ matthakaṃ pāpetvā vissajjesi. Yo hi vipassanaṃ maggaṃ anupādāvimuttiṃ pāpetvā kathetuṃ sakkoti, so ekantadhammakathiko. Tenāha ‘‘dhammakathikassa pucchā kathitā’’ti. Dvīhīti dutiyatatiyanayehi. Tanti pucchaṃ. Visesetvāti visiṭṭhaṃ katvā. Yathāpucchitamattameva akathetvā apucchitampi atthaṃ dassento dhammānudhammapaṭipattiṃ anupādāya vimuttisaṅkhātaṃ visesaṃ pāpetvā. Bhagavā hi appaṃ yācito bahuṃ dento uḷārapuriso viya dhammakathikalakkhaṇaṃ pucchito paṭiccasamuppādamukhena tañceva tato ca uttariṃ dhammānudhammapaṭipattiṃ anupādāvimuttañca vissajjesi. Tattha ‘‘nibbidāya…pe… dhammaṃ desetī’’ti iminā dhammadesanaṃ vāsanābhāgiyaṃ katvā dassesi. ‘‘Nirodhāya paṭipanno hotī’’ti iminā nibbedhabhāgiyaṃ, ‘‘anupādāvimutto hotī’’ti iminā desanaṃ asekkhabhāgiyaṃ katvā dassesi. Tenāha ‘‘sekkhāsekkhabhūmiyo niddiṭṭhā’’ti.
த⁴ம்மகதி²கஸுத்தவண்ணனா நிட்டி²தா.
Dhammakathikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. த⁴ம்மகதி²கஸுத்தங் • 6. Dhammakathikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. த⁴ம்மகதி²கஸுத்தவண்ணனா • 6. Dhammakathikasuttavaṇṇanā
