| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. த⁴னஞ்ஜானிஸுத்தவண்ணனா
7. Dhanañjānisuttavaṇṇanā
445. ஏவங் மே ஸுதந்தி த⁴னஞ்ஜானிஸுத்தங். தத்த² த³க்கி²ணாகி³ரிஸ்மிந்தி கி³ரீதி பப்³ப³தோ, ராஜக³ஹங் பரிக்கி²பித்வா டி²தபப்³ப³தஸ்ஸ த³க்கி²ணதி³ஸாபா⁴கே³ ஜனபத³ஸ்ஸேதங் நாமங். தண்டு³லபாலித்³வாராயாதி ராஜக³ஹஸ்ஸ கிர த்³வத்திங்ஸமஹாத்³வாரானி சதுஸட்டி²கு²த்³த³கத்³வாரானி, தேஸு ஏகங் தண்டு³லபாலித்³வாரங் நாம, தங் ஸந்தா⁴யேவமாஹ. ராஜானங் நிஸ்ஸாயாதி ‘‘க³ச்ச² மனுஸ்ஸே அபீளெத்வா ஸஸ்ஸபா⁴க³ங் க³ண்ஹாஹீ’’தி ரஞ்ஞா பேஸிதோ க³ந்த்வா ஸப்³ப³மேவ ஸஸ்ஸங் க³ண்ஹாதி, ‘‘மா நோ, ப⁴ந்தே, நாஸேஹீ’’தி ச வுத்தே – ‘‘ராஜகுலே வுத்தங் மந்த³ங், அஹங் ரஞ்ஞா ஆக³மனகாலேயேவ ஏவங் ஆணத்தோ, மா கந்தி³த்தா²’’தி ஏவங் ராஜானங் நிஸ்ஸாய ப்³ராஹ்மணக³ஹபதிகே விலும்பதி. த⁴ஞ்ஞங் யேபு⁴ய்யேன அத்தனோ க⁴ரங் பவேஸெத்வா அப்பகங் ராஜகுலே பவேஸேதி. கிங் ப்³ராஹ்மணக³ஹபதிகானங் ந பீளங் அகாஸீதி ச வுத்தோ – ‘‘ஆம, மஹாராஜ, இமஸ்மிங் வாரே கெ²த்தானி மந்த³ஸஸ்ஸானி அஹேஸுங், தஸ்மா அபீளெந்தஸ்ஸ மே க³ண்ஹதோ ந ப³ஹுங் ஜாத’’ந்தி ஏவங் ப்³ராஹ்மணக³ஹபதிகே நிஸ்ஸாய ராஜானங் விலும்பதி.
445.Evaṃme sutanti dhanañjānisuttaṃ. Tattha dakkhiṇāgirisminti girīti pabbato, rājagahaṃ parikkhipitvā ṭhitapabbatassa dakkhiṇadisābhāge janapadassetaṃ nāmaṃ. Taṇḍulapālidvārāyāti rājagahassa kira dvattiṃsamahādvārāni catusaṭṭhikhuddakadvārāni, tesu ekaṃ taṇḍulapālidvāraṃ nāma, taṃ sandhāyevamāha. Rājānaṃ nissāyāti ‘‘gaccha manusse apīḷetvā sassabhāgaṃ gaṇhāhī’’ti raññā pesito gantvā sabbameva sassaṃ gaṇhāti, ‘‘mā no, bhante, nāsehī’’ti ca vutte – ‘‘rājakule vuttaṃ mandaṃ, ahaṃ raññā āgamanakāleyeva evaṃ āṇatto, mā kanditthā’’ti evaṃ rājānaṃ nissāya brāhmaṇagahapatike vilumpati. Dhaññaṃ yebhuyyena attano gharaṃ pavesetvā appakaṃ rājakule paveseti. Kiṃ brāhmaṇagahapatikānaṃ na pīḷaṃ akāsīti ca vutto – ‘‘āma, mahārāja, imasmiṃ vāre khettāni mandasassāni ahesuṃ, tasmā apīḷentassa me gaṇhato na bahuṃ jāta’’nti evaṃ brāhmaṇagahapatike nissāya rājānaṃ vilumpati.
446. பயோ பீயதந்தி தருணகீ²ரங் பிவது. தாவ ப⁴த்தஸ்ஸாதி யாவ கீ²ரங் பிவித்வா நிஸீதி³ஸ்ஸத², தாவதே³வ ப⁴த்தஸ்ஸ காலோ ப⁴விஸ்ஸதி. இதே⁴வ ஹி நோ பாதராஸப⁴த்தங் ஆஹரிஸ்ஸந்தீதி த³ஸ்ஸேதி. மாதாபிதரோதிஆதீ³ஸு மஹல்லகா மாதாபிதரோ முது³கானி அத்த²ரணபாவுரணானி ஸுகு²மானி வத்தா²னி மது⁴ரபோ⁴ஜனங் ஸுக³ந்த⁴க³ந்த⁴மாலாதீ³னி ச பரியேஸித்வா போஸேதப்³பா³. புத்ததீ⁴தானங் நாமகரணமங்க³லாதீ³னி ஸப்³ப³கிச்சானி கரொந்தேன புத்ததா³ரோ போஸேதப்³போ³. ஏவஞ்ஹி அகரியமானே க³ரஹா உப்பஜ்ஜதீதி இமினா நயேன அத்தோ² வேதி³தப்³போ³.
446.Payo pīyatanti taruṇakhīraṃ pivatu. Tāva bhattassāti yāva khīraṃ pivitvā nisīdissatha, tāvadeva bhattassa kālo bhavissati. Idheva hi no pātarāsabhattaṃ āharissantīti dasseti. Mātāpitarotiādīsu mahallakā mātāpitaro mudukāni attharaṇapāvuraṇāni sukhumāni vatthāni madhurabhojanaṃ sugandhagandhamālādīni ca pariyesitvā posetabbā. Puttadhītānaṃ nāmakaraṇamaṅgalādīni sabbakiccāni karontena puttadāro posetabbo. Evañhi akariyamāne garahā uppajjatīti iminā nayena attho veditabbo.
447. அத⁴ம்மசாரீதி பஞ்ச து³ஸ்ஸீல்யகம்மானி வா த³ஸ து³ஸ்ஸீல்யகம்மானி வா இத⁴ அத⁴ம்மோ நாம. உபகட்³டெ⁴ய்யுந்தி பஞ்சவித⁴ப³ந்த⁴னாதி³கம்மகரணத்த²ங் தங் தங் நிரயங் கட்³டெ⁴ய்யுங்.
447.Adhammacārīti pañca dussīlyakammāni vā dasa dussīlyakammāni vā idha adhammo nāma. Upakaḍḍheyyunti pañcavidhabandhanādikammakaraṇatthaṃ taṃ taṃ nirayaṃ kaḍḍheyyuṃ.
448. த⁴ம்மசாரீதி த⁴ம்மிகஸிவவிஜ்ஜாதி³கம்மகாரீ. படிக்கமந்தீதி ஓஸரந்தி பரிஹாயந்தி. அபி⁴க்கமந்தீதி அபி⁴ஸரந்தி வட்³ட⁴ந்தி. ஸெய்யோதி வரதரங். ஹீனேதி நிஹீனே லாமகே. காலங்கதோ ச ஸாரிபுத்தாதி இத³ங் ப⁴க³வா ‘‘தத்ரஸ்ஸ க³ந்த்வா தே³ஸேஹீ’’தி அதி⁴ப்பாயேன தே²ரமாஹ. தே²ரோபி தங்க²ணங்யேவ க³ந்த்வா மஹாப்³ரஹ்முனோ த⁴ம்மங் தே³ஸேஸி, ததோ பட்டா²ய சாதுப்பதி³கங் கா³த²ங் கதெ²ந்தோபி சதுஸச்சவிமுத்தங் நாம ந கதே²ஸீதி.
448.Dhammacārīti dhammikasivavijjādikammakārī. Paṭikkamantīti osaranti parihāyanti. Abhikkamantīti abhisaranti vaḍḍhanti. Seyyoti varataraṃ. Hīneti nihīne lāmake. Kālaṅkato ca sāriputtāti idaṃ bhagavā ‘‘tatrassa gantvā desehī’’ti adhippāyena theramāha. Theropi taṃkhaṇaṃyeva gantvā mahābrahmuno dhammaṃ desesi, tato paṭṭhāya cātuppadikaṃ gāthaṃ kathentopi catusaccavimuttaṃ nāma na kathesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
த⁴னஞ்ஜானிஸுத்தவண்ணனா நிட்டி²தா.
Dhanañjānisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. த⁴னஞ்ஜானிஸுத்தங் • 7. Dhanañjānisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. த⁴னஞ்ஜானிஸுத்தவண்ணனா • 7. Dhanañjānisuttavaṇṇanā
