| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. ப்³ராஹ்மணஸங்யுத்தங்
7. Brāhmaṇasaṃyuttaṃ
1. அரஹந்தவக்³கோ³
1. Arahantavaggo
1. த⁴னஞ்ஜானீஸுத்தவண்ணனா
1. Dhanañjānīsuttavaṇṇanā
187. த⁴னஞ்ஜானிகொ³த்தாதி எத்த² புப்³ப³புரிஸதோ ஆக³தஸ்ஸ குலவங்ஸஸ்ஸ நாமாபி⁴தா⁴னஸங்கா²தங் க³ங் தாயதீதி கொ³த்தங். (கிங் பன தந்தி? அஞ்ஞகுலபரம்பராஸாதா⁴ரணங் தஸ்ஸ குலஸ்ஸ ஆதி³புரிஸஸமுதா³க³தங் தங்குலபரியாபன்னஸாதா⁴ரணங் ஸாமஞ்ஞரூபந்தி த³ட்ட²ப்³ப³ங்.) த⁴னஞ்ஜானிகொ³த்தங் ஏதிஸ்ஸந்தி த⁴னஞ்ஜானிகொ³த்தா. தஸ்ஸா உதா³னஸ்ஸ காரணங் புச்சி²த்வா ஆதி³தோ பட்டா²ய விபா⁴வேதுங் ‘‘ஸோ கிரா’’திஆதி³ வுத்தங். நானாரஸபோ⁴ஜனங் தே³தீதி யோஜனா. பஞ்சகோ³ரஸஸம்பாதி³தங் ஸாலிப⁴த்தங் ஸூபஸாகப்³யஞ்ஜனங் நானாரஸங் ப்³ராஹ்மணபோ⁴ஜனங். மண்ட³லக்³க³க²க்³க³ந்தி மண்ட³லக்³க³ஸங்கா²தங் க²க்³க³ங். து³விதோ⁴ ஹி க²க்³கோ³ மண்ட³லக்³கோ³ தீ³க⁴க்³கோ³தி. தத்த² யஸ்ஸ அக்³கோ³ மண்ட³லாகாரேன டி²தோ, ஸோ மண்ட³லக்³கோ³. யஸ்ஸ பன அஸிபுத்திகா விய தீ³கோ⁴, ஸோ தீ³க⁴க்³கோ³.
187.Dhanañjānigottāti ettha pubbapurisato āgatassa kulavaṃsassa nāmābhidhānasaṅkhātaṃ gaṃ tāyatīti gottaṃ. (Kiṃ pana tanti? Aññakulaparamparāsādhāraṇaṃ tassa kulassa ādipurisasamudāgataṃ taṃkulapariyāpannasādhāraṇaṃ sāmaññarūpanti daṭṭhabbaṃ.) Dhanañjānigottaṃ etissanti dhanañjānigottā. Tassā udānassa kāraṇaṃ pucchitvā ādito paṭṭhāya vibhāvetuṃ ‘‘so kirā’’tiādi vuttaṃ. Nānārasabhojanaṃ detīti yojanā. Pañcagorasasampāditaṃ sālibhattaṃ sūpasākabyañjanaṃ nānārasaṃ brāhmaṇabhojanaṃ. Maṇḍalaggakhagganti maṇḍalaggasaṅkhātaṃ khaggaṃ. Duvidho hi khaggo maṇḍalaggo dīghaggoti. Tattha yassa aggo maṇḍalākārena ṭhito, so maṇḍalaggo. Yassa pana asiputtikā viya dīgho, so dīghaggo.
ஸாஸனாதி அனுஸாஸனா. ‘‘நமோ…பே॰… ஸம்பு³த்³த⁴ஸ்ஸா’’தி ஏவங் வுத்தா பஞ்சபதி³ககா³தா². ஸத்து²ஸாஸனே ஹி லோகியச்ச²ந்த³ங் அனபெக்கி²த்வா ஏஸா பஞ்சபதி³ககா³தா²தி த³ட்ட²ப்³பா³. ஓக்காவரத⁴ராதி புப்³ப³புரிஸஸங்கா²தஉக்காகவங்ஸவரதா⁴ரிகா. ஸக்காதி ஸக்குணெய்யங்.
Sāsanāti anusāsanā. ‘‘Namo…pe… sambuddhassā’’ti evaṃ vuttā pañcapadikagāthā. Satthusāsane hi lokiyacchandaṃ anapekkhitvā esā pañcapadikagāthāti daṭṭhabbā. Okkāvaradharāti pubbapurisasaṅkhātaukkākavaṃsavaradhārikā. Sakkāti sakkuṇeyyaṃ.
ஏவந்தி ‘‘ஸசே மே அங்க³மங்கா³னீ’’திஆதி³னா இமினா பகாரேன. ‘‘பஞ்ச கா³தா²ஸதானி பன அட்ட²கத²ங் ஆருள்ஹானி, இத⁴ பன த்³வே ஏவ உத்³த⁴டா’’தி வத³ந்தி. பஹரிதுங் வாதி ஏகவாரம்பி ஹத்தே²ன வா பாதே³ன வா பஹரிதும்பி பராமஸிதும்பி அஸக்கொந்தோதி அத்தோ². ஸோ ஹி தஸ்ஸா அரியஸாவிகாய ஆனுபா⁴வேன அத்தனோ ஸாமத்தி²யேன வஸே வத்தாபனத்த²ங் ஸந்தஜ்ஜித்வாபி தத³னுவத்தந்தோ நிப்³பி³ஸோ அஹோஸி. தேனாஹ ‘‘போ⁴தீ’’திஆதி³.
Evanti ‘‘sace me aṅgamaṅgānī’’tiādinā iminā pakārena. ‘‘Pañca gāthāsatāni pana aṭṭhakathaṃ āruḷhāni, idha pana dve eva uddhaṭā’’ti vadanti. Paharituṃ vāti ekavārampi hatthena vā pādena vā paharitumpi parāmasitumpi asakkontoti attho. So hi tassā ariyasāvikāya ānubhāvena attano sāmatthiyena vase vattāpanatthaṃ santajjitvāpi tadanuvattanto nibbiso ahosi. Tenāha ‘‘bhotī’’tiādi.
தஸ்ஸ ப்³ராஹ்மணஸ்ஸாதி அத்தனோ ஸாமிகப்³ராஹ்மணஸ்ஸ. உபஸங்ஹரந்தீதி உபனெந்தீ. தஸ்மிங் ஸமயேதி தஸ்மிங் து³க்கு²ப்பத்திகாலே ‘‘ஸப்³பே³ ஸங்கா²ரா து³க்கா²’’தி ப⁴க³வதோ வசனங் அனுஸ்ஸரித்வா ‘‘த³ஸப³லஸ்ஸ ப⁴க³வதோ’’திஆதீ³ஸு யதா²பரிசிதங் கு³ணபத³ங் அனுஸ்ஸரி. தேனாஹ ‘‘த³ஸப³லங் ஸரீ’’தி.
Tassa brāhmaṇassāti attano sāmikabrāhmaṇassa. Upasaṃharantīti upanentī. Tasmiṃ samayeti tasmiṃ dukkhuppattikāle ‘‘sabbe saṅkhārā dukkhā’’ti bhagavato vacanaṃ anussaritvā ‘‘dasabalassa bhagavato’’tiādīsu yathāparicitaṃ guṇapadaṃ anussari. Tenāha ‘‘dasabalaṃ sarī’’ti.
க²ந்திஸோரச்சரஹிததாய குஜ்ஜி²த்வா. பி⁴ஜ்ஜித்வாதி ஸங்யதாபா⁴வதோ தஸ்ஸ ப்³ராஹ்மணஸ்ஸ அந்தரே மெத்திபே⁴தே³ன பி⁴ஜ்ஜித்வா. ஏவமேவாதி யதா² ஏதரஹி அகாரணேன, ஏவமேவ அஞ்ஞதா³பி அகாரணேனாதி அத்தோ². நிக்காரணதாதீ³பனே ஏவங்-ஸத்³தோ³, ஏவ-ஸத்³தோ³ பன அவதா⁴ரணத்தோ². நிக்காரணதா ச நாம நிரத்த²கதா, நிரத்த²கவிப்பலாபபா⁴வேனெத்த² ஏவங்-ஸத்³த³ஸ்ஸ க³ஹணே பவத்தி க³வேஸிதப்³பா³. க³ரஹத்தோ² வாயங் ஏவங்-ஸத்³தோ³ அனேகத்த²த்தா நிபாதானங். க³ரஹத்த²தா சஸ்ஸ வஸலிஸத்³த³ஸன்னிதா⁴னதோ பாகடா ஏவ.
Khantisoraccarahitatāya kujjhitvā. Bhijjitvāti saṃyatābhāvato tassa brāhmaṇassa antare mettibhedena bhijjitvā. Evamevāti yathā etarahi akāraṇena, evameva aññadāpi akāraṇenāti attho. Nikkāraṇatādīpane evaṃ-saddo, eva-saddo pana avadhāraṇattho. Nikkāraṇatā ca nāma niratthakatā, niratthakavippalāpabhāvenettha evaṃ-saddassa gahaṇe pavatti gavesitabbā. Garahattho vāyaṃ evaṃ-saddo anekatthattā nipātānaṃ. Garahatthatā cassa vasalisaddasannidhānato pākaṭā eva.
கா³மனிக³மரட்ட²பூஜிதோதி இமினா கா³மனிக³மரட்ட²ஸாமிகேஹி பூஜிதபா⁴வோ தீ³பிதோ கா³மாதீ³னங் தேஸங் வஸே வத்தனதோ. அஸுகஸ்ஸ நாம புக்³க³லஸ்ஸ. ஸேஸந்தி அபி⁴க்கந்தந்திஆதி³, யம்பி சஞ்ஞங் இதா⁴க³தங் ஹெட்டா² வண்ணிதஞ்ச.
Gāmanigamaraṭṭhapūjitoti iminā gāmanigamaraṭṭhasāmikehi pūjitabhāvo dīpito gāmādīnaṃ tesaṃ vase vattanato. Asukassa nāma puggalassa. Sesanti abhikkantantiādi, yampi caññaṃ idhāgataṃ heṭṭhā vaṇṇitañca.
த⁴னஞ்ஜானீஸுத்தவண்ணனா நிட்டி²தா.
Dhanañjānīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. த⁴னஞ்ஜானீஸுத்தங் • 1. Dhanañjānīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. த⁴னஞ்ஜானீஸுத்தவண்ணனா • 1. Dhanañjānīsuttavaṇṇanā
