| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. தா⁴துஸங்யுத்தங்
3. Dhātusaṃyuttaṃ
1. நானத்தவக்³கோ³
1. Nānattavaggo
1. தா⁴துனானத்தஸுத்தவண்ணனா
1. Dhātunānattasuttavaṇṇanā
85. பட²மந்தி இமஸ்மிங் நிதா³னவக்³கே³ ஸங்யுத்தானங் பட²மங் ஸங்கீ³தத்தா. நிஸ்ஸத்தட்ட²ஸுஞ்ஞதட்ட²ஸங்கா²தேனாதி த⁴ம்மமத்ததாய நிஸ்ஸத்ததாஸங்கா²தேன நிச்சஸுப⁴ஸுக²அத்தஸுஞ்ஞதத்த²ஸங்கா²தேன. ஸபா⁴வட்டே²னாதி யதா²பூ⁴தஸபா⁴வட்டே²ன. ததோ ஏவ ஸபா⁴வஸ்ஸ தா⁴ரணட்டே²ன தா⁴தூதி லத்³த⁴னாமானங். நானாஸபா⁴வோ அஞ்ஞமஞ்ஞவிஸதி³ஸதா தா⁴துனானத்தங். சக்கு²ஸங்கா²தோ பஸாதோ³ சக்கு²பஸாதோ³. ஸோ ஏவ சக்க²னட்டே²ன சக்கு², நிஸ்ஸத்தஸுஞ்ஞதட்டே²ன தா⁴து சாதி சக்கு²தா⁴து. சக்கு²பஸாத³வத்து²ங் அதி⁴ட்டா²னங் கத்வா பவத்தங் சக்கு²பஸாத³வத்து²கங். ஸேஸபதே³ஸுபி ஏஸேவ நயோ. த்³வே ஸம்படிச்ச²னமனோதா⁴துயோ, ஏகா கிரியா மனோதா⁴தூதி திஸ்ஸோ மனோதா⁴துயோ மனோதா⁴து ‘‘மனநமத்தா தா⁴தூ’’தி கத்வா. வேத³னாத³யோ…பே॰… நிப்³பா³னஞ்ச த⁴ம்மதா⁴து விஸேஸஸஞ்ஞாபரிஹாரேன ஸாமஞ்ஞஸஞ்ஞாய பவத்தனதோ. ததா² ஹேதே த⁴ம்மா ஆயதனதே³ஸனாய ‘‘த⁴ம்மாயதன’’ந்தேவ தே³ஸிதா. ந ஹி நேஸங் ரூபாயதனாதீ³னங் விய விஞ்ஞாணேஹி அஞ்ஞவிஞ்ஞாணேன க³ஹேதப்³ப³தாகாரோ அத்தி². ஸப்³ப³ம்பீதி ச²ஸத்ததிவித⁴ங் மனோவிஞ்ஞாணங். காமாவசரா காமதா⁴துபரியாபன்னத்தா. அவஸானே த்³வேதி த⁴ம்மதா⁴துமனோவிஞ்ஞாணதா⁴துயோ. அயமெத்த² ஸங்கே²போ, வித்தா²ரோ பன விஸுத்³தி⁴மக்³கே³ தங்ஸங்வண்ணனாஸு த³ட்ட²ப்³போ³.
85.Paṭhamanti imasmiṃ nidānavagge saṃyuttānaṃ paṭhamaṃ saṃgītattā. Nissattaṭṭhasuññataṭṭhasaṅkhātenāti dhammamattatāya nissattatāsaṅkhātena niccasubhasukhaattasuññatatthasaṅkhātena. Sabhāvaṭṭhenāti yathābhūtasabhāvaṭṭhena. Tato eva sabhāvassa dhāraṇaṭṭhena dhātūti laddhanāmānaṃ. Nānāsabhāvo aññamaññavisadisatā dhātunānattaṃ. Cakkhusaṅkhāto pasādo cakkhupasādo. So eva cakkhanaṭṭhena cakkhu, nissattasuññataṭṭhena dhātu cāti cakkhudhātu. Cakkhupasādavatthuṃ adhiṭṭhānaṃ katvā pavattaṃ cakkhupasādavatthukaṃ. Sesapadesupi eseva nayo. Dve sampaṭicchanamanodhātuyo, ekā kiriyā manodhātūti tisso manodhātuyo manodhātu ‘‘mananamattā dhātū’’ti katvā. Vedanādayo…pe… nibbānañca dhammadhātu visesasaññāparihārena sāmaññasaññāya pavattanato. Tathā hete dhammā āyatanadesanāya ‘‘dhammāyatana’’nteva desitā. Na hi nesaṃ rūpāyatanādīnaṃ viya viññāṇehi aññaviññāṇena gahetabbatākāro atthi. Sabbampīti chasattatividhaṃ manoviññāṇaṃ. Kāmāvacarā kāmadhātupariyāpannattā. Avasāne dveti dhammadhātumanoviññāṇadhātuyo. Ayamettha saṅkhepo, vitthāro pana visuddhimagge taṃsaṃvaṇṇanāsu daṭṭhabbo.
தா⁴துனானத்தஸுத்தவண்ணனா நிட்டி²தா.
Dhātunānattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. தா⁴துனானத்தஸுத்தங் • 1. Dhātunānattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1.தா⁴துனானத்தஸுத்தவண்ணனா • 1. Dhātunānattasuttavaṇṇanā
