| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
9. தா⁴துஸோஸங்ஸந்த³னஸுத்தவண்ணனா
9. Dhātusosaṃsandanasuttavaṇṇanā
78. நவமே தா⁴துஸோதி தா⁴துதோ. தா⁴தூதி ச அஜ்ஜா²ஸயதா⁴து அஜ்ஜா²ஸயஸபா⁴வோ அதி⁴ப்பேதோ, யோ அதி⁴முத்தீதிபி வுச்சதி. ஸங்ஸந்த³ந்தீதி தாய தா⁴துஸபா⁴க³தாய யதா²தா⁴து யதா²அஜ்ஜா²ஸயங் அல்லீயந்தி ஏகதோ ஹொந்தி. ஸமெந்தீதி தாய ஏவ ஸமானஜ்ஜா²ஸயதாய ஏகசித்தா ஹுத்வா ஸமாக³ச்ச²ந்தி அஞ்ஞமஞ்ஞங் ப⁴ஜந்தி உபஸங்கமந்தி, அத்தனோ ருசிபா⁴வக²ந்திதி³ட்டி²யோ வா தத்த² தத்த² ஸமே கரொந்தா பவத்தந்தி. ஹீனாதி⁴முத்திகாதி ஹீனே காமகு³ணாதி³கே அதி⁴முத்தி ஏதேஸந்தி ஹீனாதி⁴முத்திகா, ஹீனஜ்ஜா²ஸயா. கல்யாணாதி⁴முத்திகாதி கல்யாணே நெக்க²ம்மாதி³கே அதி⁴முத்தி ஏதேஸந்தி கல்யாணாதி⁴முத்திகா, பணீதஜ்ஜா²ஸயா. ஸசே ஹி ஆசரியுபஜ்ஜா²யா ந ஸீலவந்தோ , அந்தேவாஸிகஸத்³தி⁴விஹாரிகா ச ஸீலவந்தோ, தே ஆசரியுபஜ்ஜா²யேபி ந உபஸங்கமந்தி, அத்தனோ ஸதி³ஸே ஸாருப்பபி⁴க்கூ²யேவ உபஸங்கமந்தி. ஸசே பன ஆசரியுபஜ்ஜா²யா ஸீலவந்தோ, இதரே ந ஸீலவந்தோ, தேபி ந ஆசரியுபஜ்ஜா²யே உபஸங்கமந்தி, அத்தனோ ஸதி³ஸே ஹீனாதி⁴முத்திகேயேவ உபஸங்கமந்தி. ஏவங் உபஸங்கமனங் பன ந கேவலங் ஏதரஹி ஏவ, அத² கோ² அதீதானாக³தேபீதி த³ஸ்ஸெந்தோ ‘‘அதீதம்பி, பி⁴க்க²வே’’திஆதி³மாஹ. ஸங்கே²பதோ ஸங்கிலேஸத⁴ம்மேஸு அபி⁴னிவிட்டா² ஹீனாதி⁴முத்திகா , வோதா³னத⁴ம்மேஸு அபி⁴னிவிட்டா² கல்யாணாதி⁴முத்திகா.
78. Navame dhātusoti dhātuto. Dhātūti ca ajjhāsayadhātu ajjhāsayasabhāvo adhippeto, yo adhimuttītipi vuccati. Saṃsandantīti tāya dhātusabhāgatāya yathādhātu yathāajjhāsayaṃ allīyanti ekato honti. Samentīti tāya eva samānajjhāsayatāya ekacittā hutvā samāgacchanti aññamaññaṃ bhajanti upasaṅkamanti, attano rucibhāvakhantidiṭṭhiyo vā tattha tattha same karontā pavattanti. Hīnādhimuttikāti hīne kāmaguṇādike adhimutti etesanti hīnādhimuttikā, hīnajjhāsayā. Kalyāṇādhimuttikāti kalyāṇe nekkhammādike adhimutti etesanti kalyāṇādhimuttikā, paṇītajjhāsayā. Sace hi ācariyupajjhāyā na sīlavanto , antevāsikasaddhivihārikā ca sīlavanto, te ācariyupajjhāyepi na upasaṅkamanti, attano sadise sāruppabhikkhūyeva upasaṅkamanti. Sace pana ācariyupajjhāyā sīlavanto, itare na sīlavanto, tepi na ācariyupajjhāye upasaṅkamanti, attano sadise hīnādhimuttikeyeva upasaṅkamanti. Evaṃ upasaṅkamanaṃ pana na kevalaṃ etarahi eva, atha kho atītānāgatepīti dassento ‘‘atītampi, bhikkhave’’tiādimāha. Saṅkhepato saṃkilesadhammesu abhiniviṭṭhā hīnādhimuttikā , vodānadhammesu abhiniviṭṭhā kalyāṇādhimuttikā.
இத³ங் பன து³ஸ்ஸீலானங் து³ஸ்ஸீலஸேவனமேவ, ஸீலவந்தானங் ஸீலவந்தஸேவனமேவ, து³ப்பஞ்ஞானங் து³ப்பஞ்ஞஸேவனமேவ, பஞ்ஞவந்தானங் பஞ்ஞவந்தஸேவனமேவ கோ நியாமேதீதி? அஜ்ஜா²ஸயதா⁴து நியாமேதி. ஸம்ப³ஹுலா கிர பி⁴க்கூ² ஏகஸ்மிங் கா³மே பி⁴க்கா²சாரங் சரந்தி. தே மனுஸ்ஸா ப³ஹுங் ப⁴த்தங் ஆஹரித்வா பத்தானி பூரெத்வா ‘‘யதா²ஸபா⁴க³ங் பரிபு⁴ஞ்ஜதா²’’தி வத்வா உய்யோஜேஸுங். பி⁴க்கூ² ஆஹங்ஸு ‘‘ஆவுஸோ, மனுஸ்ஸா தா⁴துஸங்யுத்தகம்மே பயோஜெந்தீ’’தி. ஏவங் அஜ்ஜா²ஸயதா⁴து நியாமேதீதி. தா⁴துஸங்யுத்தேன அயமத்தோ² தீ³பேதப்³போ³ – கி³ஜ்ஜ²கூடபப்³ப³தஸ்மிஞ்ஹி கி³லானஸெய்யாய நிபன்னோ ப⁴க³வா ஆரக்க²த்தா²ய பரிவாரெத்வா வஸந்தேஸு ஸாரிபுத்தமொக்³க³ல்லானாதீ³ஸு ஏகமேகங் அத்தனோ பரிஸாய ஸத்³தி⁴ங் சங்கமந்தங் ஓலோகெத்வா பி⁴க்கூ² ஆமந்தேஸி ‘‘பஸ்ஸத² நோ தும்ஹே, பி⁴க்க²வே, ஸாரிபுத்தங் ஸம்ப³ஹுலேஹி பி⁴க்கூ²ஹி ஸத்³தி⁴ங் சங்கமந்தந்தி. ஏவங், ப⁴ந்தே. ஸப்³பே³ கோ² ஏதே, பி⁴க்க²வே, பி⁴க்கூ² மஹாபஞ்ஞா’’தி (ஸங்॰ நி॰ 2.99) ஸப்³ப³ங் வித்தா²ரேதப்³ப³ங்.
Idaṃ pana dussīlānaṃ dussīlasevanameva, sīlavantānaṃ sīlavantasevanameva, duppaññānaṃ duppaññasevanameva, paññavantānaṃ paññavantasevanameva ko niyāmetīti? Ajjhāsayadhātu niyāmeti. Sambahulā kira bhikkhū ekasmiṃ gāme bhikkhācāraṃ caranti. Te manussā bahuṃ bhattaṃ āharitvā pattāni pūretvā ‘‘yathāsabhāgaṃ paribhuñjathā’’ti vatvā uyyojesuṃ. Bhikkhū āhaṃsu ‘‘āvuso, manussā dhātusaṃyuttakamme payojentī’’ti. Evaṃ ajjhāsayadhātu niyāmetīti. Dhātusaṃyuttena ayamattho dīpetabbo – gijjhakūṭapabbatasmiñhi gilānaseyyāya nipanno bhagavā ārakkhatthāya parivāretvā vasantesu sāriputtamoggallānādīsu ekamekaṃ attano parisāya saddhiṃ caṅkamantaṃ oloketvā bhikkhū āmantesi ‘‘passatha no tumhe, bhikkhave, sāriputtaṃ sambahulehi bhikkhūhi saddhiṃ caṅkamantanti. Evaṃ, bhante. Sabbe kho ete, bhikkhave, bhikkhū mahāpaññā’’ti (saṃ. ni. 2.99) sabbaṃ vitthāretabbaṃ.
கா³தா²ஸு ஸங்ஸக்³கா³தி ஸங்கிலேஸதோ ஸஹவாஸாதி³வஸேன ஸமாயோக³தோ, அத² வா த³ஸ்ஸனஸங்ஸக்³கோ³, ஸவனஸங்ஸக்³கோ³, ஸமுல்லாபஸங்ஸக்³கோ³, ஸம்போ⁴க³ஸங்ஸக்³கோ³, காயஸங்ஸக்³கோ³தி ஏவங் பஞ்சவிதே⁴ ஸங்ஸக்³கே³ யதோ குதோசி ஸங்ஸக்³க³தோ. வனதோ² ஜாதோதி கிலேஸோ உப்பன்னோ மக்³கே³ன அஸமூஹதோ. அஸங்ஸக்³கே³ன சி²ஜ்ஜதீதி ஸங்ஸக்³க³படிக்கே²பேன காயவிவேகாதி³னா புப்³ப³பா⁴கே³ சி²ஜ்ஜித்வா புன அச்சந்தாஸங்ஸக்³கே³ன ஸமுச்சே²த³விவேகேன சி²ஜ்ஜதி பஹீயதி. எத்தாவதா ஸங்கே²பதோ ஹீனாதி⁴முத்தியா ஸமுத³யோ அத்த²ங்க³மோ ச த³ஸ்ஸிதோ ஹோதி.
Gāthāsu saṃsaggāti saṃkilesato sahavāsādivasena samāyogato, atha vā dassanasaṃsaggo, savanasaṃsaggo, samullāpasaṃsaggo, sambhogasaṃsaggo, kāyasaṃsaggoti evaṃ pañcavidhe saṃsagge yato kutoci saṃsaggato. Vanatho jātoti kileso uppanno maggena asamūhato. Asaṃsaggena chijjatīti saṃsaggapaṭikkhepena kāyavivekādinā pubbabhāge chijjitvā puna accantāsaṃsaggena samucchedavivekena chijjati pahīyati. Ettāvatā saṅkhepato hīnādhimuttiyā samudayo atthaṅgamo ca dassito hoti.
யஸ்மா பன தே ஸங்ஸக்³கா³ தே ச கிலேஸா கோஸஜ்ஜவஸேன உப்பஜ்ஜந்தி சேவ வட்³ட⁴ந்தி ச, ந வீரியாரம்ப⁴வஸேன, தஸ்மா ஹீனாதி⁴முத்திகே குஸீதபுக்³க³லே வஜ்ஜெத்வா கல்யாணாதி⁴முத்திகே ஆரத்³த⁴வீரியே ஸேவந்தேன அஸங்ஸக்³கே³ன ஸங்ஸக்³க³ஜோ வனதோ² சி²ந்தி³தப்³போ³தி யதா²வுத்தமத்த²ங் வித்தா²ரதோ த³ஸ்ஸெந்தோ குஸீதஸேவனாய தாவ ஆதீ³னவங் பகாஸேதுங் ‘‘பரித்தங் தா³ரு’’ந்திஆதி³மாஹ.
Yasmā pana te saṃsaggā te ca kilesā kosajjavasena uppajjanti ceva vaḍḍhanti ca, na vīriyārambhavasena, tasmā hīnādhimuttike kusītapuggale vajjetvā kalyāṇādhimuttike āraddhavīriye sevantena asaṃsaggena saṃsaggajo vanatho chinditabboti yathāvuttamatthaṃ vitthārato dassento kusītasevanāya tāva ādīnavaṃ pakāsetuṃ ‘‘parittaṃ dāru’’ntiādimāha.
தத்த² பரித்தங் தா³ருந்தி கு²த்³த³கங் கட்ட²மயங் குல்லங். யதா² ஸீதே³ மஹண்ணவேதி யதா² கு²த்³த³கங் குல்லங் ஆருஹித்வா மஹாஸமுத்³த³ங் தரிதுகாமோ தீரங் அப்பத்வா ஸமுத்³த³மஜ்ஜே²யேவ ஸீதெ³ய்ய, பதித்வா மச்ச²கச்ச²பப⁴க்கோ² ப⁴வெய்ய. ஏவங் குஸீதங் ஆக³ம்ம, ஸாது⁴ஜீவீபி ஸீத³தீதி ஏவமேவ குஸீதங் வீரியாரம்ப⁴ரஹிதங் கிலேஸவஸிகங் புக்³க³லங் நிஸ்ஸாய தேன கதஸங்ஸக்³கோ³ ஸாது⁴ஜீவீபி பரிஸுத்³தா⁴ஜீவோ பரிஸுத்³த⁴ஸீலோபி ஸமானோ ஹீனஸங்ஸக்³க³தோ உப்பன்னேஹி காமவிதக்காதீ³ஹி க²ஜ்ஜமானோ பாரங் க³ந்துங் அஸமத்தோ² ஸங்ஸாரண்ணவேயேவ ஸீத³தி. தஸ்மாதி யஸ்மா ஏவங் அனத்தா²வஹோ குஸீதஸங்ஸக்³கோ³, தஸ்மா தங் ஆக³ம்ம ஆலஸியானுயோகே³ன குச்சி²தங் ஸீத³தீதி குஸீதங். ததோ ஏவ ஹீனவீரியங் நிப்³பீ³ரியங் அகல்யாணமித்தங் பரிவஜ்ஜெய்ய. ஏகந்தேனேவ பன காயவிவேகாதீ³னஞ்சேவ தத³ங்க³விவேகாதீ³னஞ்ச வஸேன பவிவித்தேஹி, ததோ ஏவ கிலேஸேஹி ஆரகத்தா அரியேஹி பரிஸுத்³தே⁴ஹி நிப்³பா³னங் படிபேஸிதத்தபா⁴வதோ பஹிதத்தேஹி ஆரம்மணலக்க²ணூபனிஜ்ஜா²னானங் வஸேன ஜா²யனதோ ஜா²யீஹி ஸப்³ப³காலங் பக்³க³ஹிதவீரியதாய ஆரத்³த⁴வீரியேஹி பண்டி³தேஹி ஸப்பஞ்ஞேஹியேவ ஸஹ ஆவஸெய்ய ஸங்வஸெய்யாதி.
Tattha parittaṃ dārunti khuddakaṃ kaṭṭhamayaṃ kullaṃ. Yathā sīde mahaṇṇaveti yathā khuddakaṃ kullaṃ āruhitvā mahāsamuddaṃ taritukāmo tīraṃ appatvā samuddamajjheyeva sīdeyya, patitvā macchakacchapabhakkho bhaveyya. Evaṃ kusītaṃ āgamma, sādhujīvīpi sīdatīti evameva kusītaṃ vīriyārambharahitaṃ kilesavasikaṃ puggalaṃ nissāya tena katasaṃsaggo sādhujīvīpi parisuddhājīvo parisuddhasīlopi samāno hīnasaṃsaggato uppannehi kāmavitakkādīhi khajjamāno pāraṃ gantuṃ asamattho saṃsāraṇṇaveyeva sīdati. Tasmāti yasmā evaṃ anatthāvaho kusītasaṃsaggo, tasmā taṃ āgamma ālasiyānuyogena kucchitaṃ sīdatīti kusītaṃ. Tato eva hīnavīriyaṃ nibbīriyaṃ akalyāṇamittaṃ parivajjeyya. Ekanteneva pana kāyavivekādīnañceva tadaṅgavivekādīnañca vasena pavivittehi, tato eva kilesehi ārakattā ariyehi parisuddhehi nibbānaṃ paṭipesitattabhāvato pahitattehi ārammaṇalakkhaṇūpanijjhānānaṃ vasena jhāyanato jhāyīhi sabbakālaṃ paggahitavīriyatāya āraddhavīriyehi paṇḍitehi sappaññehiyeva saha āvaseyya saṃvaseyyāti.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 9. தா⁴துஸோஸங்ஸந்த³னஸுத்தங் • 9. Dhātusosaṃsandanasuttaṃ
