| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
2. தா⁴துஸுத்தவண்ணனா
2. Dhātusuttavaṇṇanā
51. து³தியே தா⁴துயோதி அத்தனோ ப²லஸ்ஸ ஸபா⁴வஸ்ஸ ச தா⁴ரணட்டே²ன தா⁴துயோ. யஞ்செத்த² ப²லனிப்³ப³த்தகங், தங் அத்தனோ ப²லஸ்ஸ ஸபா⁴வஸ்ஸ ச, இதரங் ஸபா⁴வஸ்ஸேவ தா⁴ரணட்டே²ன தா⁴து. ரூபதா⁴தூதி ரூபப⁴வோ. தா⁴துயா ஆக³தட்டா²னே ப⁴வேன பரிச்சி²ந்தி³தப்³ப³ங், ப⁴வஸ்ஸ ஆக³தட்டா²னே தா⁴துயா பரிச்சி²ந்தி³தப்³ப³ந்தி இத⁴ ப⁴வேன பரிச்சே²தோ³ கதி²தோ. தஸ்மா –
51. Dutiye dhātuyoti attano phalassa sabhāvassa ca dhāraṇaṭṭhena dhātuyo. Yañcettha phalanibbattakaṃ, taṃ attano phalassa sabhāvassa ca, itaraṃ sabhāvasseva dhāraṇaṭṭhena dhātu. Rūpadhātūti rūpabhavo. Dhātuyā āgataṭṭhāne bhavena paricchinditabbaṃ, bhavassa āgataṭṭhāne dhātuyā paricchinditabbanti idha bhavena paricchedo kathito. Tasmā –
‘‘கதமே த⁴ம்மா ரூபாவசரா? ஹெட்ட²தோ ப்³ரஹ்மலோகங் பரியந்தங் கரித்வா உபரிதோ அகனிட்டே² தே³வே அந்தோ கரித்வா எத்தா²வசரா எத்த² பரியாபன்னா க²ந்த⁴தா⁴துஆயதனா, இமே த⁴ம்மா ரூபாவசரா’’தி (த⁴॰ ஸ॰ 1289) –
‘‘Katame dhammā rūpāvacarā? Heṭṭhato brahmalokaṃ pariyantaṃ karitvā uparito akaniṭṭhe deve anto karitvā etthāvacarā ettha pariyāpannā khandhadhātuāyatanā, ime dhammā rūpāvacarā’’ti (dha. sa. 1289) –
ஏவங் வுத்தா ரூபாவசரத⁴ம்மா ரூபதா⁴து. அரூபதா⁴தூதி அரூபப⁴வோ. இதா⁴பி ப⁴வேன பரிச்சே²தோ³ கதி²தோதி –
Evaṃ vuttā rūpāvacaradhammā rūpadhātu. Arūpadhātūti arūpabhavo. Idhāpi bhavena paricchedo kathitoti –
‘‘கதமே த⁴ம்மா அரூபாவசரா? ஹெட்ட²தோ ஆகாஸானஞ்சாயதனூபகே³ தே³வே அந்தோ கரித்வா, உபரிதோ நேவஸஞ்ஞானாஸஞ்ஞாயதனூபகே³ தே³வே அந்தோ கரித்வா, எத்தா²வசரா எத்த² பரியாபன்னா க²ந்த⁴தா⁴துஆயதனா, இமே த⁴ம்மா அரூபாவசரா’’தி (த⁴॰ ஸ॰ 1291) –
‘‘Katame dhammā arūpāvacarā? Heṭṭhato ākāsānañcāyatanūpage deve anto karitvā, uparito nevasaññānāsaññāyatanūpage deve anto karitvā, etthāvacarā ettha pariyāpannā khandhadhātuāyatanā, ime dhammā arūpāvacarā’’ti (dha. sa. 1291) –
ஏவங் வுத்தா அரூபாவசரத⁴ம்மா அரூபதா⁴து. நிரோத⁴தா⁴தூதி நிப்³பா³னங் வேதி³தப்³ப³ங்.
Evaṃ vuttā arūpāvacaradhammā arūpadhātu. Nirodhadhātūti nibbānaṃ veditabbaṃ.
அபரோ நயோ – ரூபஸஹிதா, ரூபபடிப³த்³தா⁴, த⁴ம்மப்பவத்தி ரூபதா⁴து, பஞ்சவோகாரப⁴வோ, ஏகவோகாரப⁴வோ ச, தேன ஸகலோ காமப⁴வோ ரூபப⁴வோ ச ஸங்க³ஹிதோ. ரூபரஹிதா த⁴ம்மப்பவத்தி அரூபதா⁴து, சதுவோகாரப⁴வோ, தேன அரூபப⁴வோ ஸங்க³ஹிதோ. இதி த்³வீஹி பதே³ஹி தயோ ப⁴வா ஸப்³பா³ ஸங்ஸாரப்பவத்தி த³ஸ்ஸிதா. ததியபதே³ன பன அஸங்க²ததா⁴துயேவ ஸங்க³ஹிதாதி மக்³க³ப²லானி இத⁴ திகவினிமுத்தத⁴ம்மா நாம ஜாதா. கேசி பன ‘‘ரூபதா⁴தூதி ரூபஸபா⁴வா த⁴ம்மா, அரூபதா⁴தூதி அரூபஸபா⁴வா த⁴ம்மாதி பத³த்³வயேன அனவஸேஸதோ பஞ்சக்க²ந்தா⁴ க³ஹிதா’’தி. ‘‘ரூபதண்ஹாய விஸயபூ⁴தா த⁴ம்மா ரூபதா⁴து, அரூபதண்ஹாய விஸயபூ⁴தா அரூபதா⁴தூ’’தி ச வத³ந்தி, தங் ஸப்³ப³ங் இத⁴ நாதி⁴ப்பேதங். தஸ்மா வுத்தனயேனேவ அத்தோ² வேதி³தப்³போ³.
Aparo nayo – rūpasahitā, rūpapaṭibaddhā, dhammappavatti rūpadhātu, pañcavokārabhavo, ekavokārabhavo ca, tena sakalo kāmabhavo rūpabhavo ca saṅgahito. Rūparahitā dhammappavatti arūpadhātu, catuvokārabhavo, tena arūpabhavo saṅgahito. Iti dvīhi padehi tayo bhavā sabbā saṃsārappavatti dassitā. Tatiyapadena pana asaṅkhatadhātuyeva saṅgahitāti maggaphalāni idha tikavinimuttadhammā nāma jātā. Keci pana ‘‘rūpadhātūti rūpasabhāvā dhammā, arūpadhātūti arūpasabhāvā dhammāti padadvayena anavasesato pañcakkhandhā gahitā’’ti. ‘‘Rūpataṇhāya visayabhūtā dhammā rūpadhātu, arūpataṇhāya visayabhūtā arūpadhātū’’ti ca vadanti, taṃ sabbaṃ idha nādhippetaṃ. Tasmā vuttanayeneva attho veditabbo.
கா³தா²ஸு ரூபதா⁴துங் பரிஞ்ஞாயாதி ரூபபடிப³த்³த⁴த⁴ம்மபவத்திங் ஞாதபரிஞ்ஞாதீ³ஹி தீஹி பரிஞ்ஞாஹி பரிஜானித்வா. ஆருப்பேஸு அஸண்டி²தாதி அரூபாவசரத⁴ம்மேஸு ப⁴வராக³வஸேன ப⁴வதி³ட்டி²வஸேன ச ந பதிட்டி²தா அனல்லீனா. ‘‘அரூபேஸு அஸண்டி²தா’’தி ச பட²ந்தி, ஸோ ஏவ அத்தோ². எத்தாவதா தேபூ⁴மகத⁴ம்மானங் பரிஞ்ஞா வுத்தா. நிரோதே⁴ யே விமுச்சந்தீதி யே நிப்³பா³னே ஆரம்மணபூ⁴தே அக்³க³மக்³க³ப²லவஸேன ஸமுச்சே²த³படிப்பஸ்ஸத்³தீ⁴ஹி அனவஸேஸகிலேஸதோ விமுச்சந்தி. தே ஜனா மச்சுஹாயினோதி தே கீ²ணாஸவஜனா மரணங் ஸமதீதா.
Gāthāsu rūpadhātuṃ pariññāyāti rūpapaṭibaddhadhammapavattiṃ ñātapariññādīhi tīhi pariññāhi parijānitvā. Āruppesu asaṇṭhitāti arūpāvacaradhammesu bhavarāgavasena bhavadiṭṭhivasena ca na patiṭṭhitā anallīnā. ‘‘Arūpesu asaṇṭhitā’’ti ca paṭhanti, so eva attho. Ettāvatā tebhūmakadhammānaṃ pariññā vuttā. Nirodhe ye vimuccantīti ye nibbāne ārammaṇabhūte aggamaggaphalavasena samucchedapaṭippassaddhīhi anavasesakilesato vimuccanti. Te janā maccuhāyinoti te khīṇāsavajanā maraṇaṃ samatītā.
ஏவங் தா⁴துத்தயஸமதிக்கமேன அமதாதி⁴க³மங் த³ஸ்ஸெத்வா ‘‘அயஞ்ச படிபதா³ மயா க³தமக்³கோ³ ச தும்ஹாகங் த³ஸ்ஸிதோ’’தி தத்த² நேஸங் உஸ்ஸாஹங் ஜனெந்தோ து³தியங் கா³த²மாஹ. தத்த² காயேனாதி நாமகாயேன மக்³க³ப²லேஹி. பு²ஸயித்வாதி பத்வா. நிரூபதி⁴ந்தி க²ந்தா⁴தி³ஸப்³பூ³பதி⁴ரஹிதங். உபதி⁴ப்படினிஸ்ஸக்³க³ந்தி தேஸங்யேவ ச உபதீ⁴னங் படினிஸ்ஸஜ்ஜனகாரணங். நிப்³பா³னஸ்ஸ ஹி மக்³க³ஞாணேன ஸச்சி²கிரியாய ஸப்³பே³ உபத⁴யோ படினிஸ்ஸட்டா² ஹொந்தீதி தங் தேஸங் படினிஸ்ஸஜ்ஜனகாரணங். ஸச்சி²கத்வாதி காலேன காலங் ப²லஸமாபத்திஸமாபஜ்ஜனேன அத்தபச்சக்க²ங் கத்வா அனாஸவோ ஸம்மாஸம்பு³த்³தோ⁴ தமேவ அஸோகங் விரஜங் நிப்³பா³னபத³ங் தே³ஸேதி. தஸ்மா தத³தி⁴க³மாய உஸ்ஸுக்கங் காதப்³ப³ந்தி.
Evaṃ dhātuttayasamatikkamena amatādhigamaṃ dassetvā ‘‘ayañca paṭipadā mayā gatamaggo ca tumhākaṃ dassito’’ti tattha nesaṃ ussāhaṃ janento dutiyaṃ gāthamāha. Tattha kāyenāti nāmakāyena maggaphalehi. Phusayitvāti patvā. Nirūpadhinti khandhādisabbūpadhirahitaṃ. Upadhippaṭinissagganti tesaṃyeva ca upadhīnaṃ paṭinissajjanakāraṇaṃ. Nibbānassa hi maggañāṇena sacchikiriyāya sabbe upadhayo paṭinissaṭṭhā hontīti taṃ tesaṃ paṭinissajjanakāraṇaṃ. Sacchikatvāti kālena kālaṃ phalasamāpattisamāpajjanena attapaccakkhaṃ katvā anāsavo sammāsambuddho tameva asokaṃ virajaṃ nibbānapadaṃ deseti. Tasmā tadadhigamāya ussukkaṃ kātabbanti.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 2. தா⁴துஸுத்தங் • 2. Dhātusuttaṃ
