| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. தீ³க⁴னக²ஸுத்தவண்ணனா
4. Dīghanakhasuttavaṇṇanā
201. ஏவங் மே ஸுதந்தி தீ³க⁴னக²ஸுத்தங். தத்த² ஸூகரக²தாயந்தி ஸூகரக²தாதி ஏவங்னாமகே லேணே. கஸ்ஸபபு³த்³த⁴காலே கிர தங் லேணங் ஏகஸ்மிங் பு³த்³த⁴ந்தரே பத²வியா வட்³ட⁴மானாய அந்தோபூ⁴மிக³தங் ஜாதங். அதே²கதி³வஸங் ஏகோ ஸூகரோ தஸ்ஸ ச²த³னபரியந்தஸமீபே பங்ஸுங் க²ணி. தே³வே வுட்டே பங்ஸுதோ⁴தோ ச²த³னபரியந்தோ பாகடோ அஹோஸி. ஏகோ வனசரகோ தி³ஸ்வா – ‘‘புப்³பே³ ஸீலவந்தேஹி பரிபு⁴த்தலேணேன ப⁴விதப்³ப³ங், படிஜக்³கி³ஸ்ஸாமி ந’’ந்தி ஸமந்ததோ பங்ஸுங் அபனெத்வா லேணங் ஸோதெ⁴த்வா குட்டபரிக்கே²பங் கத்வா த்³வாரவாதபானங் யோஜெத்வா ஸுபரினிட்டி²த-ஸுதா⁴கம்மசித்தகம்மரஜதபட்டஸதி³ஸாய வாலுகாய ஸந்த²தபரிவேணங் லேணங் கத்வா மஞ்சபீட²ங் பஞ்ஞாபெத்வா ப⁴க³வதோ வஸனத்தா²ய அதா³ஸி. லேணங் க³ம்பீ⁴ரங் அஹோஸி ஓதரித்வா அபி⁴ருஹிதப்³ப³ங். தங் ஸந்தா⁴யேதங் வுத்தங்.
201.Evaṃme sutanti dīghanakhasuttaṃ. Tattha sūkarakhatāyanti sūkarakhatāti evaṃnāmake leṇe. Kassapabuddhakāle kira taṃ leṇaṃ ekasmiṃ buddhantare pathaviyā vaḍḍhamānāya antobhūmigataṃ jātaṃ. Athekadivasaṃ eko sūkaro tassa chadanapariyantasamīpe paṃsuṃ khaṇi. Deve vuṭṭe paṃsudhoto chadanapariyanto pākaṭo ahosi. Eko vanacarako disvā – ‘‘pubbe sīlavantehi paribhuttaleṇena bhavitabbaṃ, paṭijaggissāmi na’’nti samantato paṃsuṃ apanetvā leṇaṃ sodhetvā kuṭṭaparikkhepaṃ katvā dvāravātapānaṃ yojetvā supariniṭṭhita-sudhākammacittakammarajatapaṭṭasadisāya vālukāya santhatapariveṇaṃ leṇaṃ katvā mañcapīṭhaṃ paññāpetvā bhagavato vasanatthāya adāsi. Leṇaṃ gambhīraṃ ahosi otaritvā abhiruhitabbaṃ. Taṃ sandhāyetaṃ vuttaṃ.
தீ³க⁴னகோ²தி தஸ்ஸ பரிப்³பா³ஜகஸ்ஸ நாமங். உபஸங்கமீதி கஸ்மா உபஸங்கமி? ஸோ கிர தே²ரே அட்³ட⁴மாஸபப்³ப³ஜிதே சிந்தேஸி – ‘‘மய்ஹங் மாதுலோ அஞ்ஞங் பாஸண்ட³ங் க³ந்த்வா ந சிரங் திட்ட²தி, இதா³னி பனஸ்ஸ ஸமணஸ்ஸ கோ³தமஸ்ஸ ஸந்திகங் க³தஸ்ஸ அட்³ட⁴மாஸோ ஜாதோ. பவத்திம்பிஸ்ஸ ந ஸுணாமி, ஓஜவந்தங் நு கோ² ஸாஸனங், ஜானிஸ்ஸாமி ந’’ந்தி க³ந்துகாமோ ஜாதோ. தஸ்மா உபஸங்கமி. ஏகமந்தங் டி²தோதி தஸ்மிங் கிர ஸமயே தே²ரோ ப⁴க³வந்தங் பீ³ஜயமானோ டி²தோ ஹோதி, பரிப்³பா³ஜகோ மாதுலே ஹிரொத்தப்பேன டி²தகோவ பஞ்ஹங் புச்சி². தேன வுத்தங் ‘‘ஏகமந்தங் டி²தோ’’தி.
Dīghanakhoti tassa paribbājakassa nāmaṃ. Upasaṅkamīti kasmā upasaṅkami? So kira there aḍḍhamāsapabbajite cintesi – ‘‘mayhaṃ mātulo aññaṃ pāsaṇḍaṃ gantvā na ciraṃ tiṭṭhati, idāni panassa samaṇassa gotamassa santikaṃ gatassa aḍḍhamāso jāto. Pavattimpissa na suṇāmi, ojavantaṃ nu kho sāsanaṃ, jānissāmi na’’nti gantukāmo jāto. Tasmā upasaṅkami. Ekamantaṃ ṭhitoti tasmiṃ kira samaye thero bhagavantaṃ bījayamāno ṭhito hoti, paribbājako mātule hirottappena ṭhitakova pañhaṃ pucchi. Tena vuttaṃ ‘‘ekamantaṃ ṭhito’’ti.
ஸப்³ப³ங் மே நக்க²மதீதி ஸப்³பா³ மே உபபத்தியோ நக்க²மந்தி, படிஸந்தி⁴யோ நக்க²மந்தீதி அதி⁴ப்பாயேன வத³தி. எத்தாவதானேன ‘‘உச்சே²த³வாதோ³ஹமஸ்மீ’’தி தீ³பிதங் ஹோதி. ப⁴க³வா பனஸ்ஸ அதி⁴ப்பாயங் முஞ்சித்வா அக்க²ரே தாவ தோ³ஸங் த³ஸ்ஸெந்தோ யாபி கோ² தேதிஆதி³மாஹ. தத்த² ஏஸாபி தே தி³ட்டி² நக்க²மதீதி ஏஸாபி தே பட²மங் ருச்சித்வா க²மாபெத்வா க³ஹிததி³ட்டி² நக்க²மதீதி. ஏஸா சே மே, போ⁴ கோ³தம, தி³ட்டி² க²மெய்யாதி மய்ஹஞ்ஹி ஸப்³ப³ங் நக்க²மதீதி தி³ட்டி², தஸ்ஸ மய்ஹங் யா ஏஸா ஸப்³ப³ங் மே நக்க²மதீதி தி³ட்டி², ஏஸா மே க²மெய்ய. யங் தங் ‘‘ஸப்³ப³ங் மே நக்க²மதீ’’தி வுத்தங், தம்பிஸ்ஸ தாதி³ஸமேவ. யதா² ஸப்³ப³க³ஹணேன க³ஹிதாபி அயங் தி³ட்டி² க²மதி, ஏவமேவங் தம்பி க²மெய்ய . ஏவங் அத்தனோ வாதே³ ஆரோபிதங் தோ³ஸங் ஞத்வா தங் பரிஹராமீதி ஸஞ்ஞாய வத³தி, அத்த²தோ பனஸ்ஸ ‘‘ஏஸா தி³ட்டி² ந மே க²மதீ’’தி ஆபஜ்ஜதி. யஸ்ஸ பனேஸா ந க²மதி ந ருச்சதி, தஸ்ஸாயங் தாய தி³ட்டி²யா ஸப்³ப³ங் மே ந க²மதீதி தி³ட்டி² ருசிதங். தேன ஹி தி³ட்டி²அக்க²மேன அருசிதேன ப⁴விதப்³ப³ந்தி ஸப்³ப³ங் க²மதீதி ருச்சதீதி ஆபஜ்ஜதி. ந பனேஸ தங் ஸம்படிச்ச²தி, கேவலங் தஸ்ஸாபி உச்சே²த³தி³ட்டி²யா உச்சே²த³மேவ க³ண்ஹாதி. தேனாஹ ப⁴க³வா அதோ கோ² தே, அக்³கி³வெஸ்ஸன,…பே॰… அஞ்ஞஞ்ச தி³ட்டி²ங் உபாதி³யந்தீதி. தத்த² அதோதி பஜஹனகேஸு நிஸ்ஸக்கங், யே பஜஹந்தி, தேஹி யே நப்பஜஹந்தீதி வுச்சியந்தி, தேவ ப³ஹுதராதி அத்தோ². ப³ஹூ ஹி ப³ஹுதராதி எத்த² ஹிகாரோ நிபாதமத்தங், ப³ஹூ ப³ஹுதராதி அத்தோ². பரதோ தனூ ஹி தனுதராதி பதே³பி ஏஸேவ நயோ. யே ஏவமாஹங்ஸூதி யே ஏவங் வத³ந்தி. தஞ்சேவ தி³ட்டி²ங் நப்பஜஹந்தி, அஞ்ஞஞ்ச தி³ட்டி²ங் உபாதி³யந்தீதி மூலத³ஸ்ஸனங் நப்பஜஹந்தி, அபரத³ஸ்ஸனங் உபாதி³யந்தி.
Sabbaṃ me nakkhamatīti sabbā me upapattiyo nakkhamanti, paṭisandhiyo nakkhamantīti adhippāyena vadati. Ettāvatānena ‘‘ucchedavādohamasmī’’ti dīpitaṃ hoti. Bhagavā panassa adhippāyaṃ muñcitvā akkhare tāva dosaṃ dassento yāpi kho tetiādimāha. Tattha esāpi te diṭṭhi nakkhamatīti esāpi te paṭhamaṃ ruccitvā khamāpetvā gahitadiṭṭhi nakkhamatīti. Esā ce me, bho gotama, diṭṭhi khameyyāti mayhañhi sabbaṃ nakkhamatīti diṭṭhi, tassa mayhaṃ yā esā sabbaṃ me nakkhamatīti diṭṭhi, esā me khameyya. Yaṃ taṃ ‘‘sabbaṃ me nakkhamatī’’ti vuttaṃ, tampissa tādisameva. Yathā sabbagahaṇena gahitāpi ayaṃ diṭṭhi khamati, evamevaṃ tampi khameyya . Evaṃ attano vāde āropitaṃ dosaṃ ñatvā taṃ pariharāmīti saññāya vadati, atthato panassa ‘‘esā diṭṭhi na me khamatī’’ti āpajjati. Yassa panesā na khamati na ruccati, tassāyaṃ tāya diṭṭhiyā sabbaṃ me na khamatīti diṭṭhi rucitaṃ. Tena hi diṭṭhiakkhamena arucitena bhavitabbanti sabbaṃ khamatīti ruccatīti āpajjati. Na panesa taṃ sampaṭicchati, kevalaṃ tassāpi ucchedadiṭṭhiyā ucchedameva gaṇhāti. Tenāha bhagavā ato kho te, aggivessana,…pe… aññañca diṭṭhiṃ upādiyantīti. Tattha atoti pajahanakesu nissakkaṃ, ye pajahanti, tehi ye nappajahantīti vucciyanti, teva bahutarāti attho. Bahū hi bahutarāti ettha hikāro nipātamattaṃ, bahū bahutarāti attho. Parato tanū hi tanutarāti padepi eseva nayo. Ye evamāhaṃsūti ye evaṃ vadanti. Tañceva diṭṭhiṃ nappajahanti, aññañca diṭṭhiṃ upādiyantīti mūladassanaṃ nappajahanti, aparadassanaṃ upādiyanti.
எத்த² ச ஸஸ்ஸதங் க³ஹெத்வா தம்பி அப்பஹாய உச்சே²த³ங் வா ஏகச்சஸஸ்ஸதங் வா க³ஹேதுங் ந ஸக்கா, உச்சே²த³ம்பி க³ஹெத்வா தங் அப்பஹாய ஸஸ்ஸதங் வா ஏகச்சஸஸ்ஸதங் வா ந ஸக்கா க³ஹேதுங், ஏகச்சஸஸ்ஸதம்பி க³ஹெத்வா தங் அப்பஹாய ஸஸ்ஸதங் வா உச்சே²த³ங் வா ந ஸக்கா க³ஹேதுங். மூலஸஸ்ஸதங் பன அப்பஹாய அஞ்ஞங் ஸஸ்ஸதமேவ ஸக்கா க³ஹேதுங். கத²ங்? ஏகஸ்மிஞ்ஹி ஸமயே ‘‘ரூபங் ஸஸ்ஸத’’ந்தி க³ஹெத்வா அபரஸ்மிங் ஸமயே ‘‘ந ஸுத்³த⁴ரூபமேவ ஸஸ்ஸதங், வேத³னாபி ஸஸ்ஸதா, விஞ்ஞாணம்பி ஸஸ்ஸத’’ந்தி க³ண்ஹாதி. உச்சே²தே³பி ஏகச்சஸஸ்ஸதேபி ஏஸேவ நயோ. யதா² ச க²ந்தே⁴ஸு, ஏவங் ஆயதனேஸுபி யோஜேதப்³ப³ங். இத³ங் ஸந்தா⁴ய வுத்தங் – ‘‘தஞ்சேவ தி³ட்டி²ங் நப்பஜஹந்தி, அஞ்ஞஞ்ச தி³ட்டி²ங் உபாதி³யந்தீ’’தி.
Ettha ca sassataṃ gahetvā tampi appahāya ucchedaṃ vā ekaccasassataṃ vā gahetuṃ na sakkā, ucchedampi gahetvā taṃ appahāya sassataṃ vā ekaccasassataṃ vā na sakkā gahetuṃ, ekaccasassatampi gahetvā taṃ appahāya sassataṃ vā ucchedaṃ vā na sakkā gahetuṃ. Mūlasassataṃ pana appahāya aññaṃ sassatameva sakkā gahetuṃ. Kathaṃ? Ekasmiñhi samaye ‘‘rūpaṃ sassata’’nti gahetvā aparasmiṃ samaye ‘‘na suddharūpameva sassataṃ, vedanāpi sassatā, viññāṇampi sassata’’nti gaṇhāti. Ucchedepi ekaccasassatepi eseva nayo. Yathā ca khandhesu, evaṃ āyatanesupi yojetabbaṃ. Idaṃ sandhāya vuttaṃ – ‘‘tañceva diṭṭhiṃ nappajahanti, aññañca diṭṭhiṃ upādiyantī’’ti.
து³தியவாரே அதோதி அப்பஜஹனகேஸு நிஸ்ஸக்கங், யே நப்பஜஹந்தி, தேஹி, யே பஜஹந்தீதி வுச்சியந்தி, தேவ தனுதரா அப்பதராதி அத்தோ². தஞ்சேவ தி³ட்டி²ங் பஜஹந்தி, அஞ்ஞஞ்ச தி³ட்டி²ங் ந உபாதி³யந்தீதி தஞ்ச மூலத³ஸ்ஸனங் பஜஹந்தி, அஞ்ஞஞ்ச த³ஸ்ஸனங் ந க³ண்ஹந்தி. கத²ங்? ஏகஸ்மிஞ்ஹி ஸமயே ‘‘ரூபங் ஸஸ்ஸத’’ந்தி க³ஹெத்வா அபரஸ்மிங் ஸமயே தத்த² ஆதீ³னவங் தி³ஸ்வா ‘‘ஓளாரிகமேதங் மய்ஹங் த³ஸ்ஸன’’ந்தி பஜஹதி ‘‘ந கேவலஞ்ச ரூபங் ஸஸ்ஸதந்தி த³ஸ்ஸனமேவ ஓளாரிகங், வேத³னாபி ஸஸ்ஸதா…பே॰… விஞ்ஞாணம்பி ஸஸ்ஸதந்தி த³ஸ்ஸனங் ஓளாரிகமேவா’’தி விஸ்ஸஜ்ஜேதி . உச்சே²தே³பி ஏகச்சஸஸ்ஸதேபி ஏஸேவ நயோ. யதா² ச க²ந்தே⁴ஸு, ஏவங் ஆயதனேஸுபி யோஜேதப்³ப³ங். ஏவங் தஞ்ச மூலத³ஸ்ஸனங் பஜஹந்தி, அஞ்ஞஞ்ச த³ஸ்ஸனங் ந க³ண்ஹந்தி.
Dutiyavāre atoti appajahanakesu nissakkaṃ, ye nappajahanti, tehi, ye pajahantīti vucciyanti, teva tanutarā appatarāti attho. Tañceva diṭṭhiṃ pajahanti, aññañca diṭṭhiṃ na upādiyantīti tañca mūladassanaṃ pajahanti, aññañca dassanaṃ na gaṇhanti. Kathaṃ? Ekasmiñhi samaye ‘‘rūpaṃ sassata’’nti gahetvā aparasmiṃ samaye tattha ādīnavaṃ disvā ‘‘oḷārikametaṃ mayhaṃ dassana’’nti pajahati ‘‘na kevalañca rūpaṃ sassatanti dassanameva oḷārikaṃ, vedanāpi sassatā…pe… viññāṇampi sassatanti dassanaṃ oḷārikamevā’’ti vissajjeti . Ucchedepi ekaccasassatepi eseva nayo. Yathā ca khandhesu, evaṃ āyatanesupi yojetabbaṃ. Evaṃ tañca mūladassanaṃ pajahanti, aññañca dassanaṃ na gaṇhanti.
ஸந்தக்³கி³வெஸ்ஸனாதி கஸ்மா ஆரபி⁴? அயங் உச்சே²த³லத்³தி⁴கோ அத்தனோ லத்³தி⁴ங் நிகூ³ஹதி, தஸ்ஸா பன லத்³தி⁴யா வண்ணே வுச்சமானே அத்தனோ லத்³தி⁴ங் பாதுகரிஸ்ஸதீதி திஸ்ஸோ லத்³தி⁴யோ ஏகதோ த³ஸ்ஸெத்வா விப⁴ஜிதுங் இமங் தே³ஸனங் ஆரபி⁴.
Santaggivessanāti kasmā ārabhi? Ayaṃ ucchedaladdhiko attano laddhiṃ nigūhati, tassā pana laddhiyā vaṇṇe vuccamāne attano laddhiṃ pātukarissatīti tisso laddhiyo ekato dassetvā vibhajituṃ imaṃ desanaṃ ārabhi.
ஸாராகா³ய ஸந்திகேதிஆதீ³ஸு ராக³வஸேன வட்டே ரஜ்ஜனஸ்ஸ ஆஸன்னா தண்ஹாதி³ட்டி²ஸங்யோஜனேன வட்டஸங்யோஜனஸ்ஸ ஸந்திகே. அபி⁴னந்த³னாயாதி தண்ஹாதி³ட்டி²வஸேனேவ கி³லித்வா பரியாதி³யனஸ்ஸ க³ஹணஸ்ஸ ச ஆஸன்னாதி அத்தோ². அஸாராகா³ய ஸந்திகேதிஆதீ³ஸு வட்டே அரஜ்ஜனஸ்ஸ ஆஸன்னாதிஆதி³னா நயேன அத்தோ² வேதி³தப்³போ³.
Sārāgāya santiketiādīsu rāgavasena vaṭṭe rajjanassa āsannā taṇhādiṭṭhisaṃyojanena vaṭṭasaṃyojanassa santike. Abhinandanāyāti taṇhādiṭṭhivaseneva gilitvā pariyādiyanassa gahaṇassa ca āsannāti attho. Asārāgāya santiketiādīsu vaṭṭe arajjanassa āsannātiādinā nayena attho veditabbo.
எத்த² ச ஸஸ்ஸதத³ஸ்ஸனங் அப்பஸாவஜ்ஜங் த³ந்த⁴விராக³ங், உச்சே²த³த³ஸ்ஸனங் மஹாஸாவஜ்ஜங் கி²ப்பவிராக³ங். கத²ங்? ஸஸ்ஸதவாதீ³ ஹி இத⁴லோகங் பரலோகஞ்ச அத்தீ²தி ஜானாதி, ஸுகதது³க்கடானங் ப²லங் அத்தீ²தி ஜானாதி, குஸலங் கரோதி, அகுஸலங் கரொந்தோ பா⁴யதி, வட்டங் அஸ்ஸாதே³தி, அபி⁴னந்த³தி. பு³த்³தா⁴னங் வா பு³த்³த⁴ஸாவகானங் வா ஸம்முகீ²பூ⁴தோ ஸீக⁴ங் லத்³தி⁴ங் ஜஹிதுங் ந ஸக்கோதி. தஸ்மா தங் ஸஸ்ஸதத³ஸ்ஸனங் அப்பஸாவஜ்ஜங் த³ந்த⁴விராக³ந்தி வுச்சதி. உச்சே²த³வாதீ³ பன இத⁴லோகபரலோகங் அத்தீ²தி ஜானாதி, ஸுகதது³க்கடானங் ப²லங் அத்தீ²தி ஜானாதி, குஸலங் ந கரோதி, அகுஸலங் கரொந்தோ ந பா⁴யதி, வட்டங் ந அஸ்ஸாதே³தி, நாபி⁴னந்த³தி, பு³த்³தா⁴னங் வா பு³த்³த⁴ஸாவகானங் வா ஸம்முகீ²பா⁴வே ஸீக⁴ங் த³ஸ்ஸனங் பஜஹதி. பாரமியோ பூரேதுங் ஸக்கொந்தோ பு³த்³தோ⁴ ஹுத்வா, அஸக்கொந்தோ அபி⁴னீஹாரங் கத்வா ஸாவகோ ஹுத்வா பரினிப்³பா³யதி. தஸ்மா உச்சே²த³த³ஸ்ஸனங் மஹாஸாவஜ்ஜங் கி²ப்பவிராக³ந்தி வுச்சதி.
Ettha ca sassatadassanaṃ appasāvajjaṃ dandhavirāgaṃ, ucchedadassanaṃ mahāsāvajjaṃ khippavirāgaṃ. Kathaṃ? Sassatavādī hi idhalokaṃ paralokañca atthīti jānāti, sukatadukkaṭānaṃ phalaṃ atthīti jānāti, kusalaṃ karoti, akusalaṃ karonto bhāyati, vaṭṭaṃ assādeti, abhinandati. Buddhānaṃ vā buddhasāvakānaṃ vā sammukhībhūto sīghaṃ laddhiṃ jahituṃ na sakkoti. Tasmā taṃ sassatadassanaṃ appasāvajjaṃ dandhavirāganti vuccati. Ucchedavādī pana idhalokaparalokaṃ atthīti jānāti, sukatadukkaṭānaṃ phalaṃ atthīti jānāti, kusalaṃ na karoti, akusalaṃ karonto na bhāyati, vaṭṭaṃ na assādeti, nābhinandati, buddhānaṃ vā buddhasāvakānaṃ vā sammukhībhāve sīghaṃ dassanaṃ pajahati. Pāramiyo pūretuṃ sakkonto buddho hutvā, asakkonto abhinīhāraṃ katvā sāvako hutvā parinibbāyati. Tasmā ucchedadassanaṃ mahāsāvajjaṃ khippavirāganti vuccati.
202. ஸோ பன பரிப்³பா³ஜகோ ஏதமத்த²ங் அஸல்லக்கெ²த்வா – ‘‘மய்ஹங் த³ஸ்ஸனங் ஸங்வண்ணேதி பஸங்ஸதி, அத்³தா⁴ மே ஸுந்த³ரங் த³ஸ்ஸன’’ந்தி ஸல்லக்கெ²த்வா உக்கங்ஸேதி மே ப⁴வந்திஆதி³மாஹ.
202. So pana paribbājako etamatthaṃ asallakkhetvā – ‘‘mayhaṃ dassanaṃ saṃvaṇṇeti pasaṃsati, addhā me sundaraṃ dassana’’nti sallakkhetvā ukkaṃseti me bhavantiādimāha.
இதா³னி யஸ்மா அயங் பரிப்³பா³ஜகோ கஞ்ஜியேனேவ தித்தகாலாபு³, உச்சே²த³த³ஸ்ஸனேனேவ பூரிதோ, ஸோ யதா² கஞ்ஜியங் அப்பஹாய ந ஸக்கா லாபு³ம்ஹி தேலபா²ணிதாதீ³னி பக்கி²பிதுங், பக்கி²த்தானிபி ந க³ண்ஹாதி, ஏவமேவங் தங் லத்³தி⁴ங் அப்பஹாய அப⁴ப்³போ³ மக்³க³ப²லானங் லாபா⁴ய, தஸ்மா லத்³தி⁴ங் ஜஹாபனத்த²ங் தத்ரக்³கி³வெஸ்ஸனாதிஆதி³ ஆரத்³த⁴ங். விக்³க³ஹோதி கலஹோ. ஏவமேதாஸங் தி³ட்டீ²னங் பஹானங் ஹோதீதி ஏவங் விக்³க³ஹாதி³ஆதீ³னவங் தி³ஸ்வா தாஸங் தி³ட்டீ²னங் பஹானங் ஹோதி. ஸோ ஹி பரிப்³பா³ஜகோ ‘‘கிங் மே இமினா விக்³க³ஹாதி³னா’’தி தங் உச்சே²த³த³ஸ்ஸனங் பஜஹதி.
Idāni yasmā ayaṃ paribbājako kañjiyeneva tittakālābu, ucchedadassaneneva pūrito, so yathā kañjiyaṃ appahāya na sakkā lābumhi telaphāṇitādīni pakkhipituṃ, pakkhittānipi na gaṇhāti, evamevaṃ taṃ laddhiṃ appahāya abhabbo maggaphalānaṃ lābhāya, tasmā laddhiṃ jahāpanatthaṃ tatraggivessanātiādi āraddhaṃ. Viggahoti kalaho. Evametāsaṃ diṭṭhīnaṃ pahānaṃ hotīti evaṃ viggahādiādīnavaṃ disvā tāsaṃ diṭṭhīnaṃ pahānaṃ hoti. So hi paribbājako ‘‘kiṃ me iminā viggahādinā’’ti taṃ ucchedadassanaṃ pajahati.
205. அத²ஸ்ஸ ப⁴க³வா வமிதகஞ்ஜியே லாபு³ம்ஹி ஸப்பிபா²ணிதாதீ³னி பக்கி²பந்தோ விய ஹத³யே அமதோஸத⁴ங் பூரெஸ்ஸாமீதி விபஸ்ஸனங் ஆசிக்க²ந்தோ அயங் கோ² பன, அக்³கி³வெஸ்ஸன, காயோதிஆதி³மாஹ. தஸ்ஸத்தோ² வம்மிகஸுத்தே வுத்தோ. அனிச்சதோதிஆதீ³னிபி ஹெட்டா² வித்தா²ரிதானேவ. யோ காயஸ்மிங் காயச²ந்தோ³தி யா காயஸ்மிங் தண்ஹா. ஸ்னேஹோதி தண்ஹாஸ்னேஹோவ. காயன்வயதாதி காயானுக³மனபா⁴வோ, காயங் அனுக³ச்ச²னககிலேஸோதி அத்தோ².
205. Athassa bhagavā vamitakañjiye lābumhi sappiphāṇitādīni pakkhipanto viya hadaye amatosadhaṃ pūressāmīti vipassanaṃ ācikkhanto ayaṃ kho pana, aggivessana, kāyotiādimāha. Tassattho vammikasutte vutto. Aniccatotiādīnipi heṭṭhā vitthāritāneva. Yo kāyasmiṃ kāyachandoti yā kāyasmiṃ taṇhā. Snehoti taṇhāsnehova. Kāyanvayatāti kāyānugamanabhāvo, kāyaṃ anugacchanakakilesoti attho.
ஏவங் ரூபகம்மட்டா²னங் த³ஸ்ஸெத்வா இதா³னி அரூபகம்மட்டா²னங் த³ஸ்ஸெந்தோ திஸ்ஸோ கோ²திஆதி³மாஹ. புன தாஸங்யேவ வேத³னானங் அஸம்மிஸ்ஸபா⁴வங் த³ஸ்ஸெந்தோ யஸ்மிங், அக்³கி³வெஸ்ஸன, ஸமயேதிஆதி³மாஹ. தத்ராயங் ஸங்கே²பத்தோ² – யஸ்மிங் ஸமயே ஸுகா²தீ³ஸு ஏகங் வேத³னங் வேத³யதி, தஸ்மிங் ஸமயே அஞ்ஞா வேத³னா அத்தனோ வாரங் வா ஓகாஸங் வா ஓலோகயமானா நிஸின்னா நாம நத்தி², அத² கோ² அனுப்பன்னாவ ஹொந்தி பி⁴ன்னஉத³கபுப்பு²ளா விய ச அந்தரஹிதா வா. ஸுகா²பி கோ²திஆதி³ தாஸங் வேத³னானங் சுண்ணவிசுண்ணபா⁴வத³ஸ்ஸனத்த²ங் வுத்தங்.
Evaṃ rūpakammaṭṭhānaṃ dassetvā idāni arūpakammaṭṭhānaṃ dassento tisso khotiādimāha. Puna tāsaṃyeva vedanānaṃ asammissabhāvaṃ dassento yasmiṃ, aggivessana, samayetiādimāha. Tatrāyaṃ saṅkhepattho – yasmiṃ samaye sukhādīsu ekaṃ vedanaṃ vedayati, tasmiṃ samaye aññā vedanā attano vāraṃ vā okāsaṃ vā olokayamānā nisinnā nāma natthi, atha kho anuppannāva honti bhinnaudakapupphuḷā viya ca antarahitā vā. Sukhāpi khotiādi tāsaṃ vedanānaṃ cuṇṇavicuṇṇabhāvadassanatthaṃ vuttaṃ.
ந கேனசி ஸங்வத³தீதி தஸ்ஸதங் க³ஹெத்வா ‘‘ஸஸ்ஸதவாதீ³ அஹ’’ந்தி உச்சே²த³வாதி³னாபி ஸத்³தி⁴ங் ந ஸங்வத³தி, தமேவ க³ஹெத்வா ‘‘ஸஸ்ஸதவாதீ³ அஹ’’ந்தி ஏகச்சஸஸ்ஸதவாதி³னா ஸத்³தி⁴ங் ந விவத³தி. ஏவங் தயோபி வாதா³ பரிவத்தெத்வா யோஜேதப்³பா³. யஞ்ச லோகே வுத்தந்தி யங் லோகே கதி²தங் வோஹரிதங், தேன வோஹரதி அபராமஸந்தோ கிஞ்சி த⁴ம்மங் பராமாஸக்³கா³ஹேன அக்³க³ண்ஹந்தோ. வுத்தம்பி சேதங் –
Na kenaci saṃvadatīti tassataṃ gahetvā ‘‘sassatavādī aha’’nti ucchedavādināpi saddhiṃ na saṃvadati, tameva gahetvā ‘‘sassatavādī aha’’nti ekaccasassatavādinā saddhiṃ na vivadati. Evaṃ tayopi vādā parivattetvā yojetabbā. Yañca loke vuttanti yaṃ loke kathitaṃ voharitaṃ, tena voharati aparāmasanto kiñci dhammaṃ parāmāsaggāhena aggaṇhanto. Vuttampi cetaṃ –
‘‘யோ ஹோதி பி⁴க்கு² அரஹங் கதாவீ,
‘‘Yo hoti bhikkhu arahaṃ katāvī,
கீ²ணாஸவோ அந்திமதே³ஹதா⁴ரீ;
Khīṇāsavo antimadehadhārī;
அஹங் வதா³மீதிபி ஸோ வதெ³ய்ய,
Ahaṃ vadāmītipi so vadeyya,
மமங் வத³ந்தீதிபி ஸோ வதெ³ய்ய;
Mamaṃ vadantītipi so vadeyya;
லோகே ஸமஞ்ஞங் குஸலோ விதி³த்வா,
Loke samaññaṃ kusalo viditvā,
வோஹாரமத்தேன ஸோ வோஹரெய்யா’’தி. (ஸங்॰ நி॰ 1.25);
Vohāramattena so vohareyyā’’ti. (saṃ. ni. 1.25);
அபரம்பி வுத்தங் – ‘‘இமா கோ² சித்த லோகஸமஞ்ஞா லோகனிருத்தியோ லோகவோஹாரா லோகபஞ்ஞத்தியோ, யாஹி ததா²க³தோ வோஹரதி அபராமஸ’’ந்தி (தீ³॰ நி॰ 1.440).
Aparampi vuttaṃ – ‘‘imā kho citta lokasamaññā lokaniruttiyo lokavohārā lokapaññattiyo, yāhi tathāgato voharati aparāmasa’’nti (dī. ni. 1.440).
206. அபி⁴ஞ்ஞாபஹானமாஹாதி ஸஸ்ஸதாதீ³ஸு தேஸங் தேஸங் த⁴ம்மானங் ஸஸ்ஸதங் அபி⁴ஞ்ஞாய ஜானித்வா ஸஸ்ஸதஸ்ஸ பஹானமாஹ, உச்சே²த³ங், ஏகச்சஸஸ்ஸதங் அபி⁴ஞ்ஞாய ஏகச்சஸஸ்ஸதஸ்ஸ பஹானங் வத³தி. ரூபங் அபி⁴ஞ்ஞாய ரூபஸ்ஸ பஹானங் வத³தீதிஆதி³னா நயேனெத்த² அத்தோ² வேதி³தப்³போ³.
206.Abhiññāpahānamāhāti sassatādīsu tesaṃ tesaṃ dhammānaṃ sassataṃ abhiññāya jānitvā sassatassa pahānamāha, ucchedaṃ, ekaccasassataṃ abhiññāya ekaccasassatassa pahānaṃ vadati. Rūpaṃ abhiññāya rūpassa pahānaṃ vadatītiādinā nayenettha attho veditabbo.
படிஸஞ்சிக்க²தோதி பச்சவெக்க²ந்தஸ்ஸ. அனுபாதா³ய ஆஸவேஹி சித்தங் விமுச்சீதி அனுப்பாத³னிரோதே⁴ன நிருத்³தே⁴ஹி ஆஸவேஹி அக்³க³ஹெத்வாவ சித்தங் விமுச்சி. எத்தாவதா சேஸ பரஸ்ஸ வட்³டி⁴தங் ப⁴த்தங் பு⁴ஞ்ஜித்வா கு²த³ங் வினோதெ³ந்தோ விய பரஸ்ஸ ஆரத்³தா⁴ய த⁴ம்மதே³ஸனாய ஞாணங் பேஸெத்வா விபஸ்ஸனங் வட்³டெ⁴த்வா அரஹத்தஞ்சேவ பத்தோ, ஸாவகபாரமீஞாணஸ்ஸ ச மத்த²கங், ஸோளஸ ச பஞ்ஞா படிவிஜ்ஜி²த்வா டி²தோ. தீ³க⁴னகோ² பன ஸோதாபத்திப²லங் பத்வா ஸரணேஸு பதிட்டி²தோ.
Paṭisañcikkhatoti paccavekkhantassa. Anupādāya āsavehi cittaṃ vimuccīti anuppādanirodhena niruddhehi āsavehi aggahetvāva cittaṃ vimucci. Ettāvatā cesa parassa vaḍḍhitaṃ bhattaṃ bhuñjitvā khudaṃ vinodento viya parassa āraddhāya dhammadesanāya ñāṇaṃ pesetvā vipassanaṃ vaḍḍhetvā arahattañceva patto, sāvakapāramīñāṇassa ca matthakaṃ, soḷasa ca paññā paṭivijjhitvā ṭhito. Dīghanakho pana sotāpattiphalaṃ patvā saraṇesu patiṭṭhito.
ப⁴க³வா பன இமங் தே³ஸனங் ஸூரியே த⁴ரமானேயேவ நிட்டா²பெத்வா கி³ஜ்ஜ²கூடா ஓருய்ஹ வேளுவனங் க³ந்த்வா ஸாவகஸன்னிபாதமகாஸி, சதுரங்க³ஸமன்னாக³தோ ஸன்னிபாதோ அஹோஸி. தத்ரிமானி அங்கா³னி – மாக⁴னக்க²த்தேன யுத்தோ புண்ணமஉபோஸத²தி³வஸோ, கேனசி அனாமந்திதானி ஹுத்வா அத்தனோயேவ த⁴ம்மதாய ஸன்னிபதிதானி அட்³ட⁴தேலஸானி பி⁴க்கு²ஸதானி, தேஸு ஏகோபி புது²ஜ்ஜனோ வா ஸோதாபன்ன-ஸகதா³கா³மி-அனாகா³மி-ஸுக்க²விபஸ்ஸக-அரஹந்தேஸு வா அஞ்ஞதரோ நத்தி², ஸப்³பே³ ச²ளபி⁴ஞ்ஞாவ, ஏகோபி செத்த² ஸத்த²கேன கேஸே சி²ந்தி³த்வா பப்³ப³ஜிதோ நாம நத்தி², ஸப்³பே³ ஏஹிபி⁴க்கு²னோயேவாதி.
Bhagavā pana imaṃ desanaṃ sūriye dharamāneyeva niṭṭhāpetvā gijjhakūṭā oruyha veḷuvanaṃ gantvā sāvakasannipātamakāsi, caturaṅgasamannāgato sannipāto ahosi. Tatrimāni aṅgāni – māghanakkhattena yutto puṇṇamauposathadivaso, kenaci anāmantitāni hutvā attanoyeva dhammatāya sannipatitāni aḍḍhatelasāni bhikkhusatāni, tesu ekopi puthujjano vā sotāpanna-sakadāgāmi-anāgāmi-sukkhavipassaka-arahantesu vā aññataro natthi, sabbe chaḷabhiññāva, ekopi cettha satthakena kese chinditvā pabbajito nāma natthi, sabbe ehibhikkhunoyevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
தீ³க⁴னக²ஸுத்தவண்ணனா நிட்டி²தா.
Dīghanakhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. தீ³க⁴னக²ஸுத்தங் • 4. Dīghanakhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. தீ³க⁴னக²ஸுத்தவண்ணனா • 4. Dīghanakhasuttavaṇṇanā
