| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. ட்³தண்ஹாஸங்யோஜனஸுத்தவண்ணனா
5. Ḍtaṇhāsaṃyojanasuttavaṇṇanā
15. பஞ்சமே யஸ்ஸ விஜ்ஜதி, தங் புக்³க³லங் து³க்கே²ஹி, கம்மங் வா விபாகேஹி, ப⁴வயோனிக³திவிஞ்ஞாணட்டி²திஸத்தாவாஸே வா ப⁴வந்தராதீ³ஹி ஸங்யோஜேதீதி ஸங்யோஜனங். தண்ஹாயனட்டே²ன தண்ஹா, தஸதி ஸயங் பரிதஸதி, தஸந்தி வா ஏதாயாதி தண்ஹா. ஸஞ்ஞுத்தாதி சக்கா²தீ³ஸு அபி⁴னிவேஸவத்தூ²ஸு ப³த்³தா⁴. ஸேஸங் வுத்தனயமேவ. காமஞ்செத்த² அவிஜ்ஜாயபி ஸங்யோஜனபா⁴வோ தண்ஹாய ச நீவரணபா⁴வோ அத்தி²யேவ, ததா²பி அவிஜ்ஜாய படிச்சா²தி³தாதீ³னவேஹி ப⁴வேஹி தண்ஹா ஸத்தே ஸங்யோஜேதீதி இமஸ்ஸ விஸேஸஸ்ஸ த³ஸ்ஸனத்த²ங் புரிமஸுத்தே அவிஜ்ஜா நீவரணபா⁴வேன, இத⁴ ச தண்ஹா ஸங்யோஜனபா⁴வேனேவ வுத்தா. கிஞ்ச நீவரணஸங்யோஜனப்பதா⁴னஸ்ஸ த³ஸ்ஸனத்த²ங். யதா² ஹி நீவரணபா⁴வேன அவிஜ்ஜா ஸங்கிலேஸத⁴ம்மானங் பதா⁴னபூ⁴தா புப்³ப³ங்க³மா ச, ஏவங் ஸங்யோஜனபா⁴வேன நேஸங் தண்ஹாதி தத³தீ⁴னப்பதா⁴னபா⁴வங் த³ஸ்ஸேதுங் ஸுத்தத்³வயே ஏவமேதே த⁴ம்மா வுத்தா. அபிச விஸேஸேன அவிஜ்ஜா நிப்³பா³னஸுக²ங் நிவாரேதீதி ‘‘நீவரண’’ந்தி வுத்தா, தண்ஹா ஸங்ஸாரது³க்கே²ன ஸத்தே ஸங்யோஜேதீதி ‘‘ஸங்யோஜன’’ந்தி.
15. Pañcame yassa vijjati, taṃ puggalaṃ dukkhehi, kammaṃ vā vipākehi, bhavayonigativiññāṇaṭṭhitisattāvāse vā bhavantarādīhi saṃyojetīti saṃyojanaṃ. Taṇhāyanaṭṭhena taṇhā, tasati sayaṃ paritasati, tasanti vā etāyāti taṇhā. Saññuttāti cakkhādīsu abhinivesavatthūsu baddhā. Sesaṃ vuttanayameva. Kāmañcettha avijjāyapi saṃyojanabhāvo taṇhāya ca nīvaraṇabhāvo atthiyeva, tathāpi avijjāya paṭicchāditādīnavehi bhavehi taṇhā satte saṃyojetīti imassa visesassa dassanatthaṃ purimasutte avijjā nīvaraṇabhāvena, idha ca taṇhā saṃyojanabhāveneva vuttā. Kiñca nīvaraṇasaṃyojanappadhānassa dassanatthaṃ. Yathā hi nīvaraṇabhāvena avijjā saṃkilesadhammānaṃ padhānabhūtā pubbaṅgamā ca, evaṃ saṃyojanabhāvena nesaṃ taṇhāti tadadhīnappadhānabhāvaṃ dassetuṃ suttadvaye evamete dhammā vuttā. Apica visesena avijjā nibbānasukhaṃ nivāretīti ‘‘nīvaraṇa’’nti vuttā, taṇhā saṃsāradukkhena satte saṃyojetīti ‘‘saṃyojana’’nti.
த³ஸ்ஸனக³மனந்தராயகரணதோ வா விஜ்ஜாசரணவிபக்க²தோ த்³வயங் த்³விதா⁴ வுத்தங். விஜ்ஜாய ஹி உஜுவிபச்சனீகபூ⁴தா அவிஜ்ஜா நிப்³பா³னத³ஸ்ஸனஸ்ஸ அவிபரீதத³ஸ்ஸனஸ்ஸ ச விஸேஸதோ அந்தராயகரா, சரணத⁴ம்மானங் உஜுவிபச்சனீகபூ⁴தா தண்ஹா க³மனஸ்ஸ ஸம்மாபடிபத்தியா அந்தராயகராதி; ஏவமயங் அவிஜ்ஜாய நிவுதோ அந்தீ⁴கதோ தண்ஹாய ஸங்வுதோ ப³த்³தோ⁴ அஸ்ஸுதவா புது²ஜ்ஜனோ அந்தோ⁴ விய ப³த்³தோ⁴ மஹாகந்தாரங், ஸங்ஸாரகந்தாரங் நாதிவத்ததி. அனத்து²ப்பத்திஹேதுத்³வயத³ஸ்ஸனத்த²ம்பி த்³வயங் த்³விதா⁴ வுத்தங். அவிஜ்ஜாக³தோ ஹி புக்³க³லோ பா³லபா⁴வேன அத்த²ங் பரிஹாபேதி, அனத்த²ஞ்ச அத்தனோ கரோதி, அகுஸலோ விய ஆதுரோ அஸப்பாயகிரியாய. ஜானந்தோபி பா³லோ பா³லபா⁴வேன அத்த²ங் பரிஹாபேதி, அனத்த²ஞ்ச கரோதி ஜானந்தோ விய ரோகீ³ அஸப்பாயஸேவீ. மக்கடாலேபோபமஸுத்தங் சேதஸ்ஸ அத்த²ஸ்ஸ ஸாத⁴கங்.
Dassanagamanantarāyakaraṇato vā vijjācaraṇavipakkhato dvayaṃ dvidhā vuttaṃ. Vijjāya hi ujuvipaccanīkabhūtā avijjā nibbānadassanassa aviparītadassanassa ca visesato antarāyakarā, caraṇadhammānaṃ ujuvipaccanīkabhūtā taṇhā gamanassa sammāpaṭipattiyā antarāyakarāti; evamayaṃ avijjāya nivuto andhīkato taṇhāya saṃvuto baddho assutavā puthujjano andho viya baddho mahākantāraṃ, saṃsārakantāraṃ nātivattati. Anatthuppattihetudvayadassanatthampi dvayaṃ dvidhā vuttaṃ. Avijjāgato hi puggalo bālabhāvena atthaṃ parihāpeti, anatthañca attano karoti, akusalo viya āturo asappāyakiriyāya. Jānantopi bālo bālabhāvena atthaṃ parihāpeti, anatthañca karoti jānanto viya rogī asappāyasevī. Makkaṭālepopamasuttaṃ cetassa atthassa sādhakaṃ.
படிச்சஸமுப்பாத³ஸ்ஸ மூலகாரணத³ஸ்ஸனத்த²ம்பெத்த² த்³வயங் த்³விதா⁴ வுத்தங். விஸேஸேன ஹி ஸம்மோஹஸ்ஸ ப³லவபா⁴வதோ அவிஜ்ஜாகெ²த்தங் அதீதோ அத்³தா⁴, பத்த²னாய ப³லவபா⁴வதோ தண்ஹாகெ²த்தங் அனாக³தோ அத்³தா⁴. ததா² ஹி பா³லஜனோ ஸம்மோஹப³ஹுலோ அதீதமனுஸோசதி, தஸ்ஸ அவிஜ்ஜாபச்சயா ஸங்கா²ராதி ஸப்³ப³ங் நேதப்³ப³ங். பத்த²னாப³ஹுலோ அனாக³தங் பஜப்பதி, தஸ்ஸ தண்ஹாபச்சயா உபாதா³னந்திஆதி³ ஸப்³ப³ங் நேதப்³ப³ங். தேனேவ தாஸங் புப்³ப³ந்தாஹரணேன அபரந்தபடிஸந்தா⁴னேன சஸ்ஸ யதா²க்கமங் மூலகாரணதா த³ஸ்ஸிதாதி வேதி³தப்³ப³ந்தி.
Paṭiccasamuppādassa mūlakāraṇadassanatthampettha dvayaṃ dvidhā vuttaṃ. Visesena hi sammohassa balavabhāvato avijjākhettaṃ atīto addhā, patthanāya balavabhāvato taṇhākhettaṃ anāgato addhā. Tathā hi bālajano sammohabahulo atītamanusocati, tassa avijjāpaccayā saṅkhārāti sabbaṃ netabbaṃ. Patthanābahulo anāgataṃ pajappati, tassa taṇhāpaccayā upādānantiādi sabbaṃ netabbaṃ. Teneva tāsaṃ pubbantāharaṇena aparantapaṭisandhānena cassa yathākkamaṃ mūlakāraṇatā dassitāti veditabbanti.
கா³தா²ஸு தண்ஹாது³தியோதி தண்ஹாஸஹாயோ. தண்ஹா ஹி நிருத³ககந்தாரே மரீசிகாய உத³கஸஞ்ஞா விய பிபாஸாபி⁴பூ⁴தங் அப்படிகாரது³க்கா²பி⁴பூ⁴தம்பி ஸத்தங் அஸ்ஸாத³ஸந்த³ஸ்ஸனவஸேன ஸஹாயகிச்சங் கரொந்தீ ப⁴வாதீ³ஸு அனிப்³பி³ந்த³ங் கத்வா பரிப்³ப⁴மாபேதி, தஸ்மா தண்ஹா புரிஸஸ்ஸ ‘‘து³தியா’’தி வுத்தா. நனு ச அஞ்ஞேபி கிலேஸாத³யோ ப⁴வாபி⁴னிப்³ப³த்தியா பச்சயாவ? ஸச்சமேதங், ந பன ததா² விஸேஸப்பச்சயோ யதா² தண்ஹா. ததா² ஹி ஸா குஸலேஹி வினா அகுஸலேஹி, காமாவசராதி³குஸலேஹி ச வினா ரூபாவசராதி³குஸலேஹி ப⁴வனிப்³ப³த்தியா விஸேஸப்பச்சயோ, யதோ ஸமுத³யஸச்சந்தி வுச்சதீதி. இத்த²பா⁴வஞ்ஞதா²பா⁴வந்தி இத்த²பா⁴வோ ச அஞ்ஞதா²பா⁴வோ ச இத்த²பா⁴வஞ்ஞதா²பா⁴வோ. ஸோ ஏதஸ்ஸ அத்தீ²தி இத்த²பா⁴வஞ்ஞதா²பா⁴வோ ஸங்ஸாரோ, தங் தத்த² இத்த²பா⁴வோ மனுஸ்ஸத்தங், அஞ்ஞதா²பா⁴வோ ததோ அவஸிட்ட²ஸத்தாவாஸா. இத்த²பா⁴வோ வா தேஸங் தேஸங் ஸத்தானங் பச்சுப்பன்னோ அத்தபா⁴வோ, அஞ்ஞதா²பா⁴வோ அனாக³தத்தபா⁴வோ. ஏவரூபோ வா அஞ்ஞோபி அத்தபா⁴வோ இத்த²பா⁴வோ, ந ஏவரூபோ அஞ்ஞதா²பா⁴வோ. தங் இத்த²பா⁴வஞ்ஞதா²பா⁴வங் ஸங்ஸாரங் க²ந்த⁴தா⁴துஆயதனபடிபாடிங் நாதிவத்ததி, ந அதிக்கமதி.
Gāthāsu taṇhādutiyoti taṇhāsahāyo. Taṇhā hi nirudakakantāre marīcikāya udakasaññā viya pipāsābhibhūtaṃ appaṭikāradukkhābhibhūtampi sattaṃ assādasandassanavasena sahāyakiccaṃ karontī bhavādīsu anibbindaṃ katvā paribbhamāpeti, tasmā taṇhā purisassa ‘‘dutiyā’’ti vuttā. Nanu ca aññepi kilesādayo bhavābhinibbattiyā paccayāva? Saccametaṃ, na pana tathā visesappaccayo yathā taṇhā. Tathā hi sā kusalehi vinā akusalehi, kāmāvacarādikusalehi ca vinā rūpāvacarādikusalehi bhavanibbattiyā visesappaccayo, yato samudayasaccanti vuccatīti. Itthabhāvaññathābhāvanti itthabhāvo ca aññathābhāvo ca itthabhāvaññathābhāvo. So etassa atthīti itthabhāvaññathābhāvo saṃsāro, taṃ tattha itthabhāvo manussattaṃ, aññathābhāvo tato avasiṭṭhasattāvāsā. Itthabhāvo vā tesaṃ tesaṃ sattānaṃ paccuppanno attabhāvo, aññathābhāvo anāgatattabhāvo. Evarūpo vā aññopi attabhāvo itthabhāvo, na evarūpo aññathābhāvo. Taṃ itthabhāvaññathābhāvaṃ saṃsāraṃ khandhadhātuāyatanapaṭipāṭiṃ nātivattati, na atikkamati.
ஏதமாதீ³னவங் ஞத்வா, தண்ஹங் து³க்க²ஸ்ஸ ஸம்ப⁴வந்தி ஏதங் ஸகலவட்டது³க்க²ஸ்ஸ ஸம்ப⁴வங் ஸமுத³யங் தண்ஹங் ஆதீ³னவங் ஆதீ³னவதோ ஞத்வாதி அத்தோ². அத² வா ஏதமாதீ³னவங் ஞத்வாதி ஏதங் யதா²வுத்தங் ஸங்ஸாரனாதிவத்தனங் ஆதீ³னவங் தோ³ஸங் ஞத்வா. தண்ஹங் து³க்க²ஸ்ஸ ஸம்ப⁴வந்தி தண்ஹஞ்ச வுத்தனயேன வட்டது³க்க²ஸ்ஸ பதா⁴னகாரணந்தி ஞத்வா. வீததண்ஹோ அனாதா³னோ, ஸதோ பி⁴க்கு², பரிப்³ப³ஜேதி ஏவங் தீஹி பரிஞ்ஞாஹி பரிஜானந்தோ விபஸ்ஸனங் வட்³டெ⁴த்வா மக்³க³படிபாடியா தண்ஹங் விக³மெந்தோ அக்³க³மக்³கே³ன ஸப்³ப³ஸோ வீததண்ஹோ விக³ததண்ஹோ, ததோ ஏவ சதூஸு உபாதா³னேஸு கஸ்ஸசிபி அபா⁴வேன ஆயதிங் படிஸந்தி⁴ஸங்கா²தஸ்ஸ வா ஆதா³னஸ்ஸ அபா⁴வேன அனாதா³னோ, ஸதிவேபுல்லப்பத்தியா ஸப்³ப³த்த² ஸதோகாரிதாய ஸதோ பி⁴ன்னகிலேஸோ பி⁴க்கு² பரிப்³ப³ஜே சரெய்ய, க²ந்த⁴பரினிப்³பா³னேன வா ஸங்கா²ரப்பவத்திதோ அபக³ச்செ²ய்யாதி அத்தோ².
Etamādīnavaṃ ñatvā, taṇhaṃ dukkhassa sambhavanti etaṃ sakalavaṭṭadukkhassa sambhavaṃ samudayaṃ taṇhaṃ ādīnavaṃ ādīnavato ñatvāti attho. Atha vā etamādīnavaṃ ñatvāti etaṃ yathāvuttaṃ saṃsāranātivattanaṃ ādīnavaṃ dosaṃ ñatvā. Taṇhaṃ dukkhassa sambhavanti taṇhañca vuttanayena vaṭṭadukkhassa padhānakāraṇanti ñatvā. Vītataṇho anādāno, sato bhikkhu, paribbajeti evaṃ tīhi pariññāhi parijānanto vipassanaṃ vaḍḍhetvā maggapaṭipāṭiyā taṇhaṃ vigamento aggamaggena sabbaso vītataṇho vigatataṇho, tato eva catūsu upādānesu kassacipi abhāvena āyatiṃ paṭisandhisaṅkhātassa vā ādānassa abhāvena anādāno, sativepullappattiyā sabbattha satokāritāya sato bhinnakileso bhikkhu paribbaje careyya, khandhaparinibbānena vā saṅkhārappavattito apagaccheyyāti attho.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. தண்ஹாஸங்யோஜனஸுத்தங் • 5. Taṇhāsaṃyojanasuttaṃ
