| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. து³ப்³ப³ண்ணியஸுத்தவண்ணனா
3. Dubbaṇṇiyasuttavaṇṇanā
268. து³ப்³ப³ண்ணோ து³த்³த³ஸிகோ விரூபவண்ணோ. ஓகோடிமகோதி ரஸ்ஸபா⁴வேன அவரகோடிமகோ. ஸக்கேன க³ஹிதனாமமேவேதங், ந பன ஸோ ததா²ரூபோ கோசி யக்கோ². தேனாஹ ‘‘ஏகோ ரூபாவசரப்³ரஹ்மா’’தி. யதி³ ஏவங் கஸ்மா ஸோ ததா²ரூபோ ஹுத்வா ஆக³தோதி ஆஹ ‘‘ஸக்கோ கிரா’’தி. கத²ங் பனெத்த² ஞாயதி ‘‘ஸோ ஏகோ ரூபாவசரப்³ரஹ்மா, ந பனேஸோ அவருத்³த⁴கயக்கோ²’’தி யுத்திங் த³ஸ்ஸெந்தோ ‘‘அவருத்³த⁴கயக்கா² பனா’’திஆதி³மாஹ. தே³வானங் வசனங் ஸுத்வா. ப²ருஸேனாதி ப²ருஸஸமாசாரேன. ‘‘கோ நாம மய்ஹங் ஆஸனே ஸன்னிஸின்னோ’’தி அக்க²ந்திங் அனுப்பாதெ³ந்தோ க²ந்தியங் ட²த்வா. ப³லவசித்தீகாரந்தி க³ருதரங் ஸக்காரப³ஹுமானங். நீசவுத்தியாதி பரமனிபச்சகாரே ஸுவூபஸமனே ச த³ஸ்ஸியமானே. ஸக்கஸ்ஸ தாய ஏவ ஆசாரஸம்பத்தியா ஸக்காஸனே டா²துங், அத்தனோ ச ஆவிகாதுங் அஸக்கொந்தோ அந்தரதா⁴யி. உபஹதசித்தொம்ஹீதி க²ந்திமெத்தானுத்³த³யாஸப்³பா⁴வதோ பரஸ்மிங் உபஹதசித்தொம்ஹீதி ஸக்கோ அத்தனோ ஸபா⁴வங் வத³தி. கோத⁴வஸே வத்தேதுந்தி கோதே⁴ன அத்தனோ வஸே நிப்³ப³த்தேதுங் ந ஸுகரொம்ஹி, அத² கோ² கோத⁴ங் மய்ஹங் வஸே ந வத்தேமீதி அதி⁴ப்பாயோ. சிரங் ந குஜ்ஜா²மீதி யதி³ மே கதா³சி கோதோ⁴ உப்பஜ்ஜெய்ய, தங் கோத⁴ங் அனுவத்தெந்தோ சிரகாலங் ந குஜ்ஜா²மி . ந உபனய்ஹாமீதி அந்தோ ஸசே மே கோதோ⁴ உப்பஜ்ஜெய்ய, கி²ப்பமேவ ச நங் படிவினெய்யந்தி தங் மே புப்³பே³வ வதங் பரிபூரிதங்.
268.Dubbaṇṇo duddasiko virūpavaṇṇo. Okoṭimakoti rassabhāvena avarakoṭimako. Sakkena gahitanāmamevetaṃ, na pana so tathārūpo koci yakkho. Tenāha ‘‘eko rūpāvacarabrahmā’’ti. Yadi evaṃ kasmā so tathārūpo hutvā āgatoti āha ‘‘sakko kirā’’ti. Kathaṃ panettha ñāyati ‘‘so eko rūpāvacarabrahmā, na paneso avaruddhakayakkho’’ti yuttiṃ dassento ‘‘avaruddhakayakkhā panā’’tiādimāha. Devānaṃ vacanaṃ sutvā. Pharusenāti pharusasamācārena. ‘‘Ko nāma mayhaṃ āsane sannisinno’’ti akkhantiṃ anuppādento khantiyaṃ ṭhatvā. Balavacittīkāranti garutaraṃ sakkārabahumānaṃ. Nīcavuttiyāti paramanipaccakāre suvūpasamane ca dassiyamāne. Sakkassa tāya eva ācārasampattiyā sakkāsane ṭhātuṃ, attano ca āvikātuṃ asakkonto antaradhāyi. Upahatacittomhīti khantimettānuddayāsabbhāvato parasmiṃ upahatacittomhīti sakko attano sabhāvaṃ vadati. Kodhavase vattetunti kodhena attano vase nibbattetuṃ na sukaromhi, atha kho kodhaṃ mayhaṃ vase na vattemīti adhippāyo. Ciraṃ na kujjhāmīti yadi me kadāci kodho uppajjeyya, taṃ kodhaṃ anuvattento cirakālaṃ na kujjhāmi . Na upanayhāmīti anto sace me kodho uppajjeyya, khippameva ca naṃ paṭivineyyanti taṃ me pubbeva vataṃ paripūritaṃ.
து³ப்³ப³ண்ணியஸுத்தவண்ணனா நிட்டி²தா.
Dubbaṇṇiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. து³ப்³ப³ண்ணியஸுத்தங் • 2. Dubbaṇṇiyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. து³ப்³ப³ண்ணியஸுத்தவண்ணனா • 2. Dubbaṇṇiyasuttavaṇṇanā
