| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. દુબ્બણ્ણિયસુત્તવણ્ણના
3. Dubbaṇṇiyasuttavaṇṇanā
૨૬૮. દુબ્બણ્ણો દુદ્દસિકો વિરૂપવણ્ણો. ઓકોટિમકોતિ રસ્સભાવેન અવરકોટિમકો. સક્કેન ગહિતનામમેવેતં, ન પન સો તથારૂપો કોચિ યક્ખો. તેનાહ ‘‘એકો રૂપાવચરબ્રહ્મા’’તિ. યદિ એવં કસ્મા સો તથારૂપો હુત્વા આગતોતિ આહ ‘‘સક્કો કિરા’’તિ. કથં પનેત્થ ઞાયતિ ‘‘સો એકો રૂપાવચરબ્રહ્મા, ન પનેસો અવરુદ્ધકયક્ખો’’તિ યુત્તિં દસ્સેન્તો ‘‘અવરુદ્ધકયક્ખા પના’’તિઆદિમાહ. દેવાનં વચનં સુત્વા. ફરુસેનાતિ ફરુસસમાચારેન. ‘‘કો નામ મય્હં આસને સન્નિસિન્નો’’તિ અક્ખન્તિં અનુપ્પાદેન્તો ખન્તિયં ઠત્વા. બલવચિત્તીકારન્તિ ગરુતરં સક્કારબહુમાનં. નીચવુત્તિયાતિ પરમનિપચ્ચકારે સુવૂપસમને ચ દસ્સિયમાને. સક્કસ્સ તાય એવ આચારસમ્પત્તિયા સક્કાસને ઠાતું, અત્તનો ચ આવિકાતું અસક્કોન્તો અન્તરધાયિ. ઉપહતચિત્તોમ્હીતિ ખન્તિમેત્તાનુદ્દયાસબ્ભાવતો પરસ્મિં ઉપહતચિત્તોમ્હીતિ સક્કો અત્તનો સભાવં વદતિ. કોધવસે વત્તેતુન્તિ કોધેન અત્તનો વસે નિબ્બત્તેતું ન સુકરોમ્હિ, અથ ખો કોધં મય્હં વસે ન વત્તેમીતિ અધિપ્પાયો. ચિરં ન કુજ્ઝામીતિ યદિ મે કદાચિ કોધો ઉપ્પજ્જેય્ય, તં કોધં અનુવત્તેન્તો ચિરકાલં ન કુજ્ઝામિ . ન ઉપનય્હામીતિ અન્તો સચે મે કોધો ઉપ્પજ્જેય્ય, ખિપ્પમેવ ચ નં પટિવિનેય્યન્તિ તં મે પુબ્બેવ વતં પરિપૂરિતં.
268.Dubbaṇṇo duddasiko virūpavaṇṇo. Okoṭimakoti rassabhāvena avarakoṭimako. Sakkena gahitanāmamevetaṃ, na pana so tathārūpo koci yakkho. Tenāha ‘‘eko rūpāvacarabrahmā’’ti. Yadi evaṃ kasmā so tathārūpo hutvā āgatoti āha ‘‘sakko kirā’’ti. Kathaṃ panettha ñāyati ‘‘so eko rūpāvacarabrahmā, na paneso avaruddhakayakkho’’ti yuttiṃ dassento ‘‘avaruddhakayakkhā panā’’tiādimāha. Devānaṃ vacanaṃ sutvā. Pharusenāti pharusasamācārena. ‘‘Ko nāma mayhaṃ āsane sannisinno’’ti akkhantiṃ anuppādento khantiyaṃ ṭhatvā. Balavacittīkāranti garutaraṃ sakkārabahumānaṃ. Nīcavuttiyāti paramanipaccakāre suvūpasamane ca dassiyamāne. Sakkassa tāya eva ācārasampattiyā sakkāsane ṭhātuṃ, attano ca āvikātuṃ asakkonto antaradhāyi. Upahatacittomhīti khantimettānuddayāsabbhāvato parasmiṃ upahatacittomhīti sakko attano sabhāvaṃ vadati. Kodhavase vattetunti kodhena attano vase nibbattetuṃ na sukaromhi, atha kho kodhaṃ mayhaṃ vase na vattemīti adhippāyo. Ciraṃ na kujjhāmīti yadi me kadāci kodho uppajjeyya, taṃ kodhaṃ anuvattento cirakālaṃ na kujjhāmi . Na upanayhāmīti anto sace me kodho uppajjeyya, khippameva ca naṃ paṭivineyyanti taṃ me pubbeva vataṃ paripūritaṃ.
દુબ્બણ્ણિયસુત્તવણ્ણના નિટ્ઠિતા.
Dubbaṇṇiyasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૨. દુબ્બણ્ણિયસુત્તં • 2. Dubbaṇṇiyasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨. દુબ્બણ્ણિયસુત્તવણ્ણના • 2. Dubbaṇṇiyasuttavaṇṇanā
