| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. து³க்க²த⁴ம்மஸுத்தவண்ணனா
7. Dukkhadhammasuttavaṇṇanā
244. து³க்க²த⁴ம்மானந்தி து³க்க²காரணானங். தேனாஹ ‘‘து³க்க²ஸம்ப⁴வத⁴ம்மான’’ந்திஆதி³. தத்த² கிங் து³க்க²ங், கா து³க்க²த⁴ம்மாதி தது³ப⁴யங் த³ஸ்ஸேதுங் ‘‘பஞ்சஸு ஹீ’’தி வுத்தங். தேதி பஞ்சக்க²ந்தா⁴. து³க்க²ஸம்ப⁴வத⁴ம்மத்தாதி து³க்கு²ப்பத்திகாரணத்தா. அஸ்ஸாதி தேன. கரணே ஹேதங் ஸாமிவசனங். காமேதி வத்து²காமே கிலேஸகாமே ச. புன அஸ்ஸாதி ஸாமிஅத்தே² ஏவ ஸாமிவசனங். சாரந்தி சித்தாசாரங். விஹாரந்தி பஞ்சத்³வாரப்பவத்திசாரவிஹாரங். ‘‘ஏகட்டா²’’தி ச வத³ந்தி. தேனேவ ஹி ‘‘அனுப³ந்தி⁴த்வா சரந்தங்’’இச்சேவ வுத்தங். அனுப³ந்தி⁴த்வாதி ச வீதி²சித்தப்பவத்திதோ பட்டா²ய யாவ ததியஜவனவாரா அனு அனு ப³ந்தி⁴த்வா. பக்க²ந்த³னாதீ³தி ஆதி³-ஸத்³தே³ன கஸிகோ³ரக்கா²தி³வஸேனபி காமானங் பரியேஸனது³க்க²ங் ஸங்க³ண்ஹாதி.
244.Dukkhadhammānanti dukkhakāraṇānaṃ. Tenāha ‘‘dukkhasambhavadhammāna’’ntiādi. Tattha kiṃ dukkhaṃ, kā dukkhadhammāti tadubhayaṃ dassetuṃ ‘‘pañcasu hī’’ti vuttaṃ. Teti pañcakkhandhā. Dukkhasambhavadhammattāti dukkhuppattikāraṇattā. Assāti tena. Karaṇe hetaṃ sāmivacanaṃ. Kāmeti vatthukāme kilesakāme ca. Puna assāti sāmiatthe eva sāmivacanaṃ. Cāranti cittācāraṃ. Vihāranti pañcadvārappavatticāravihāraṃ. ‘‘Ekaṭṭhā’’ti ca vadanti. Teneva hi ‘‘anubandhitvā carantaṃ’’icceva vuttaṃ. Anubandhitvāti ca vīthicittappavattito paṭṭhāya yāva tatiyajavanavārā anu anu bandhitvā. Pakkhandanādīti ādi-saddena kasigorakkhādivasenapi kāmānaṃ pariyesanadukkhaṃ saṅgaṇhāti.
தா³யதீதி தா³யோ, வனங். தேனாஹ ‘‘அடவி’’ந்தி. கண்டகக³ப்³ப⁴ந்தி ஓவரகஸதி³ஸங் வனங். நாமபத³ங் நாம கிரியாபதா³பெக்க²ந்தி ‘‘விஜ்ஜீ²’’தி வசனஸேஸேன கிரியாபத³ங் க³ண்ஹாதி.
Dāyatīti dāyo, vanaṃ. Tenāha ‘‘aṭavi’’nti. Kaṇṭakagabbhanti ovarakasadisaṃ vanaṃ. Nāmapadaṃ nāma kiriyāpadāpekkhanti ‘‘vijjhī’’ti vacanasesena kiriyāpadaṃ gaṇhāti.
த³ந்தா⁴யிதத்தங் உப்பன்னகிலேஸானங் அவட்டா²னங். தேனாஹ ‘‘உப்பன்னமத்தாயா’’திஆதி³. தாயாதி ஸதியா. காசி கிலேஸாதி சுத்³த³ஸவிதே⁴ சித்தஸ்ஸ கிச்சே ஜவனகிச்சே ஏவ சித்தகிலேஸானங் உப்பத்திங் கத்வா ததா² வுத்தங். நிக்³க³ஹிதாவ ஹொந்தி பவத்திதுங் அப்பதா³னவஸேன. தேனாஹ ‘‘ந ஸண்டா²துங் ஸக்கொந்தீ’’தி. சக்கு²த்³வாரஸ்மிந்தி பாளியங் தஸ்ஸ பட²மங் க³ஹிததாய வுத்தங், தேன நயேன ஸேஸத்³வாரானிபி க³ஹிதானேவ ஹொந்தி. ராகா³தீ³ஸு உப்பன்னேஸு பட²மஜவனவாரே. ஸதிஸம்மோஸேன ‘‘கிலேஸா மே உப்பன்னா’’தி ஞத்வா ததா² பச்சாமாஸஸதியா லப்³ப⁴னதோ. தேனாஹ – ‘‘அனச்ச²ரியங் சேத’’ந்தி. ஆவட்டெத்வாதி அயோனிஸோ ஆவட்டெத்வா. ஆவஜ்ஜனாதீ³ஸூதி ததோ ஏவ அயோனிஸோ ஆவஜ்ஜனாதீ³ஸு உப்பன்னேஸு இட்டா²ரம்மணஸ்ஸ லத்³த⁴த்தா பச்சயஸித்³தி⁴யா ஸம்பத்தங் பவத்தனாரஹங். நிவத்தெத்வாதி து³தியஜவனவாரேபி கிலேஸுப்பத்திங் நிவத்தெத்வா. கத²ங் பனஸ்ஸ ஏவங் லத்³து⁴ங் ஸக்காதி ஆஹ ‘‘ஆரத்³த⁴விபஸ்ஸகானங் ஹீ’’திஆதி³. பா⁴வனாபடிஸங்கா²னேதி பா⁴வனாயங் படிஸங்கா²னே ச யோகி³னோ பதிட்டி²தபா⁴வோ. தஸ்ஸ அயமானிஸங்ஸோ – யங் பச்சயலாபே⁴ன உப்பஜ்ஜிதுங் லத்³தோ⁴காஸாபி கிலேஸா புப்³பே³ பவத்தபா⁴வனானுபா⁴வேன விக்க²ம்பி⁴தா ததா² ததா² நிக்³க³ஹிதா ஏவ ஹுத்வா நிவத்தந்தி, குஸலா த⁴ம்மாவ லத்³தோ⁴காஸா உபரூபரி வட்³ட⁴ந்தி.
Dandhāyitattaṃ uppannakilesānaṃ avaṭṭhānaṃ. Tenāha ‘‘uppannamattāyā’’tiādi. Tāyāti satiyā. Kāci kilesāti cuddasavidhe cittassa kicce javanakicce eva cittakilesānaṃ uppattiṃ katvā tathā vuttaṃ. Niggahitāva honti pavattituṃ appadānavasena. Tenāha ‘‘na saṇṭhātuṃ sakkontī’’ti. Cakkhudvārasminti pāḷiyaṃ tassa paṭhamaṃ gahitatāya vuttaṃ, tena nayena sesadvārānipi gahitāneva honti. Rāgādīsu uppannesu paṭhamajavanavāre. Satisammosena ‘‘kilesā me uppannā’’ti ñatvā tathā paccāmāsasatiyā labbhanato. Tenāha – ‘‘anacchariyaṃ ceta’’nti. Āvaṭṭetvāti ayoniso āvaṭṭetvā. Āvajjanādīsūti tato eva ayoniso āvajjanādīsu uppannesu iṭṭhārammaṇassa laddhattā paccayasiddhiyā sampattaṃ pavattanārahaṃ. Nivattetvāti dutiyajavanavārepi kilesuppattiṃ nivattetvā. Kathaṃ panassa evaṃ laddhuṃ sakkāti āha ‘‘āraddhavipassakānaṃ hī’’tiādi. Bhāvanāpaṭisaṅkhāneti bhāvanāyaṃ paṭisaṅkhāne ca yogino patiṭṭhitabhāvo. Tassa ayamānisaṃso – yaṃ paccayalābhena uppajjituṃ laddhokāsāpi kilesā pubbe pavattabhāvanānubhāvena vikkhambhitā tathā tathā niggahitā eva hutvā nivattanti, kusalā dhammāva laddhokāsā uparūpari vaḍḍhanti.
அபி⁴ஹட்டு²ந்தி அபி⁴ஹரித்வா. அனுத³ஹந்தீதி அனுத³ஹந்தா விய ஹொந்தி. அனுஸெந்தீதி எத்தா²பி ஏஸேவ நயோ. அனாவட்டந்தேதி அனிவத்தந்தே ஸாமஞ்ஞதோதி அதி⁴ப்பாயோ. விபஸ்ஸனாப³லமேவ தீ³பிதங் மக்³க³ப²லாதி⁴க³மஸ்ஸ அஜோதிதத்தா.
Abhihaṭṭhunti abhiharitvā. Anudahantīti anudahantā viya honti. Anusentīti etthāpi eseva nayo. Anāvaṭṭanteti anivattante sāmaññatoti adhippāyo. Vipassanābalameva dīpitaṃ maggaphalādhigamassa ajotitattā.
து³க்க²த⁴ம்மஸுத்தவண்ணனா நிட்டி²தா.
Dukkhadhammasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. து³க்க²த⁴ம்மஸுத்தங் • 7. Dukkhadhammasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. து³க்க²த⁴ம்மஸுத்தவண்ணனா • 7. Dukkhadhammasuttavaṇṇanā
