| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. அரஹத்தவக்³கோ³
8. Arahattavaggo
1. து³க்க²ஸுத்தங்
1. Dukkhasuttaṃ
75. ‘‘ச²ஹி , பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ங் விஹரதி ஸவிகா⁴தங் ஸஉபாயாஸங் ஸபரிளாஹங், காயஸ்ஸ பே⁴தா³ பரங் மரணா து³க்³க³தி பாடிகங்கா². கதமேஹி ச²ஹி? காமவிதக்கேன, ப்³யாபாத³விதக்கேன, விஹிங்ஸாவிதக்கேன, காமஸஞ்ஞாய, ப்³யாபாத³ஸஞ்ஞாய, விஹிங்ஸாஸஞ்ஞாய – இமேஹி, கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ங் விஹரதி ஸவிகா⁴தங் ஸஉபாயாஸங் ஸபரிளாஹங், காயஸ்ஸ பே⁴தா³ பரங் மரணா து³க்³க³தி பாடிகங்கா².
75. ‘‘Chahi , bhikkhave, dhammehi samannāgato bhikkhu diṭṭheva dhamme dukkhaṃ viharati savighātaṃ saupāyāsaṃ sapariḷāhaṃ, kāyassa bhedā paraṃ maraṇā duggati pāṭikaṅkhā. Katamehi chahi? Kāmavitakkena, byāpādavitakkena, vihiṃsāvitakkena, kāmasaññāya, byāpādasaññāya, vihiṃsāsaññāya – imehi, kho, bhikkhave, chahi dhammehi samannāgato bhikkhu diṭṭheva dhamme dukkhaṃ viharati savighātaṃ saupāyāsaṃ sapariḷāhaṃ, kāyassa bhedā paraṃ maraṇā duggati pāṭikaṅkhā.
‘‘ச²ஹி , பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ங் விஹரதி அவிகா⁴தங் அனுபாயாஸங் அபரிளாஹங், காயஸ்ஸ பே⁴தா³ பரங் மரணா ஸுக³தி பாடிகங்கா². கதமேஹி ச²ஹி? நெக்க²ம்மவிதக்கேன, அப்³யாபாத³விதக்கேன, அவிஹிங்ஸாவிதக்கேன, நெக்க²ம்மஸஞ்ஞாய, அப்³யாபாத³ஸஞ்ஞாய, அவிஹிங்ஸாஸஞ்ஞாய – இமேஹி, கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ங் விஹரதி அவிகா⁴தங் அனுபாயாஸங் அபரிளாஹங், காயஸ்ஸ பே⁴தா³ பரங் மரணா ஸுக³தி பாடிகங்கா²’’தி. பட²மங்.
‘‘Chahi , bhikkhave, dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ, kāyassa bhedā paraṃ maraṇā sugati pāṭikaṅkhā. Katamehi chahi? Nekkhammavitakkena, abyāpādavitakkena, avihiṃsāvitakkena, nekkhammasaññāya, abyāpādasaññāya, avihiṃsāsaññāya – imehi, kho, bhikkhave, chahi dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ, kāyassa bhedā paraṃ maraṇā sugati pāṭikaṅkhā’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. து³க்க²ஸுத்தவண்ணனா • 1. Dukkhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-3. து³க்க²ஸுத்தாதி³வண்ணனா • 1-3. Dukkhasuttādivaṇṇanā
