| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. து³க்க²ஸுத்தவண்ணனா
3. Dukkhasuttavaṇṇanā
43. ஸமுத³யனங் ஸமுத³யோ, ஸமுதே³தி ஏதம்ஹாதி ஸமுத³யோ, ஏவங் உபி⁴ன்னங் ஸமுத³யானமத்த²தோபி பே⁴தோ³ வேதி³தப்³போ³. பச்சயாவ பச்சயஸமுத³யோ. ஆரத்³த⁴விபஸ்ஸகோ ‘‘இமஞ்ச இமஞ்ச பச்சயஸாமக்³கி³ங் படிச்ச இமே த⁴ம்மா க²ணே க²ணே உப்பஜ்ஜந்தீ’’தி பஸ்ஸந்தோ ‘‘பச்சயஸமுத³யங் பஸ்ஸந்தோபி பி⁴க்கு² க²ணிகஸமுத³யங் பஸ்ஸதீ’’தி வுத்தோ பச்சயத³ஸ்ஸனமுகே²ன நிப்³ப³த்திக்க²ணஸ்ஸ த³ஸ்ஸனதோ. ஸோ பன க²ணே க²ணே ஸங்கா²ரானங் நிப்³ப³த்திங் பஸ்ஸிதுங் ஆரத்³தோ⁴ ‘‘இமேஹி நாம பச்சயேஹி நிப்³ப³த்ததீ’’தி பஸ்ஸதி. ‘‘ஸோ க²ணிகஸமுத³யங் பஸ்ஸந்தோ பச்சயங் பஸ்ஸதீ’’தி வத³ந்தி. யஸ்மா பன பச்சயதோ ஸங்கா²ரானங் உத³யங் பஸ்ஸந்தோ க²ணதோ தேஸங் உத³யத³ஸ்ஸனங் ஹோதி, க²ணதோ ஏதேஸங் உத³யங் பஸ்ஸதோ பகே³வ பச்சயானங் ஸுக்³க³ஹிதத்தா பச்சயதோ த³ஸ்ஸனங் ஸுகே²ன இஜ்ஜ²தி, தஸ்மா வுத்தங் ‘‘பச்சயஸமுத³யங் பஸ்ஸந்தோபீ’’திஆதி³. அத்த²ங்க³மத³ஸ்ஸனேபி ஏஸேவ நயோ. அச்சந்தத்த²ங்க³மோதி அப்பவத்தி நிரோதோ⁴ நிப்³பா³னந்தி. பே⁴த³த்த²ங்க³மோதி க²ணிகனிரோதோ⁴. தது³ப⁴யங் புப்³ப³பா⁴கே³ உக்³க³ஹபரிபுச்சா²தி³வஸேன பஸ்ஸந்தோ அஞ்ஞதரஸ்ஸ த³ஸ்ஸனே இதரத³ஸ்ஸனம்பி ஸித்³த⁴மேவ ஹோதி, புப்³ப³பா⁴கே³ ச ஆரம்மணவஸேன க²யதோ வயஸம்மஸனாதி³காலே பே⁴த³த்த²ங்க³மங் பஸ்ஸந்தோ அதிரேகவஸேன அனுஸ்ஸவாதி³தோ அச்சந்தங் அத்த²ங்க³மங் பஸ்ஸதி. மக்³க³க்க²ணே பனாரம்மணதோ அச்சந்தஅத்த²ங்க³மங் பஸ்ஸதி, அஸம்மோஹதோ இதரம்பி பஸ்ஸதி. தங் ஸந்தா⁴யாஹ ‘‘அச்சந்தத்த²ங்க³மங் பஸ்ஸந்தோபீ’’திஆதி³. ஸமுத³யத்த²ங்க³மங் நிப்³ப³த்திபே⁴த³ந்தி ஸமுத³யஸங்கா²தங் நிப்³ப³த்திங் அத்த²ங்க³மஸங்கா²தங் பே⁴த³ஞ்ச. நிஸ்ஸயவஸேனாதி சக்கு²ஸ்ஸ ஸன்னிஸ்ஸயவஸேன பச்சயங் கத்வா. ஆரம்மணவஸேனாதி ரூபே ஆரம்மணங் கத்வா. யங் பனெத்த² வத்தப்³ப³ங், தங் மது⁴பிண்டி³கஸுத்தடீகாயங் வுத்தனயேன வேதி³தப்³ப³ங். திண்ணங் ஸங்க³தி ப²ஸ்ஸோதி ‘‘சக்கு² ரூபானி விஞ்ஞாண’’ந்தி இமேஸங் திண்ணங் ஸங்க³தி ஸமாக³மே நிப்³ப³த்தி ப²ஸ்ஸோதி வுத்தோதி ஆஹ ‘‘திண்ணங் ஸங்க³தியா ப²ஸ்ஸோ’’தி. திண்ணந்தி ச பாகடபச்சயவஸேன வுத்தங், தத³ஞ்ஞேபி பன மனஸிகாராத³யோ ப²ஸ்ஸபச்சயா ஹொந்தியேவ. ஏவந்தி தண்ஹாதீ³னங் அஸேஸவிராக³னிரோத⁴க்கமேன. பி⁴ன்னங் ஹோதீதி அனுப்பாத³னிரோதே⁴ன நிருத்³த⁴ங் ஹோதி. தேனாஹ ‘‘அப்படிஸந்தி⁴ய’’ந்தி.
43. Samudayanaṃ samudayo, samudeti etamhāti samudayo, evaṃ ubhinnaṃ samudayānamatthatopi bhedo veditabbo. Paccayāva paccayasamudayo. Āraddhavipassako ‘‘imañca imañca paccayasāmaggiṃ paṭicca ime dhammā khaṇe khaṇe uppajjantī’’ti passanto ‘‘paccayasamudayaṃ passantopi bhikkhu khaṇikasamudayaṃ passatī’’ti vutto paccayadassanamukhena nibbattikkhaṇassa dassanato. So pana khaṇe khaṇe saṅkhārānaṃ nibbattiṃ passituṃ āraddho ‘‘imehi nāma paccayehi nibbattatī’’ti passati. ‘‘So khaṇikasamudayaṃ passanto paccayaṃ passatī’’ti vadanti. Yasmā pana paccayato saṅkhārānaṃ udayaṃ passanto khaṇato tesaṃ udayadassanaṃ hoti, khaṇato etesaṃ udayaṃ passato pageva paccayānaṃ suggahitattā paccayato dassanaṃ sukhena ijjhati, tasmā vuttaṃ ‘‘paccayasamudayaṃ passantopī’’tiādi. Atthaṅgamadassanepi eseva nayo. Accantatthaṅgamoti appavatti nirodho nibbānanti. Bhedatthaṅgamoti khaṇikanirodho. Tadubhayaṃ pubbabhāge uggahaparipucchādivasena passanto aññatarassa dassane itaradassanampi siddhameva hoti, pubbabhāge ca ārammaṇavasena khayato vayasammasanādikāle bhedatthaṅgamaṃ passanto atirekavasena anussavādito accantaṃ atthaṅgamaṃ passati. Maggakkhaṇe panārammaṇato accantaatthaṅgamaṃ passati, asammohato itarampi passati. Taṃ sandhāyāha ‘‘accantatthaṅgamaṃ passantopī’’tiādi. Samudayatthaṅgamaṃ nibbattibhedanti samudayasaṅkhātaṃ nibbattiṃ atthaṅgamasaṅkhātaṃ bhedañca. Nissayavasenāti cakkhussa sannissayavasena paccayaṃ katvā. Ārammaṇavasenāti rūpe ārammaṇaṃ katvā. Yaṃ panettha vattabbaṃ, taṃ madhupiṇḍikasuttaṭīkāyaṃ vuttanayena veditabbaṃ. Tiṇṇaṃ saṅgati phassoti ‘‘cakkhu rūpāni viññāṇa’’nti imesaṃ tiṇṇaṃ saṅgati samāgame nibbatti phassoti vuttoti āha ‘‘tiṇṇaṃ saṅgatiyā phasso’’ti. Tiṇṇanti ca pākaṭapaccayavasena vuttaṃ, tadaññepi pana manasikārādayo phassapaccayā hontiyeva. Evanti taṇhādīnaṃ asesavirāganirodhakkamena. Bhinnaṃ hotīti anuppādanirodhena niruddhaṃ hoti. Tenāha ‘‘appaṭisandhiya’’nti.
து³க்க²ஸுத்தவண்ணனா நிட்டி²தா.
Dukkhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. து³க்க²ஸுத்தங் • 3. Dukkhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. து³க்க²ஸுத்தவண்ணனா • 3. Dukkhasuttavaṇṇanā
