| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. து³தியஅக்³கி³ஸுத்தங்
4. Dutiyaaggisuttaṃ
47. தேன கோ² பன ஸமயேன உக்³க³தஸரீரஸ்ஸ ப்³ராஹ்மணஸ்ஸ மஹாயஞ்ஞோ உபக்க²டோ ஹோதி. பஞ்ச உஸப⁴ஸதானி தூ²ணூபனீதானி ஹொந்தி யஞ்ஞத்தா²ய , பஞ்ச வச்ச²தரஸதானி தூ²ணூபனீதானி ஹொந்தி யஞ்ஞத்தா²ய, பஞ்ச வச்ச²தரிஸதானி தூ²ணூபனீதானி ஹொந்தி யஞ்ஞத்தா²ய, பஞ்ச அஜஸதானி தூ²ணூபனீதானி ஹொந்தி யஞ்ஞத்தா²ய, பஞ்ச உரப்³ப⁴ஸதானி தூ²ணூபனீதானி ஹொந்தி யஞ்ஞத்தா²ய. அத² கோ² உக்³க³தஸரீரோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² உக்³க³தஸரீரோ ப்³ராஹ்மணோ ப⁴க³வந்தங் ஏதத³வோச –
47. Tena kho pana samayena uggatasarīrassa brāhmaṇassa mahāyañño upakkhaṭo hoti. Pañca usabhasatāni thūṇūpanītāni honti yaññatthāya , pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya. Atha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uggatasarīro brāhmaṇo bhagavantaṃ etadavoca –
‘‘ஸுதங் மேதங், போ⁴ கோ³தம, அக்³கி³ஸ்ஸ ஆதா³னங் 1 யூபஸ்ஸ உஸ்ஸாபனங் மஹப்ப²லங் ஹோதி மஹானிஸங்ஸ’’ந்தி. ‘‘மயாபி கோ² ஏதங், ப்³ராஹ்மண, ஸுதங் அக்³கி³ஸ்ஸ ஆதா³னங் யூபஸ்ஸ உஸ்ஸாபனங் மஹப்ப²லங் ஹோதி மஹானிஸங்ஸ’’ந்தி. து³தியம்பி கோ² உக்³க³தஸரீரோ ப்³ராஹ்மணோ…பே॰… ததியம்பி கோ² உக்³க³தஸரீரோ ப்³ராஹ்மணோ ப⁴க³வந்தங் ஏதத³வோச – ‘‘ஸுதங் மேதங், போ⁴ கோ³தம, அக்³கி³ஸ்ஸ ஆதா³னங் யூபஸ்ஸ உஸ்ஸாபனங் மஹப்ப²லங் ஹோதி மஹானிஸங்ஸ’’ந்தி. ‘‘மயாபி கோ² ஏதங், ப்³ராஹ்மண, ஸுதங் அக்³கி³ஸ்ஸ ஆதா³னங் யூபஸ்ஸ உஸ்ஸாபனங் மஹப்ப²லங் ஹோதி மஹானிஸங்ஸ’’ந்தி. ‘‘தயித³ங், போ⁴ கோ³தம , ஸமேதி போ⁴தோ சேவ கோ³தமஸ்ஸ அம்ஹாகஞ்ச, யதி³த³ங் ஸப்³பே³ன ஸப்³ப³ங்’’.
‘‘Sutaṃ metaṃ, bho gotama, aggissa ādānaṃ 2 yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. Dutiyampi kho uggatasarīro brāhmaṇo…pe… tatiyampi kho uggatasarīro brāhmaṇo bhagavantaṃ etadavoca – ‘‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Tayidaṃ, bho gotama , sameti bhoto ceva gotamassa amhākañca, yadidaṃ sabbena sabbaṃ’’.
ஏவங் வுத்தே ஆயஸ்மா ஆனந்தோ³ உக்³க³தஸரீரங் ப்³ராஹ்மணங் ஏதத³வோச – ‘‘ந கோ², ப்³ராஹ்மண, ததா²க³தா ஏவங் புச்சி²தப்³பா³ – ‘ஸுதங் மேதங், போ⁴ கோ³தம, அக்³கி³ஸ்ஸ ஆதா³னங் யூபஸ்ஸ உஸ்ஸாபனங் மஹப்ப²லங் ஹோதி மஹானிஸங்ஸ’ந்தி. ஏவங் கோ², ப்³ராஹ்மண, ததா²க³தா புச்சி²தப்³பா³ – ‘அஹஞ்ஹி, ப⁴ந்தே, அக்³கி³ங் 3 ஆதா³துகாமோ, 4 யூபங் உஸ்ஸாபேதுகாமோ. ஓவத³து மங், ப⁴ந்தே, ப⁴க³வா. அனுஸாஸது மங், ப⁴ந்தே, ப⁴க³வா யங் மம அஸ்ஸ தீ³க⁴ரத்தங் ஹிதாய ஸுகா²யா’’’தி.
Evaṃ vutte āyasmā ānando uggatasarīraṃ brāhmaṇaṃ etadavoca – ‘‘na kho, brāhmaṇa, tathāgatā evaṃ pucchitabbā – ‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’nti. Evaṃ kho, brāhmaṇa, tathāgatā pucchitabbā – ‘ahañhi, bhante, aggiṃ 5 ādātukāmo, 6 yūpaṃ ussāpetukāmo. Ovadatu maṃ, bhante, bhagavā. Anusāsatu maṃ, bhante, bhagavā yaṃ mama assa dīgharattaṃ hitāya sukhāyā’’’ti.
அத² கோ² உக்³க³தஸரீரோ ப்³ராஹ்மணோ ப⁴க³வந்தங் ஏதத³வோச – ‘‘அஹஞ்ஹி, போ⁴ கோ³தம, அக்³கி³ங் ஆதா³துகாமோ யூபங் உஸ்ஸாபேதுகாமோ. ஓவத³து மங் ப⁴வங் கோ³தமோ. அனுஸாஸது மங் ப⁴வங் கோ³தமோ யங் மம அஸ்ஸ தீ³க⁴ரத்தங் ஹிதாய ஸுகா²யா’’தி.
Atha kho uggatasarīro brāhmaṇo bhagavantaṃ etadavoca – ‘‘ahañhi, bho gotama, aggiṃ ādātukāmo yūpaṃ ussāpetukāmo. Ovadatu maṃ bhavaṃ gotamo. Anusāsatu maṃ bhavaṃ gotamo yaṃ mama assa dīgharattaṃ hitāya sukhāyā’’ti.
‘‘அக்³கி³ங், ப்³ராஹ்மண, ஆதெ³ந்தோ 7 யூபங் உஸ்ஸாபெந்தோ புப்³பே³வ யஞ்ஞா தீணி ஸத்தா²னி உஸ்ஸாபேதி அகுஸலானி து³க்கு²த்³ரயானி 8 து³க்க²விபாகானி. கதமானி தீணி ? காயஸத்த²ங், வசீஸத்த²ங், மனோஸத்த²ங். அக்³கி³ங், ப்³ராஹ்மண, ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா ஏவங் சித்தங் உப்பாதே³ஸி – ‘எத்தகா உஸபா⁴ ஹஞ்ஞந்து யஞ்ஞத்தா²ய, எத்தகா வச்ச²தரா ஹஞ்ஞந்து யஞ்ஞத்தா²ய, எத்தகா வச்ச²தரியோ ஹஞ்ஞந்து யஞ்ஞத்தா²ய, எத்தகா அஜா ஹஞ்ஞந்து யஞ்ஞத்தா²ய, எத்தகா உரப்³பா⁴ ஹஞ்ஞந்து யஞ்ஞத்தா²யா’தி. ஸோ ‘புஞ்ஞங் கரோமீ’தி அபுஞ்ஞங் கரோதி, ‘குஸலங் கரோமீ’தி அகுஸலங் கரோதி, ‘ஸுக³தியா மக்³க³ங் பரியேஸாமீ’தி து³க்³க³தியா மக்³க³ங் பரியேஸதி. அக்³கி³ங், ப்³ராஹ்மண, ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா இத³ங் பட²மங் மனோஸத்த²ங் உஸ்ஸாபேதி அகுஸலங் து³க்கு²த்³ரயங் து³க்க²விபாகங்.
‘‘Aggiṃ, brāhmaṇa, ādento 9 yūpaṃ ussāpento pubbeva yaññā tīṇi satthāni ussāpeti akusalāni dukkhudrayāni 10 dukkhavipākāni. Katamāni tīṇi ? Kāyasatthaṃ, vacīsatthaṃ, manosatthaṃ. Aggiṃ, brāhmaṇa, ādento yūpaṃ ussāpento pubbeva yaññā evaṃ cittaṃ uppādesi – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ paṭhamaṃ manosatthaṃ ussāpeti akusalaṃ dukkhudrayaṃ dukkhavipākaṃ.
‘‘புன சபரங், ப்³ராஹ்மண, அக்³கி³ங் ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா ஏவங் வாசங் பா⁴ஸதி – ‘எத்தகா உஸபா⁴ ஹஞ்ஞந்து யஞ்ஞத்தா²ய, எத்தகா வச்ச²தரா ஹஞ்ஞந்து யஞ்ஞத்தா²ய, எத்தகா வச்ச²தரியோ ஹஞ்ஞந்து யஞ்ஞத்தா²ய, எத்தகா அஜா ஹஞ்ஞந்து யஞ்ஞத்தா²ய, எத்தகா உரப்³பா⁴ ஹஞ்ஞந்து யஞ்ஞத்தா²யா’தி. ஸோ ‘புஞ்ஞங் கரோமீ’தி அபுஞ்ஞங் கரோதி, ‘குஸலங் கரோமீ’தி அகுஸலங் கரோதி, ‘ஸுக³தியா மக்³க³ங் பரியேஸாமீ’தி து³க்³க³தியா மக்³க³ங் பரியேஸதி. அக்³கி³ங், ப்³ராஹ்மண, ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா இத³ங் து³தியங் வசீஸத்த²ங் உஸ்ஸாபேதி அகுஸலங் து³க்கு²த்³ரயங் து³க்க²விபாகங்.
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā evaṃ vācaṃ bhāsati – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ dutiyaṃ vacīsatthaṃ ussāpeti akusalaṃ dukkhudrayaṃ dukkhavipākaṃ.
‘‘புன சபரங், ப்³ராஹ்மண, அக்³கி³ங் ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா ஸயங் பட²மங் ஸமாரம்ப⁴தி 11 உஸபா⁴ ஹந்துங் 12 யஞ்ஞத்தா²ய, ஸயங் பட²மங் ஸமாரம்ப⁴தி வச்ச²தரா ஹந்துங் யஞ்ஞத்தா²ய, ஸயங் பட²மங் ஸமாரம்ப⁴தி வச்ச²தரியோ ஹந்துங் யஞ்ஞத்தா²ய, ஸயங் பட²மங் ஸமாரம்ப⁴தி அஜா ஹந்துங் யஞ்ஞத்தா²ய, ஸயங் பட²மங் ஸமாரம்ப⁴தி உரப்³பா⁴ ஹந்துங் யஞ்ஞத்தா²ய 13. ஸோ ‘புஞ்ஞங் கரோமீ’தி அபுஞ்ஞங் கரோதி, ‘குஸலங் கரோமீ’தி அகுஸலங் கரோதி, ‘ஸுக³தியா மக்³க³ங் பரியேஸாமீ’தி து³க்³க³தியா மக்³க³ங் பரியேஸதி. அக்³கி³ங், ப்³ராஹ்மண, ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா இத³ங் ததியங் காயஸத்த²ங் உஸ்ஸாபேதி அகுஸலங் து³க்கு²த்³ரயங் து³க்க²விபாகங். அக்³கி³ங், ப்³ராஹ்மண, ஆதெ³ந்தோ யூபங் உஸ்ஸாபெந்தோ புப்³பே³வ யஞ்ஞா இமானி தீணி ஸத்தா²னி உஸ்ஸாபேதி அகுஸலானி து³க்கு²த்³ரயானி து³க்க²விபாகானி.
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā sayaṃ paṭhamaṃ samārambhati 14 usabhā hantuṃ 15 yaññatthāya, sayaṃ paṭhamaṃ samārambhati vacchatarā hantuṃ yaññatthāya, sayaṃ paṭhamaṃ samārambhati vacchatariyo hantuṃ yaññatthāya, sayaṃ paṭhamaṃ samārambhati ajā hantuṃ yaññatthāya, sayaṃ paṭhamaṃ samārambhati urabbhā hantuṃ yaññatthāya 16. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ tatiyaṃ kāyasatthaṃ ussāpeti akusalaṃ dukkhudrayaṃ dukkhavipākaṃ. Aggiṃ, brāhmaṇa, ādento yūpaṃ ussāpento pubbeva yaññā imāni tīṇi satthāni ussāpeti akusalāni dukkhudrayāni dukkhavipākāni.
‘‘தயோமே , ப்³ராஹ்மண, அக்³கீ³ பஹாதப்³பா³ பரிவஜ்ஜேதப்³பா³, ந ஸேவிதப்³பா³. கதமே தயோ? ராக³க்³கி³ , தோ³ஸக்³கி³, மோஹக்³கி³.
‘‘Tayome , brāhmaṇa, aggī pahātabbā parivajjetabbā, na sevitabbā. Katame tayo? Rāgaggi , dosaggi, mohaggi.
‘‘கஸ்மா சாயங், ப்³ராஹ்மண, ராக³க்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³? ரத்தோ கோ², ப்³ராஹ்மண, ராகே³ன அபி⁴பூ⁴தோ பரியாதி³ன்னசித்தோ காயேன து³ச்சரிதங் சரதி, வாசாய து³ச்சரிதங் சரதி, மனஸா து³ச்சரிதங் சரதி. ஸோ காயேன து³ச்சரிதங் சரித்வா, வாசாய து³ச்சரிதங் சரித்வா, மனஸா து³ச்சரிதங் சரித்வா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. தஸ்மாயங் ராக³க்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³.
‘‘Kasmā cāyaṃ, brāhmaṇa, rāgaggi pahātabbo parivajjetabbo, na sevitabbo? Ratto kho, brāhmaṇa, rāgena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ rāgaggi pahātabbo parivajjetabbo, na sevitabbo.
‘‘கஸ்மா சாயங், ப்³ராஹ்மண, தோ³ஸக்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³? து³ட்டோ² கோ², ப்³ராஹ்மண, தோ³ஸேன அபி⁴பூ⁴தோ பரியாதி³ன்னசித்தோ காயேன து³ச்சரிதங் சரதி, வாசாய து³ச்சரிதங் சரதி, மனஸா து³ச்சரிதங் சரதி. ஸோ காயேன து³ச்சரிதங் சரித்வா, வாசாய து³ச்சரிதங் சரித்வா, மனஸா து³ச்சரிதங் சரித்வா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. தஸ்மாயங் தோ³ஸக்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³.
‘‘Kasmā cāyaṃ, brāhmaṇa, dosaggi pahātabbo parivajjetabbo, na sevitabbo? Duṭṭho kho, brāhmaṇa, dosena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ dosaggi pahātabbo parivajjetabbo, na sevitabbo.
‘‘கஸ்மா சாயங், ப்³ராஹ்மண, மோஹக்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³? மூள்ஹோ கோ², ப்³ராஹ்மண, மோஹேன அபி⁴பூ⁴தோ பரியாதி³ன்னசித்தோ காயேன து³ச்சரிதங் சரதி, வாசாய து³ச்சரிதங் சரதி, மனஸா து³ச்சரிதங் சரதி. ஸோ காயேன து³ச்சரிதங் சரித்வா, வாசாய து³ச்சரிதங் சரித்வா, மனஸா து³ச்சரிதங் சரித்வா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. தஸ்மாயங் மோஹக்³கி³ பஹாதப்³போ³ பரிவஜ்ஜேதப்³போ³, ந ஸேவிதப்³போ³. இமே கோ² தயோ, ப்³ராஹ்மண, அக்³கீ³ பஹாதப்³பா³ பரிவஜ்ஜேதப்³பா³, ந ஸேவிதப்³பா³.
‘‘Kasmā cāyaṃ, brāhmaṇa, mohaggi pahātabbo parivajjetabbo, na sevitabbo? Mūḷho kho, brāhmaṇa, mohena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ mohaggi pahātabbo parivajjetabbo, na sevitabbo. Ime kho tayo, brāhmaṇa, aggī pahātabbā parivajjetabbā, na sevitabbā.
‘‘தயோ கோ², ப்³ராஹ்மண, அக்³கீ³ ஸக்கத்வா க³ருங் கத்வா மானெத்வா பூஜெத்வா ஸம்மா ஸுக²ங் பரிஹாதப்³பா³. கதமே தயோ? ஆஹுனெய்யக்³கி³ , க³ஹபதக்³கி³, த³க்கி²ணெய்யக்³கி³.
‘‘Tayo kho, brāhmaṇa, aggī sakkatvā garuṃ katvā mānetvā pūjetvā sammā sukhaṃ parihātabbā. Katame tayo? Āhuneyyaggi , gahapataggi, dakkhiṇeyyaggi.
‘‘கதமோ ச, ப்³ராஹ்மண, ஆஹுனெய்யக்³கி³? இத⁴, ப்³ராஹ்மண, யஸ்ஸ தே ஹொந்தி மாதாதி வா பிதாதி வா, அயங் வுச்சதி, ப்³ராஹ்மண, ஆஹுனெய்யக்³கி³. தங் கிஸ்ஸ ஹேது ? அதோஹயங் 17, ப்³ராஹ்மண, ஆஹுதோ ஸம்பூ⁴தோ, தஸ்மாயங் ஆஹுனெய்யக்³கி³ ஸக்கத்வா க³ருங் கத்வா மானெத்வா பூஜெத்வா ஸம்மா ஸுக²ங் பரிஹாதப்³போ³.
‘‘Katamo ca, brāhmaṇa, āhuneyyaggi? Idha, brāhmaṇa, yassa te honti mātāti vā pitāti vā, ayaṃ vuccati, brāhmaṇa, āhuneyyaggi. Taṃ kissa hetu ? Atohayaṃ 18, brāhmaṇa, āhuto sambhūto, tasmāyaṃ āhuneyyaggi sakkatvā garuṃ katvā mānetvā pūjetvā sammā sukhaṃ parihātabbo.
‘‘கதமோ ச, ப்³ராஹ்மண, க³ஹபதக்³கி³? இத⁴, ப்³ராஹ்மண, யஸ்ஸ தே ஹொந்தி புத்தாதி வா தா³ராதி வா தா³ஸாதி வா பெஸ்ஸாதி வா கம்மகராதி வா, அயங் வுச்சதி, ப்³ராஹ்மண , க³ஹபதக்³கி³. தஸ்மாயங் க³ஹபதக்³கி³ ஸக்கத்வா க³ருங் கத்வா மானெத்வா பூஜெத்வா ஸம்மா ஸுக²ங் பரிஹாதப்³போ³.
‘‘Katamo ca, brāhmaṇa, gahapataggi? Idha, brāhmaṇa, yassa te honti puttāti vā dārāti vā dāsāti vā pessāti vā kammakarāti vā, ayaṃ vuccati, brāhmaṇa , gahapataggi. Tasmāyaṃ gahapataggi sakkatvā garuṃ katvā mānetvā pūjetvā sammā sukhaṃ parihātabbo.
‘‘கதமோ ச, ப்³ராஹ்மண, த³க்கி²ணெய்யக்³கி³? இத⁴, ப்³ராஹ்மண, யே தே ஸமணப்³ராஹ்மணா பரப்பவாதா³ படிவிரதா க²ந்திஸோரச்சே நிவிட்டா² ஏகமத்தானங் த³மெந்தி, ஏகமத்தானங் ஸமெந்தி, ஏகமத்தானங் பரினிப்³பா³பெந்தி, அயங் வுச்சதி, ப்³ராஹ்மண, த³க்கி²ணெய்யக்³கி³. தஸ்மாயங் த³க்கி²ணெய்யக்³கி³ ஸக்கத்வா க³ருங் கத்வா மானெத்வா பூஜெத்வா ஸம்மா ஸுக²ங் பரிஹாதப்³போ³. இமே கோ², ப்³ராஹ்மண, தயோ அக்³கீ³ ஸக்கத்வா க³ருங் கத்வா மானெத்வா பூஜெத்வா ஸம்மா ஸுக²ங் பரிஹாதப்³பா³.
‘‘Katamo ca, brāhmaṇa, dakkhiṇeyyaggi? Idha, brāhmaṇa, ye te samaṇabrāhmaṇā parappavādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti, ayaṃ vuccati, brāhmaṇa, dakkhiṇeyyaggi. Tasmāyaṃ dakkhiṇeyyaggi sakkatvā garuṃ katvā mānetvā pūjetvā sammā sukhaṃ parihātabbo. Ime kho, brāhmaṇa, tayo aggī sakkatvā garuṃ katvā mānetvā pūjetvā sammā sukhaṃ parihātabbā.
‘‘அயங் கோ² பன, ப்³ராஹ்மண, கட்ட²க்³கி³ காலேன காலங் உஜ்ஜலேதப்³போ³, காலேன காலங் அஜ்ஜு²பெக்கி²தப்³போ³, காலேன காலங் நிப்³பா³பேதப்³போ³, காலேன காலங் நிக்கி²பிதப்³போ³’’தி.
‘‘Ayaṃ kho pana, brāhmaṇa, kaṭṭhaggi kālena kālaṃ ujjaletabbo, kālena kālaṃ ajjhupekkhitabbo, kālena kālaṃ nibbāpetabbo, kālena kālaṃ nikkhipitabbo’’ti.
ஏவங் வுத்தே உக்³க³தஸரீரோ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம; அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³தந்தி. ஏஸாஹங், போ⁴ கோ³தம, பஞ்ச உஸப⁴ஸதானி முஞ்சாமி ஜீவிதங் தே³மி, பஞ்ச வச்ச²தரஸதானி முஞ்சாமி ஜீவிதங் தே³மி, பஞ்ச வச்ச²தரிஸதானி முஞ்சாமி ஜீவிதங் தே³மி, பஞ்ச அஜஸதானி முஞ்சாமி ஜீவிதங் தே³மி, பஞ்ச உரப்³ப⁴ஸதானி முஞ்சாமி ஜீவிதங் தே³மி. ஹரிதானி சேவ திணானி கா²த³ந்து, ஸீதானி ச பானீயானி பிவந்து, ஸீதோ ச நேஸங் வாதோ உபவாயத’’ந்தி 19. சதுத்த²ங்.
Evaṃ vutte uggatasarīro brāhmaṇo bhagavantaṃ etadavoca – ‘‘abhikkantaṃ, bho gotama; abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatanti. Esāhaṃ, bho gotama, pañca usabhasatāni muñcāmi jīvitaṃ demi, pañca vacchatarasatāni muñcāmi jīvitaṃ demi, pañca vacchatarisatāni muñcāmi jīvitaṃ demi, pañca ajasatāni muñcāmi jīvitaṃ demi, pañca urabbhasatāni muñcāmi jīvitaṃ demi. Haritāni ceva tiṇāni khādantu, sītāni ca pānīyāni pivantu, sīto ca nesaṃ vāto upavāyata’’nti 20. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. து³தியஅக்³கி³ஸுத்தவண்ணனா • 4. Dutiyaaggisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-5. து³தியஅக்³கி³ஸுத்தாதி³வண்ணனா • 4-5. Dutiyaaggisuttādivaṇṇanā
