| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. து³தியஅனுருத்³த⁴ஸுத்தங்
8. Dutiyaanuruddhasuttaṃ
131. அத² கோ² ஆயஸ்மா அனுருத்³தோ⁴ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா அனுருத்³தோ⁴ ஆயஸ்மந்தங் ஸாரிபுத்தங் ஏதத³வோச – ‘‘இதா⁴ஹங், ஆவுஸோ ஸாரிபுத்த, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸஹஸ்ஸங் லோகங் ஓலோகேமி. ஆரத்³த⁴ங் கோ² பன மே வீரியங் அஸல்லீனங், உபட்டி²தா ஸதி அஸம்முட்டா² 1, பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். அத² ச பன மே நானுபாதா³ய 2 ஆஸவேஹி சித்தங் விமுச்சதீ’’தி.
131. Atha kho āyasmā anuruddho yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā anuruddho āyasmantaṃ sāriputtaṃ etadavoca – ‘‘idhāhaṃ, āvuso sāriputta, dibbena cakkhunā visuddhena atikkantamānusakena sahassaṃ lokaṃ olokemi. Āraddhaṃ kho pana me vīriyaṃ asallīnaṃ, upaṭṭhitā sati asammuṭṭhā 3, passaddho kāyo asāraddho, samāhitaṃ cittaṃ ekaggaṃ. Atha ca pana me nānupādāya 4 āsavehi cittaṃ vimuccatī’’ti.
‘‘யங் கோ² தே, ஆவுஸோ அனுருத்³த⁴, ஏவங் ஹோதி – ‘அஹங் தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸஹஸ்ஸங் லோகங் வோலோகேமீ’தி, இத³ங் தே மானஸ்மிங். யம்பி தே, ஆவுஸோ அனுருத்³த⁴, ஏவங் ஹோதி – ‘ஆரத்³த⁴ங் கோ² பன மே வீரியங் அஸல்லீனங், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³’ந்தி, இத³ங் தே உத்³த⁴ச்சஸ்மிங். யம்பி தே, ஆவுஸோ அனுருத்³த⁴, ஏவங் ஹோதி – ‘அத² ச பன மே நானுபாதா³ய ஆஸவேஹி சித்தங் விமுச்சதீ’தி, இத³ங் தே குக்குச்சஸ்மிங். ஸாது⁴ வதாயஸ்மா அனுருத்³தோ⁴ இமே தயோ த⁴ம்மே பஹாய, இமே தயோ த⁴ம்மே அமனஸிகரித்வா அமதாய தா⁴துயா சித்தங் உபஸங்ஹரதூ’’தி.
‘‘Yaṃ kho te, āvuso anuruddha, evaṃ hoti – ‘ahaṃ dibbena cakkhunā visuddhena atikkantamānusakena sahassaṃ lokaṃ volokemī’ti, idaṃ te mānasmiṃ. Yampi te, āvuso anuruddha, evaṃ hoti – ‘āraddhaṃ kho pana me vīriyaṃ asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekagga’nti, idaṃ te uddhaccasmiṃ. Yampi te, āvuso anuruddha, evaṃ hoti – ‘atha ca pana me nānupādāya āsavehi cittaṃ vimuccatī’ti, idaṃ te kukkuccasmiṃ. Sādhu vatāyasmā anuruddho ime tayo dhamme pahāya, ime tayo dhamme amanasikaritvā amatāya dhātuyā cittaṃ upasaṃharatū’’ti.
அத² கோ² ஆயஸ்மா அனுருத்³தோ⁴ அபரேன ஸமயேன இமே தயோ த⁴ம்மே பஹாய, இமே தயோ த⁴ம்மே அமனஸிகரித்வா அமதாய தா⁴துயா சித்தங் உபஸங்ஹரி 5. அத² கோ² ஆயஸ்மா அனுருத்³தோ⁴ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி, தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா அனுருத்³தோ⁴ அரஹதங் அஹோஸீதி. அட்ட²மங்.
Atha kho āyasmā anuruddho aparena samayena ime tayo dhamme pahāya, ime tayo dhamme amanasikaritvā amatāya dhātuyā cittaṃ upasaṃhari 6. Atha kho āyasmā anuruddho eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā anuruddho arahataṃ ahosīti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. து³தியஅனுருத்³த⁴ஸுத்தவண்ணனா • 8. Dutiyaanuruddhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. து³தியஅனுருத்³த⁴ஸுத்தவண்ணனா • 8. Dutiyaanuruddhasuttavaṇṇanā
