สํยุตฺต นิกาย ๓๕ฯ๑๖

๒ฯ ยมกวคฺค

ทุติยอสฺสาทปริเยสนสุตฺต

“รูปานาหํ, ภิกฺขเว, อสฺสาทปริเยสนํ อจรึฯ โย รูปานํ อสฺสาโท ตทชฺฌคมํฯ ยาวตา รูปานํ อสฺสาโท ปญฺญาย เม โส สุทิฏฺโฐฯ รูปานาหํ, ภิกฺขเว, อาทีนวปริเยสนํ อจรึฯ โย รูปานํ อาทีนโว ตทชฺฌคมํฯ ยาวตา รูปานํ อาทีนโว ปญฺญาย เม โส สุทิฏฺโฐฯ รูปานาหํ, ภิกฺขเว, นิสฺสรณปริเยสนํ อจรึฯ ยํ รูปานํ นิสฺสรณํ ตทชฺฌคมํฯ ยาวตา รูปานํ นิสฺสรณํ, ปญฺญาย เม ตํ สุทิฏฺฐํฯ สทฺทานาหํ, ภิกฺขเว … คนฺธานาหํ, ภิกฺขเว … รสานาหํ, ภิกฺขเว … โผฏฺฐพฺพานาหํ, ภิกฺขเว … ธมฺมานาหํ, ภิกฺขเว, อสฺสาทปริเยสนํ อจรึฯ โย ธมฺมานํ อสฺสาโท ตทชฺฌคมํฯ ยาวตา ธมฺมานํ อสฺสาโท ปญฺญาย เม โส สุทิฏฺโฐฯ ธมฺมานาหํ, ภิกฺขเว, อาทีนวปริเยสนํ อจรึฯ โย ธมฺมานํ อาทีนโว ตทชฺฌคมํฯ ยาวตา ธมฺมานํ อาทีนโว ปญฺญาย เม โส สุทิฏฺโฐฯ ธมฺมานาหํ, ภิกฺขเว, นิสฺสรณปริเยสนํ อจรึฯ ยํ ธมฺมานํ นิสฺสรณํ ตทชฺฌคมํฯ ยาวตา ธมฺมานํ นิสฺสรณํ, ปญฺญาย เม ตํ สุทิฏฺฐํฯ

ยาวกีวญฺจาหํ, ภิกฺขเว, อิเมสํ ฉนฺนํ พาหิรานํ อายตนานํ อสฺสาทญฺจ อสฺสาทโต, อาทีนวญฺจ อาทีนวโต, นิสฺสรณญฺจ นิสฺสรณโต ยถาภูตํ นาพฺภญฺญาสึ …เป… ปจฺจญฺญาสึฯ

ญาณญฺจ ปน เม ทสฺสนํ อุทปาทิ: ‘อกุปฺปา เม วิมุตฺติ, อยมนฺติมา ชาติ, นตฺถิ ทานิ ปุนพฺภโว'”ติฯ

จตุตฺถํฯ