| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. து³தியஅஸ்ஸுதவாஸுத்தவண்ணனா
2. Dutiyaassutavāsuttavaṇṇanā
62. பச்சயபா⁴வேன ஸுக²வேத³னாய ஹிதந்தி ஸுக²வேத³னியங். தேனாஹ ‘‘ஸுக²வேத³னாய பச்சய’’ந்தி. பச்சயபா⁴வோ ச உபனிஸ்ஸயகோடியா, ந ஸஹஜாதகோடியா. தேனாஹ ‘‘நனு சா’’திஆதி³. ஜவனவேத³னாயாதி ஜவனசித்தஸஹக³தாய வேத³னாய. தங் ஸந்தா⁴யாதி தங் உபனிஸ்ஸயபச்சயதங் ஸந்தா⁴ய. ஏதந்தி ஏதங் ‘‘ஸுக²வேத³னாய பச்சய’’ந்தி வசனங் வுத்தங். ஏஸேவ நயோதி இமினா ‘‘நனு ச ஸோதஸம்ப²ஸ்ஸோ ஸுக²வேத³னாய பச்சயோ ந ஹோதீ’’தி ஏவமாதி³ங் அதிதி³ஸதி. ஸோ ஸம்ப²ஸ்ஸோ ஜாதி உப்பத்திட்டா²னங் ஏதஸ்ஸாதி தஜ்ஜாதிகங், வேத³யிதங். தங் பன யஸ்மா தஸ்ஸ ப²ஸ்ஸஸ்ஸ அனுச்ச²விகமேவ ஹோதி, தஸ்மா தஸ்ஸாருப்பங் தஸ்ஸ ப²ஸ்ஸஸ்ஸ அனுரூபந்தி ச அத்தோ² வுத்தோ. வுத்தனயேனாதி ‘‘ஸுக²வேத³னாய பச்சயோ’’திஆதி³னா வுத்தவிதி⁴அனுஸாரேன. அத⁴ராரணியங் உத்தராரணியா மந்தனவஸேன க⁴ட்டனங் இவ ஸங்க⁴ட்டனங் ப²ஸ்ஸேன யுக³க்³கா³ஹோ, தஸ்ஸ பன க⁴ட்டனஸ்ஸ நிரந்தரப்பவத்தியா பிண்டி³தபா⁴வோ இத⁴ ஸமோதா⁴னங், ந கேஸஞ்சி த்³வின்னங் திண்ணங் வா ஸஹாவட்டா²னந்தி வுத்தங் ‘‘ஸங்க⁴ட்டனஸம்பிண்ட³னேனாதி அத்தோ²’’தி. அக்³கி³சுண்ணோதி விப்பு²லிங்க³ங். வத்தூ²தி சக்கா²தி³வத்து² விஸயஸங்க⁴ட்டனதோ. லப்³ப⁴மானோவ த⁴ம்மோ ஸங்க⁴ட்டனங் விய க³ய்ஹதீதி வுத்தங் ‘‘ஸங்க⁴ட்டனங் விய ப²ஸ்ஸோ’’தி. உஸ்மாதா⁴து விய வேத³னா து³க்க²ஸபா⁴வத்தா.
62. Paccayabhāvena sukhavedanāya hitanti sukhavedaniyaṃ. Tenāha ‘‘sukhavedanāya paccaya’’nti. Paccayabhāvo ca upanissayakoṭiyā, na sahajātakoṭiyā. Tenāha ‘‘nanu cā’’tiādi. Javanavedanāyāti javanacittasahagatāya vedanāya. Taṃ sandhāyāti taṃ upanissayapaccayataṃ sandhāya. Etanti etaṃ ‘‘sukhavedanāya paccaya’’nti vacanaṃ vuttaṃ. Eseva nayoti iminā ‘‘nanu ca sotasamphasso sukhavedanāya paccayo na hotī’’ti evamādiṃ atidisati. So samphasso jāti uppattiṭṭhānaṃ etassāti tajjātikaṃ, vedayitaṃ. Taṃ pana yasmā tassa phassassa anucchavikameva hoti, tasmā tassāruppaṃ tassa phassassa anurūpanti ca attho vutto. Vuttanayenāti ‘‘sukhavedanāya paccayo’’tiādinā vuttavidhianusārena. Adharāraṇiyaṃ uttarāraṇiyā mantanavasena ghaṭṭanaṃ iva saṅghaṭṭanaṃ phassena yugaggāho, tassa pana ghaṭṭanassa nirantarappavattiyā piṇḍitabhāvo idha samodhānaṃ, na kesañci dvinnaṃ tiṇṇaṃ vā sahāvaṭṭhānanti vuttaṃ ‘‘saṅghaṭṭanasampiṇḍanenāti attho’’ti. Aggicuṇṇoti vipphuliṅgaṃ. Vatthūti cakkhādivatthu visayasaṅghaṭṭanato. Labbhamānova dhammo saṅghaṭṭanaṃ viya gayhatīti vuttaṃ ‘‘saṅghaṭṭanaṃ viya phasso’’ti. Usmādhātu viya vedanā dukkhasabhāvattā.
து³தியஅஸ்ஸுதவாஸுத்தவண்ணனா நிட்டி²தா.
Dutiyaassutavāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. து³தியஅஸ்ஸுதவாஸுத்தங் • 2. Dutiyaassutavāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. து³தியஅஸ்ஸுதவாஸுத்தவண்ணனா • 2. Dutiyaassutavāsuttavaṇṇanā
