| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. து³தியசக்கானுவத்தனஸுத்தங்
2. Dutiyacakkānuvattanasuttaṃ
132. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ சக்கவத்திஸ்ஸ ஜெட்டோ² புத்தோ பிதரா பவத்திதங் சக்கங் த⁴ம்மேனேவ அனுப்பவத்தேதி; தங் ஹோதி சக்கங் அப்படிவத்தியங் கேனசி மனுஸ்ஸபூ⁴தேன பச்சத்தி²கேன பாணினா.
132. ‘‘Pañcahi, bhikkhave, aṅgehi samannāgato rañño cakkavattissa jeṭṭho putto pitarā pavattitaṃ cakkaṃ dhammeneva anuppavatteti; taṃ hoti cakkaṃ appaṭivattiyaṃ kenaci manussabhūtena paccatthikena pāṇinā.
‘‘கதமேஹி பஞ்சஹி? இத⁴, பி⁴க்க²வே, ரஞ்ஞோ சக்கவத்திஸ்ஸ ஜெட்டோ² புத்தோ அத்த²ஞ்ஞூ ச ஹோதி, த⁴ம்மஞ்ஞூ ச, மத்தஞ்ஞூ ச, காலஞ்ஞூ ச, பரிஸஞ்ஞூ ச. இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ ரஞ்ஞோ சக்கவத்திஸ்ஸ ஜெட்டோ² புத்தோ பிதரா பவத்திதங் சக்கங் த⁴ம்மேனேவ அனுப்பவத்தேதி; தங் ஹோதி சக்கங் அப்படிவத்தியங் கேனசி மனுஸ்ஸபூ⁴தேன பச்சத்தி²கேன பாணினா.
‘‘Katamehi pañcahi? Idha, bhikkhave, rañño cakkavattissa jeṭṭho putto atthaññū ca hoti, dhammaññū ca, mattaññū ca, kālaññū ca, parisaññū ca. Imehi kho, bhikkhave, pañcahi aṅgehi samannāgato rañño cakkavattissa jeṭṭho putto pitarā pavattitaṃ cakkaṃ dhammeneva anuppavatteti; taṃ hoti cakkaṃ appaṭivattiyaṃ kenaci manussabhūtena paccatthikena pāṇinā.
‘‘ஏவமேவங் கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஸாரிபுத்தோ ததா²க³தேன அனுத்தரங் த⁴ம்மசக்கங் பவத்திதங் ஸம்மதே³வ அனுப்பவத்தேதி; தங் ஹோதி சக்கங் அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிங்.
‘‘Evamevaṃ kho, bhikkhave, pañcahi dhammehi samannāgato sāriputto tathāgatena anuttaraṃ dhammacakkaṃ pavattitaṃ sammadeva anuppavatteti; taṃ hoti cakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ.
‘‘கதமேஹி பஞ்சஹி? இத⁴, பி⁴க்க²வே, ஸாரிபுத்தோ அத்த²ஞ்ஞூ, த⁴ம்மஞ்ஞூ, மத்தஞ்ஞூ , காலஞ்ஞூ, பரிஸஞ்ஞூ. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஸாரிபுத்தோ ததா²க³தேன அனுத்தரங் த⁴ம்மசக்கங் பவத்திதங் ஸம்மதே³வ அனுப்பவத்தேதி; தங் ஹோதி சக்கங் அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மி’’ந்தி. து³தியங்.
‘‘Katamehi pañcahi? Idha, bhikkhave, sāriputto atthaññū, dhammaññū, mattaññū , kālaññū, parisaññū. Imehi kho, bhikkhave, pañcahi dhammehi samannāgato sāriputto tathāgatena anuttaraṃ dhammacakkaṃ pavattitaṃ sammadeva anuppavatteti; taṃ hoti cakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmi’’nti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. து³தியசக்கானுவத்தனஸுத்தவண்ணனா • 2. Dutiyacakkānuvattanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. து³தியசக்கானுவத்தனஸுத்தவண்ணனா • 2. Dutiyacakkānuvattanasuttavaṇṇanā
