| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
10. து³தியத³ப்³ப³ஸுத்தவண்ணனா
10. Dutiyadabbasuttavaṇṇanā
80. த³ஸமே தத்ர கோ² ப⁴க³வா பி⁴க்கூ² ஆமந்தேஸீதி ப⁴க³வா ராஜக³ஹே யதா²பி⁴ரந்தங் விஹரித்வா ஜனபத³சாரிகங் சரந்தோ அனுக்கமேன ஸாவத்தி²ங் பத்வா ஜேதவனே விஹரந்தோயேவ யேஸங் பி⁴க்கூ²னங் ஆயஸ்மதோ த³ப்³ப³ஸ்ஸ மல்லபுத்தஸ்ஸ பரினிப்³பா³னங் அபச்சக்க²ங், தேஸங் தங் பச்சக்க²ங் கத்வா த³ஸ்ஸேதுங், யேபி ச மெத்தியபூ⁴மஜகேஹி கதேன அபூ⁴தேன அப்³பா⁴சிக்க²ணேன தே²ரே கா³ரவரஹிதா புது²ஜ்ஜனா, தேஸங் தே²ரே ப³ஹுமானுப்பாத³னத்த²ஞ்ச ஆமந்தேஸி. தத்த² தத்ராதி வசனஸஞ்ஞாபனே நிபாதமத்தங். கோ²தி அவதா⁴ரணே. தேஸு ‘‘தத்ரா’’தி இமினா ‘‘ப⁴க³வா பி⁴க்கூ² ஆமந்தேஸீ’’தி ஏதேஸங் பதா³னங் வுச்சமானதங்யேவ ஜோதேதி. ‘‘கோ²’’தி பன இமினா ஆமந்தேஸியேவ, நாஸ்ஸ ஆமந்தனே கோசி அந்தராயோ அஹோஸீதி இமமத்த²ங் த³ஸ்ஸேதி. அத² வா தத்ராதி தஸ்மிங் ஆராமே. கோ²தி வசனாலங்காரே நிபாதோ. ஆமந்தேஸீதி அபா⁴ஸி. கஸ்மா பன ப⁴க³வா பி⁴க்கூ²யேவ ஆமந்தேஸீதி? ஜெட்ட²த்தா ஸெட்ட²த்தா ஆஸன்னத்தா ஸப்³ப³காலங் ஸன்னிஹிதத்தா த⁴ம்மதே³ஸனாய விஸேஸதோ பா⁴ஜனபூ⁴தத்தா ச.
80. Dasame tatra kho bhagavā bhikkhū āmantesīti bhagavā rājagahe yathābhirantaṃ viharitvā janapadacārikaṃ caranto anukkamena sāvatthiṃ patvā jetavane viharantoyeva yesaṃ bhikkhūnaṃ āyasmato dabbassa mallaputtassa parinibbānaṃ apaccakkhaṃ, tesaṃ taṃ paccakkhaṃ katvā dassetuṃ, yepi ca mettiyabhūmajakehi katena abhūtena abbhācikkhaṇena there gāravarahitā puthujjanā, tesaṃ there bahumānuppādanatthañca āmantesi. Tattha tatrāti vacanasaññāpane nipātamattaṃ. Khoti avadhāraṇe. Tesu ‘‘tatrā’’ti iminā ‘‘bhagavā bhikkhū āmantesī’’ti etesaṃ padānaṃ vuccamānataṃyeva joteti. ‘‘Kho’’ti pana iminā āmantesiyeva, nāssa āmantane koci antarāyo ahosīti imamatthaṃ dasseti. Atha vā tatrāti tasmiṃ ārāme. Khoti vacanālaṅkāre nipāto. Āmantesīti abhāsi. Kasmā pana bhagavā bhikkhūyeva āmantesīti? Jeṭṭhattā seṭṭhattā āsannattā sabbakālaṃ sannihitattā dhammadesanāya visesato bhājanabhūtattā ca.
பி⁴க்க²வோதி தேஸங் ஆமந்தனாகாரத³ஸ்ஸனங். ப⁴த³ந்தேதி ஆமந்திதானங் பி⁴க்கூ²னங் கா³ரவேன ஸத்து² படிவசனதா³னங். தத்த² ‘‘பி⁴க்க²வோ’’தி வத³ந்தோ ப⁴க³வா தே பி⁴க்கூ² ஆலபதி. ‘‘ப⁴த³ந்தே’’தி வத³ந்தா தே பச்சாலபந்தி. அபிச ‘‘பி⁴க்க²வோ’’தி இமினா கருணாவிப்பா²ரஸொம்மஹத³யனிஸ்ஸிதபுப்³ப³ங்க³மேன வசனேன தே பி⁴க்கூ² கம்மட்டா²னமனஸிகாரத⁴ம்மபச்சவெக்க²ணாதி³தோ நிவத்தெத்வா அத்தனோ முகா²பி⁴முகே² கரோதி. ‘‘ப⁴த³ந்தே’’தி இமினா ஸத்த²ரி ஆத³ரப³ஹுமானகா³ரவதீ³பனவசனேன தே பி⁴க்கூ² அத்தனோ ஸுஸ்ஸூஸதங் ஓவாத³ப்படிக்³க³ஹகா³ரவபா⁴வஞ்ச படிவேதெ³ந்தி. ப⁴க³வதோ பச்சஸ்ஸோஸுந்தி தே பி⁴க்கூ² ப⁴க³வதோ வசனங் பதிஅஸ்ஸோஸுங் ஸோதுகாமதங் ஜனேஸுங் . ஏதத³வோசாதி ப⁴க³வா ஏதங் இதா³னி வக்க²மானங் ஸகலங் ஸுத்தங் அபா⁴ஸி. த³ப்³ப³ஸ்ஸ, பி⁴க்க²வே, மல்லபுத்தஸ்ஸாதிஆதி³ அனந்தரஸுத்தே வுத்தத்த²மேவ. ஏதமத்த²ந்திஆதீ³ஸுபி அபுப்³ப³ங் நத்தி², அனந்தரஸுத்தே வுத்தனயேனேவ வேதி³தப்³ப³ங்.
Bhikkhavoti tesaṃ āmantanākāradassanaṃ. Bhadanteti āmantitānaṃ bhikkhūnaṃ gāravena satthu paṭivacanadānaṃ. Tattha ‘‘bhikkhavo’’ti vadanto bhagavā te bhikkhū ālapati. ‘‘Bhadante’’ti vadantā te paccālapanti. Apica ‘‘bhikkhavo’’ti iminā karuṇāvipphārasommahadayanissitapubbaṅgamena vacanena te bhikkhū kammaṭṭhānamanasikāradhammapaccavekkhaṇādito nivattetvā attano mukhābhimukhe karoti. ‘‘Bhadante’’ti iminā satthari ādarabahumānagāravadīpanavacanena te bhikkhū attano sussūsataṃ ovādappaṭiggahagāravabhāvañca paṭivedenti. Bhagavato paccassosunti te bhikkhū bhagavato vacanaṃ patiassosuṃ sotukāmataṃ janesuṃ . Etadavocāti bhagavā etaṃ idāni vakkhamānaṃ sakalaṃ suttaṃ abhāsi. Dabbassa, bhikkhave, mallaputtassātiādi anantarasutte vuttatthameva. Etamatthantiādīsupi apubbaṃ natthi, anantarasutte vuttanayeneva veditabbaṃ.
கா³தா²ஸு பன அயோக⁴னஹதஸ்ஸாதி அயோ ஹஞ்ஞதி ஏதேனாதி அயோக⁴னங், கம்மாரானங் அயோகூடங் அயோமுட்டி² ச. தேன அயோக⁴னேன ஹதஸ்ஸ பஹதஸ்ஸ. கேசி பன ‘‘அயோக⁴னஹதஸ்ஸாதி க⁴னஅயோபிண்ட³ங் ஹதஸ்ஸா’’தி அத்த²ங் வத³ந்தி. ஏவ-ஸத்³தோ³ செத்த² நிபாதமத்தங். ஜலதோ ஜாதவேத³ஸோதி ஜா²யமானஸ்ஸ அக்³கி³ஸ்ஸ. அனாத³ரே ஏதங் ஸாமிவசனங். அனுபுப்³பூ³பஸந்தஸ்ஸாதி அனுக்கமேன உபஸந்தஸ்ஸ விஜ்ஜா²தஸ்ஸ நிருத்³த⁴ஸ்ஸ. யதா² ந ஞாயதே க³தீதி யதா² தஸ்ஸ க³தி ந ஞாயதி. இத³ங் வுத்தங் ஹோதி – அயோமுட்டி²கூடாதி³னா மஹதா அயோக⁴னேன ஹதஸ்ஸ ஸங்ஹதஸ்ஸ, கங்ஸபா⁴ஜனாதி³க³தஸ்ஸ வா ஜலமானஸ்ஸ அக்³கி³ஸ்ஸ, ததா² உப்பன்னஸ்ஸ வா ஸத்³த³ஸ்ஸ அனுக்கமேன உபஸந்தஸ்ஸ ஸுவூபஸந்தஸ்ஸ த³ஸஸு தி³ஸாஸு ந கத்த²சி க³தி பஞ்ஞாயதி பச்சயனிரோதே⁴ன அப்படிஸந்தி⁴கனிருத்³த⁴த்தா.
Gāthāsu pana ayoghanahatassāti ayo haññati etenāti ayoghanaṃ, kammārānaṃ ayokūṭaṃ ayomuṭṭhi ca. Tena ayoghanena hatassa pahatassa. Keci pana ‘‘ayoghanahatassāti ghanaayopiṇḍaṃ hatassā’’ti atthaṃ vadanti. Eva-saddo cettha nipātamattaṃ. Jalato jātavedasoti jhāyamānassa aggissa. Anādare etaṃ sāmivacanaṃ. Anupubbūpasantassāti anukkamena upasantassa vijjhātassa niruddhassa. Yathā na ñāyate gatīti yathā tassa gati na ñāyati. Idaṃ vuttaṃ hoti – ayomuṭṭhikūṭādinā mahatā ayoghanena hatassa saṃhatassa, kaṃsabhājanādigatassa vā jalamānassa aggissa, tathā uppannassa vā saddassa anukkamena upasantassa suvūpasantassa dasasu disāsu na katthaci gati paññāyati paccayanirodhena appaṭisandhikaniruddhattā.
ஏவங் ஸம்மாவிமுத்தானந்தி ஏவங் ஸம்மா ஹேதுனா ஞாயேன தத³ங்க³விக்க²ம்ப⁴னவிமுத்திபுப்³ப³ங்க³மேன அரியமக்³கே³ன சதூஹிபி உபாதா³னேஹி ஆஸவேஹி ச விமுத்தத்தா ஸம்மா விமுத்தானங், ததோ ஏவ காமபப³ந்த⁴ஸங்கா²தங் காமோக⁴ங் ப⁴வோகா⁴தி³பே⁴த³ங் அவஸிட்ட²ங் ஓக⁴ஞ்ச தரித்வா டி²தத்தா காமப³ந்தோ⁴க⁴தாரினங் ஸுட்டு² படிபஸ்ஸம்பி⁴தஸப்³ப³கிலேஸவிப்ப²ந்தி³தத்தா கிலேஸாபி⁴ஸங்கா²ரவாதேஹி ச அகம்பனீயதாய அசலங் அனுபாதி³ஸேஸனிப்³பா³னஸங்கா²தங் ஸப்³ப³ஸங்கா²ரூபஸமங் ஸுக²ங் பத்தானங் அதி⁴க³தானங் கீ²ணாஸவானங் க³தி தே³வமனுஸ்ஸாதி³பே⁴தா³ஸு க³தீஸு அயங் நாமாதி பஞ்ஞபேதப்³ப³தாய அபா⁴வத்தா பஞ்ஞாபேதுங் நத்தி² ந உபலப்³ப⁴தி, யதா²வுத்தஜாதவேதோ³ விய அபஞ்ஞத்திகபா⁴வமேவ ஹி ஸோ க³தோதி அத்தோ².
Evaṃ sammāvimuttānanti evaṃ sammā hetunā ñāyena tadaṅgavikkhambhanavimuttipubbaṅgamena ariyamaggena catūhipi upādānehi āsavehi ca vimuttattā sammā vimuttānaṃ, tato eva kāmapabandhasaṅkhātaṃ kāmoghaṃ bhavoghādibhedaṃ avasiṭṭhaṃ oghañca taritvā ṭhitattā kāmabandhoghatārinaṃ suṭṭhu paṭipassambhitasabbakilesavipphanditattā kilesābhisaṅkhāravātehi ca akampanīyatāya acalaṃ anupādisesanibbānasaṅkhātaṃ sabbasaṅkhārūpasamaṃ sukhaṃ pattānaṃ adhigatānaṃ khīṇāsavānaṃ gati devamanussādibhedāsu gatīsu ayaṃ nāmāti paññapetabbatāya abhāvattā paññāpetuṃ natthi na upalabbhati, yathāvuttajātavedo viya apaññattikabhāvameva hi so gatoti attho.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
நிட்டி²தா ச பாடலிகா³மியவக்³க³வண்ணனா.
Niṭṭhitā ca pāṭaligāmiyavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 10. து³தியத³ப்³ப³ஸுத்தங் • 10. Dutiyadabbasuttaṃ
