| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. து³தியஏஸனாஸுத்தவண்ணனா
6. Dutiyaesanāsuttavaṇṇanā
55. ச²ட்டே² ப்³ரஹ்மசரியேஸனா ஸஹாதி ப்³ரஹ்மசரியேஸனாய ஸத்³தி⁴ங். விப⁴த்திலோபேன ஹி அயங் நித்³தே³ஸோ, கரணத்தே² வா ஏதங் பச்சத்தவசனங். இத³ங் வுத்தங் ஹோதி ‘‘ப்³ரஹ்மசரியேஸனாய ஸத்³தி⁴ங் காமேஸனா, ப⁴வேஸனாதி திஸ்ஸோ ஏஸனா’’தி. தாஸு ப்³ரஹ்மசரியேஸனங் ஸரூபதோ த³ஸ்ஸேதுங் ‘‘இதிஸச்சபராமாஸோ, தி³ட்டி²ட்டா²னா ஸமுஸ்ஸயா’’தி வுத்தங். தஸ்ஸத்தோ² – இதி ஏவங் ஸச்சந்தி பராமாஸோ இதிஸச்சபராமாஸோ. இத³மேவ ஸச்சங், மோக⁴மஞ்ஞந்தி தி³ட்டி²யா பவத்திஆகாரங் த³ஸ்ஸேதி. தி³ட்டி²யோ ஏவ ஸப்³பா³னத்த²ஹேதுபா⁴வதோ தி³ட்டி²ட்டா²னா. வுத்தஞ்ஹேதங் – ‘‘மிச்சா²தி³ட்டி²பரமாஹங், பி⁴க்க²வே, வஜ்ஜங் வதா³மீ’’தி (அ॰ நி॰ 1.310). தா ஏவ ச உபரூபரி வட்³ட⁴மானா லோபா⁴தி³கிலேஸஸமுஸ்ஸயேன ச ஸமுஸ்ஸயா, ‘‘இத³மேவ ஸச்சங், மோக⁴மஞ்ஞ’’ந்தி மிச்சா²பி⁴னிவிஸமானா ஸப்³பா³னத்த²ஹேதுபூ⁴தா கிலேஸது³க்கூ²பசயஹேதுபூ⁴தா ச தி³ட்டி²யோ ப்³ரஹ்மசரியேஸனாதி வுத்தங் ஹோதி. ஏதேன பவத்திஆகாரதோ நிப்³ப³த்திதோ ச ப்³ரஹ்மசரியேஸனா த³ஸ்ஸிதாதி வேதி³தப்³பா³.
55. Chaṭṭhe brahmacariyesanā sahāti brahmacariyesanāya saddhiṃ. Vibhattilopena hi ayaṃ niddeso, karaṇatthe vā etaṃ paccattavacanaṃ. Idaṃ vuttaṃ hoti ‘‘brahmacariyesanāya saddhiṃ kāmesanā, bhavesanāti tisso esanā’’ti. Tāsu brahmacariyesanaṃ sarūpato dassetuṃ ‘‘itisaccaparāmāso, diṭṭhiṭṭhānā samussayā’’ti vuttaṃ. Tassattho – iti evaṃ saccanti parāmāso itisaccaparāmāso. Idameva saccaṃ, moghamaññanti diṭṭhiyā pavattiākāraṃ dasseti. Diṭṭhiyo eva sabbānatthahetubhāvato diṭṭhiṭṭhānā. Vuttañhetaṃ – ‘‘micchādiṭṭhiparamāhaṃ, bhikkhave, vajjaṃ vadāmī’’ti (a. ni. 1.310). Tā eva ca uparūpari vaḍḍhamānā lobhādikilesasamussayena ca samussayā, ‘‘idameva saccaṃ, moghamañña’’nti micchābhinivisamānā sabbānatthahetubhūtā kilesadukkhūpacayahetubhūtā ca diṭṭhiyo brahmacariyesanāti vuttaṃ hoti. Etena pavattiākārato nibbattito ca brahmacariyesanā dassitāti veditabbā.
ஸப்³ப³ராக³விரத்தஸ்ஸாதி ஸப்³பே³ஹி காமராக³ப⁴வராகே³ஹி விரத்தஸ்ஸ. ததோ ஏவ தண்ஹக்க²யஸங்கா²தே நிப்³பா³னே விமுத்தத்தா தண்ஹக்க²யவிமுத்தினோ அரஹதோ. ஏஸனா படினிஸ்ஸட்டா²தி காமேஸனா, ப⁴வேஸனா ச ஸப்³ப³ஸோ நிஸ்ஸட்டா² பஹீனா. தி³ட்டி²ட்டா²னா ஸமூஹதாதி ப்³ரஹ்மசரியேஸனாஸங்கா²தா தி³ட்டி²ட்டா²னா ச பட²மமக்³கே³னேவ ஸமுக்³கா⁴திதா. ஏஸனானங் க²யாதி ஏவமேதாஸங் திஸ்ஸன்னங் ஏஸனானங் க²யா அனுப்பாத³னிரோதா⁴ பி⁴ன்னகிலேஸத்தா. பி⁴க்கூ²தி ச ஸப்³ப³ஸோ ஆஸாபா⁴ வா. நிராஸோதி ச தி³ட்டே²கட்ட²ஸ்ஸ விசிகிச்சா²கத²ங்கதா²ஸல்லஸ்ஸ பஹீனத்தா அகத²ங்கதீ²தி ச வுச்சதீதி.
Sabbarāgavirattassāti sabbehi kāmarāgabhavarāgehi virattassa. Tato eva taṇhakkhayasaṅkhāte nibbāne vimuttattā taṇhakkhayavimuttino arahato. Esanā paṭinissaṭṭhāti kāmesanā, bhavesanā ca sabbaso nissaṭṭhā pahīnā. Diṭṭhiṭṭhānā samūhatāti brahmacariyesanāsaṅkhātā diṭṭhiṭṭhānā ca paṭhamamaggeneva samugghātitā. Esanānaṃ khayāti evametāsaṃ tissannaṃ esanānaṃ khayā anuppādanirodhā bhinnakilesattā. Bhikkhūti ca sabbaso āsābhā vā. Nirāsoti ca diṭṭhekaṭṭhassa vicikicchākathaṃkathāsallassa pahīnattā akathaṃkathīti ca vuccatīti.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. து³தியஏஸனாஸுத்தங் • 6. Dutiyaesanāsuttaṃ
