| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. து³தியஹத்த²கஸுத்தங்
4. Dutiyahatthakasuttaṃ
24. ஏகங் ஸமயங் ப⁴க³வா ஆளவியங் விஹரதி அக்³கா³ளவே சேதியே. அத² கோ² ஹத்த²கோ ஆளவகோ பஞ்சமத்தேஹி உபாஸகஸதேஹி பரிவுதோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஹத்த²கங் ஆளவகங் ப⁴க³வா ஏதத³வோச – ‘‘மஹதீ கோ² த்யாயங், ஹத்த²க, பரிஸா. கத²ங் பன த்வங், ஹத்த²க, இமங் மஹதிங் பரிஸங் ஸங்க³ண்ஹாஸீ’’தி? ‘‘யானிமானி, ப⁴ந்தே, ப⁴க³வதா தே³ஸிதானி 1 சத்தாரி ஸங்க³ஹவத்தூ²னி, தேஹாஹங் 2 இமங் மஹதிங் பரிஸங் ஸங்க³ண்ஹாமி. அஹங், ப⁴ந்தே, யங் ஜானாமி – ‘அயங் தா³னேன ஸங்க³ஹேதப்³போ³’தி, தங் தா³னேன ஸங்க³ண்ஹாமி; யங் ஜானாமி – ‘அயங் பெய்யவஜ்ஜேன ஸங்க³ஹேதப்³போ³’தி, தங் பெய்யவஜ்ஜேன ஸங்க³ண்ஹாமி; யங் ஜானாமி – ‘அயங் அத்த²சரியாய ஸங்க³ஹேதப்³போ³’தி, தங் அத்த²சரியாய ஸங்க³ண்ஹாமி; யங் ஜானாமி – ‘அயங் ஸமானத்ததாய ஸங்க³ஹேதப்³போ³’தி, தங் ஸமானத்ததாய ஸங்க³ண்ஹாமி. ஸங்விஜ்ஜந்தி கோ² பன மே, ப⁴ந்தே, குலே போ⁴கா³. த³லித்³த³ஸ்ஸ கோ² நோ ததா² ஸோதப்³ப³ங் மஞ்ஞந்தீ’’தி. ‘‘ஸாது⁴ ஸாது⁴, ஹத்த²க! யோனி கோ² த்யாயங், ஹத்த²க, மஹதிங் பரிஸங் ஸங்க³ஹேதுங். யே ஹி கேசி, ஹத்த²க, அதீதமத்³தா⁴னங் மஹதிங் பரிஸங் ஸங்க³ஹேஸுங், ஸப்³பே³ தே இமேஹேவ சதூஹி ஸங்க³ஹவத்தூ²ஹி மஹதிங் பரிஸங் ஸங்க³ஹேஸுங். யேபி ஹி கேசி, ஹத்த²க, அனாக³தமத்³தா⁴னங் மஹதிங் பரிஸங் ஸங்க³ண்ஹிஸ்ஸந்தி , ஸப்³பே³ தே இமேஹேவ சதூஹி ஸங்க³ஹவத்தூ²ஹி மஹதிங் பரிஸங் ஸங்க³ண்ஹிஸ்ஸந்தி. யேபி ஹி கேசி, ஹத்த²க, ஏதரஹி மஹதிங் பரிஸங் ஸங்க³ண்ஹந்தி, ஸப்³பே³ தே இமேஹேவ சதூஹி ஸங்க³ஹவத்தூ²ஹி மஹதிங் பரிஸங் ஸங்க³ண்ஹந்தீ’’தி.
24. Ekaṃ samayaṃ bhagavā āḷaviyaṃ viharati aggāḷave cetiye. Atha kho hatthako āḷavako pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho hatthakaṃ āḷavakaṃ bhagavā etadavoca – ‘‘mahatī kho tyāyaṃ, hatthaka, parisā. Kathaṃ pana tvaṃ, hatthaka, imaṃ mahatiṃ parisaṃ saṅgaṇhāsī’’ti? ‘‘Yānimāni, bhante, bhagavatā desitāni 3 cattāri saṅgahavatthūni, tehāhaṃ 4 imaṃ mahatiṃ parisaṃ saṅgaṇhāmi. Ahaṃ, bhante, yaṃ jānāmi – ‘ayaṃ dānena saṅgahetabbo’ti, taṃ dānena saṅgaṇhāmi; yaṃ jānāmi – ‘ayaṃ peyyavajjena saṅgahetabbo’ti, taṃ peyyavajjena saṅgaṇhāmi; yaṃ jānāmi – ‘ayaṃ atthacariyāya saṅgahetabbo’ti, taṃ atthacariyāya saṅgaṇhāmi; yaṃ jānāmi – ‘ayaṃ samānattatāya saṅgahetabbo’ti, taṃ samānattatāya saṅgaṇhāmi. Saṃvijjanti kho pana me, bhante, kule bhogā. Daliddassa kho no tathā sotabbaṃ maññantī’’ti. ‘‘Sādhu sādhu, hatthaka! Yoni kho tyāyaṃ, hatthaka, mahatiṃ parisaṃ saṅgahetuṃ. Ye hi keci, hatthaka, atītamaddhānaṃ mahatiṃ parisaṃ saṅgahesuṃ, sabbe te imeheva catūhi saṅgahavatthūhi mahatiṃ parisaṃ saṅgahesuṃ. Yepi hi keci, hatthaka, anāgatamaddhānaṃ mahatiṃ parisaṃ saṅgaṇhissanti , sabbe te imeheva catūhi saṅgahavatthūhi mahatiṃ parisaṃ saṅgaṇhissanti. Yepi hi keci, hatthaka, etarahi mahatiṃ parisaṃ saṅgaṇhanti, sabbe te imeheva catūhi saṅgahavatthūhi mahatiṃ parisaṃ saṅgaṇhantī’’ti.
அத² கோ² ஹத்த²கோ ஆளவகோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி . அத² கோ² ப⁴க³வா அசிரபக்கந்தே ஹத்த²கே ஆளவகே பி⁴க்கூ² ஆமந்தேஸி – ‘‘அட்ட²ஹி, பி⁴க்க²வே, அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தங் ஹத்த²கங் ஆளவகங் தா⁴ரேத². கதமேஹி அட்ட²ஹி? ஸத்³தோ⁴, பி⁴க்க²வே, ஹத்த²கோ ஆளவகோ; ஸீலவா, பி⁴க்க²வே…பே॰… ஹிரீமா… ஒத்தப்பீ… ப³ஹுஸ்ஸுதோ… சாக³வா… பஞ்ஞவா, பி⁴க்க²வே, ஹத்த²கோ ஆளவகோ; அப்பிச்சோ², பி⁴க்க²வே, ஹத்த²கோ ஆளவகோ. இமேஹி கோ², பி⁴க்க²வே, அட்ட²ஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தங் ஹத்த²கங் ஆளவகங் தா⁴ரேதா²’’தி. சதுத்த²ங்.
Atha kho hatthako āḷavako bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi . Atha kho bhagavā acirapakkante hatthake āḷavake bhikkhū āmantesi – ‘‘aṭṭhahi, bhikkhave, acchariyehi abbhutehi dhammehi samannāgataṃ hatthakaṃ āḷavakaṃ dhāretha. Katamehi aṭṭhahi? Saddho, bhikkhave, hatthako āḷavako; sīlavā, bhikkhave…pe… hirīmā… ottappī… bahussuto… cāgavā… paññavā, bhikkhave, hatthako āḷavako; appiccho, bhikkhave, hatthako āḷavako. Imehi kho, bhikkhave, aṭṭhahi acchariyehi abbhutehi dhammehi samannāgataṃ hatthakaṃ āḷavakaṃ dhārethā’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. து³தியஹத்த²கஸுத்தவண்ணனா • 4. Dutiyahatthakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. பட²மஉக்³க³ஸுத்தாதி³வண்ணனா • 1-7. Paṭhamauggasuttādivaṇṇanā
