| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. து³தியகாலஸுத்தங்
7. Dutiyakālasuttaṃ
147. ‘‘சத்தாரோமே, பி⁴க்க²வே, காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானங் க²யங் பாபெந்தி. கதமே சத்தாரோ? காலேன த⁴ம்மஸ்ஸவனங், காலேன த⁴ம்மஸாகச்சா², காலேன ஸம்மஸனா, காலேன விபஸ்ஸனா – இமே கோ², பி⁴க்க²வே, சத்தாரோ காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானங் க²யங் பாபெந்தி.
147. ‘‘Cattārome, bhikkhave, kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti. Katame cattāro? Kālena dhammassavanaṃ, kālena dhammasākacchā, kālena sammasanā, kālena vipassanā – ime kho, bhikkhave, cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti.
‘‘ஸெய்யதா²பி, பி⁴க்க²வே, உபரிபப்³ப³தே து²ல்லபு²ஸிதகே தே³வே வஸ்ஸந்தே தங் உத³கங் யதா²னின்னங் பவத்தமானங் பப்³ப³தகந்த³ரபத³ரஸாகா² பரிபூரேதி; பப்³ப³தகந்த³ரபத³ரஸாகா² பரிபூரா குஸொப்³பே⁴ பரிபூரெந்தி; குஸொப்³பா⁴ பரிபூரா மஹாஸொப்³பே⁴ பரிபூரெந்தி; மஹாஸொப்³பா⁴ பரிபூரா குன்னதி³யோ பரிபூரெந்தி; குன்னதி³யோ பரிபூரா மஹானதி³யோ பரிபூரெந்தி; மஹானதி³யோ பரிபூரா ஸமுத்³த³ங் 1 பரிபூரெந்தி. ஏவமேவங் கோ², பி⁴க்க²வே, இமே சத்தாரோ காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானங் க²யங் பாபெந்தீ’’தி. ஸத்தமங்.
‘‘Seyyathāpi, bhikkhave, uparipabbate thullaphusitake deve vassante taṃ udakaṃ yathāninnaṃ pavattamānaṃ pabbatakandarapadarasākhā paripūreti; pabbatakandarapadarasākhā paripūrā kusobbhe paripūrenti; kusobbhā paripūrā mahāsobbhe paripūrenti; mahāsobbhā paripūrā kunnadiyo paripūrenti; kunnadiyo paripūrā mahānadiyo paripūrenti; mahānadiyo paripūrā samuddaṃ 2 paripūrenti. Evamevaṃ kho, bhikkhave, ime cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpentī’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. து³தியகாலஸுத்தவண்ணனா • 7. Dutiyakālasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-10. து³தியகாலஸுத்தாதி³வண்ணனா • 7-10. Dutiyakālasuttādivaṇṇanā
