| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. து³தியக²மஸுத்தங்
5. Dutiyakhamasuttaṃ
165. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? அக்க²மா படிபதா³, க²மா படிபதா³, த³மா படிபதா³, ஸமா படிபதா³.
165. ‘‘Catasso imā, bhikkhave, paṭipadā. Katamā catasso? Akkhamā paṭipadā, khamā paṭipadā, damā paṭipadā, samā paṭipadā.
‘‘கதமா ச, பி⁴க்க²வே, அக்க²மா படிபதா³? இத⁴, பி⁴க்க²வே, ஏகச்சோ அக்க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய, ட³ங்ஸமகஸவாதாதபஸரீஸபஸம்ப²ஸ்ஸானங் து³ருத்தானங் து³ராக³தானங் வசனபதா²னங் உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங் கடுகானங் அஸாதானங் அமனாபானங் பாணஹரானங் அனதி⁴வாஸகஜாதிகோ ஹோதி. அயங் வுச்சதி, பி⁴க்க²வே, அக்க²மா படிபதா³ .
‘‘Katamā ca, bhikkhave, akkhamā paṭipadā? Idha, bhikkhave, ekacco akkhamo hoti sītassa uṇhassa jighacchāya pipāsāya, ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ anadhivāsakajātiko hoti. Ayaṃ vuccati, bhikkhave, akkhamā paṭipadā .
‘‘கதமா ச, பி⁴க்க²வே, க²மா படிபதா³? இத⁴, பி⁴க்க²வே, ஏகச்சோ க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய, ட³ங்ஸமகஸவாதாதபஸரீஸபஸம்ப²ஸ்ஸானங் து³ருத்தானங் து³ராக³தானங் வசனபதா²னங் உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங் கடுகானங் அஸாதானங் அமனாபானங் பாணஹரானங் அதி⁴வாஸகஜாதிகோ ஹோதி. அயங் வுச்சதி, பி⁴க்க²வே, க²மா படிபதா³.
‘‘Katamā ca, bhikkhave, khamā paṭipadā? Idha, bhikkhave, ekacco khamo hoti sītassa uṇhassa jighacchāya pipāsāya, ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātiko hoti. Ayaṃ vuccati, bhikkhave, khamā paṭipadā.
‘‘கதமா ச, பி⁴க்க²வே, த³மா படிபதா³? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி…பே॰… ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி; ரக்க²தி மனிந்த்³ரியங்; மனிந்த்³ரியே ஸங்வரங் ஆபஜ்ஜதி. அயங் வுச்சதி, பி⁴க்க²வே, த³மா படிபதா³.
‘‘Katamā ca, bhikkhave, damā paṭipadā? Idha, bhikkhave, bhikkhu cakkhunā rūpaṃ disvā na nimittaggāhī hoti…pe… sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya na nimittaggāhī hoti nānubyañjanaggāhī; yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati; rakkhati manindriyaṃ; manindriye saṃvaraṃ āpajjati. Ayaṃ vuccati, bhikkhave, damā paṭipadā.
‘‘கதமா ச, பி⁴க்க²வே, ஸமா படிபதா³? இத⁴, பி⁴க்க²வே, பி⁴க்கு² உப்பன்னங் காமவிதக்கங் நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வங் க³மேதி, உப்பன்னங் ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வங் க³மேதி. அயங் வுச்சதி, பி⁴க்க²வே, ஸமா படிபதா³. இமா கோ², பி⁴க்க²வே, சதஸ்ஸோ படிபதா³’’தி. பஞ்சமங்.
‘‘Katamā ca, bhikkhave, samā paṭipadā? Idha, bhikkhave, bhikkhu uppannaṃ kāmavitakkaṃ nādhivāseti pajahati vinodeti sameti byantīkaroti anabhāvaṃ gameti, uppannaṃ byāpādavitakkaṃ…pe… uppannaṃ vihiṃsāvitakkaṃ… uppannuppanne pāpake akusale dhamme nādhivāseti pajahati vinodeti sameti byantīkaroti anabhāvaṃ gameti. Ayaṃ vuccati, bhikkhave, samā paṭipadā. Imā kho, bhikkhave, catasso paṭipadā’’ti. Pañcamaṃ.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-6. பட²மக²மஸுத்தாதி³வண்ணனா • 4-6. Paṭhamakhamasuttādivaṇṇanā
