| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. து³தியமஹாபஞ்ஹாஸுத்தங்
8. Dutiyamahāpañhāsuttaṃ
28. ஏகங் ஸமயங் ப⁴க³வா கஜங்க³லாயங் விஹரதி வேளுவனே. அத² கோ² ஸம்ப³ஹுலா கஜங்க³லகா உபாஸகா யேன கஜங்க³லிகா பி⁴க்கு²னீ தேனுபஸங்கமிங்ஸு; உபஸங்கமித்வா கஜங்க³லிகங் பி⁴க்கு²னிங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² கஜங்க³லகா உபாஸகா கஜங்க³லிகங் பி⁴க்கு²னிங் ஏதத³வோசுங் –
28. Ekaṃ samayaṃ bhagavā kajaṅgalāyaṃ viharati veḷuvane. Atha kho sambahulā kajaṅgalakā upāsakā yena kajaṅgalikā bhikkhunī tenupasaṅkamiṃsu; upasaṅkamitvā kajaṅgalikaṃ bhikkhuniṃ abhivādetvā ekamantaṃ nisīdiṃsu. Ekamantaṃ nisinnā kho kajaṅgalakā upāsakā kajaṅgalikaṃ bhikkhuniṃ etadavocuṃ –
‘‘வுத்தமித³ங், அய்யே, ப⁴க³வதா மஹாபஞ்ஹேஸு – ‘ஏகோ பஞ்ஹோ ஏகோ உத்³தே³ஸோ ஏகங் வெய்யாகரணங், த்³வே பஞ்ஹா த்³வே உத்³தே³ஸா த்³வே வெய்யாகரணானி, தயோ பஞ்ஹா தயோ உத்³தே³ஸா தீணி வெய்யாகரணானி, சத்தாரோ பஞ்ஹா சத்தாரோ உத்³தே³ஸா சத்தாரி வெய்யாகரணானி, பஞ்ச பஞ்ஹா பஞ்சுத்³தே³ஸா பஞ்ச வெய்யாகரணானி, ச² பஞ்ஹா ச² உத்³தே³ஸா ச² வெய்யாகரணானி, ஸத்த பஞ்ஹா ஸத்துத்³தே³ஸா ஸத்த வெய்யாகரணானி, அட்ட² பஞ்ஹா அட்டு²த்³தே³ஸா அட்ட² வெய்யாகரணானி, நவ பஞ்ஹா நவுத்³தே³ஸா நவ வெய்யாகரணானி, த³ஸ பஞ்ஹா த³ஸுத்³தே³ஸா த³ஸ வெய்யாகரணானீ’தி. இமஸ்ஸ நு கோ², அய்யே, ப⁴க³வதா ஸங்கி²த்தேன பா⁴ஸிதஸ்ஸ கத²ங் வித்தா²ரேன அத்தோ² த³ட்ட²ப்³போ³’’தி?
‘‘Vuttamidaṃ, ayye, bhagavatā mahāpañhesu – ‘eko pañho eko uddeso ekaṃ veyyākaraṇaṃ, dve pañhā dve uddesā dve veyyākaraṇāni, tayo pañhā tayo uddesā tīṇi veyyākaraṇāni, cattāro pañhā cattāro uddesā cattāri veyyākaraṇāni, pañca pañhā pañcuddesā pañca veyyākaraṇāni, cha pañhā cha uddesā cha veyyākaraṇāni, satta pañhā sattuddesā satta veyyākaraṇāni, aṭṭha pañhā aṭṭhuddesā aṭṭha veyyākaraṇāni, nava pañhā navuddesā nava veyyākaraṇāni, dasa pañhā dasuddesā dasa veyyākaraṇānī’ti. Imassa nu kho, ayye, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘ந கோ² பனேதங், ஆவுஸோ, ப⁴க³வதோ ஸம்முகா² ஸுதங் ஸம்முகா² படிக்³க³ஹிதங், நபி மனோபா⁴வனீயானங் பி⁴க்கூ²னங் ஸம்முகா² ஸுதங் ஸம்முகா² படிக்³க³ஹிதங்; அபி ச, யதா² மெத்த² கா²யதி தங் ஸுணாத², ஸாது⁴கங் மனஸி கரோத², பா⁴ஸிஸ்ஸாமீ’’தி. ‘‘ஏவங், அய்யே’’தி, கோ² கஜங்க³லகா உபாஸகா கஜங்க³லிகாய பி⁴க்கு²னியா பச்சஸ்ஸோஸுங். கஜங்க³லிகா பி⁴க்கு²னீ ஏதத³வோச –
‘‘Na kho panetaṃ, āvuso, bhagavato sammukhā sutaṃ sammukhā paṭiggahitaṃ, napi manobhāvanīyānaṃ bhikkhūnaṃ sammukhā sutaṃ sammukhā paṭiggahitaṃ; api ca, yathā mettha khāyati taṃ suṇātha, sādhukaṃ manasi karotha, bhāsissāmī’’ti. ‘‘Evaṃ, ayye’’ti, kho kajaṅgalakā upāsakā kajaṅgalikāya bhikkhuniyā paccassosuṃ. Kajaṅgalikā bhikkhunī etadavoca –
‘‘‘ஏகோ பஞ்ஹோ ஏகோ உத்³தே³ஸோ ஏகங் வெய்யாகரண’ந்தி, இதி கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? ஏகத⁴ம்மே, ஆவுஸோ, பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமஸ்மிங் ஏகத⁴ம்மே? ஸப்³பே³ ஸத்தா ஆஹாரட்டி²திகா – இமஸ்மிங் கோ², ஆவுஸோ, ஏகத⁴ம்மே பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘ஏகோ பஞ்ஹோ ஏகோ உத்³தே³ஸோ ஏகங் வெய்யாகரணந்தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Eko pañho eko uddeso ekaṃ veyyākaraṇa’nti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Ekadhamme, āvuso, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamasmiṃ ekadhamme? Sabbe sattā āhāraṭṭhitikā – imasmiṃ kho, āvuso, ekadhamme bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Eko pañho eko uddeso ekaṃ veyyākaraṇanti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘த்³வே பஞ்ஹா த்³வே உத்³தே³ஸா த்³வே வெய்யாகரணானீ’தி இதி, கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? த்³வீஸு, ஆவுஸோ, த⁴ம்மேஸு பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமேஸு த்³வீஸு? நாமே ச ரூபே ச…பே॰… கதமேஸு தீஸு? தீஸு வேத³னாஸு – இமேஸு கோ², ஆவுஸோ, தீஸு த⁴ம்மேஸு பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘தயோ பஞ்ஹா தயோ உத்³தே³ஸா தீணி வெய்யாகரணானீ’தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Dve pañhā dve uddesā dve veyyākaraṇānī’ti iti, kho panetaṃ vuttaṃ bhagavatā. Kiñcetaṃ paṭicca vuttaṃ? Dvīsu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu dvīsu? Nāme ca rūpe ca…pe… katamesu tīsu? Tīsu vedanāsu – imesu kho, āvuso, tīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Tayo pañhā tayo uddesā tīṇi veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘சத்தாரோ பஞ்ஹா சத்தாரோ உத்³தே³ஸா சத்தாரி வெய்யாகரணானீ’தி, இதி கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? சதூஸு, ஆவுஸோ, த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமேஸு சதூஸு? சதூஸு ஸதிபட்டா²னேஸு – இமேஸு கோ², ஆவுஸோ, சதூஸு த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘சத்தாரோ பஞ்ஹா சத்தாரோ உத்³தே³ஸா சத்தாரி வெய்யாகரணானீ’தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Cattāro pañhā cattāro uddesā cattāri veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Catūsu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu catūsu? Catūsu satipaṭṭhānesu – imesu kho, āvuso, catūsu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘பஞ்ச பஞ்ஹா பஞ்சுத்³தே³ஸா பஞ்ச வெய்யாகரணானீ’தி, இதி கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? பஞ்சஸு, ஆவுஸோ, த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமேஸு பஞ்சஸு? பஞ்சஸு இந்த்³ரியேஸு…பே॰… கதமேஸு ச²ஸு? ச²ஸு நிஸ்ஸரணீயாஸு தா⁴தூஸு…பே॰… கதமேஸு ஸத்தஸு? ஸத்தஸு பொ³ஜ்ஜ²ங்கே³ஸு…பே॰… கதமேஸு அட்ட²ஸு? அட்ட²ஸு அரியஅட்ட²ங்கி³கமக்³கே³ஸு – இமேஸு கோ², ஆவுஸோ, அட்ட²ஸு த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘அட்ட² பஞ்ஹா அட்டு²த்³தே³ஸா அட்ட² வெய்யாகரணானீ’தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Pañca pañhā pañcuddesā pañca veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Pañcasu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu pañcasu? Pañcasu indriyesu…pe… katamesu chasu? Chasu nissaraṇīyāsu dhātūsu…pe… katamesu sattasu? Sattasu bojjhaṅgesu…pe… katamesu aṭṭhasu? Aṭṭhasu ariyaaṭṭhaṅgikamaggesu – imesu kho, āvuso, aṭṭhasu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Aṭṭha pañhā aṭṭhuddesā aṭṭha veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘நவ பஞ்ஹா நவுத்³தே³ஸா நவ வெய்யாகரணானீ’தி, இதி கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? நவஸு, ஆவுஸோ, த⁴ம்மேஸு பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமேஸு நவஸு? நவஸு ஸத்தாவாஸேஸு – இமேஸு கோ², ஆவுஸோ, நவஸு த⁴ம்மேஸு பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘நவ பஞ்ஹா நவுத்³தே³ஸா நவ வெய்யாகரணானீ’தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Nava pañhā navuddesā nava veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Navasu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu navasu? Navasu sattāvāsesu – imesu kho, āvuso, navasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Nava pañhā navuddesā nava veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘த³ஸ பஞ்ஹா த³ஸுத்³தே³ஸா த³ஸ வெய்யாகரணானீ’தி, இதி கோ² பனேதங் வுத்தங் ப⁴க³வதா. கிஞ்சேதங் படிச்ச வுத்தங்? த³ஸஸு, ஆவுஸோ, த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமேஸு த³ஸஸு? த³ஸஸு குஸலேஸு கம்மபதே²ஸு – இமேஸு கோ², ஆவுஸோ, த³ஸஸு த⁴ம்மேஸு பி⁴க்கு² ஸம்மா ஸுபா⁴விதசித்தோ ஸம்மா பரியந்தத³ஸ்ஸாவீ ஸம்மத³த்த²ங் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. ‘த³ஸ பஞ்ஹா த³ஸுத்³தே³ஸா த³ஸ வெய்யாகரணானீ’தி, இதி யங் தங் வுத்தங் ப⁴க³வதா இத³மேதங் படிச்ச வுத்தங்.
‘‘‘Dasa pañhā dasuddesā dasa veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Dasasu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu dasasu? Dasasu kusalesu kammapathesu – imesu kho, āvuso, dasasu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Dasa pañhā dasuddesā dasa veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘இதி கோ², ஆவுஸோ, யங் தங் வுத்தங் ப⁴க³வதா ஸங்கி²த்தேன பா⁴ஸிதாஸு மஹாபஞ்ஹாஸு – ‘ஏகோ பஞ்ஹோ ஏகோ உத்³தே³ஸோ ஏகங் வெய்யாகரணங்…பே॰… த³ஸ பஞ்ஹா த³ஸுத்³தே³ஸா த³ஸ வெய்யாகரணானீ’தி, இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமி. ஆகங்க²மானா ச பன தும்ஹே, ஆவுஸோ, ப⁴க³வந்தஞ்ஞேவ உபஸங்கமித்வா ஏதமத்த²ங் படிபுச்செ²ய்யாத². யதா² வோ 1 ப⁴க³வா ப்³யாகரோதி ததா² நங் தா⁴ரெய்யாதா²’’தி. ‘‘ஏவங், அய்யே’’தி கோ² கஜங்க³லகா உபாஸகா கஜங்க³லிகாய கோ² பி⁴க்கு²னியா பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா கஜங்க³லிகங் பி⁴க்கு²னிங் அபி⁴வாதெ³த்வா பத³க்கி²ணங் கத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² கஜங்க³லகா உபாஸகா யாவதகோ அஹோஸி கஜங்க³லிகாய பி⁴க்கு²னியா ஸத்³தி⁴ங் கதா²ஸல்லாபோ, தங் ஸப்³ப³ங் ப⁴க³வதோ ஆரோசேஸுங்.
‘‘Iti kho, āvuso, yaṃ taṃ vuttaṃ bhagavatā saṃkhittena bhāsitāsu mahāpañhāsu – ‘eko pañho eko uddeso ekaṃ veyyākaraṇaṃ…pe… dasa pañhā dasuddesā dasa veyyākaraṇānī’ti, imassa kho ahaṃ, āvuso, bhagavatā saṃkhittena bhāsitassa evaṃ vitthārena atthaṃ ājānāmi. Ākaṅkhamānā ca pana tumhe, āvuso, bhagavantaññeva upasaṅkamitvā etamatthaṃ paṭipuccheyyātha. Yathā vo 2 bhagavā byākaroti tathā naṃ dhāreyyāthā’’ti. ‘‘Evaṃ, ayye’’ti kho kajaṅgalakā upāsakā kajaṅgalikāya kho bhikkhuniyā bhāsitaṃ abhinanditvā anumoditvā uṭṭhāyāsanā kajaṅgalikaṃ bhikkhuniṃ abhivādetvā padakkhiṇaṃ katvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho kajaṅgalakā upāsakā yāvatako ahosi kajaṅgalikāya bhikkhuniyā saddhiṃ kathāsallāpo, taṃ sabbaṃ bhagavato ārocesuṃ.
‘‘ஸாது⁴ ஸாது⁴, க³ஹபதயோ! பண்டி³தா, க³ஹபதயோ, கஜங்க³லிகா பி⁴க்கு²னீ. மஹாபஞ்ஞா, க³ஹபதயோ, கஜங்க³லிகா பி⁴க்கு²னீ. மஞ்சேபி தும்ஹே, க³ஹபதயோ, உபஸங்கமித்வா ஏதமத்த²ங் படிபுச்செ²ய்யாத², அஹம்பி சேதங் ஏவமேவங் 3 ப்³யாகரெய்யங் யதா² தங் கஜங்க³லிகாய பி⁴க்கு²னியா ப்³யாகதங். ஏஸோ சேவ தஸ்ஸ 4 அத்தோ². ஏவஞ்ச நங் தா⁴ரெய்யாதா²’’தி. அட்ட²மங்.
‘‘Sādhu sādhu, gahapatayo! Paṇḍitā, gahapatayo, kajaṅgalikā bhikkhunī. Mahāpaññā, gahapatayo, kajaṅgalikā bhikkhunī. Mañcepi tumhe, gahapatayo, upasaṅkamitvā etamatthaṃ paṭipuccheyyātha, ahampi cetaṃ evamevaṃ 5 byākareyyaṃ yathā taṃ kajaṅgalikāya bhikkhuniyā byākataṃ. Eso ceva tassa 6 attho. Evañca naṃ dhāreyyāthā’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. து³தியமஹாபஞ்ஹஸுத்தவண்ணனா • 8. Dutiyamahāpañhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. து³தியமஹாபஞ்ஹஸுத்தாதி³வண்ணனா • 8-9. Dutiyamahāpañhasuttādivaṇṇanā
