| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૭. દુતિયમિત્તામચ્ચસુત્તં
7. Dutiyamittāmaccasuttaṃ
૧૦૧૩. ‘‘યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે, ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા. કતમેસુ ચતૂસુ? બુદ્ધે અવેચ્ચપ્પસાદે સમાદપેતબ્બા, નિવેસેતબ્બા, પતિટ્ઠાપેતબ્બા – ઇતિપિ સો ભગવા…પે॰… સત્થા દેવમનુસ્સાનં બુદ્ધો ભગવા’’તિ.
1013. ‘‘Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave, catūsu sotāpattiyaṅgesu samādapetabbā, nivesetabbā, patiṭṭhāpetabbā. Katamesu catūsu? Buddhe aveccappasāde samādapetabbā, nivesetabbā, patiṭṭhāpetabbā – itipi so bhagavā…pe… satthā devamanussānaṃ buddho bhagavā’’ti.
‘‘સિયા, ભિક્ખવે, ચતુન્નં મહાભૂતાનં અઞ્ઞથત્તં – પથવીધાતુયા, આપોધાતુયા, તેજોધાતુયા, વાયોધાતુયા – ન ત્વેવ બુદ્ધે અવેચ્ચપ્પસાદેન સમન્નાગતસ્સ અરિયસાવકસ્સ સિયા અઞ્ઞથત્તં. તત્રિદં અઞ્ઞથત્તં – સો વત બુદ્ધે અવેચ્ચપ્પસાદેન સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતી’’તિ – નેતં ઠાનં વિજ્જતિ. ‘‘ધમ્મે…પે॰… સઙ્ઘે…પે॰… અરિયકન્તેસુ સીલેસુ સમાદપેતબ્બા, નિવેસેતબ્બા, પતિટ્ઠાપેતબ્બા અખણ્ડેસુ…પે॰… સમાધિસંવત્તનિકેસુ. સિયા, ભિક્ખવે, ચતુન્નં મહાભૂતાનં અઞ્ઞથત્તં – પથવીધાતુયા, આપોધાતુયા, તેજોધાતુયા, વાયોધાતુયા – ન ત્વેવ અરિયકન્તેહિ સીલેહિ સમન્નાગતસ્સ અરિયસાવકસ્સ સિયા અઞ્ઞથત્તં. તત્રિદં અઞ્ઞથત્તં – સો વત અરિયકન્તેહિ સીલેહિ સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતીતિ – નેતં ઠાનં વિજ્જતિ. યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે , ઇમેસુ ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા’’તિ. સત્તમં.
‘‘Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva buddhe aveccappasādena samannāgatassa ariyasāvakassa siyā aññathattaṃ. Tatridaṃ aññathattaṃ – so vata buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatī’’ti – netaṃ ṭhānaṃ vijjati. ‘‘Dhamme…pe… saṅghe…pe… ariyakantesu sīlesu samādapetabbā, nivesetabbā, patiṭṭhāpetabbā akhaṇḍesu…pe… samādhisaṃvattanikesu. Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva ariyakantehi sīlehi samannāgatassa ariyasāvakassa siyā aññathattaṃ. Tatridaṃ aññathattaṃ – so vata ariyakantehi sīlehi samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti – netaṃ ṭhānaṃ vijjati. Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave , imesu catūsu sotāpattiyaṅgesu samādapetabbā, nivesetabbā, patiṭṭhāpetabbā’’ti. Sattamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૭. દુતિયમિત્તામચ્ચસુત્તવણ્ણના • 7. Dutiyamittāmaccasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૭. દુતિયમિત્તામચ્ચસુત્તવણ્ણના • 7. Dutiyamittāmaccasuttavaṇṇanā
